Hebrews 3

Lahu Bible Edited © Thailand Bible Society and Bible Society of Myanmar, 2010, 2020.

← Chapter 2 Jump to: Chapter 4 →

1Hkʼe te leh, mvuhˇ naw ma hkʼoˆ lo kuˬ yuˬ ve awˬ bon hta‸ ngaˬ hui geh hkʼa geh gʼa ve, da‸ ve kehˬ ve awˬ viˉ awˬ nyi teˇ hpaˍ-oˬ, Yeˍsuˆ hta‸ dawˇ nyi-o. Yawˇ lehˬ, ngaˬ hui yonˍ taˍ ve teˇ ceuˬ awˬ hkʼaw lo tcuh yaˇ leh paw hkuˇ lonˉ hpeh‸ ve yoˬ.

2Moˉseˍ lehˬ Gʼuiˬsha ve yehˬ teˇ yehˬ awˬ hkʼaw lo ka ti‸ yeˬ leh na yuˬ puiˉ ve hkʼe, Yeˍsuˆ htawˇ yawˇ hta‸ leuˆ teh taˍ piˇ shehˍ hpaˇ hta‸ ka ti‸ yeˬ leh na yuˬ puiˉ ve yoˬ.

3Yehˬ te shehˍ hpaˇ lehˬ, yehˬ a‸ kehˉ awˬ me‸ awˬ hponˇ cawˬ ve hkʼe, Yeˍsuˆ htawˇ Moˉseˍ a‸ kehˉ awˬ me‸ awˬ hponˇ cawˬ keunˍ ve yoˬ teh‸ Gʼuiˬsha shawˍ taˍ ve yoˬ.

4Awˬ lawn kʼo, yehˬ teˇ yehˬ le le lehˬ, te shehˍ hpaˇ cawˬ ve yoˬ. Ya‸ hkʼaˇ, teˇ ceuˬ le le hta‸ te shehˍ hpaˇ lehˬ Gʼuiˬsha yoˬ.

5Moˉseˍ lehˬ, awˬ hkʼaw‸ nawˉ hkʼa kʼoˆ maˍ tuˬ ve teˇ hpaˍ hta‸ shaˉ hkiˆ hkanˍ tuˬ awˬ pon, Gʼuiˬsha ve yehˬ teˇ yehˬ hkʼa peu-eˬ awˬ hkʼaw, awˬ ceˬ ve kanˉ hta‸ te ve awˬ hkʼaw lo yawˇ ka ti‸ yeˬ leh na yuˬ puiˉ ve yoˬ.

6Ya‸ hkʼaˇ Hkri‸ lehˬ, Gʼuiˬsha ve yehˬ awˬ hkʼoˆ hta‸ yaˇ paˍ hpeh‸ ve awˬ hkʼaw lo ka ti‸ yeˬ leh na yuˬ puiˉ ve yoˬ. Ngaˬ hui htawˇ, nyi ma ha‸ hanˉ ve teˇ ceuˬ hta‸ maˇ kʼoˆ, dawˇ law ve awˬ hkʼaw lo ha lehˬ leh nyi ma uiˍ tuˬ cawˬ ve teˇ ceuˬ hta‸ maˇ kʼoˆ, awˬ leh meuˇ hkʼa gaˬ yeˬ chaweh vawˆ taˍ ve kʼo, ngaˬ hui lehˬ yehˬ oˇ ve teˇ yehˬ hpeh‸ ve yoˬ.

7Hkʼe te leh, da‸ ve kehˬ ve Awˬ ha hpu kʼoˆ taˍ ve hkʼe, Ya‸ nyi yawˇ ve awˬ hkawˇ hta‸ nawˬ hui gʼa kaˇ ve kʼo,

8heh puiˉ hkʼaw lo ngaˬ hta‸ lawˇ nyi leh nyi ma zuhˆ tuˬ te laˇ ve awˬ nyi teˇ nyi hkʼa shuˍ shuˍ, nawˬ hui ve nyi ma taˇ heh piˇ.

9Oˇ kaˬ lo nawˬ hui ve awˬ puˍ awˬ pi hui ngaˬ hta‸ lawˇ nyi canˇ nyi leh, awˇ chi hkʼaw‸ hkʼa gaˬ ngaˬ te ve kanˉ teˇ hpaˍ hta‸ gʼa mawˬ ve yo.

