Lamentations 1

Lahu Bible Edited © Thailand Bible Society and Bible Society of Myanmar, 2010, 2020.

Jump to: Chapter 2 →

1Teˇ pawˆ htaˇ, chaw hkʼa biˇ chehˇ taˍ ve Yeˍruˆsaˍlehnˍ venˇ lehˬ, chi beu‸ hkʼaˬ ma gawˬ cu gawˬ pehˆ hpeh‸ chehˇ ve le. Teˇ pawˆ htaˇ, miˬguiˬ chaw ceuˬ teˇ hpaˍ yawˇ hta‸ taˍ uiˍ taˍ mvuh chehˇ ve yoˬ. Ya‸ hkʼaˇ, chi beu‸ yawˇ lehˬ mehˇchawˇma hkʼe hpeh‸ la peuˬ. Shu a‸ kehˉ awˬ me‸ awˬ hponˇ uiˍ ve venˇ lehˬ, chi beu‸ shu ve awˬ ceˬ hpeh‸ la peuˬ.

2Teˇ haˉ tanˇ hkuinˇ yawˇ hawˬ leh mehˆ gʼuiˬ ya‸ la chehˇ ve yoˬ. Yawˇ hta‸ nyi ma sha la piˇ tuˬ te piˇ paˍ awˬ chawˇ teˇ gʼaˇ ka‸ maˇ kʼaw‸ cawˬ. Yawˇ ve awˬ chawˇ teˇ hpaˍ chi beu‸ yawˇ hta‸ kʼaw‸ hpfuhˆ leh, yawˇ ve canˇ paˍ hpeh‸ la peuˬ.

3Yuˇda‸ chaw hui lehˬ, shu gʼa‸ kʼoˬ ve hta‸ gʼa hkanˍ leh, shu ve awˬ ceˬ gʼa te chehˇ ve yoˬ. Yawˇ hui shu ve mvuhˇmiˬ hkʼaw gʼa ca chehˇ leh, yawˇ hui ve mvuhˇmiˬ mehˉ kʼai peuˬ. Yawˇ hui hta‸ canˇ paˍ teˇ hpaˍ hoˆ taˍ leh, ponˬ kuiˬ ya‸ kʼaw maˇ cawˬ.

4Da‸ kehˬ ve awˬ nyi htaˇ, chaw teˇ gʼaˇ ka‸ bon yehˬ hkʼaw lo oˉ kʼoˍ maˇ ca kʼaw‸ pui la-o. Oˇ kaˬ lo kʼa muiˬ hkawˇ kʼa chehˇ ve yaˇ miˇ haˉ teˇ hpaˍ, tu‸ ve hkanˍ ve hta‸ gʼa hkanˍ chehˇ leh, paw hkuˇ teˇ hpaˍ htawˇ hkʼanˇ chehˇ ve yoˬ. Venˇ taˍ meu‸ hpe‸ teˇ hpaˍ gawˬ cu gawˬ pehˆ hpeh‸ kʼai leh Ziˉonˍ venˇ lehˬ, dawˇ haˍ jaˇ chehˇ ve yoˬ.

5Yawˇ ve canˇ paˍ teˇ hpaˍ bawˆ gʼaˇ leh yawˇ yawˇ hui ve la‸ sheh hkʼaw gaˬ peuˬ, Yawˇ venˇbaˆ laiˉ ceuˬ te peuˬ ve pa taw, Gʼuiˬsha yawˇ hta‸ tu‸ hkanˍ piˇ lawˬ ve yoˬ. Yawˇ ve yaˇ teˇ hpaˍ htawˇ, shu hpeh yuˬ leh shiˍ kʼai peuˬ ve yoˬ.

