Mark 12

Lugbara (E’yo Siza Alatararu Munguniri BIBLIA)

← Chapter 11 Jump to: Chapter 13 →

1Eri ’ba e’yo ’yo yi ria e’yo o’bezasi, ’Ba alu isi ndra zabibu pari nga alia, eri nga kali to ageinia ci, eri nga ’bile ga efini ma su nzizu, eri nga moro si ageini tezu; eri nga nga nde ku ’ba ageini tepi ’diyi dri, nga di ini mu angu azinia.

2Ewuni ecaria eri nga ati’bo ma ti pe ’ba amvu agei tepi ’diyi vu, eri ma a’i zabibu ma efi ’ba ageini tepi ’diyi dri.

3Te yi nga eri bi ci, nga eri co ra, nga eri ti pe dri be pirini.

4Eri nga ati’bo azini ma ti pe yi vu dika; yi nga eri gba dria, yi nga eri dri drinza fe ambo.

5Eri nga azini ma ri pe, te yi ’di agu nderi ra,

6Ace di erini ’ba alu, mvi erini leleri’i; vilerisi eri nga eri ti pe yi vu, kini, Yi nga mvi mani inzi ra,

7Te ’ba amvu agei tepi nde ’diyi nga e’yo ’yo yi eselia kini, ’Di ’ba ngapi angu nyapiri’i; emi emu, ama fu eri ra, angu nyazani nga mvi amaniri ani.

8Yi nga eri bi, nga eri fu kai, ’be amvu zabibuni ma aliasi amve.

9Opi amvu zabibuni ma e’ini nga di a’di ’ye ya? Eri nga emu ’ba amvu agei tepi ’diyi ma dri ja ra, eri nga amvu zabibuni fe ’ba azini dri.

10Emi lani ndra e’yo siza ’diri ku ya? kini: Oni ’ba jo sipi ’diyini gale siri, oni ’diri ofu ovuzu jo kalati ma oni driruri’i;

11oni driru nde ’diri enga Opi vu, eri ovu ama milia e’yo osutaruni.

12Yi ’ba geri ndru eri bizu, te yi ovu ’ba ongulumurusi urisi, a’disiku yi va ra eri ’yo e’yo o’beza ’diri yi ma e’yosi; yi nga eri ku ra, nga mu ra,

13Yi nga ’ba Farisaini piyi ma azi ti pe ’ba Herodeni ma azi be vunia, eri mbazu e’yo erini ’yolerisi.

14Yi ka eca ’bo, yi nga ’yo tinia kini,’Ba ’ba Imbapiri, ama ni ra mi ’ba adani, mi asini ’ba aluni ma e’yosi ku; a’disiku mi openi ’ba e’daza yi ma ruanisi ku, te mi ’ba imba geri Mungunisi adaru. Azita a’i ’bani musoro fezu Kaisari dri ra, kani ku ya?

15Ama fe ra, kani ama fe ku? Te erini lokiri yini varia, nga ’yo yi tia kini, Emi ma o’bi ’dini a’disi ya? Emi eji nga ma dri silingi, ma ma ndre ani.

16Yi eji ra. Eri ’yo yi tia kini, Wura ruania, e’yo sile drinia ’diri be, eri a’dini ya? Yi ’yo tinia, Kaisarini,

17Yesu nga ’yo yi tia kini, Afa Kaisarini emi ofe Kaisari dri, te afa Munguni Mungu dri. Yi osu tu eri ma e’yosi.

18’Ba Sadukayoni nga emu vunia, ’ba adripi ’yopi engata yo ’diyi; yi nga zi tinia kini,

19’Ba ’ba Imbapiri, Musa si ndra ama dri kini agu ma adripi ka dra ra, ka oku ku mva kokoru, adripi erini ma omvi, oku ndeni, ma oti anzi drinia adripi ma ori idrizu.

20Ndra adripi aziri indi; okori nga oku bi ra, dra ra, kuni ori ku;

21iriri nga eri omvi ra, nga dra ra ori kokoru; nari nga ’ye ’dinile indi;

22yi aziri dria kuru ori ku. Yi vutia dria oku nga dra indi,

23Etu engatani ma alia, eri nga ovu oku a’dini ya? ’Ba aziri ’diyini eri bile okururisi.

