Hebrews 5

Lahu Bible Edited © Thailand Bible Society and Bible Society of Myanmar, 2010, 2020.

← Chapter 4 Jump to: Chapter 6 →

1Awˬ lawn kʼo, chaw yaˇ hui awˬ hkʼaw lo leuˆ yuˬ taˍ ve paw hkuˇ lonˉ teˇ gʼaˇ le le lehˬ, Gʼuiˬsha hta‸ caˉ da‸ ve kanˉ teˇ hpaˍ te tuˬ, chaw yaˇ hui awˬ tan leuˆ teh taˍ ve yoˬ. Yawˇ hui lehˬ, venˇ baˆ teˇ hpaˍ awˬ pon la‸ shawnˍ leh tanˇ tuˬ teˇ hpaˍ tanˇ piˇ ve yoˬ.

2Yawˇ hui awˬ to htawˇ gʼaˇ nuˇ puiˉ ve chaw hpeh‸ ve pa taw, maˇ shiˍ ve chaw leh ya‸ kʼai ve chaw hui hta‸ yawˇ hui ha kʼaˉ puiˉ ve yoˬ.

3Yawˇ hui gʼaˇ nuˇ puiˉ ve pa taw, chaw yaˇ hui ve venˇbaˆ awˬ pon gʼa tanˇ piˇ ve hkʼe, a shu yawˇ ve venˇ baˆ awˬ pon htawˇ yawˇ hui gʼa tanˇ piˇ sheˍ ve yoˬ.

4Peuˬ leh, chaw teˇ gʼaˇ ka‸ a shu yawˇ hkʼaˇ yawˇ aˉ yaˇ chi hta‸ yuˬ hpeh‸ ve maˇ heˆ. Aˍronˍ hta‸ Gʼuiˬsha kuˬ yuˬ ve hkʼe, yawˇ hui hta‸ htawˇ Gʼuiˬsha gʼa kuˬ yuˬ ve yoˬ.

5Chi hkʼa shuˍ shuˍ, Hkri‸ lehˬ yawˇ awˬ to hta‸ taˍ uiˍ leh paw hkuˇ lonˉ hpeh‸ la tuˬ ve aˉ yaˇ hta‸ gʼa tuˬ yawˇ hkʼaˇ yawˇ ca te yuˬ ve maˇ heˆ. Nawˬ lehˬ ngaˬ ve Yaˇ hpu hpeh‸ ve yoˬ. Ya‸ nyi ngaˬ nawˬ ve Awˬ pa hpeh‸ la peuˬ, teh‸ yawˇ hta‸ kʼoˆ piˇ shehˍ hpaˇ lehˬ, yawˇ hta‸ aˉ yaˇ piˇ ve yoˬ.

6Chi hkʼa shuˍ shuˍ, awˬ kaˍ awˬ nu teˇ kaˬ lo yawˇ kʼoˆ taˍ ve, Maˍlaˍhkiˆsaˍdehˆ paw hkuˇ hpeh‸ veawˬ hkʼaˇ hkʼa shuˍ shuˍ, nawˬ lehˬ co co taiˍ taiˍ paw hkuˇ hpeh‸ ve yoˬ.

7Yeˍsuˆ lehˬ, miˬguiˬ hkʼoˆ lo chehˇ ve teˇ yanˇ, suh kuiˬ lo yawˇ hta‸ htaiˍ hkʼaw‸ laˇ puiˉ shehˍ hpaˇ hta‸ gʼaˇ hte‸ kuˬ leh mehˆ gʼuiˬ ya‸ la ve awˬ hkʼaw lo bon lawˬ leh lawˬ hkawˉ ve yoˬ. Yawˇ Gʼuiˬsha hta‸ yawˆ yan puiˉ, na yuˬ puiˉ ve pa taw, Gʼuiˬsha yawˇ ve hkawˇ hta‸ na yuˬ ve yoˬ.

8Yawˇ lehˬ, Yaˇ hpu hpeh‸ ve htawˇ tu‸ ve hkanˍ ve hta‸ hkanˍ ve awˬ hkʼaw lo, yawˇ na yuˬ puiˉ ve teˇ ceuˬ hta‸ shiˍ la ve yoˬ.

9Yawˇ biˇ la peuˬ hkʼaw‸ nawˉ, yawˇ ve tawˇ hkawˇ hta‸ hkʼa na yuˬ ve chaw hui awˬ pon yawˇ lehˬ, co co taiˍ taiˍ Htaiˍ hkʼaw‸ shehˍ hpaˇ hpeh‸ la ve yoˬ.

10Maˍlaˍhkiˆsaˍdehˆ paw hkuˇ lonˉ hpeh‸ ve awˬ hkʼaˇ hkʼa shuˍ shuˍ, Gʼuiˬsha yawˇ hta‸ paw hkuˇ lonˉ teh taˍ ve yoˬ.

11Awˬ lawn chi ngaˬ kʼoˆ tuˬ maˇ maˇ cawˬ ve yoˬ. Ya‸ hkʼaˇ, nawˬ hui haˆ haˆ na maˇ gʼa puiˉ ve pa taw, tcuhˉ kuiˬ kʼaoˍ maˍ laˇ tuˬ haˍ ve yoˬ.

12Awˬ yanˇ chi maw maw gaˬ peuˬ ve hta‸ dawˇ nyi ve kʼo, nawˬ hui lehˬ shu hta‸ maˍ piˇ shehˍ hpaˇ hpeh‸ cawˇ ve htawˇ, Gʼuiˬsha ve tawˇ hkawˇ awˬ lawn lonˉ ma teˇ hpaˍ, shu nawˬ hui hta‸ maˍ laˇ tuˬ loˍ sheˍ ve yoˬ. Heh ve caˇ tuˬ hta‸ nawˬ hui caˇ maˇ gʼa ve pa taw, cuˉ gʼuiˬ hta‸ nawˬ hui dawˬ cawˇ sheˍ ve yoˬ.

13Awˬ lawn kʼo, cuˉ gʼuiˬ hta‸ dawˬ ve chaw teˇ gʼaˇ le le lehˬ, yaˇ ehˉ hpeh‸ chehˇ sheˍ ve pa taw, hteˇ ve cawˇ ve tawˇ hkawˇ hta‸ maˇ shiˍ puiˉ.

14Ya‸ hkʼaˇ, heh ve caˇ tuˬ lehˬ, chaw mawˇ teˇ hpaˍ awˬ pon yoˬ. Yawˇ hui lehˬ, a shu yawˇ mawˬ ve kaˇ ve jawˬ ve awˬ ceuˬ teˇ hpaˍ hta‸ puiˉ la tuˬ laiˉ pawˆ te jawˬ ve pa taw, da‸ ve leh maˇ da‸ ve hta‸ fuiˍ da‸ pehˬ da‸ gʼa ve yoˬ.

← Chapter 4 Jump to: Chapter 6 →