6Yeˍruˆsaˍlehnˍ ve awˬ me‸ awˬ hponˇ luˬ kʼai peuˬ. Yawˇ ve awˬ hoˉ awˬ naˬ teˇ hpaˍ lehˬ, shaˍ bawˆ paˍ hui gʼa‸ yuˬ chehˇ ve pa taw, awˍ meu‸ jaˇ chehˇ leh, gʼaˇ nuˇ kʼai chehˇ ve hkuiˉ zuhˬ hkʼe hpeh‸ la peuˬ.

7Chi beu‸ luˬ kʼai peuˬ ve Yeˍruˆsaˍlehnˍ venˇ lehˬ, aˬ sho-eˬ htaˇ yawˇ ve awˬ me‸ awˬ hponˇ hkʼaˬ ma uiˍ jaˇ ve hta‸ kʼaw‸ dawˇ nawˇ chehˇ ve yoˬ. Yawˇ canˇ paˍ la‸ sheh hkʼaw lo gaˬ ve teˇ yanˇ, yawˇ hta‸ ga piˇ paˍ teˇ gʼaˇ ka‸ maˇ cawˬ. Yawˇ luˬ kʼai ve hta‸, yawˇ ve canˇ paˍ teˇ hpaˍ nyi taˍ leh, gʼuiˬ chehˇ ve yoˬ.

8Yawˇ ve awˬ me‸ awˬ hponˇ mehˉ kʼai peuˬ. Yawˇ awˬ kʼu nyi hpeh‸ leh nyiˉ ya‸ ve hta‸ gʼa hkanˍ peuˬ. Yawˇ hkʼanˇ chehˇ leh, ya‸ taw jaˇ ve awˬ hkʼaw lo, yawˇ ve mehˆ hpfuhˇ hta‸ beh taˍ ve yoˬ. Yeˍruˆsaˍlehnˍ venˇ lehˬ, venˇbaˆ uiˍ jaˇ ve pa taw cha‸ chiˆ jaˇ peuˬ ve yoˬ.

9Yawˇ hkʼaˬ ma cha‸ chiˆ jaˇ ve hta‸ hkʼa tawˍ lehˆ mawˬ hpeh‸ ve yoˬ. Ya‸ hkʼaˇ, yawˇ hkʼaˬ hkʼe hpeh‸ la tuˬ ve hta‸ yawˇ maˇ dawˇ mawˬ. Yawˇ paiˍ ve lehˬ jaˇ ve yoˬ. Yawˇ hta‸ dawˇ sha piˇ shehˍ hpaˇ teˇ gʼaˇ ka‸ maˇ cawˬ. Yawˇ lehˬ, canˇ paˍ ve la‸ sheh hkʼaw lo gaˬ peuˬ leh, Gʼuiˬsha ha kʼaˉ laˇ tuˬ kuˬ chehˇ ve yoˬ.

10Canˇ paˍ teˇ hpaˍ lehˬ, yawˇ ve mawˇ jeˬ hkʼa peu-eˬ hta‸ hiˉ yuˬ kʼai peuˬ. Gʼuiˬsha maˇ lo‸-e tcuh ve bon yehˬ hkʼaw buiˇshaˆaˉnaˆ chaw teˇ hpaˍ lo‸-e chehˇ ve hta‸ yawˇ gʼa mawˬ ve yoˬ.

11Yawˇ ve chaw teˇ hpaˍ hkʼanˇ leh caˇ tuˬ ca toˇ chehˇ ve yoˬ. Yawˇ hui ve mawˇ jeˬ yuˬ leh, caˇ tuˬ pa caˇ chehˇ ve yoˬ. Gʼuiˬsha-oˬ, ngaˬ hkʼaˬ ma gʼa tu‸ gʼa hkanˍ chehˇ ve hta‸ a ciˉ nyi laˇ-oˆ, teh‸ yawˇ bon lawˬ chehˇ ve yoˬ.

