Nehemiah 4

Lugbara (E’yo Siza Alatararu Munguniri BIBLIA)

← Chapter 3 Jump to: Chapter 5 →

1Te eri nga eca ’dini, Sanibalati ka eri kini ama e’do abi kaliru si, eri ovu aokosi tu, adra be tu, eri inza ’ba Yahudini ma dri.

2Eri nga ’yo adripi erini ’diyi pi ma drilia, asikari ongulumuru Samariaa ’diyi be kini, ’Ba Yahudini adaza ’diyi a’di ’ye ya? Le yi ageia kali to okporu ya? Le edeta ede ya? Yi nga e’yo de dria vu alu ya? Le oni vele acisi ’bo ’diyi ’bazu idriru okurunya drole nguluru nguluru ’diyi ma eseliasi ya?

3De Tobia ’ba Amoniari ovu eri be, eri ’yo ra, Afa yini sileri-obalako ka tu drinia, eri nga abi kaliru yini sile onisi nderi asu va ra!

4Mi eri ama fo, Mungu amani la, yini ama edelerisi; mi ma omvi a’daa yini yi ma ngulupi ma dria, mi fe ma opa afa yini angu yini ovuzu ati’baruria.

5Mi ma a’bu e’yo onzi yini ku, mi ini e’yo onzi yini mi ma miliasi ku indi; yini mi asi engale aokoru ’ba abi sipi ’diyi ma driliarisi.

6’Dini ama si ubi kaliru nderi ra; abi kaliru nde eci i tualu, sizaru uru cazu kpere coza erini ma agaduaria. A’disiku ’bani asi ’bazu azi ’yezurisi.

7Te eri nga eca ’dini, Sanibalati pi Tobia pie, ’ba Arabua ’diyi pie, ’ba Amonia ’diyi pie, ’ba Asidodia, ’diyi pie, ka eri kini azi abi kaliru Yerusalemuari sizuri ’ba aci onyiru ’bo, azini kini ’ba e’do pari yi asupi va ’diyi edezu dika ’bo, aoko nya yi tu;

8te yi dria nga e’yo otu yi asia emuzu a’di ’dizu Yerusalemu be, e’yo aleniari osazu.

9Te ama’i, ama zi Mungu amaniri vu, ama ’ba ’ba angu agei tepi etu vusi ini vusi ’diyi ci, yi ma e’yosi.

10Te Yuda ’yo ra, ’Ba teri ejipi ’diyi ma okpo de i curu’do ’bo, azini okurunya ovu tu,’dini ama econi abi kaliru edezaru ku.

11Ari’ba amani kini, Yi ngani ni kani ndre ku, cazu kpere amani cazu yi ma eselia yi ofuzu, fezu azi ndeni asizu.

12Eri nga eca ’dini, ’ba Yahudini ovupi yi ma ageia ’diyi ka emu ra, yi ’yo ama tia pale mudri kini, Engazu pari dria emini muzuria, yi nga emu ama dri aru.

13E’yo ’disi ma ’ba ’ba pari eleru abi vutia, pari mboru ’diyia, ori’ba vusi ori’ba vusi, sei be yi dria, aju pie, osu pie.

14Te ma lu, ma enga uru, ma ’yo ’ba opiru ’diyi pi ma tia, ’ba ’ba dri cepi ’diyi pie, ’ba;azi ’diyi pie, Emi ru yi ku. Emi ega Yehova ovupi ambo uriuriruri, emi ma ’di ani a’di emi adripi ma e’yosi, emi anzipi pie, emi ezopi pie, emi okupi pie, jo emini pie.

15Eri eca ’dini, ari’ba amani ka eri kini ama ni e’yo nderi ’bo, azini Mungu oja e’yo yini amaleri toko ’bo, ama nga emvi dria abi kaliru vu dika, ama dria alu alu azi amani vusi.

16Eri nga eca ’dini, engazu etu ’dasi ati’ba mani ’diyi ma esele aluri nga azi nde nga, te esele aziniri nga aju ’du gombere pie, osu pie, afa suza ayaru ombaniri pie; te ’ba ’ba dri cepi ’diyi yi adri pa so ’ba Yudani ’diyi ma vutia.

17’Ba abi kaliru sipi ’diyi azini ’ba afa jipi ’diyi nga afa ’du yi ngulupi ma drisi yi’i, yi dria alu alu nga azi nga dri alusi, te dri azinisi nga afa ombani bi ci.

18Azini ’ba sipi ’diyi dria yi su sei yini yi ma opilia ci, yi nga abi kaliru si ’dini. Te ’ba guka vupiri ovu ma ageia.

19Ma nga di ’yo ’ba opiru ’diyi ma tia, ’ba ’ba dri cepi ’diyi pie, ’ba azini ’diyi pie, kini, Azi ’diri eri amboru tu azini walaru, azini ama ere ama tu abi kaliru dria, ’ba alu pi ma esele agyi be eri re re.

20Pari ngoni ngori emini ngaria guka eriria, emi etru emi ama vu. Mungu amaniri nga a’di ’di ama dri.

21’Dini ama nga azi’i, azini ’ba, ’diyi ma esele aluri bi aju engazu etuni efuria cazu ’bi’bioni e’daria.

22Etu ndesi ma ’yo vini ’ba nde ’diyi tia kini, ’Ba dria alu alu ati’bo yini be ma la Yerusalemua, ’dini yi ma te ama agei inisi ani, ma nga azi etusi beni.

23’Dinile ma’i, adripi mani ’diyi pie, ati’ba mani pie, ’ba ’ba agei tepi ma vuti bipi ’diyi pie, ama truni bongo amani aluni ku; ’ba dria alu alu mu yia afa yini ombaniri be.

← Chapter 3 Jump to: Chapter 5 →