Mark 16

Lugbara (E’yo Siza Alatararu Munguniri BIBLIA)

← Chapter 15 Jump to:

1Sabato ka aga ’bo, Mariamu Magadaleni pi, Mariamu Yakobo ma andriruri pie, Salome be, yi nga ajinguru arikariru je, yi ma mu eri rua efi ani.

2O’biti drio drio, o’du sabatoni okorisi, yi nga mu gule tia etuni efuria.

3Yi ri te e’yo ’yo yi eselia kini, A’dini nga era gu gule tiliarisini ya?

4Te yini mile engaria, yi ndre de gu era ’bo; te eri era amboro tu.

5Yini firia gule alia ’bo, yi nga ’ba karilauru ndre erini riria kala dri ndiria, de bongo emveru izuro eri ruaa judi; yi nga osu tu.

6Eri nga ’yo yi tia kini, Emi osu ku; emi Yesu Nazaretiarini ndru, ndra yini dile pati ruaari’i. Eri enga ’bo, eri ’doa yo; emi ndre pari ndra yini eri ’bazuri do.

7Te emi mu e’yo olu ’ba erini imbale ’diyi ma tia, Petero tia indi, kini, eri mu emi drilia Galilia; emi nga eri ndre ’dale, ndra ’erini ’yale emi tiarile.

8Yi nga fu amve, nga apa gule tiarisi apa apa; yi ruari oya oya asi osuza be tu; ’yoni e’yo ’ba azini be ku, urini yi bilerisi,

9Eri ka enga ’bo, o’du alu sabatonirisi o’biti drio drio, eri nga li rua ece oko Mariamu Magadaleni idri, ndra erini orindi onzi odrozu ’eri ma alia aziriri’i.

10Oku nderi inga mu e’yo olu ’ba ndra ovupi eri be ’diyi ma tia, yini otaria candisi awu be.

11’Ba nde ka eri kini eri idriru, azini eri ece di i rua oku nde dri ’bo, yi a’ini ku.

12Vilerisi eri nga i rua ece wura andinisi ’ba iri yi ma eselia ’diyi dri, yini aciria geria, muna aseari.

13’Ba nde ’diyi nga fu mu e’yo olu ’ba acepi ’diyi ma tia, te yi a’ini vini ’ba ’diyi ku indi.

14Vilerisi eri nga i rua ece ’ba mudri drini alu ’diyi dri yini riria nyaka nyaria; eri nga ega yi dria a’itaako yini pisi asi mbaza yini be, yini ’ba eri ndrepi de erini engaria ’boria ’diyi ma e’yo a’ile kurisi.

15Eri nga ’yo yi tia kini, Emi mu angu wudrikuru drisi dria, emi olu e’yo bari ’ba Munguni ’bale ’diyi ma tia dria,

16A’ipi baputizi bipiri nga i pa ra; te a’ipi kuri, e’yo lizani nga eri nde ra.

17Eceta ’diyi nga ovu ’ba e’yo a’ipi ’diyi be: yi nga orindi onzi odro ma rusi; yi nga e’yo ’yo ti o’dirusi;

18yi nga uri ’du; yi ka afa draru mvu ra, eri ngani yi ’ye onzi ku; yi nga dri oti ’ba azo be ’diyi ma ruaa, yi rua nga ati ra.

19Opi Yesu ka e’yo ’diyi ’yo yi,tia ’bo, nga ini ovu ’duzaru uru ’bua, inga ri va Mungu ma dri ndiria.

20Te yi’ini, nga fu e’yo olu pari dri dria, de Opi ri azi ’ye yi be tualu, okpo fezu e’yo nde dri eceta ovupi yi be indi ’diyisi. Amena.

← Chapter 15 Jump to: