Hebrews 4

Lahu Bible Edited © Thailand Bible Society and Bible Society of Myanmar, 2010, 2020.

← Chapter 3 Jump to: Chapter 5 →

1Hkʼe te leh, yawˇ ve gʼaˇ jehˇ kuiˬ awˬ hkʼaw lo lo‸-e tuˬ a hkaw-anˬ cawˬ sheˍ ve teˇ yanˇ, nawˬ hui awˬ hkʼaw lo teˇ gʼaˇ gʼaˇ maˇ gʼa lo‸-e puiˉ-aˆ teh‸ nyiˬ hui teˇ geh dawˇ hkiˉ cawˇ ve yoˬ.

2Awˬ lawn kʼo, yawˇ hui ha lehˬ ve bon hkawˇ gʼa kaˇ ve hkʼe, ngaˬ hui htawˇ gʼa kaˇ peuˬ. Ya‸ hkʼaˇ, yawˇ hui gʼa kaˇ ve bon hkawˇ hta‸ maˇ yonˍ ve pa taw, yawˇ hui awˬ pon awˬ bon maˇ cawˬ.

3Ngaˬ hui yonˍ peuˬ ve chaw teˇ hpaˍ lehˬ, gʼaˇ jehˇ kuiˬ oˇ ve awˬ hkʼaw lo lo‸-e chehˇ ve yoˬ. Oˇ ve hkʼa shuˍ shuˍ yawˇ kʼoˆ ve, Yawˇ hui lehˬ, ngaˬ ve gʼaˇ jehˇ kuiˬ awˬ hkʼaw lo maˇ gʼa lo‸-e teh‸ nyi ma zuhˆ ve awˬ hkʼaw lo ngaˬ hkanˍ ve yoˬ, teh‸ kʼoˆ taˍ ve yoˬ. Ya‸ hkʼaˇ, miˬguiˬ te hpanˍ htaˇ ka‸ yawˇ ve kanˉ teˇ hpaˍ hta‸ yawˇ te taˍ peuˬ ve yoˬ.

4Awˬ lawn kʼo, Gʼuiˬsha lehˬ yawˇ kanˉ hkʼa peu-eˬ hta‸ te peuˬ leh, suhˍ nyi teˇ nyi awˬ hkʼaw lo gʼaˇ jehˇ ve yoˬ teh‸, suhˍ nyi teˇ nyi awˬ lawn Li‸ hpu teˇ kaˬ awˬ hkʼaw lo kʼoˆ taˍ ve yoˬ.

5Li‸ hpu teˇ tawn awˬ hkʼaw lo, Yawˇ hui lehˬ, ngaˬ ve gʼaˇ jehˇ kuiˬ awˬ hkʼaw lo maˇ gʼa lo‸-e, teh‸ teˇ pawˆ kʼaw‸ kʼoˆ taˍ ve yoˬ.

6Awˉ lawˉ htaˇ ka‸ ha lehˬ ve bon hkawˇ hta‸ gʼa kaˇ peuˬ ve chaw hui maˇ na yuˬ ve pa taw yawˇ hui maˇ gʼa lo‸-e ve htawˇ, gʼa lo‸-e tuˬ ve chaw teˇ hpaˍ hpaˍ cawˬ ve pa taw,

7Gʼuiˬsha lehˬ awˬ nyi teˇ pawˆ kʼaw‸ tinˍ ve yoˬ. Awˬ yanˇ maw peuˬ hkʼaw‸ nawˉ, Gʼuiˬsha lehˬ Daˍviˆ hta‸ cuˇ leh ya‸ sheh bvuh‸ taˍ ve hkʼe, Ya‸ nyi yawˇ ve awˬ hkawˇ hta‸ nawˬ hui gʼa kaˇ ve kʼo, nawˬ hui nyi ma taˇ heh, teh‸ kʼoˆ ve yoˬ. Yawˇ tinˍ taˍ ve awˬ nyi oˇ ve lehˬ ya‸ nyi yoˬ.

8Awˬ lawn kʼo, Yawˇsuˆ lehˬ yawˇ hui hta‸ gʼaˇ jehˇ kuiˬ hkʼaw lo lo‸-e piˇ lawˬ peuˬ ve hkʼe kʼo, awˬ hkʼaw‸ nawˉ awˬ kaˍ awˬ nu teˇ nyi hta‸ Gʼuiˬ sha kʼaw‸ kʼoˆ tuˬ ve maˇ heˆ.

