Lamentations 3

Lahu Bible Edited © Thailand Bible Society and Bible Society of Myanmar, 2010, 2020.

← Chapter 2 Jump to: Chapter 4 →

1Ngaˬ lehˬ, Gʼuiˬsha ciˍ yanˍ laˇ ve hta‸ gʼa hkanˍ ve chaw teˇ gʼaˇ hpeh‸ ve yoˬ.

2Yawˇ lehˬ, ngaˬ hta‸ naˆ ho‸ jaˇ kuiˬ lo gʼa‸ kʼoˬ laˇ leh,

3ngaˬ hta‸ teˇ pawˆ peuˬ teˇ pawˆ jaw‸ hpehˇ laˇ ve yoˬ.

4Yawˇ lehˬ ngaˬ ve awˬ shaˍ hta‸ kuiˇ kʼai tuˬ te laˇ leh, ngaˬ ve awˬ mu‸ ku hta‸ hteh kʼai piˇ lawˬ ve yoˬ.

5Yawˇ ngaˬ hta‸ hkanˍ haˍ jaˇ ve htawnˍ hkʼaw yuˬ keu laˇ ve yoˬ.

6Naˆ ho‸ leh kuiˇ nuˬ jaˇ ve chaw suh taˍ kuiˬ lo yawˇ ngaˬ hta‸ chehˇ tcuh laˇ ve yoˬ.

7Yawˇ ngaˬ hta‸ sho caˆ yuˬ hpeh leh, ngaˬ lehˬ gʼa ponˬ tuˬ dawˇ law kuiˬ maˇ cawˬ ve htawnˍ yaˇ hpeh‸ ve yoˬ.

8Ngaˬ hta‸ ga laˇ tuˬ gʼaˇ hte‸ kuˬ ve htawˇ, ngaˬ kuˬ hkawˇ hta‸ Gʼuiˬsha maˇ na laˇ.

9Ngaˬ lehˬ ya‸ kʼaw hteˇ lehˍ toˇ maˇ gʼa leh, ngaˬ mehˆ gʼuˇ suhˍ lo haˉ pui gʼo‸ pa ceh tiˉ tawˍ taˍ laˇ ve yoˬ.

10Yawˇ lehˬ yehˬ miˉ tawˍ hkʼa shuˍ ngaˬ hta‸ law taˍ leh, laˇ caˬ shiˉ hkʼa shuˍ ngaˬ hta‸ pawˆ che‸ laˇ ve yoˬ.

11Yawˇ ngaˬ hta‸ gʼa‸ yuˬ leh, ngaˬ hta‸ tzuh‸ baˬ taˉ laˇ ve yoˬ.

12Yawˇ ve hkaˆ yuˬ leh, ngaˬ hta‸ mawˍ taˍ laˇ ve yoˬ.

13Yawˇ lehˬ, ngaˬ hta‸ hkaˆ ce teˇ hpaˍ bawˆ tcuhˉ laˇ ve yoˬ.

14Chaw yaˇ teˇ hpaˍ, teˇ nyi tanˇ vanˇ ngaˬ hta‸ hpoˆ gʼuiˬ chehˇ ve yoˬ. Ngaˬ lehˬ, yawˇ hui awˬ pon gʼuiˬ yawˬ tuˬ hpeh‸ ve yoˬ.

15Yawˇ ngaˬ hta‸ hkʼaˇ jaˇ ve awˬ gʼuiˬ taw laˇ leh, hkʼaˇ jaˇ ve caˇ tuˬ caˍ laˇ ve yoˬ.

16Yawˇ lehˬ, ngaˬ ve mehˆ hpfuhˇ hta‸ miˬ chaˇ hkʼoˆ gui htu-iˍ laˇ ve pa taw, ngaˬ ve ciˍ teˇ hpaˍ hkʼeh‸ ve yoˬ.

17Chehˇ sha cawˬ sha ve, gawˬ lehˍ ve, leh ha lehˬ dawˇ sha ve awˬ ceuˬ chi teˇ hpaˍ hta‸ ngaˬ leunˇ kʼai peuˬ.

