1 Thessalonians 3

Lahu Bible Edited © Thailand Bible Society and Bible Society of Myanmar, 2010, 2020.

← Chapter 2 Jump to: Chapter 4 →

1Hkʼe te leh, nawˬ hui awˬ lawn ngaˬ hui maˇ gʼa shiˍ maˇ gʼa kaˇ ve pa taw hkanˍ maˇ gʼa ve teˇ yanˇ, ngaˬ teˇ gʼaˇ tiˉ Aˍhtenˍ ven awˬ hkʼaw lo chehˇ taˉ tuˬ ngaˬ dawˇ cheˆ taˍ ve yoˬ.

2Ngaˬ hui ve awˬ viˉ awˬ nyi Tiˆmoˉseˍ hta‸ ngaˬ hui nawˬ hui geh peu laˇ ve yoˬ. Yawˇ lehˬ, Hkri‸ ve ha lehˬ ve bon hkawˇ maˍ shehˍ hpaˇ Gʼuiˬsha ve awˬ ceˬ hpeh‸ ve yoˬ.

3Tu‸ ve hkanˍ ve chi teˇ hpaˍ hta‸ nawˬ hui gʼa hkanˍ ve htawˇ, nawˬ hui nyi ma yeˬ chehˇ tuˬ awˬ pon maˇ kʼoˆ, yonˍ ve teˇ ceuˬ awˬ hkʼaw lo nawˬ hui hkʼa deh‸ chehˇ yeˬ leh awˬ gʼaˇ cawˬ tuˬ awˬ pon maˇ kʼoˆ, ngaˬ hui yawˇ hta‸ peu laˇ ve yoˬ. Tu‸ ve hkanˍ ve teˇ hpaˍ hta‸ ngaˬ hui gʼa hkanˍ ve yoˬ teh‸ nawˬ hui shiˍ chehˇ ve yoˬ.

4Awˬ lawn kʼo, tu‸ ve hkanˍ ve hta‸ ngaˬ hui gʼa hkanˍ tuˬ yoˬ teh‸, ngaˬ hui nawˬ hui geh chehˇ ve teˇ yanˇ ngaˬ hui kʼoˆ taˍ ve yoˬ. Kʼoˆ taˍ ve hkʼe hpeh‸ la ve hta‸ htawˇ nawˬ hui shiˍ ve yoˬ.

5Chi hta‸ pa taw, ngaˬ hkanˍ maˇ gʼa ve teˇ yanˇ, nawˬ hui hkʼaˬ hkʼe yonˍ chehˇ ve hta‸ ngaˬ gʼa shiˍ tuˬ, Tiˆmoˉseˍ hta‸ ngaˬ peu laˇ ve yoˬ. Beˬ shehˍ hpaˇ nawˬ hui hta‸ beˬ yuˬ leh, ngaˬ hui kanˉ te hkeu‸ ve teˇ hpaˍ hkʼe leˇ hpeh‸ la puiˉ-aˆ teh‸ ngaˬ dawˇ haˍ ve yoˬ.

6Ya‸ hkʼaˇ, chi beu‸ Tiˆmoˉseˍ kʼaw‸ gaˬ la leh, nawˬ hui yonˍ ve teˇ ceuˬ leh ha‸ pehnˇ ve teˇ ceuˬ awˬ lawn, ha lehˬ tuˬ uiˍ jaˇ ve tawˇ hkawˇ ngaˬ hui hta‸ hto laˇ ve yoˬ. Nawˬ hui hkʼaˬ htaˆ ka‸ ngaˬ hui hta‸ hkʼa deh‸ dawˇ nawˇ chehˇ leh, ngaˬ hui nawˬ hui hta‸ mawˬ gaˇ ve hkʼe nawˬ hui htawˇ ngaˬ hui hta‸ mawˬ gaˇ jaˇ ve awˬ lawn ka‸, yawˇ hto laˇ ve yoˬ.

7Awˬ viˉ awˬ nyi teˇ hpaˍ-oˬ, ngaˬ hui dawˇ haˍ jaˇ ve leh tu‸ ve hkanˍ ve teˇ ceuˬ le le hta‸ gʼa hkanˍ ve htawˇ, nawˬ hui ve yonˍ ve teˇ ceuˬ hta‸ pa taw dawˇ sha ve teˇ ceuˬ hta‸ ngaˬ hui gʼa ve yoˬ.

8Awˬ lawn kʼo, Jawˇmawˇ Yeˍsuˆ awˬ hkʼaw lo nawˬ hui yeˬ chehˇ ve kʼo, chi beu‸ ngaˬ hui awˬ pon te‸ ve teˇ ceuˬ hpeh‸ ve yoˬ.

9Nawˬ hui hta‸ pa taw ngaˬ hui ve Gʼuiˬ sha mehˆ gʼuˇ suhˍ ngaˬ hui ha lehˬ tuˬ maˇ maˇ cawˬ ve yoˬ. Ha lehˬ tuˬ chi hkʼa peu-eˬ hta‸ ngaˬ hui dawˇ nyi ve teˇ yanˇ, nawˬ hui awˬ pon Gʼuiˬsha hta‸ ngaˬ hui maˇ maˇ chiˇ mvuh ve yoˬ.

10Ngaˬ hui nawˬ hui hta‸ gʼa kʼaw‸ mawˬ da‸ leh, nawˬ hui yonˍ maˇ biˇ sheˍ ve awˬ ceuˬ biˇ la tuˬ, tanˇ hkuinˇ tanˇ venˇ ngaˬ hui bon gʼaˇ hte‸ lawˬ chehˇ ve yoˬ.

11Nawˬ hui geh ngaˬ hui laˬ hpeh‸ tuˬ, ngaˬ hui ve Awˬ pa Gʼuiˬsha leh ngaˬ hui ve Jawˇmawˇ Yeˍsuˆ ngaˬ hui pon ya‸ kʼaw gu taˍ laˇ piˇ-oˆ.

12Ngaˬ hui nawˬ hui hta‸ ha‸ ve hkʼe, nawˬ hui htawˇ teˇ gʼaˇ leh teˇ gʼaˇ hta‸ ha‸ da‸ ve maˇ kʼoˆ, chaw hkʼa peu-eˬ hta‸ ha‸ ve maˇ kʼoˆ, nawˬ hui awˬ hkʼaw lo uiˍ la maˇ la tuˬ, Jawˇmawˇ Yeˍsuˆ te laˇ piˇ-oˆ.

13Ngaˬ hui ve Jawˇmawˇ Yeˍsuˆ lehˬ, yawˇ ve da‸ kehˬ ve chaw hkʼa peu-eˬ geh teˇ geh kʼaw‸ ya‸ la ve teˇ yanˇ, ngaˬ hui ve Awˬ pa Gʼuiˬsha mehˆ gʼuˇ suhˍ nawˬ hui ve nyi ma da‸ kehˬ ve awˬ hkʼaw lo venˇbaˆ taˍ kuiˬ maˇ gʼa cawˬ tuˬ, yawˇ nawˬ hui ve nyi ma hta‸ yeˬ piˇ lawˬ tuˬ yoˬ.

← Chapter 2 Jump to: Chapter 4 →