12Oˇ kaˬ lo hpanˍ kʼai chehˇ ve chaw hui hta‸ yawˇ nyi taˍ leh, chi hkʼe kʼoˆ piˇ chehˇ ve yoˬ. Ngaˬ hta‸ a ciˉ nyi sheˍ. Chaw teˇ gʼaˇ ka‸ ngaˬ hkʼe taw maˇ gʼa hkanˍ jaw taˬ. Gʼuiˬsha nyi ma zuhˆ jaˇ ve hkʼaw, yawˇ ngaˬ hta‸ chi hkʼe hkanˍ tcuh laˇ ve yoˬ.

13Yawˇ aˬ miˍ hta‸ ce peu laˇ leh, aˬ miˍ oˇ ve ngaˬ awˬ hkʼaw lo to‸ chehˇ ve yoˬ. Yawˇ ngaˬ awˬ pon va htaw taˍ leh, ngaˬ hta‸ miˬ chaˇ hkʼoˆ lo paiˍ piˇ lawˬ ve yoˬ. Oˇ hkʼe te peuˬ hkʼaw‸ nawˉ, yawˇ ngaˬ hta‸ tu‸ kuiˬ hkanˍ kuiˬ hkʼaw lo baˬ taˉ laˇ ve yoˬ.

14Yawˇ lehˬ ngaˬ ve venˇbaˆ teˇ hpaˍ hta‸ shaw hpoˆ leh hpeh tsuh‸ taˍ ve yoˬ. Peuˬ leh venˇbaˆ oˇ ve teˇ hpaˍ ngaˬ ve kʼaw‸ peˍ hta‸ hpeh yu taˍ laˇ ve yoˬ. Venˇbaˆ oˇ ve teˇ hpaˍ hawˇ jaˇ ve pa taw, ngaˬ gʼaˇ nuˇ jaˇ peuˬ ve yoˬ. Gʼuiˬsha lehˬ, ngaˬ hta‸ canˇ paˍ teˇ hpaˍ ve la‸ sheh hkʼaw lo chiˇ a‸ laˇ leh, ngaˬ yawˇ hui hta‸ te‸ chiˉ kʼaw‸ te maˇ gʼa ve yoˬ.

15Ngaˬ ve awˬ gʼaˇ uiˍ jaˇ ve ma‸ yaˇ teˇ hpaˍ hta‸ Gʼuiˬsha nyi taˍ leh, gʼuiˬ yawˬ chehˇ ve yoˬ. Yawˇ lehˬ, ngaˬ ve yaˇ nehˬ teˇ hpaˍ hta‸ te luˬ te sheˆ piˇ tuˬ, ma‸ moˍ lonˉ hta‸ peu laˇ ve yoˬ. A pehˉ meuˇ gʼuiˬ nyiˉ kuiˬ lo keu taˍ ve a pehˉ meuˇ shiˍ hkʼa shuˍ, yawˇ lehˬ ngaˬ ve chaw teˇ hpaˍ hta‸ nyiˉ ceh‸ piˇ ve yoˬ.

16Chi hta‸ pa taw, ngaˬ ve mehˆ shiˍ hkʼaw mehˆ gʼuiˬ hkʼa biˇ tawˆ la chehˇ ve yoˬ. Chaw teˇ gʼaˇ ka‸ ngaˬ hta‸ dawˇ sha tuˬ te laˇ maˇ gʼa. Chaw teˇ gʼaˇ ka‸ ngaˬ hta‸ awˬ gʼaˇ pe‸ laˇ maˇ gʼa. Canˇ paˍ teˇ hpaˍ ngaˬ hta‸ bawˆ gʼaˇ peuˬ. Ngaˬ ve chaw teˇ hpaˍ mawˇ jeˬ te‸ chiˉ maˇ kʼaw‸ cawˬ-o.

17Ngaˬ la‸ sheh che taˍ ve htawˇ, chaw teˇ gʼaˇ ka‸ ngaˬ hta‸ maˇ ga laˇ. Gʼuiˬsha lehˬ, ngaˬ hta‸ ca bawˆ la tuˬ, teˇ hpawˇ le le lo chehˇ ve canˇ paˍ teˇ hpaˍ hta‸ kuˬ yuˬ taˍ peuˬ ve yoˬ. Yawˇ hui ngaˬ hta‸ cha‸ chiˆ ve awˬ ceuˬ hkʼe shawˍ laˇ chehˇ ve yoˬ.