18Ngaˬ lehˬ, maw maw gʼa te‸ chehˇ tuˬ ve maˇ heˆ. Ngaˬ Gʼuiˬsha hta‸ dawˇ law chehˇ ve awˬ ceuˬ htawˇ mehˉ kʼai peuˬ.

19Ngaˬ gʼa hkanˍ chehˇ ve a naˍ leh, ngaˬ yehˬ maˇ kʼaw‸ cawˬ ve awˬ lawn chi teˇ hpaˍ hta‸ dawˇ nyi htaˇ, hkʼaˇ jaˇ ve awˬ taw‸ ma hkʼe hpeh‸ ve yoˬ.

20Awˬ lawn oˇ ve teˇ hpaˍ hta‸ ngaˬ hkʼaˬ htaˆ ka‸ dawˇ nyi chehˇ leh, ngaˬ ve co ha gʼaˇ nuˇ jaˇ ve yoˬ.

21Ya‸ hkʼaˇ, chi ve hta‸ ngaˬ kʼaw‸ dawˇ nawˇ la htaˇ, ngaˬ dawˇ law kuiˬ kʼaw‸ cawˬ la ve yoˬ.

22Gʼuiˬsha lehˬ, hkʼaˬ htaˆ ka‸ ha‸ pehnˇ uiˍ jaˇ leh ha kʼaˉ puiˉ jaˇ ve yoˬ.

23Oˇ ve teˇ hpaˍ lehˬ, mvuhˇ shawˉ mvuhˇ ba la leh mvuhˇ nyi tawˆ la ve hkʼa shuˍ hpeh‸ ve yoˬ.

24Gʼuiˬsha teˇ gʼaˇ ceh tiˉ ngaˬ ve dawˇ law kuiˬ hpeh‸ leh, ngaˬ yawˇ hta‸ dawˇ law chehˇ ve yoˬ.

25Gʼuiˬsha lehˬ, yawˇ hta‸ gʼaˇ va ve chaw hkʼa peu-eˬ hta‸ awˬ bon na‸ piˇ ve yoˬ.

26Chi hta‸ pa taw, htaiˍ hkʼaw‸ laˇ tuˬ ngaˬ hui yeunˇ hkanˍ leh law taˍ cawˇ ve yoˬ.

27A sha‸ i sheˍ htaˇ, yeunˇ hkanˍ puiˉ la tuˬ te jawˬ ve teˇ ceuˬ lehˬ, da‸ jaˇ ve yoˬ.

28Ngaˬ hui gʼa tu‸ gʼa hkanˍ ve teˇ yanˇ, yeunˇ hkanˍ ve hkʼaw ta‸ iˉ gawˬ lehˍ mui taˍ cawˇ ve yoˬ.

29Ngaˬ hui boˆ taˍ leh, yawˇ ve a loˍ hta‸ ca cawˇ ve yoˬ. Oˇ hkʼe te ve kʼo, dawˇ law kuiˬ cawˬ la tuˬ sheˍ ve yoˬ.

30Shu dawˆ leh maˇ shawˍ maˇ caˆ te laˇ ve htawˇ, ngaˬ hui yeunˇ hkanˍ cawˇ ve yoˬ.

31Gʼuiˬsha lehˬ, ha kʼaˉ puiˉ jaˇ leh ngaˬ hui hta‸ co co taiˍ taiˍ chiˇ baˬ taˍ laˇ tuˬ ve maˇ heˆ.

32Yawˇ ngaˬ hui hta‸ dawˇ haˍ tcuh laˇ ve htawˇ, ngaˬ hui hta‸ ha‸ ve teˇ ceuˬ awˬ gʼaˇ uiˍ jaˇ ve yoˬ.

33Yawˇ ngaˬ hui hta‸ dawˇ haˍ piˇ lawˬ ve pa taw, yawˇ ha lehˬ chehˇ ve maˇ heˆ.

34Htawnˍ hkʼaw lo ngaˬ hui gʼa tu‸ hkanˍ chehˇ ve hta‸ Gʼuiˬsha shiˍ taˍ ve yoˬ.

