1 Thessalonians 2

Lahu Bible Edited © Thailand Bible Society and Bible Society of Myanmar, 2010, 2020.

← Chapter 1 Jump to: Chapter 3 →

1Awˬ viˉ awˬ nyi teˇ hpaˍ-oˬ, ngaˬ hui nawˬ hui geh laˬ ve lehˬ, hkʼe leˇ hpeh‸ ve maˇ heˆ teh‸ nawˬ hui shiˍ chehˇ ve yoˬ.

2Nawˬ hui shiˍ taˍ ve hkʼe, Hpiˇliˇpiˆ venˇ awˬ hkʼaw lo tu‸ ve hkanˍ ve leh maˇ shawˍ maˇ caˆ te laˇ ve hta‸ ngaˬ hui gʼa hkanˍ peuˬ ve yoˬ. Ya‸ hkʼaˇ, nawˬ hui hta‸ Gʼuiˬsha ve ha lehˬ ve bon hkawˇ ca maˍ la ve teˇ yanˇ, gʼa tawˍ da‸ tuˬ cawˬ maˇ jaˇ ve htawˇ, ngaˬ hui ve Gʼuiˬsha hta‸ pa taw ngaˬ hui nyi ma ha‸ hanˉ te leh maˍ laˇ ve yoˬ.

3Ngaˬ hui lehˬ dawˇ ya‸ te ya‸ ve awˬ hkʼaw lo maˇ kʼoˆ, cha‸ chiˆ ve awˬ hkʼaw lo maˇ kʼoˆ, heˍ ve awˬ hkʼaw lo maˇ kʼoˆ, nawˬ hui hta‸ awˬ gʼaˇ pe‸ laˇ ve maˇ heˆ.

4Ha lehˬ ve bon hkawˇ maˍ tuˬ Gʼuiˬsha ngaˬ hui hta‸ nyi hkʼaˇ suh leh chiˇ a‸ laˇ ve hkʼe ceh ngaˬ hui maˍ ve yoˬ. Chaw yaˇ nyi hkʼaˇ suh tuˬ ngaˬ hui maˍ ve maˇ heˆ. Ngaˬ hui ve nyi ma hta‸ lawˇ nyi laˇ shehˍ hpaˇ Gʼuiˬsha nyi hkʼaˇ suh tuˬ ngaˬ hui maˍ ve yoˬ.

5Awˬ lawn kʼo, nawˬ hui shiˍ taˍ ve hkʼe, shu nyi ma cawˇ tuˬ ngaˬ hui shu hta‸ chiˇ mvuh piˇ ve maˇ heˆ. Shu mawˇ shu jeˬ hta‸ ngaˬ hui sheˉ lai leh maˍ ve ka‸ maˇ heˆ teh‸ Gʼuiˬsha shaˉ hkiˆ hkanˍ hpeh‸ ve yoˬ.

6Ngaˬ hui Hkri‸ ve tcuh yaˇ hpeh‸ ve pa taw, kanˇ paˆ hta‸ yehˇ hpeh‸ ve htawˇ, nawˬ hui geh maˇ kʼoˆ, awˬ kaˍ awˬ nu chaw geh maˇ kʼoˆ, chaw yaˇ hui geh awˬ me‸ awˬ hponˇ gʼa tuˬ ngaˬ hui maˇ ca.

7Awˬ e teˇ gʼaˇ lehˬ, yawˇ ve yaˇ ehˉ teˇ hpaˍ hta‸ ha‸ shaˉ ve hkʼe, ngaˬ hui nawˬ hui geh nyi ma nuˇ nehˬ ve awˬ hkʼaw lo chehˇ ve yoˬ.

8Hkʼe te leh, ngaˬ hui nawˬ hui hta‸ ha‸ jaˇ ve pa taw, Gʼuiˬsha ve ha lehˬ ve bon hkawˇ ceh tiˉ nawˬ hui hta‸ pe‸ laˇ ve maˇ heˆ, ngaˬ hui ve a sha‸ htawˇ nawˬ hui hta‸ pe‸ laˇ gaˇ jaˇ ve yoˬ. Awˬ lawn kʼo, nawˬ hui lehˬ ngaˬ hui ha‸ jaˇ ve chaw teˇ hpaˍ hpeh‸ la peuˬ.

9Awˬ viˉ awˬ nyi teˇ hpaˍ-oˬ, ngaˬ hui kanˉ te ve hkʼaˬ ma hkeu‸ jaˇ ve hta‸ nawˬ hui dawˇ nawˇ tuˬ yoˬ. Ngaˬ hui nawˬ hui hta‸ Gʼuiˬ sha ve ha lehˬ ve bon hkawˇ maˍ laˇ ve teˇ yanˇ, nawˬ hui teˇ gʼaˇ ka‸ maˇ gʼa hkeu‸ tuˬ, ngaˬ hui lehˬ tanˇ hkuinˇ tanˇ vanˇ kanˉ te ve yoˬ.

10Nawˬ hui Hkri‸ yaˇ teˇ hpaˍ hta‸ ngaˬ hui te laˇ ve lehˬ, da‸ ve kehˬ ve, hteˇ ve cawˇ ve leh venˇbaˆ taˍ kuiˬ maˇ cawˬ ve yoˬ teh‸, nawˬ hui ka‸ Gʼuiˬsha ka‸ shaˉ hkiˆ hkanˍ hpeh‸ ve yoˬ.

11Nawˬ hui shiˍ taˍ ve hkʼe, awˬ pa teˇ gʼaˇ lehˬ, a shu yawˇ ve yaˇ teˇ hpaˍ hta‸ te piˇ ve hkʼe, ngaˬ hui nawˬ hui teˇ gʼaˇ le le hta‸ awˬ gʼaˇ pe‸ laˇ leh dawˇ sha gaˇ sha tuˬ te laˇ ve yoˬ.