10Hkʼe te leh, chaw oˇ ve teˇ co hta‸ ngaˬ nyi ma zuhˆ leh kʼoˆ ve, Yawˇ hui ve nyi ma awˬ hkʼaw lo hkʼaˬ htaˆ ka‸ ya‸ kʼai chehˇ leh, ngaˬ ve ya‸ kʼaw teˇ hpaˍ hta‸ yawˇ hui maˇ shiˍ teh‸ ngaˬ kʼoˆ ve yoˬ.

11Hkʼe te leh, Yawˇ hui lehˬ ngaˬ ve gʼaˇ jehˇ kuiˬ awˬ hkʼaw lo maˇ gʼa lo‸-e teh‸, nyi ma zuhˆ ve awˬ hkʼaw lo ngaˬ hkanˍ taˍ peuˬ, teh‸ da‸ ve kehˬ ve Awˬ ha hpu kʼoˆ ve yoˬ.

12Awˬ viˉ awˬ nyi teˇ hpaˍ-oˬ, nawˬ hui awˬ hkʼaw lo haiˬ ve leh maˇ yonˍ puiˉ ve nyi ma maˇ gʼa cawˬ tuˬ shaˍ ti‸ te-o. Chi hkʼe ve nyi ma lehˬ, nawˬ hui leh te‸ chehˇ ve, Gʼuiˬsha hta‸ hpaˆ da‸ piˇ puiˉ ve yoˬ.

13Venˇbaˆ heˍ yuˬ beˬ yuˬ ve teˇ ceuˬ hta‸ pa taw nawˬ hui awˬ hkʼaw lo teˇ gʼaˇ ka‸ nyi ma maˇ gʼa heh kʼai tuˬ, ya‸ nyi teh‸ kʼoˆ hpeh‸ ve awˬ yanˇ awˬ hkʼaw lo, teˇ nyi le le nawˬ hui teˇ gʼaˇ leh teˇ gʼaˇ awˬ gʼaˇ piˇ da‸-o‸.

14Awˬ hkuiˉ puiˍ htaˇ ka‸ ngaˬ hui nyi ma yeˬ ve hkʼe, awˬ leh meuˇ hkʼa gaˬ nyi ma hkʼa deh‸ yeˬ taˍ ve kʼo, ngaˬ hui Hkri‸ hta‸ caˉ da‸ ve chaw hpeh‸ ve yoˬ.

15Li‸ hpu hkʼaw kʼoˆ taˍ ve hkʼe, Ya‸ nyi yawˇ ve awˬ hkawˇ hta‸ nawˬ hui gʼa kaˇ ve kʼo, nyi ma zuhˆ tuˬ te laˇ ve awˬ nyi teˇ nyi hkʼa shuˍ shuˍ, nawˬ hui ve nyi ma taˇ heh piˇ.

16Gʼa kaˇ peuˬ ve htawˇ nyi ma zuhˆ tuˬ te ve chaw hui lehˬ, a shu le. Eˇjiˇtu‸ mvuhˇmiˬ awˬ hkʼaw lo Moˉseˍ sheh tawˆ la ve chaw hkʼa peu-eˬ yoˬ maˇ heˆ laˇ.

17Awˇ chi hkʼaw‸ hkʼa gaˬ yawˇ a shu hta‸ nyi ma zuhˆ ve le. Venˇbaˆ te leh, heh puiˉ hkʼaw lo paˍ suh-e ve chaw teˇ hpaˍ hta‸ maˇ heˆ laˇ.

18Nawˬ hui lehˬ, ngaˬ ve gʼaˇ jehˇ kuiˬ awˬ hkʼaw lo maˇ gʼa lo‸-e teh‸, a shu hta‸ yawˇ hkanˍ ve le. Maˇ na yuˬ ve chaw hui hta‸ yawˇ hkanˍ ve maˇ heˆ laˇ.

19Hkʼe te leh, yawˇ hui maˇ yonˍ ve pa taw maˇ gʼa lo‸-e ve hta‸ ngaˬ hui gʼa mawˬ gʼa shiˍ ve yoˬ.

← Chapter 2 Jump to: Chapter 4 →