35Shu ngaˬ hui hta‸ maˇ hteˇ maˇ cawˇ te laˇ ve hta‸ ka‸ yawˇ shiˍ chehˇ ve yoˬ.

36Shaˉ nanˉ hkʼaw maˇ hteˇ maˇ cawˇ ve kanˉ hta‸ te chehˇ ve hta‸ htawˇ, yawˇ shiˍ chehˇ ve yoˬ.

37Gʼuiˬsha a loˍ maˇ cawˇ ve kʼo, chaw teˇ gʼaˇ ka‸ te‸ chiˉ te tawˆ la maˇ gʼa.

38Yawˇ tawˇ piˇ ve teˇ yanˇ, da‸ ve leh maˇ da‸ ve awˬ ceuˬ hpeh‸ tawˆ la ve yoˬ.

39Ngaˬ hui venˇbaˆ te ve pa taw ciˍ yanˍ ve hta‸ gʼa hkanˍ ve teˇ yanˇ, aˬ hto‸ ma pa taw ngaˬ hui hkʼanˇ tuˬ loˍ ve le.

40Ngaˬ hui te chehˇ ve awˬ ceuˬ teˇ hpaˍ hta‸ chaˬ nyi leh, Gʼuiˬsha geh kʼaw‸ hpfuhˆ kʼo‸-e veuˬ.

41Mvuhˇ naw ma hkʼoˆ chehˇ ve Gʼuiˬsha hta‸ ngaˬ hui ve nyi ma hpeu‸ maw piˇ leh lawˬ hkawˉ-a veuˬ.

42Ngaˬ hui kʼaw‸ hpfuhˆ leh venˇbaˆ te peuˬ. Hkʼe te leh Gʼuiˬsha-oˬ, nawˬ lehˬ ngaˬ hui ve venˇbaˆ hta‸ maˇ hpehˇ laˇ.

43Nawˬ ngaˬ hui hta‸ gʼa‸ yuˬ leh, tiˇ pehˍ laˇ ve yoˬ. Nawˬ nyi ma zuhˆ ve pa taw, nawˬ ve ha kʼaˉ puiˉ ve teˇ ceuˬ faˉ taˍ peuˬ.

44Nawˬ nyi ma zuhˆ ve teˇ ceuˬ moˬ hkʼa shuˍ naˆ ho‸ jaˇ ve pa taw, ngaˬ hui ve bon lawˬ hkawˇ teˇ hpaˍ nawˬ geh lo gaˬ maˇ hpeh‸ ve yoˬ.

45Miˬguiˬ chaw ceuˬ chi ma ve mehˆ gʼuˇ suhˍ lo, nawˬ ngaˬ hui hta‸ chiˇ baˬ taˍ ve awˬ ceuˬ hkʼe hpeh‸ la piˇ lawˬ ve yoˬ.

46Ngaˬ hui ve canˇ paˍ teˇ hpaˍ, ngaˬ hui hta‸ hkʼa mvuhˇ hkʼa na kʼoˆ leh maˇ shawˍ maˇ caˆ te laˇ chehˇ ve yoˬ.

47Ngaˬ hui lehˬ, te luˬ te sheˆ ve hta‸ gʼa hkanˍ leh, hkʼaˬ htaˆ ka‸ gʼa kawˆ jehˇ chehˇ ve yoˬ.

48Ngaˬ ve chaw teˇ hpaˍ luˬ kʼai sheˆ kʼai ve pa taw, ngaˬ ve mehˆ gʼuiˬ iˉ kaˆ lawˬ hkʼe tawˆ la tcuhˉ taˍ ve yoˬ.

49Gʼuiˬsha nyi ya‸ peu laˇ leh ngaˬ hui hta‸ mawˬ htaˇ hkʼa gaˬ,

50ngaˬ hui ve mehˆ gʼuiˬ lehˬ, iˉ kaˆ lawˬ hkʼa shuˍ ya‸ la tuˬ sheˍ ve yoˬ.