18Gʼuiˬsha lehˬ, hteˇ jaˇ cawˇ jaˇ ve htawˇ, ngaˬ lehˬ yawˇ ve tawˇ hta‸ maˇ na yuˬ. Chaw yaˇ teˇ hpaˍ-oˬ, ngaˬ ve tawˇ hta‸ na leh, ngaˬ hkʼaˬ ma gʼa tu‸ gʼa hkanˍ chehˇ ve hta‸ nyi sheˍ. Ngaˬ ve chaw teˇ hpaˍ hta‸ shu hpeh yuˬ kʼai peuˬ.

19Ngaˬ awˬ chawˇ te da‸ taˍ ve chaw hui hta‸ ngaˬ kuˬ ve yoˬ. Ya‸ hkʼaˇ, yawˇ hui ngaˬ hta‸ maˇ ca ga la. Paw hkuˇ leh awˬ hoˉ awˬ naˬ teˇ hpaˍ lehˬ, venˇ hkʼaw lo caˇ tuˬ ca toˇ chehˇ ve teˇ yanˇ, shu tiˇ pehˍ ve hta‸ gʼa hkanˍ ve yoˬ.

20Gʼuiˬsha-oˬ, ngaˬ hkʼaˬ ma gʼa tu‸ gʼa hkanˍ chehˇ ve hta‸ a ciˉ nyi laˇ sheˍ. Ngaˬ ve venˇbaˆ teˇ hpaˍ hta‸ pa taw, ngaˬ dawˇ haˍ jaˇ leh ngaˬ ve nyi ma hkoˇ kʼai peuˬ. Ya‸ kʼaw teˇ hpaˍ awˬ hkʼoˆ lo chaw yaˇ hui tiˇ pehˍ ve hta‸ gʼa hkanˍ chehˇ leh, yehˬ hkʼaw lo htawˇ suh ve teˇ ceuˬ cawˬ taˍ ve yoˬ.

21Ngaˬ hkʼanˇ chehˇ ve awˬ hkawˇ hta‸ a ciˉ na sheˍ. Ngaˬ hta‸ dawˇ sha la piˇ shehˍ hpaˇ teˇ gʼaˇ ka‸ maˇ cawˬ. Nawˬ ngaˬ hta‸ chi hkʼe tu‸ hkanˍ piˇ lawˬ ve hta‸ ngaˬ ve canˇ paˍ teˇ hpaˍ nyi taˍ leh ha lehˬ chehˇ ve yoˬ. Nawˬ ka ti‸ te taˍ ve awˬ nyi haˆ haˆ gaˬ la piˇ-oˆ. Chi beu‸ ngaˬ gʼa hkanˍ chehˇ ve hkʼe, ngaˬ ve canˇ paˍ teˇ hpaˍ hta‸ htawˇ kʼaw‸ hkanˍ tcuh piˇ-oˆ.

22Yawˇ hui te chehˇ ve haiˬ ve kanˉ teˇ hpaˍ awˬ pon, yawˇ hui hta‸ ciˍ yanˍ piˇ-oˆ. Ngaˬ venˇbaˆ te ve pa taw, nawˬ ngaˬ hta‸ ciˍ yanˍ laˇ chehˇ ve hkʼe, yawˇ hui hta‸ htawˇ ciˍ yanˍ piˇ-oˆ. Ngaˬ lehˬ, dawˇ tui‸ gaˇ tui‸ jaˇ ve hkʼaw hkʼanˇ chehˇ leh, nyi ma htawˇ luˬ jaˇ peuˬ ve yoˬ, teh‸ kʼoˆ chehˇ ve yoˬ.

Jump to: Chapter 2 →