Hebrews 7

Lahu Bible Edited © Thailand Bible Society and Bible Society of Myanmar, 2010, 2020.

← Chapter 6 Jump to: Chapter 8 →

1Maˍlaˍhkiˆsaˍdehˆ chi teˇ gʼaˇ lehˬ, Saˍlehnˍ ve hkunˉ hawˉ hkanˇ hpeh‸ leh, mvuh jaˇ ve Gʼuiˬsha ve paw hkuˇ hpeh‸ ve yoˬ. Hkunˉ hawˉ hkanˇ teˇ hpaˍ hta‸ Aˍbraˍhanˍ bawˆ pehˍ taˉ leh kʼaw‸ la chehˇ ve teˇ yanˇ, Maˍlaˍhkiˆsaˍ dehˆ yawˇ hta‸ hpuˇ da‸ leh bon na‸ piˇ ve yoˬ.

2Aˍbraˍhanˍ htawˇ, yawˇ hkʼa gʼa taˍ ve hkʼa peu-eˬ awˬ hkʼaw lo teˇ chi pun teˇ pun yawˇ hta‸ piˇ ve yoˬ. Maˍlaˍhkiˆsaˍdehˆ teh‸ kʼoˆ ve awˬ meh chi lehˬ, hteˇ ve cawˇ ve teˇ ceuˬ ve hkunˉ hawˉ hkanˇ hpeh‸ ve teh‸ kʼoˆ ve yoˬ. Chi hkʼoˆ ka‸, Saˍlehnˍ ve hkunˉ hawˉ hkanˇ hpeh‸ ve teh‸ kʼoˆ ve yoˬ. Tcuhˉ kuiˬ kʼo, dawˇ sha gaˇ sha ve teˇ ceuˬ ve hkunˉ hawˉ hkanˇ hpeh‸ ve teh‸ kʼoˆ taˍ ve yoˬ.

3Yawˇ lehˬ, awˬ pa awˬ e maˇ cawˬ, awˬ ceuˬ awˬ hkʼaˇ ka‸ maˇ cawˬ leh, yawˇ ve a sha‸ awˬ hkuiˉ puiˍ awˬ leh meuˇ maˇ cawˬ. Gʼuiˬsha ve Yaˇ hpu hkʼa shuˍ shuˍ, hkʼaˬ htaˆ ka‸ yawˇ paw hkuˇ hpeh‸ chehˇ ve yoˬ.

4Yawˇ hkʼaˬ ma uiˍ jaˇ ve hta‸ dawˇ nyi sheˍ. Ngaˬ hui ve awˬ puˍ lonˉ Aˍbraˍhanˍ lehˬ, bawˆ da‸ kuiˬ lo gʼa veu laˇ ve mawˇ teˇ hpaˍ awˬ hkʼaw lo, yawˇ hta‸ teˇ chi pun teˇ pun piˇ ve yoˬ.

5Leˍviˆ ve awˬ ceuˬ awˬ hkʼaˇ awˬ hkʼaw lo paw hkuˇ te tuˬ aˉ yaˇ gʼa ve chaw teˇ hpaˍ lehˬ, yawˇ hui ve awˬ viˉ awˬ nyi Iˉsaˍreˍlaˆ chaw teˇ hpaˍ geh teˇ chi pun teˇ pun shaw yuˬ tuˬ, awˬliˇtawˇhkawˇ yawˇ hui hta‸ tawˇ piˇ taˍ ve yoˬ. Iˉsaˍreˍlaˆ chaw teˇ hpaˍ lehˬ, Aˍbraˍhanˍ ve awˬ yaˇ awˬ duˬ hpeh‸ ve htawˇ, yawˇ hui geh gʼa shaw yuˬ ve yoˬ.