51Venˇ hkʼaw chehˇ taˍ ve yaˇ miˇ teˇ hpaˍ hkʼaˬ hkʼe hpeh‸ la peuˬ ve hta‸ ngaˬ gʼa mawˬ ve teˇ yanˇ, ngaˬ dawˇ haˍ jaˇ ve yoˬ.

52Ngaˬ te ya‸ kuiˬ te‸ chiˉ maˇ cawˬ ve htawˇ, ngaˬ lehˬ ngaˆ ehˉ hkʼa shuˍ canˇ paˍ teˇ hpaˍ htaw taˍ ve va hta‸ yaw chehˇ taˍ peuˬ.

53Yawˇ hui ngaˬ hta‸ miˬ kʼoˍ hkʼaw awˬ te‸ te‸ baˬ keu laˇ leh, haˉ pui shiˍ yuˬ tsuhˇ taˍ laˇ ve yoˬ.

54Ngaˬ hta‸ iˉ kaˆ hoˆ beh laˇ chehˇ leh, ngaˬ lehˬ gʼa suh tuˬ yoˬ teh‸ dawˇ ve yoˬ.

55Gʼuiˬsha-oˬ, miˬ kʼoˍ hkʼaw chehˇ taˍ leh ngaˬ nawˬ hta‸ kuˬ chehˇ ve yoˬ.

56Ngaˬ kuˬ chehˇ ve awˬ hkawˇ hta‸ nawˬ gʼa kaˇ peuˬ ve yoˬ.

57Taˇ kawˆ, teh‸ nawˬ ngaˬ hta‸ kʼaw‸ yaw hkʼaw‸ laˇ ve yoˬ.

58Gʼuiˬsha-oˬ, nawˬ ngaˬ hta‸ htaiˍ hkʼaw‸ laˇ leh ngaˬ ve a sha‸ hta‸ ponˬ laˇ ve yoˬ.

59Ngaˬ hpawˇ lo chehˇ leh suhˉ jehˬ laˇ-oˆ. Yawˇ hui ngaˬ hta‸ hkʼaˬ hkʼe te laˇ peuˬ ve hta‸ nawˬ shiˍ chehˇ ve yoˬ.

60Canˇ paˍ teˇ hpaˍ ngaˬ hta‸ hkʼaˬ ma canˇ leh, ngaˬ luˬ kʼai tuˬ hkʼaˬ hkʼe te laˇ taˍ peuˬ ve hta‸ nawˬ shiˍ chehˇ ve yoˬ.

61Gʼuiˬsha-oˬ, yawˇ hui ngaˬ hta‸ hkʼa mvuhˇ hkʼa na kʼoˆ chehˇ ve awˬ hkawˇ hta‸ nawˬ gʼa kaˇ taˍ peuˬ leh, yawˇ hui te chehˇ ve kanˉ hta‸ nawˬ shiˍ ve yoˬ.

62Teˇ nyi tanˇ vanˇ yawˇ hui ngaˬ ve awˬ lawn kʼoˆ da‸ leh, awˬ hkʼaˇ gu chehˇ ve yoˬ.

63Mvuhˇ shawˉ htaˇ ka‸ te leh mvuhˇ hpeu‸ htaˇ hkʼa gaˬ, yawˇ hui ngaˬ hta‸ hkʼa mvuhˇ hkʼa na kʼoˆ chehˇ ve yoˬ.

64Gʼuiˬsha-oˬ, yawˇ hui oˇ hkʼe te chehˇ ve pa taw, yawˇ hui hta‸ ciˍ yanˍ piˇ-oˆ.

65Yawˇ hui hta‸ hkeu piˇ leh, nyi ma luˬ kʼai tuˬ te piˇ-oˆ.

66Yawˇ hui hta‸ gʼa‸ yuˬ leh, miˬguiˬ hkʼoˆ lo shiˆ baˬ piˇ-oˆ.

← Chapter 2 Jump to: Chapter 4 →

Recommended Reading

Commentary Lamentations Commentaries → Devotional Lamentations Devotional Guide → Get This Bible Lahu Bible Edited © Thailand Bible Society and Bible Society of Myanmar, , . Study Bible →