1 Thessalonians 4

Lahu Bible Edited © Thailand Bible Society and Bible Society of Myanmar, 2010, 2020.

← Chapter 3 Jump to: Chapter 5 →

1Awˬ viˉ awˬ nyi teˇ hpaˍ-oˬ, awˬ leh meuˇ ve tawˇ teˇ hkawˇ lehˬ, Jawˇmawˇ Yeˍsuˆ awˬ hkʼaw lo ngaˬ hui nawˬ hui hta‸ chi hkʼe lawˬ hkawˉ leh awˬ gʼaˇ pe‸ laˇ ve yoˬ. Nawˬ hui hkʼaˬ hkʼe gʼa te keunˍ ve leh, Gʼuiˬsha nyi hkʼaˇ suh tuˬ hkʼaˬ hkʼe gʼa te cawˇ ve teˇ hpaˍ ngaˬ hui geh gʼa henˇ taˍ peuˬ ve hkʼe, chi beu‸ nawˬ hui te chehˇ ve hkʼa shuˍ shuˍ chi a‸ kehˉ leuˉ leh awˬ gʼuˇ suhˍ gʼaˇ hte‸ te kʼai sheˍ.

2Jawˇmawˇ Yeˍsuˆ ve kanˇ paˆ awˬ hawˉ lo ngaˬ hui nawˬ hui hta‸ tawˇ pe‸ laˇ ve teˇ hpaˍ hta‸ nawˬ hui shiˍ chehˇ ve yoˬ.

3Awˬ lawn kʼo, nawˬ hui gʼa da‸ gʼa kehˬ tuˬ, chi lehˬ Gʼuiˬsha ve a loˍ cawˇ ve yoˬ. Hkʼe te leh, haˉ chawˇ haˉ paˆ te ve teˇ ceuˬ hta‸ jaw kʼai-o.

4Nawˬ hui teˇ gʼaˇ le le da‸ ve kehˬ ve leh yawˆ yan ve awˬ hkʼaw lo a shu yawˇ ve awˬ miˇ ma hta‸ hkʼa deh‸ heuˆ chehˇ-oˆ.

5Gʼuiˬsha hta‸ maˇ shiˍ ve buiˇ shaˆ aˉ naˆ chaw teˇ hpaˍ lehˬ, peh‸ ve tzuhˆ ve awˬ hkʼaˇ suh te kʼai ve yoˬ. Nawˬ hui oˇ hkʼe taˇ te.

6Kanˉ chi teˇ ceuˬ awˬ hkʼaw lo chaw teˇ gʼaˇ ka‸ a shu yawˇ ve awˬ viˉ awˬ nyi hta‸ maˇ gʼa te ponˬ te leuˉ leh maˇ gʼa te ya‸. Awˬ lawn kʼo, ponˬ laˬ htaˇ ngaˬ hui nawˬ hui hta‸ shaˍ ti‸ hkʼa deh‸ pe‸ laˇ taˍ ve hkʼe, Jawˇ mawˇ Yeˍsuˆ lehˬ, chi hkʼa peu-eˬ awˬ pon kʼaw‸ te hkʼaw‸ piˇ shehˍ hpaˇ hpeh‸ ve yoˬ.

7Awˬ lawn kʼo, cha‸ chiˆ ve chaw hpeh‸ tuˬ awˬ pon Gʼuiˬsha ngaˬ hui hta‸ kuˬ yuˬ taˍ ve maˇ heˆ. Da‸ kehˬ ve chaw hpeh‸ la tuˬ awˬ pon yawˇ kuˬ yuˬ taˍ ve yoˬ.

8Hkʼe te leh, chi hta‸ baˬ taˉ ve chaw lehˬ, chaw yaˇ hta‸ baˬ taˉ ve maˇ heˆ. Ngaˬ hui hta‸ yawˇ ve da‸ ve kehˬ ve Awˬ ha hpu pe‸ laˇ shehˍ hpaˇ Gʼuiˬsha hta‸ baˬ taˉ ve yoˬ.

9Awˬ viˉ awˬ nyi teˇ gʼaˇ leh teˇ gʼaˇ ha‸ da‸ tuˬ ve awˬ lawn ngaˬ hui nawˬ hui hta‸ li‸ bvuh‸ laˇ tuˬ maˇ loˍ. Awˬ lawn kʼo, teˇ gʼaˇ leh teˇ gʼaˇ ha‸ da‸ tuˬ Gʼuiˬsha nawˬ hui hta‸ maˍ laˇ peuˬ.