24Yesu nga ’yo yi tia kini, E’yo emini abazuri eri bani ’di’i ku ya? emini e’yo siza pi nile okpo Munguni be kurisi.

25’Bani engazu ’ba draza eseliarisi yi ngani oku je ’de ku, muni agupia ku indi, te yi nga ovu malaika ’bua ’diyile.

26’Ba draza ma e’yo, yini engazu rari, emi lani ndra buku Musani, esele pati jereruri ma e’yo ecezuri ma alia, e’yo Munguni ’yole eri tia kini, Ma Mungu Iburahimuni, ma Mungu Isakani, ma Mungu Yakoboni-ri ku ya?

27Eri Mungu ’ba draza ’diyini yo, te ’ba idriru ’diyini; emi aba tu.

28’Ba karanini ma azi alu nga emu ra, ka eri yini e’yo oziria ’bo, ka ni ra eri e’yo omvi yi tia ’yeke, eri nga zi tinia kini, Azita dria ma eselia, ngori ’okonini ya?

29Yesu nga omvi tinia kini, Okori ’di’i, Mi eri, Israeli la: Opi Mungu amani, Opini alu;

30azini mi nga Opi Mungu mini le mi asi driasi, mi idri driasi, mi asisile driasi, mi okpo driasi.!

31Iriri ’di’i, Mi nga mi agyi le mi; ngulupile. Azita azini ’diyi agapini yo.

32Karani nga ’yo tinia, ’Yeke, ’Ba ’ba Imbapiri; mi ’yo e’yo adaru kini eri ovu alu, andini yo lu eri’i;

33eri lezu asi driasi, e’yo vaza driasi, okpo driasi, azini aguni i agyi lezu i ngulupile, ’diri aga afa dria vele pi Mungu dri ’diyi pi edeta be ra.

34Yesu ka ndre ra eri omvi e’yo onduaru, eri ’yo tinia kini, Mi ovuni suru Munguni be re ku. Vutinia ’ba azini ma asi mbani e’yo zizu eri tia dika ku.

35Yesu nga e’yo omvi, erini ’ba imbaria hekalua, eri nga ’yo kini, Karani ’yo kini Kristo eri mvi Daudini ngoni ya?

36Daudi ma ngulupi ’yo Orindi Alatararusi, kini, Opi ’yo Opi mani ma tia, Mi ri ma dri ndiria, de nga ma ’bani ari’ba mini mi pa agelea ku.

37Daudi ma ngulupi omve eri Opi, ’dini; eri di ovu mvi eriniru ngoni ya? ’Ba ongulumuru kakau nga e’yo erini eri ayikosi.

38Erini ’ba imbaria, eri ’yo ra kini, Emi ma ovu mile be karani piyisi, lepi acipi bongo suza izuru be, zita lepi cuua,

39kiti dridrileru lepi pari ’bani yi okuzuria, azini pari dridrileru lepi omua ’diyi;

40yi di awuzi ma aku nya pirini, yi Mungu zi izuru yi ma e’da benisi. ’Ba ’diyi nga e’yo liza amboru agapiri isu yi ruaa.

41Yesu nga ri va sanduku sente yizu aleniari be otizaru, eri nga ri ’ba o’biru ni, yini sente yiria sanduku alia. ’Ba afa e’iru kakau nga sente yi alenia kakau,

42Awuzi alu alioru nga emu ra, eri nga sente nyiri nyiri yi iri, yi ecipi afa amboru aluri.

43Eri nga ’ba erini imbale ’diyi omve i vu, eri nga ’yo yi ria kini, Ma ’yo emi tia ndi ndi, awuzio alioru ’diri yi afa kakau aga ’ba afa yipi sanduku alia ’diyi dria ra,

44Te yi dria yi yini afa acepi yi dri tu ’diyi ma azi, te eri’i, alio erini ma alia, eri yi afa erini ovuzu yi be ’diyi dria, ada afa erini adrizuri dria.

← Chapter 11 Jump to: Chapter 13 →