6Ya‸ hkʼaˇ, hkunˉ hawˉ hkanˇ oˇ ve teˇ gʼaˇ lehˬ, yawˇ hui ve awˬ ceuˬ awˬ hkʼaˇ maˇ heˆ htawˇ, Aˍbraˍhanˍ geh yawˇ teˇ chi pun teˇ pun gʼa leh, ka ti‸ teˇ hpaˍ gʼa shehˍ hpaˇ hta‸ yawˇ bon na‸ piˇ ve yoˬ.

7Uiˍ ve chaw teˇ gʼaˇ lehˬ, i ve chaw teˇ gʼaˇ hta‸ bon na‸ piˇ ve yoˬ. Awˬ lawn chi ve hta‸ tawˇ gʼawˬ da‸ tuˬ maˇ cawˬ.

8Suh puiˉ ve chaw teˇ hpaˍ lehˬ, chi beu‸ teˇ yanˇ teˇ chi pun teˇ pun hta‸ ha‸ yuˬ ve yoˬ. Te‸ chehˇ ve teh‸ yawˇ awˬ lawn shaˉ hkiˆ hkanˍ taˍ ve chaw teˇ gʼaˇ lehˬ, oˇ ve teˇ yanˇ teˇ chi pun teˇ pun hta‸ ha‸ yuˬ ve yoˬ.

9Shu geh teˇ chi pun teˇ pun ha‸ yuˬ ve Leˍviˆ teˇ gʼa htawˇ, Aˍbraˍhanˍ awˬ hkʼaw lo teˇ chi pun teˇ pun piˇ taˍ peuˬ teh‸ kʼoˆ hpeh‸ ve yoˬ.

10Awˬ lawn kʼo, Maˍlaˍhkiˆsaˍdehˆ lehˬ Aˍbraˍhanˍ hta‸ hpuˇ da‸ ve teˇ yanˇ, Leˍviˆ lehˬ yawˇ ve awˬ puˍ lonˉ Aˍbraˍhanˍ awˬ hkʼaw lo chehˇ taˍ sheˍ ve yoˬ.

11Leˍviˆ chaw hui paw hkuˇ te ve teˇ yanˇ, Iˉsaˍraˍlaˆ chaw hui lehˬ awˬ liˇ tawˇ hkawˇ hta‸ gʼa ve yoˬ. Oˇ htaˇ, Leˍviˆ chaw hui paw hkuˇ te ve awˬ hkʼaw lo chaw yaˇ hui biˇ la gʼa ve hkʼe kʼo, aˬ hto‸ ma te awˬ kaˍ awˬ nu paw hkuˇ teˇ gʼaˇ tawˆ la tuˬ loˍ sheˍ ve le. Chi hkʼoˆ ka‸, paw hkuˇ oˇ ve lehˬ, Aˍronˍ paw hkuˇ hpeh‸ ve awˬ hkʼaˇ hkʼa shuˍ shuˍ maˇ heˆ. Maˍlaˍhkiˆsaˍdehˆ ve awˬ hkʼaˇ hkʼa shuˍ shuˍ hpeh‸ ve yoˬ.

12Awˬ lawn kʼo, paw hkuˇ te ve awˬ ceuˬ awˬ hkʼaˇ hta‸ pa ve teˇ yanˇ, awˬ liˇ tawˇ hkawˇ hta‸ htawˇ gʼa pa ve yoˬ.

13Awˬ lawn chi teˇ hpaˍ Li‸ hpu hkʼaw kʼoˆ taˍ ve awˬ shehˍ hpaˇ teˇ gʼaˇ lehˬ, awˬ kaˍ awˬ nu awˬ ceuˬ awˬ hkʼaˇ hta‸ caˉ da‸ ve yoˬ. Awˬ ceuˬ awˬ hkʼaˇ oˇ ve awˬ hkʼaw lo, teˇ gʼaˇ ka‸ tanˇ kuiˬ lo kanˉ maˇ te jaw.

