bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Lahu
/
Lahu Bible Edited © Thailand Bible Society and Bible Society of Myanmar, 2010, 2020.
/
1 Thessalonians 5
1 Thessalonians 5
Lahu Bible Edited © Thailand Bible Society and Bible Society of Myanmar, 2010, 2020.
← Chapter 4
Jump to:
Chapter 1
Chapter 2
Chapter 3
Chapter 4
Chapter 5
1
Awˬ viˉ awˬ nyi teˇ hpaˍ-oˬ, awˬ nyi awˬ haˉ leh awˬ tcuhˉ awˬ yanˇ teˇ hpaˍ awˬ lawn nawˬ hui hta‸ li‸ bvuh‸ laˇ tuˬ maˇ loˍ.
2
Awˬ lawn kʼo, tanˇ hkuinˇ htaˇ chaw hkʼawˇ laˬ ve hkʼe Jawˇmawˇ Yeˍsuˆ ve awˬ nyi gaˬ la tuˬ ve hta‸ nawˬ hui hkʼa deh‸ shiˍ chehˇ ve yoˬ.
3
Mvuhˇmiˬ gawˬ la peuˬ leh ngaˬ hui te‸ chiˉ dawˇ haˍ tuˬ maˇ cawˬ teh‸, shu kʼoˆ da‸ chehˇ ve teˇ yanˇ, yaˇ paw tuˬ naˬ ve yaˇ miˇ teˇ gʼaˇ naˬ jaˇ ve hta‸ gʼa hkanˍ ve hkʼe, luˬ ve sheˆ ve teˇ ceuˬ yawˇ hui awˬ hkʼoˆ teˇ cawˬ haˉ gaˬ la tuˬ yoˬ. Yawˇ hui ponˬ kuiˬ a ciˉ ka‸ maˇ cawˬ.
4
Ya‸ hkʼaˇ, awˬ viˉ awˬ nyi teˇ hpaˍ-oˬ, nawˬ hui naˆ ho‸ ve hkʼaw lo maˇ chehˇ ve pa taw, awˬ nyi oˇ ve lehˬ, chaw hkʼawˇ hkʼa shuˍ shuˍ nawˬ hui geh gaˬ la tuˬ ve maˇ heˆ.
5
Awˬ lawn kʼo, nawˬ hui hkʼa peu-eˬ lehˬ awˬ gʼeuˆ ve awˬ yaˇ awˬ duˬ leh mvuhˇ law‸ kʼaw ve awˬ yaˇ awˬ duˬ hpeh‸ ve yoˬ. Ngaˬ hui lehˬ mvuhˇ hpeu‸ ve teˇ ceuˬ hta‸ maˇ kʼoˆ, naˆ ho‸ ve teˇ ceuˬ hta‸ maˇ kʼoˆ, maˇ caˉ da‸.
6
Hkʼe te leh, awˬ kaˍ awˬ nu chaw teˇ hpaˍ zuh‸ muiˉ kʼa ve hkʼe ngaˬ hui zuh‸ muiˉ taˇ kʼa chehˇ. Ngaˬ hui hkʼa deh‸ shaw chehˇ leh shaˍ ti‸ taˍ-a veuˬ.
7
Awˬ lawn kʼo, zuh‸ muiˉ kʼa ve chaw teˇ hpaˍ lehˬ, tanˇ hkuinˇ htaˇ zuh‸ muiˉ kʼa chehˇ ve yoˬ. Tzuhˬ dawˬ bvuhˆ ve chaw hui htawˇ, tanˇ hkuinˇ htaˇ dawˬ bvuhˆ chehˇ ve yoˬ.
8
Ngaˬ hui lehˬ mvuhˇ law‸ kʼaw hta‸ caˉ da‸ ve chaw teˇ hpaˍ hpeh‸ ve pa taw, shaˍ ti‸ taˍ chehˇ-a veuˬ. Yonˍ ve leh ha‸ pehnˇ ve teˇ ceuˬ nyi ma pui hta‸ htanˬ tuˬ hkʼe veu‸ deh leh, htaiˍ hkʼaw‸ ve hta‸ caˉ da‸ ve dawˇ law ve teh‸ kʼoˆ ve sho uˉ tcuhˍ hta‸ hkʼawˆ taˍ-a veuˬ.
9
Awˬ lawn kʼo, nyi ma zuhˆ ve hta‸ gʼa hkanˍ tuˬ Gʼuiˬsha ngaˬ hui hta‸ fuiˍ teh taˍ ve maˇ heˆ. Ngaˬ hui ve Jawˇmawˇ Yeˍsuˆ Hkri‸ hta‸ pa taw htaiˍ hkʼaw‸ ve hta‸ gʼa tuˬ, yawˇ ngaˬ hui hta‸ fuiˍ teh taˍ ve yoˬ.
10
Ngaˬ hui te‸ chehˇ ve maˇ kʼoˆ, suh ve maˇ kʼoˆ, yawˇ geh teˇ geh gʼa te‸ chehˇ tuˬ, yawˇ ngaˬ hui awˬ pon hkanˍ suh peuˬ.
11
Hkʼe te leh, chi beu‸ nawˬ hui te chehˇ ve hkʼe, teˇ gʼaˇ leh teˇ gʼaˇ awˬ gʼaˇ piˇ da‸ leh, teˇ gʼaˇ leh teˇ gʼaˇ uiˍ la yeˬ la tuˬ te da‸-o‸.
