Mark 6

Lugbara (E’yo Siza Alatararu Munguniri BIBLIA)

← Chapter 5 Jump to: Chapter 7 →

1Eri nga fu ’dasi, nga mu i vile angua; ’ba erini imbale ’diyi nga mu eri vutia.

2Etu sabatoni ka eca ra, eri ’ba ’ba imba pari ’bani yi okuzuria; ’ba kakau yi osu osu ambo yini e’yo erini eriria, yi ’yo ra kini, Agu ’diri isu e’yo ’diyi ngoa ya? Fe ’ba ’diri dri a’du onduani ya? Tali eri ma drini ’yele ’dini ’diyi ngoni ya?

3’Di ’ba bau edepiri, Mariamu mvi, adripi Yakobo pini Yose pie Yudasi pie Simoni pieri’i ku ya? Amvipi erini yi ovuni ’doa ama be ku ya? Yi nga aba eri ma e’yosi.

4Yesu nga ’yo yi tia kini, Nabi ma ru ovuni inzikokoru ku, pe lu angu yinia, ori’ba yini ’diyi ma eselia, aku yiniria a’dule.

5Econi erini tali ’yezaru ’dale ku, pe alu eri ti dri ’ba azoru were ma ruaa yi atizu’i.

6Eri osu osu a’itaako yinisi. Eri nga aci aku ma eselesi kuru, ’ba imbazu.

7Eri nga ’ba mudri drini iri ’diyi omve i vu, eri ’ba yi ti pe iri iri, eri nga okpo fe yi dri orindi onzi agazu.

8Eri azi yi ra kini yi ma ’du afa yini acizu yi be geriari ku, te kali yini a’dule; ma ’du nyaka ku, ma ’du jurua ku, ma ’du sente yi oporoa ku indi;

9te ma su enyiriko paari, ma su koti yi ruaa iri ku.

10Eri ’yo yi tia kini, Pari emini fizu jo aliaria, emi ma ovu ’dale de nga emi funi angu ’dasi ku.

11Te angu azini ka nga emi a’i ku, ka nga e’yo emini eri ku, emini furia ’dasi emi oya irifura emi pa ageleari va yi milia, e’yo etiru yi dri.

12Yi nga efu e’yo olu, kini ’ba ma oja yi asi.

13Yi nga orindi onzi dro karakarau, yi nga odu ini ’ba azo be ’diyi ma dria karakarau, nga yi ati ani.

14Te opi amboru Herode nga e’yoni eri ra, runirini kulerisi. Eri nga ’yo ani kini, Yohana baputizi fepiri enga ’ba draza eselia ’bo; ’dini tali ’diyi nga yi ’ye eri dri ani.

15’Ba azini ’yo ra kini, ’Di Eliya’i. ’Ba azini kini, Nabi azini’i, kani ’ba nabiru ’diyi ma azini yani.

16Te Herode eri ka e’yo ’di eri ra, eri ’yo ra kini, ’Di Yohana ’ba mani drini lile vari’i, eri enga di ’bo.

17A’disiku Herode ma ngulupi pe ndra ’ba ti Yohanani bi, ombe, ’ba jo arunia, Herodiasi eri ma adripi Filipo ma oku ndra erini ’dule i ma lokururisi.

18Te Yohana ’yo ndra Herode tia kini, Azita a’ini mini mi adripi ma oku ’duzu ku.

19Herodiasi ’ba asi onzi eri vu ani, le eri fu ra. Te econi erini ku,

20a’disiku Herode ovu Yohanasi urisi ambo, erini nile kini eri ’ba onyi beni, ’ba alatararunirisi; eri nga eri ta mba ani. Eri ka e’yo erini eri ra, eri asi oti tu; te eri eri e’yo erini ayikosi.

21O’du onyi beri ka eca ra, Herode nga omu o’du erini osizurini ’ba ’wara erini ’diyi pi dri ’ba asikari ma drilia ’diyi pie, ’ba amboru Galilia ’diyi be dria.

22Zamva Herodiasini nga fi ongo tu yi milia, eri fe Herode ma asia ayiko ambo, ’ba ripi nyaka tia eri be ’diyi pie dria; opi nga ’yo zamva nderi ma tia kini, Mi zi ma tia afa mini leleri, te ma nga fe mi dri ra.

23Eri nga oyo so eri dri kini, Ma ngoni ngori mini zile ma tiari, ma nga fe mi dri ra, kani opi nyaza mani ma woko aluri pi ti.

24Eri nga fu e’yo zi andri ma tia kini, Ma nga di a’du afa a’i’i ya? Eri ’yo ra, Yohana ’ba baputizi fepiri ma dri’i.

25Eri nga fi coti opi vu ongusi, nga zi tinia kini, Ma le cucuru’do mi fe ma dri koyia alia Yohana ’ba baputizi fepiri ma dri’i.