14Awˬ lawn kʼo, ngaˬ hui ve Jawˇmawˇ Yeˍsuˆ lehˬ, Yuˇda‸ awˬ ceuˬ awˬ hkʼaˇ hpeh‸ ve hta‸ ngaˬ hui hkʼa deh‸ gʼa shiˍ ve yoˬ. Awˬ ceuˬ awˬ hkʼaˇ oˇ ve hta‸ caˉ da‸ ve chaw teˇ hpaˍ paw hkuˇ gʼa te tuˬ ve awˬ lawn Moˉseˍ te‸ chiˉ maˇ kʼoˆ taˍ.

15Maˍlaˍhkiˆsaˍdehˆ paw hkuˇ hpeh‸ ve awˬ hkʼaˇ hkʼa shuˍ shuˍ awˬ kaˍ awˬ nu paw hkuˇ teˇ gʼaˇ tawˆ la peuˬ ve pa taw, paw hkuˇ awˬ ceuˬ kʼaw‸ pa peuˬ ve hta‸ leuˉ leh hkʼa deh‸ gʼa shiˍ ve yoˬ.

16Yawˇ paw hkuˇ hpeh‸ la ve lehˬ, awˬ liˇ tawˇ hkawˇ kʼoˆ taˍ ve hkʼa shuˍ shuˍ, awˬ suhˍ awˬ shaˍ hpawˇ yawˇ paw hkuˇ awˬ ceuˬ awˬ hkʼaˇ cawˇ ve pa taw hpeh‸ la ve maˇ heˆ. Ya‸ hkʼaˇ, maˇ luˬ maˇ suh puiˉ ve a sha‸ te‸ ve kanˇ paˆ hta‸ pa taw yawˇ paw hkuˇ hpeh‸ la ve yoˬ.

17Awˬ lawn kʼo, yawˇ awˬ lawn chi hkʼe shaˉ hkiˆ hkanˍ ve, Nawˬ lehˬ Maˍlaˍhkiˆsaˍdehˆ paw hkuˇ hpeh‸ ve awˬ hkʼaˇ hkʼa shuˍ shuˍ, co co taiˍ taiˍ paw hkuˇ hpeh‸ ve yoˬ, teh‸ Gʼuiˬsha hkanˍ taˍ ve yoˬ.

18Ponˬ laˬ htaˇ piˇ taˍ ve tawˇ hkawˇ lehˬ, awˬ gʼaˇ nuˇ leh te‸ chiˉ awˬ bon maˇ cawˬ ve pa taw, tawˇ hkawˇ oˇ ve hta‸ Gʼuiˬsha teh taˉ ve yoˬ.

19(Awˬ lawn kʼo, awˬliˇtawˇhkawˇ lehˬ teˇ ceuˬ hta‸ ka‸ biˇ la piˇ maˇ gʼa.) Hkʼe te leh, oˇ ve a‸ kehˉ da‸ leuˉ ve dawˇ law tuˬ cawˬ ve teˇ ceuˬ hta‸ Gʼuiˬsha kʼaw‸ pe‸ laˇ ve yoˬ. Dawˇ law tuˬ chi hta‸ pa taw, ngaˬ hui lehˬ Gʼuiˬsha geh lo jiˆ kʼai hpeh‸ ve yoˬ.

20Chaw oˇ ve teˇ hpaˍ lehˬ, hkanˍ taˍ ve maˇ cawˬ ka‸, paw hkuˇ te tuˬ aˉ yaˇ gʼa ve yoˬ.

21Ya‸ hkʼaˇ, Yeˍsuˆ aˉ yaˇ gʼa ve lehˬ, hkanˍ taˍ ve teˇ ceuˬ cawˬ leh gʼa ve yoˬ. Hkanˍ taˍ ve oˇ ve lehˬ, Jawˇmawˇ Gʼuiˬsha hkanˍ taˍ leh, yawˇ kʼaw‸ dawˇ hpfuhˆ tuˬ ve maˇ heˆ. Nawˬ lehˬ co co taiˍ taiˍ paw hkuˇ hpeh‸ ve yoˬ, teh‸ yawˇ hta‸ kʼoˆ piˇ leh hkanˍ taˍ ve yoˬ.