12Gʼuiˬsha hta‸ keunˍ ve hkʼe ceh te tuˬ ngaˬ hui nawˬ hui hta‸ tawˇ piˇ ve yoˬ. Yawˇ ve mvuhˇmiˬ leh yawˇ ve awˬ me‸ awˬ hponˇ awˬ hkʼaw lo lo‸-e tuˬ, yawˇ nawˬ hui hta‸ kuˬ yuˬ laˇ peuˬ.

13Nawˬ hui lehˬ, ngaˬ hui maˍ laˇ ve Gʼuiˬ sha ve tawˇ hkawˇ hta‸ gʼa kaˇ ve teˇ yanˇ ha‸ yuˬ ve pa taw, Gʼuiˬsha hta‸ ngaˬ hui hkʼaˬ htaˆ ka‸ chiˇ mvuh ve yoˬ. Tawˇ hkawˇ oˇ ve hta‸ chaw yaˇ ve tawˇ hkawˇ hkʼe nawˬ hui shawˍ taˍ leh ha‸ yuˬ ve maˇ heˆ. Gʼuiˬ sha ve tawˇ hkawˇ awˬ tehˬ awˬ na hpeh‸ ve hta‸ nawˬ hui shawˍ taˍ leh ha‸ yuˬ ve yoˬ. Tawˇ hkawˇ oˇ ve lehˬ, nawˬ hui Hkri‸ yaˇ teˇ hpaˍ awˬ hkʼaw lo kanˉ te chehˇ ve yoˬ.

14Awˬ lawn kʼo, awˬ viˉ awˬ nyi teˇ hpaˍ-oˬ, Yuˇda‸ mvuhˇmiˬ awˬ hkʼaw lo cawˬ ve, Yeˍsuˆ Hkri‸ awˬ hkʼaw lo chehˇ ve Gʼuiˬ sha ve Hkri‸ yaˇ awˬ moˍ teˇ hpaˍ hta‸ nawˬ hui henˇ yuˬ jawˬ yuˬ ve yoˬ. Yawˇ hui lehˬ, Yuˇda‸ chaw hui ve la‸ hkʼaw lo tu‸ ve hkanˍ ve hta‸ gʼa hkanˍ ve hkʼe, nawˬ hui htawˇ nawˬ hui ve mvuhˇmiˬ awˬ hkʼaw lo chehˇ ve chaw teˇ hpaˍ ve la‸ hkʼaw lo tu‸ ve hkanˍ ve hta‸ gʼa hkanˍ ve yoˬ.

15Yuˇda‸ chaw oˇ ve teˇ hpaˍ lehˬ, Jawˇ mawˇ Yeˍsuˆ hta‸ ka‸, Gʼuiˬsha ve tcuh kaˍ paˍ teˇ hpaˍ hta‸ ka‸ tiˇ pehˍ leh, ngaˬ hui hta‸ htawˇ gʼa‸ kʼoˬ laˇ ve yoˬ. Yawˇ hui lehˬ, Gʼuiˬsha nyi ma cawˇ tuˬ maˇ te ve awˬ hkʼoˆ ka‸ chaw hkʼa peu-eˬ ve canˇ paˍ hpeh‸ ve yoˬ.

16Buiˇ shaˆ aˉ naˆ chaw teˇ hpaˍ htaiˍ hkʼaw‸ ve hta‸ gʼa tuˬ ngaˬ hui maˍ piˇ ve hta‸ Yuˇda‸ chaw oˇ ve teˇ hpaˍ tawˍ taˍ laˇ ve yoˬ. Yawˇ hui chi hkʼe te ve lehˬ, a shu yawˇ ve venˇbaˆ biˇ la tuˬ te chehˇ ve yoˬ. Hkʼe te leh, Gʼuiˬ sha nyi ma zuhˆ ve teˇ ceuˬ yawˇ hui awˬ hkʼoˆ hkʼa biˇ gaˬ la peuˬ.

17Awˬ viˉ awˬ nyi teˇ hpaˍ-oˬ, teˇ hkui teˇ yanˇ ngaˬ hui nawˬ hui hta‸ gʼa hpaˆ da‸ ve pa taw, ngaˬ hui nawˬ hui hta‸ kʼaw‸ mawˬ gaˇ jaˇ leh gʼaˇ hte‸ te chehˇ ve yoˬ. Awˬ to nawˬ hui hta‸ gʼa hpaˆ da‸ ve htawˇ, ngaˬ hui ve nyi ma nawˬ hui hta‸ maˇ hpaˆ da‸.

18Hkʼe te leh ngaˬ Pawˇlu‸ lehˬ, nawˬ hui geh laiˉ pawˆ laˬ gaˇ ve yoˬ. Ya‸ hkʼaˇ, Saˍtanˍ ngaˬ hui hta‸ tawˍ taˍ laˇ ve yoˬ.

19Ngaˬ hui ve Jawˇmawˇ Yeˍsuˆ Hkri‸ kʼaw‸ ya‸ la ve teˇ yanˇ, yawˇ mehˆ gʼuˇ suhˍ ngaˬ hui ve dawˇ law kuiˬ, ha lehˬ kuiˬ leh awˬ me‸ awˬ hponˇ cawˬ ve shi uˉ tcuhˍ aˬ hto‸ ma le. Nawˬ hui yoˬ maˇ heˆ laˇ.

20Awˬ lawn kʼo, nawˬ hui lehˬ ngaˬ hui ve awˬ me‸ awˬ hponˇ leh ngaˬ hui ve ha lehˬ kuiˬ hpeh‸ ve yoˬ.

← Chapter 1 Jump to: Chapter 3 →