10Awˬ tehˬ kʼoˆ ve kʼo, Maˍkeˍdawˇniˆ mvuhˇmiˬ teˇ kaˬ le le lo chehˇ ve awˬ viˉ awˬ nyi hkʼa peu-eˬ hta‸ nawˬ hui ha‸ chehˇ ve yoˬ. Ya‸ hkʼaˇ awˬ viˉ awˬ nyi teˇ hpaˍ-oˬ, chi a‸ kehˉ leuˉ leh yawˇ hui hta‸ ha‸ maˇ la tuˬ ngaˬ hui nawˬ hui hta‸ awˬ gʼaˇ pe‸ laˇ ve yoˬ.

11Chi hkʼoˆ ka‸, awˬ baˬ hpawˇ chehˇ ve chaw teˇ hpaˍ nawˬ hui hta‸ nyi ma cawˇ tuˬ leh nawˬ hui chaw teˇ gʼaˇ hta‸ ka‸ maˇ gʼa ca cuˇ tuˬ,

12ngaˬ hui nawˬ hui hta‸ kʼoˆ laˇ peuˬ ve hkʼe, ta‸ iˉ gawˬ lehˍ chehˇ leh a shu yawˇ te kuiˬ hta‸ te leh, a shu yawˇ awˬ to la‸ sheh kanˉ te tuˬ ngaˬ nawˬ hui hta‸ awˬ gʼaˇ pe‸ laˇ ve yoˬ.

13Awˬ viˉ awˬ nyi teˇ hpaˍ-oˬ, dawˇ law kuiˬ maˇ cawˬ ve awˬ kaˍ awˬ nu chaw teˇ hpaˍ dawˇ haˍ ve hkʼa shuˍ shuˍ, nawˬ hui maˇ gʼa dawˇ haˍ tuˬ, suh peuˬ ve chaw teˇ hpaˍ awˬ lawn ngaˬ hui nawˬ hui hta‸ shiˍ piˇ lawˬ gaˇ ve yoˬ.

14Awˬ lawn kʼo, Yeˍsuˆ suh leh kʼaw‸ te‸ tu la ve hta‸ ngaˬ hui yonˍ ve yoˬ. Hkʼe te leh yawˇ kʼaw‸ te‸ tu la ve hkʼa shuˍ shuˍ, Gʼuiˬsha lehˬ Yeˍsuˆ hta‸ cuˇ ve awˬ hkʼaw lo, suh peuˬ ve chaw teˇ hpaˍ hta‸ yawˇ geh teˇ geh kʼaw‸ shiˍ veu laˇ tuˬ yoˬ.

15Jawˇmawˇ Yeˍsuˆ ve tawˇ hkawˇ hta‸ ngaˬ hui cuˇ leh nawˬ hui hta‸ chi hkʼe hto laˇ ve yoˬ. Jawˇmawˇ Yeˍsuˆ kʼaw‸ gaˬ la htaˇ hkʼa gaˬ a sha‸ te‸ chehˇ sheˍ ve ngaˬ hui teˇ hpaˍ lehˬ, suh peuˬ ve chaw teˇ hpaˍ awˬ gʼuˇ suhˍ gʼa gaˬ tuˬ maˇ heˆ.

16Jawˇmawˇ Yeˍsuˆ lehˬ mvuhˇ naw ma hkʼoˆ lo ya‸ la ve teˇ yanˇ, tawˇ piˇ ve awˬ hkʼaw lo awˬ hkawˇ bvuhˬ chaweh kuˬ tuˬ yoˬ. Chi hkʼoˆ ka‸, mvuhˇ naw ma tcuh yaˇ uiˍ ve teˇ gʼaˇ ve awˬ hkawˇ leh, Gʼuiˬsha ve behˬ heh ma meuˆ ve awˬ hkawˇ htawˇ bvuhˬ la tuˬ yoˬ. Oˇ htaˇ, Hkri‸ awˬ hkʼaw lo suh peuˬ ve chaw teˇ hpaˍ awˉ lawˉ te‸ tu la tuˬ yoˬ.

17Oˇ ve awˬ hkʼaw‸ nawˉ a sha‸ te‸ chehˇ sheˍ ve ngaˬ hui teˇ hpaˍ lehˬ, mvuhˇ hpe lo Jawˇmawˇ Yeˍsuˆ hta‸ hpuˇ da‸ tuˬ, chaw oˇ ve teˇ hpaˍ geh hkʼa geh moˬ cawˬ kuiˬ lo ngaˬ hui hta‸ chiˇ taˆ-e laˇ tuˬ yoˬ. Hkʼe te leh, Jawˇmawˇ Yeˍsuˆ geh ngaˬ hui hkʼaˬ htaˆ ka‸ gʼa chehˇ tuˬ yoˬ.

18Chi hta‸ pa taw, nawˬ hui dawˇ sha la tuˬ, tawˇ hkawˇ chi teˇ hpaˍ hta‸ kʼoˆ da‸ leh, teˇ gʼaˇ leh teˇ gʼaˇ awˬ gʼaˇ piˇ da‸-o‸.

← Chapter 3 Jump to: Chapter 5 →