22Chi hta‸ pa taw, da‸ leuˉ ve ka ti‸ shaˉ caˆ chi hta‸ yeˬ chehˇ tuˬ, Yeˍsuˆ lehˬ te shehˍ hpaˇ hpeh‸ ve yoˬ.

23Oˇ htaˇ, paw hkuˇ maˇ maˇ gʼa cawˬ ve yoˬ. Awˬ lawn kʼo, suh ve teˇ ceuˬ hta‸ pa taw yawˇ hui hkʼaˬ htaˆ ka‸ kanˉ te maˇ hpeh‸.

24Ya‸ hkʼaˇ, Yeˍsuˆ lehˬ co co taiˍ taiˍ te‸ chehˇ ve pa taw, hkʼaˬ htaˆ ka‸ yawˇ paw hkuˇ hpeh‸ chehˇ ve yoˬ.

25Chi hta‸ pa taw, yawˇ hta‸ cuˇ leh Gʼuiˬsha geh jiˆ laˬ ve chaw hkʼa peu-eˬ hta‸ yawˇ hkʼaˬ htaˆ ka‸ htaiˍ hkʼaw‸ piˇ tuˬ kanˇ paˆ cawˬ ve yoˬ. Awˬ lawn kʼo, yawˇ hui awˬ pon lawˬ hkawˉ tuˬ, yawˇ hkʼaˬ htaˆ ka‸ te‸ chehˇ ve yoˬ.

26Ngaˬ hui lehˬ, chi hkʼe ve paw hkuˇ lonˉ hta‸ loˍ ve yoˬ. Yawˇ lehˬ, da‸ ve kehˬ ve, ya‸ kuiˬ jiˆ kuiˬ maˇ cawˬ ve, cha‸ chiˆ kuiˬ maˇ cawˬ ve, venˇ baˆ yaˇ hui hta‸ hpaˆ da‸ taˍ ve leh, mvuhˇ naw ma mvuh ve a‸ kehˉ Gʼuiˬ sha yawˇ hta‸ chiˇ taˆ piˇ taˍ ve chaw teˇ gʼaˇ hpeh‸ ve yoˬ.

27Yawˇ lehˬ, awˬ kaˍ awˬ nu paw hkuˇ lonˉ hui hkʼa shuˍ shuˍ, awˉ lawˉ htaˇ a shu yawˇ ve venˇbaˆ awˬ pon, awˬ hkʼaw‸ nawˉ chaw yaˇ teˇ hpaˍ ve venˇ baˆ awˬ pon, teˇ nyi le le tanˇ tuˬ gʼa tanˇ piˇ ve maˇ heˆ. Yawˇ awˬ to hta‸ teˇ pawˆ ceh tiˉ tanˇ piˇ ve yoˬ. Awˬ hkʼaw‸ nawˉ teˇ pawˆ ka‸ kʼaw‸ tanˇ piˇ tuˬ maˇ loˍ.

28Chaw yaˇ hui lehˬ, awˬ gʼaˇ nuˇ puiˉ ve htawˇ, paw hkuˇ lonˉ te tuˬ awˬ liˇ tawˇ hkawˇ yawˇ hui hta‸ aˉ yaˇ piˇ ve yoˬ. Ya‸ hkʼaˇ, awˬliˇtawˇhkawˇ awˬ hkʼaw‸ nawˉ laˬ ve hkanˍ taˍ ve tawˇ teˇ hkawˇ lehˬ, hkʼaˬ htaˆ ka‸ biˇ jaˇ ve Yaˇ hpu teˇ gʼaˇ hta‸ aˉ yaˇ piˇ taˍ ve yoˬ.

← Chapter 6 Jump to: Chapter 8 →