12
Awˬ viˉ awˬ nyi teˇ hpaˍ-oˬ, ngaˬ hui nawˬ hui hta‸ chi hkʼe lawˬ hkawˉ ve yoˬ. Nawˬ hui awˬ hkʼaw lo kanˉ te leh, Jawˇmawˇ Yeˍsuˆ awˬ hkʼaw lo nawˬ hui hta‸ ha‸ shaˉ leh shaˍ ti‸ pe‸ laˇ ve chaw teˇ hpaˍ hta‸ yawˆ yan-o.
13
Yawˇ hui te ve kanˉ teˇ hpaˍ hta‸ pa taw, ha‸ pehnˇ ve awˬ hkʼaw lo yawˇ hui hta‸ taˍ uiˍ taˍ mvuh piˇ-oˆ. Nawˬ hui htawˇ, teˇ gʼaˇ leh teˇ gʼaˇ cawˇ da‸ hui da‸ chehˇ-oˆ.
14
Awˬ viˉ awˬ nyi teˇ hpaˍ-oˬ, ngaˬ hui nawˬ hui hta‸ awˬ gʼaˇ chi hkʼe pe‸ laˇ ve yoˬ. Kanˉ maˇ te ve chaw teˇ hpaˍ hta‸ shaˍ ti‸ piˇ-oˆ. Nyi ma i puiˉ ve chaw teˇ hpaˍ hta‸ awˬ gʼaˇ piˇ-oˆ. Awˬ gʼaˇ nuˇ ve chaw teˇ hpaˍ hta‸ ga piˇ-oˆ. Chaw hkʼa peu-eˬ awˬ hkʼoˆ hta‸ nyi ma zuhˬ chaweh taˍ-o‸.
15
Shu haiˬ ve teˇ ceuˬ te laˇ ve teˇ yanˇ, nawˬ hui teˇ gʼaˇ ka‸ haiˬ ve teˇ ceuˬ maˇ gʼa kʼaw‸ te hkʼaw‸ piˇ tuˬ shaˍ ti‸ te-o. Nawˬ hui teˇ gʼaˇ leh teˇ gʼaˇ hta‸ maˇ kʼoˆ, chaw hkʼa peu-eˬ hta‸ maˇ kʼoˆ, hkʼaˬ htaˆ ka‸ da‸ ve teˇ ceuˬ hta‸ te tcuhˉ taˍ-o‸.
16
Hkʼaˬ htaˆ ka‸ ha lehˬ chehˇ-oˆ.
17
Hkʼaˬ htaˆ ka‸ bon lawˬ tcuhˉ taˍ-o‸.
18
Teˇ ceuˬ le le awˬ hkʼaw lo Gʼuiˬsha hta‸ chiˇ mvuh chehˇ-oˆ. Awˬ lawn kʼo, chi hkʼe te tuˬ nawˬ hui awˬ pon Yeˍsuˆ Hkri‸ awˬ hkʼaw lo Gʼuiˬ sha ve a loˍ cawˇ ve yoˬ.
19
Awˬ ha hpu ve aˬ miˍ hta‸ taˇ tiˇ pehˍ.
20
Shu Gʼuiˬsha ve tawˇ hkawˇ maˍ laˇ ve hta‸ maˇ shawˍ maˇ caˆ taˇ te.
21
Awˬ ceuˬ hkʼa peu-eˬ hta‸ lawˇ nyi-o. Da‸ ve awˬ ceuˬ hta‸ hkʼa deh‸ vawˆ taˍ-o‸.
22
Haiˬ ve teˇ ceuˬ le le hta‸ jaw kʼai-o.
23
Dawˇ sha piˇ shehˍ hpaˇ Gʼuiˬsha lehˬ, nawˬ hui hta‸ teˇ ceuˬ le le awˬ hkʼaw lo da‸ la kehˬ la piˇ-oˆ. Ngaˬ hui ve Jawˇ mawˇ Yeˍsuˆ Hkri‸ kʼaw‸ ya‸ la ve teˇ yanˇ, nawˬ hui ve nyi ma, co ha leh awˬ to biˇ chehˇ ve awˬ hkʼaw lo venˇbaˆ taˍ kuiˬ maˇ cawˬ tuˬ, Gʼuiˬsha nawˬ hui hta‸ ha‸ shaˉ piˇ-oˆ.
24
Nawˬ hui hta‸ kuˬ yuˬ shehˍ hpaˇ lehˬ, ka ti‸ yeˬ leh, nawˬ hui hta‸ chi hkʼe te laˇ tuˬ yoˬ.
25
Awˬ viˉ awˬ nyi teˇ hpaˍ-oˬ, ngaˬ hui awˬ pon bon lawˬ-o‸.
26
Awˬ viˉ awˬ nyi hkʼa peu-eˬ hta‸ da‸ ve kehˬ ve awˬ hkʼaw lo boˆ nu da‸ leh la‸ sheh caˉ da‸-o‸.
27
Awˬ viˉ awˬ nyi hkʼa peu-eˬ hta‸ li‸ chi gʼaw maˍ piˇ tuˬ, Jawˇmawˇ Yeˍsuˆ hta‸ ngaˬ cuˇ leh nawˬ hui hta‸ tawˇ piˇ ve yoˬ.
28
Ngaˬ hui ve Jawˇmawˇ Yeˍsuˆ Hkri‸ ve awˬ bon awˬ shinˉ nawˬ hui geh cawˬ piˇ-oˆ.
← Chapter 4
Jump to:
Chapter 1
Chapter 2
Chapter 3
Chapter 4
Chapter 5
All chapters:
1
2
3
4
5