Mark 1

Lugbara (E’yo Siza Alatararu Munguniri BIBLIA)

Jump to: Chapter 2 →

1E’yo bari Yesu Kristo Mungu Mvini ma e’dozani.

2Yini sile nabi Isaya ma alia ’borile, kini, Mi ndre, ma ojio mani ma ti pe mi drilia, eri nga geri mini ede;

3o’duko ’ba e’yo oyupi roko driarini, kini: Emi ede geri Opini ngonde, emi ofa leti erini ’diyi kililiru-

4Yohana, ’ba baputizi fepi angu roko driari emu ra, olu baputizi asi ojazani e’yo onzi wuzu aniri ma e’yo.

5’Ba angu Yahudinia ’diyi pi dria, ’ba dria Yerusalemua ’diyi be, nga efu eri vu; eri nga baputizi fe yi dri yi ara Yoridania, yini e’yo onzi yini e’daria.

6Yohana su ndra i ruaa gamia ma ’biko cale bongoruri, eri ma opilia enyi kafaru indi, Eri adri ombi pi nya anyusu aseari be.

7Eri olu e’yo, kini, ’Ba azini ovupi okpo be ma agapi rari nga emu ma vutia, ma funi dri ani avuzu enyi eri ma paari ma baka ayuzaru ku.

8Ma fe mani baputizi emi dri yisi; te eri nga baputizi fe emi dri Orindi Alatararusi.

9Eri nga ovu ’dini o’du ’dayisi; Yesu nga efu Nazareti Galiliniriasi, Yohana fe baputizi eri dri Yoridani ma alia.

10Coti erini efuria yia, eri ndre ’bu asi i mgboru, azini ’Orindi Alatararu esi ri i ma dria kile la’balaule;

11o’duko enga ’bua, kini, Mi Mvi mani lele turi’i, mi ayiko fe ma dri tu.

12Coti Orindi nga eri dro angu roko driaria.

13Eri ovu roko dria ’dale o’du kali su, obezaru Satani dri; eri ovu anyapa asea ’diyi be; malaika nga azi nga eri dri.

14De yini Yohanani ’baria aruru ’boria, Yesu nga emu Galilia, e’yo bari Munguni oluzu kini,

15Ewu eca ’bo, suru lunguniri ovu va ogogo; emi oja emi asi, emi a’i e’yo bari’i.

16Erini agaria miri Galilini ma tiarisi, eri nga Simonini ndre, azini Simoni ma adripi Andarea’i, yini emba ’beria miri ma alia; te yi ovu ’ba e’bi okupi ’diyi.

17Yesu nga ’yo yi tia kini, Emi bi ma vuti, ma nga emi ’ba ovuzu ’ba ’ba okupi, ’diyiru.

18Yi nga emba yini ku coti, nga mu eri vutisi.

19Eri kai mu drile were, eri ndre Yakobo Zebedayo mvi pi adripi erini Yohana, be; yi ovu o’bo ma alia emba yini ederia.

20Eri nga yi omve coti; yi nga yi ati Zebedayoni ku o’bo alia ’ba azi ngapi oyasi ’diyi be ra, yi nga mu vutinia.

21Yi nga fi Kaperinaumua; sabatosi coti eri nga fi pari ’bani yi okuzuria, nga ’ba imba.

22Yi nga osu tu eri ma imbatasi, a’disiku eri imba yi ’ba ’ba ayupi okposirile, te ekile karanini adrile imbalerile ku.

23’Ba azini indi, pari yini yi okuzuria, orindi onzi be eri ma alia; eri nga oyu uru coti

24kini, E’yo amani mi be ngoni ya? Mi Yesu Nazaretiari, mi di emu ama dri ja ya? Ma ni mi ra, mi ’Ba Alatararu Munguniri’i

25Yesu nga ega dri-nia, kini, Mi adri ciri, mi efu eri ma aliasi!

26Orindi onzini eri rua aseria, oyuria o’duko urusi, eri nga efu eri ma aliasi ra.

27Yi dria nga osu tu, yi nga ani e’yo zi yi agyi tia kini, ’Di a’di ya? ’Di imbata o’dini fo! Ka tro orindi onzini ti, eri nga yi ayu okposi, te yi eri e’yo erini ra.

28Ru erini nga ku wakaka coti, kpere angu Galilini ma ageiasi dria.

29Yi ka fu pari ’bani yi okuzuriasi amve, yi mu perepere fi jo Simoni pini Andarea beri ma alia, Yakobo pie Yohana be.

30Simoni vile oku ma andri la rua driza be valesi; yi nga perepere e’yo erini olu tinia.

31Eri nga mu vunia, nga drini bi, nga eri enga urulesi; rua driza erini nga ati ra, eri nga azi nga yi dri.

32Ondresi, etu ka ’de ’bo, yi nga ’ba dria azo be ’diyi eji vunia, ’ba orindi onzi be ’diyi be dria.

33’Ba aku ndea ’diyi oku yi dria tualu jotilia.

34Eri nga ’ba rua azoru azo ndu be ’diyi ati kakau, eri nga orindi onzi ofu karakarau indi; te eri a’ini orindi onzini e’yo ’yozu ku, yini eri nilerisi,

35O’bitisi de angu atiza ace ambo indi, eri nga enga uru, fu amve, mu angu roko driaria, eri nga a’i Mungu tia ’dale.

36Simoni pi,mu eri ma vunia ’ba ovupi eri be ’diyi be;

37yi nga eri isu ra, nga ’yo tinia kini, ’Ba dria yi mi ndru.

38Eri ’yo yi tia kini, Ama mu angu,andinia aku azini ma alia, ma ma ’lolu e’yo ’dale indi ani; te ma efu bani e’yo ’disi.

39Eri nga fi pari ’bani yi okuzuria angu Galilini ma alesi dria e’yo oluzu, orindi onzi odrozu indi.

40’Ba alu ofu beri nga emu vunia matu ’bazu vunia, kumuti osizu vunia, nga ’yo tinia kini, Mi ka le ra, eco mini ma rua ’bazaru alaru.

41Asi erini nga ndri ndri, eri nga i dri eju, nga ruani elo, nga ’yo tinia kini, Ma le ra; mi rua ma ovu di ’alaru.

42Coti ofu nga eri rua ku ra, eri nga ovu alaru ani.

43Eri nga eri azi okposi, eri nga eri ti pe coti, kini,

44Mi ndre onyiru mi ma ’yo e’yo ’diri ’ba azini ma tia ku fo! Te mi mu mi rua ece kuhani dri, mi ji eri vu, mi rua ’bale alaruri ma e’yosi, afa feza ndra Musani azileri, e’yo eti nzezu yi dri.

45Te eri ka fu ra, eri ’ba e’yo olu wakaka, e’yonini kuzu saaru; econi ani Yesuni fizaru aku alesi mgboru ku, te eri ovu amvesi angu roko dria. ’Ba nga efu vunia angu drisi dria ’diyisi, Amena,

Jump to: Chapter 2 →

Recommended Reading

Commentary Mark Commentaries → Devotional Mark Devotional Guide → Get This Bible Lugbara (E’yo Siza Alatararu Munguniri BIBLIA) Study Bible →