26Opi nga ani ovu candisi ambo; te oyo erini solerisi, azini ’ba ripi eri be ’diyi ma e’yosi, eri leni zamva ndezu ku,

27Te coti opi nga asikari i agei tepiri ma ti pe alu, eri azi tinia drini ejizu, Eri nga mu drini li va jo arunia,

28nga drini eji koyia alia, nga eri fe zamva dri; zamva nga ji fe i andri dri.

29’Ba erini imbale ’diyi ka eri ra, yi nga emu avuni ’du ji sa ’bilea,

30’Ba ti opele ’diyi nga yi oku tualu Yesu vu, yi nga e’yo dria yini, ’yeleri olu, e’yo yini imbaleri pie dria.

31Eri nga ’yo yi tia kini,i Emi emu kalaa angu didia, emi a’dule, emi li ava were, A’disiku ’ba karakarau yi emu emu, yi mvi, yi isuni ani pari nyaka nyazu ku.

32Yi nga mu oguru alia angu didia, yi’i a’dule.

33Te ’ba ndre yini muria, azini ’ba karakarau nga yi ni ra, nga nzu tualu ’dale pasi engazu aku dria ma alia, nga ca yini oko.

34Erini furia eri nga ’ba ongulumuru ndre ra, eri asini nga ndri ndri yi vu, yini ovule kabilo ’ba yi ocepiri kokoru ’dinilerisi; eri ’ba yi imba e’yo kakausi.

35Te etu ka curu’do ’ba ’de ’bo, ’ba erini imbale ’diyi nga emu vunia, nga ’yo tinia kini, Angu ’doari angu didini, etuni curu’do ’ye ’de ’di;

36mi pe yi ti mvizu, yi ma mu angu ama ageia ’doa aku eselesi nyaka jezu yi dri.

37Eri nga e’yo omvi yi tia kini, Emi fe yi dri nyaka nya emi’i. Yi nga ’yo tinia kini, Ama di mu mikate je silingi turu irisi fezu yi dri nyazu ra ya?

38Eri ’yo yi tia kini, Mikate emi dri si ya? Emi mu ndre. Yi ka ni ’bo, yi ’yo ra kini, Towi, azini e’bi iri.

39Eri azi yi, ria, kini ’ba ma ri va dria irindi dria eselesi eselesi.

40Yi nga di ri va nguluru nguluru, azini turu turu, azini kali towi kali towi.

41Eri nga mikate towi nde ’du ra e’bi iri ’diyi be, eri nga angu lu ’bua uru, eri ka asi ndriza a’i drinia ’bo, eri nga mikate ma ale ati, nga fe ’ba erini imbale ’diyi dri, yi ma asa eri ’ba nde ma palaa; e’bi nde iri ’diyi eri nga awa yi dri dria indi.

42Yi dria nga nya, nga tra ra.

43Yi nga mikate awaleri ma jolokoni o’du evu alia tre tre mudri drini iri, azini e’bi ma joloko be indi.

44’Ba mikate nde nyapi ’diyi ma kalafe, agupiru ’di yi alifu towi.

45Te coti eri nga ’ba erini imbale ’diyi omi fizu oguru alia zozu i drilia ’aa’dasi Betesaidaa, erini de ’ba ongulumuru ereria,

46Eri ka ’ba ku ’bo, eri nga mu oni dria Mungu a’izu.

47Ka eca ondresi, oguru ovu miri ma alia agadua, te eri’i ovu nyaku dria amve a’dule.

48Eri ka ndre yini yi ecandiria yi pezu, olini yi omvile vilerisi, eri nga emu yi vu inisi anguni ’baria atiria, acizu yi dria pasi. Eri ’ye yi aga aga,

49te yi’i yi ka eri ndre ra erini aciria yi dria pasi, yi ega ’di orindini, yi nga oyu uru ani;

50te yi dria ndre eri ra, yi ovu ani urisi ambo. Eri nga e’yo ’yo yi be coti, nga ’yo yi tia kini, Emi asi ma oti ku, ’do ma’i; emi ovu urisi ku.

51Eri nga tu fi yi vu oguru alia, oli nga ku ani lizu ja; yi nga ani osu osu ambo;

52yini e’yo mikateni vale kurisi, te yi ma asini ovule mbazarurisi.

53Yi ka zo ’aa’dasi ’bo, yi nga eca yi kutia Genesaretia, yi nga oguru a’di yi tia.

54Yi ka efu oguru alia ’bo, coti ’ba nde nga eri ni ra,

55yi nga nzu angu ageiasi dria, nga ’ba ’ba azo be ’diyi oli tiko dria, yi ka pari erini ovuzuri ma e’yo eri ra.

56Angu erini fizuria dria, aku were pie, aku amboru pie, angu amveri pie dria, yi nga ’ba azo be ’diyi ola dria cuua, nga a’i tinia eri ma ku yi ma elo kani bongo erini ma ti a’dule; ’ba dria eri elopi ’diyi ma rua ati ra.

← Chapter 5 Jump to: Chapter 7 →