9Hkʼe te leh, Gʼuiˬsha ve chaw teˇ hpaˍ awˬ pon gʼaˇ jehˇ tuˬ ve awˬ nyi cawˬ sheˍ ve yoˬ.

10Awˬ lawn kʼo, Gʼuiˬsha yawˇ kanˉ te peuˬ leh gʼaˇ jehˇ ve hkʼe, yawˇ ve gʼaˇ jehˇ kuiˬ awˬ hkʼaw lo lo‸-e ve chaw teˇ hpaˍ htawˇ, a shu yawˇ ve kanˉ hta‸ te peuˬ leh gʼaˇ gʼa jehˇ ve yoˬ.

11Hkʼe te leh, gʼaˇ jehˇ kuiˬ oˇ ve awˬ hkʼaw lo gʼa lo‸-e tuˬ, ngaˬ hui gʼaˇ hte‸ te-a veuˬ. Hkʼe maˇ heˆ kʼo, shu maˇ na yuˬ leh paiˍ ve hkʼe, ngaˬ hui htawˇ teˇ gʼaˇ gʼaˇ paiˍ tuˬ yoˬ.

12Awˬ lawn kʼo, Gʼuiˬsha ve tawˇ hkawˇ lehˬ, te‸ chehˇ leh kanˇ paˆ cawˬ ve yoˬ. Tawˇ hkawˇ oˇ ve lehˬ, awˬ viˇ nyiˇ hpawˇ cawˬ ve aˉ htaw hkʼa peu-eˬ a‸ kehˉ tcuhˆ leh, nyi ma leh co ha hta‸ maˇ kʼoˆ, awˬ mu‸ ku awˬ tcuhˉ leh awˬ caw paw hta‸ maˇ kʼoˆ, juˆ pawnˍ leh pehˬ da‸ puiˉ ve yoˬ. Nyi ma awˬ hkʼaw lo dawˇ leh heuˆ gaˇ ve teˇ hpaˍ hta‸ htawˇ, fuiˍ da‸ pehˬ da‸ puiˉ ve yoˬ.

13Hkʼa hpanˍ taˍ ve awˬ ceuˬ hkʼa peu-eˬ yawˇ mehˆ gʼuˇ suhˍ faˉ taˍ ve teˇ ceuˬ ka‸ maˇ cawˬ. Yawˇ hta‸ ngaˬ hui gʼa kʼaoˍ maˍ piˇ tuˬ ve awˬ shehˍ hpaˇ mehˆ gʼuˇ suhˍ lo hkʼa peu-eˬ awˬ kʼu nyi hpeh‸ leh, hkʼa peu-eˬ ve hta‸ yawˇ mawˬ chehˇ ve yoˬ.

14Ngaˬ hui uiˍ jaˇ ve paw hkuˇ lonˉ teˇ gʼaˇ cawˬ ve pa taw, ngaˬ hui yonˍ taˍ ve teˇ ceuˬ hta‸ yeˬ chaweh vawˆ taˍ-a veuˬ, Paw hkuˇ lonˉ oˇ ve lehˬ, mvuhˇ naw ma hkʼoˆ hkʼa gaˬ lo‸-e peuˬ ve, Gʼuiˬsha ve Yaˇ hpu Yeˍsuˆ hpeh‸ ve yoˬ.

15Ngaˬ hui awˬ gʼaˇ nuˇ ve teˇ yanˇ, maˇ ha kʼaˉ puiˉ ve paw hkuˇ lonˉ teˇ gʼaˇ ngaˬ hui cawˬ ve maˇ heˆ. Ngaˬ hui hkʼa shuˍ shuˍ beˬ ve lawˇ ve teˇ ceuˬ le le hta‸ yawˇ gʼa hkanˍ jaw ve yoˬ. Ya‸ hkʼaˇ, yawˇ venˇbaˆ maˇ te.

16Hkʼe te leh, ngaˬ hui ha kʼaˉ ve teˇ ceuˬ hta‸ ka‸, loˍ ve awˬ yanˇ awˬ hkʼaw lo ga laˇ tuˬ ve awˬ bon hta‸ ka‸ gʼa tuˬ, nyi ma ha‸ hanˉ ve awˬ hkʼaw lo awˬ bon uiˍ ve kʼaw jaw awˬ paˇ lo ngaˬ hui jiˆ kʼai-a veuˬ.

← Chapter 3 Jump to: Chapter 5 →