Lamentations 4

Lahu Bible Edited © Thailand Bible Society and Bible Society of Myanmar, 2010, 2020.

← Chapter 3 Jump to: Chapter 5 →

1Awˬ gʼeuˆ ba chehˇ ve ngaˬ hui ve shi lehˬ, chi beu‸ awˬ gʼeuˆ mehˉ kʼai peuˬ. Bon yehˬ ve haˉ pui shiˍ teˇ hpaˍ, ya‸ kʼaw hkʼoˆ lo baˬ taˍ ve yoˬ.

2Ziˉonˍ yaˇ nehˬ teˇ hpaˍ lehˬ, ngaˬ hui awˬ pon shi hkʼa shuˍ awˬ hpfuhˇhkʼaˆ jaˇ ve yoˬ. Ya‸ hkʼaˇ, chi beu‸ yawˇ hui lehˬ je‸ mu‸ hkʼu hkʼa shuˍ shawˍ taˍ ve hta‸ gʼa hkanˍ ve yoˬ.

3Heh hpuiˇ awˬ ma peuˍ lehˬ, yawˇ ve awˬ yehˇ teˇ hpaˍ hta‸ ha‸shaˉ puiˉ ve yoˬ. Ya‸ hkʼaˇ, ngaˬ ve chaw teˇ hpaˍ lehˬ, kaˍlaˍoˆ ngaˆ hkʼa shuˍ, a shu yawˇ ve yaˇ hta‸ ha‸ shaˉ piˇ hkawˇ maˇ shiˍ.

4Yawˇ hui lehˬ, a shu yawˇ ve yaˇ hta‸ meu‸ suh kaˆ suh piˇ chehˇ ve yoˬ. Yaˇ ehˉ teˇ hpaˍ lehˬ, caˇ tuˬ lawˬ caˇ chehˇ ve htawˇ, chaw teˇ gʼaˇ ka‸ yawˇ hui hta‸ maˇ caˍ piˇ.

5Teˇ pawˆ htaˇ, da‸ jaˇ ve caˇ tuˬ gʼa caˇ chehˇ ve chaw hui lehˬ, chi beu‸ ya‸ kʼaw hpuiˇ lo meu‸ suh chehˇ ve yoˬ. Paw sha ve chaw hui lehˬ, chi beu‸ ya‸ kʼaw hpuiˇ lo ca gʼawˆ caˇ toˇ chehˇ ve yoˬ.

6Ngaˬ ve chaw teˇ hpaˍ lehˬ, Sawˉdonˍ venˇ yaˇ teˇ hpaˍ a‸ kehˉ ciˍ yanˍ ve hta‸ gʼa hkanˍ peuˬ. Venˇ oˇ ve lehˬ, Gʼuiˬsha ve la‸ sheh hkʼaw lo la‸ haˉ luˬ kʼai ve yoˬ.

7Ngaˬ hui ve jawˇmawˇ yaˇ teˇ hpaˍ lehˬ, a ngeu hkʼa shuˍ da‸ kehˬ jaˇ ve yoˬ. Yawˇ hui lehˬ, chehˇ sha leh awˬ gʼaˇ awˬ shaˉ hkʼa biˇ cawˬ ve yoˬ.

8Ya‸ hkʼaˇ, chi beu‸ yawˇ hui lehˬ ya‸ kʼaw hpuiˇ lo zuh‸ taˍ leh, mehˆ hpfuhˇ naˆ-ehˍ hpeh‸ ve pa taw, shu yawˇ hui hta‸ maˇ shiˍ. Yawˇ hui ve awˬ guiˬ kʼuˉ teˇ hpaˍ htawˇ, suhˆ hkʼa shuˍ goˇ kʼai leh, awˬ mu‸ ku hta‸ nehˉ taˍ peuˬ.

9Ma‸ bawˆ kuiˬ lo suh-e ve chaw teˇ hpaˍ lehˬ, awˬ hkʼaw‸ nawˉ suh-e ve chaw teˇ hpaˍ a‸ kehˉ da‸ leuˉ ve yoˬ. Yawˇ hui caˇ tuˬ meu‸ jaˇ leh, awˬ meu-eˇ awˬ meu-eˇ shaˉ leh kʼai ve yoˬ.

10Ngaˬ ve chaw teˇ hpaˍ awˬ hkʼoˆ lo gaˬ la ve luˬ ve sheˆ ve awˬ ceuˬ lehˬ kawˆ tuˬ uiˍ jaˇ ve yoˬ. Ha kʼaˉ puiˉ ve awˬ e teˇ hpaˍ a shu yawˇ ve yaˇ hta‸ caˉ caˇ chehˇ ve yoˬ.

11Gʼuiˬsha lehˬ, nyi ma zuhˆ jaˇ peuˬ ve yoˬ. Yawˇ lehˬ, Ziˉonˍ venˇ hkʼaw aˬ miˍ ceh leh, venˇ oˇ ve hta‸ to‸ piˇ lawˬ ve yoˬ.

12Yeˍruˆsaˍlehnˍ venˇ hkʼaw canˇ paˍ teˇ hpaˍ lo‸-e gaˬ tuˬ yoˬ, teh‸ hkʼaˬ ve chaw teˇ gʼaˇ maˇ kʼoˆ, jawˇmawˇ hkʼaˬ ve teˇ gʼaˇ maˇ kʼoˆ, maˇ yonˍ.

13Ya‸ hkʼaˇ, venˇ oˇ ve luˬ kʼai ve yoˬ. Awˬ lawn kʼo, yawˇ ve tcuh kaˍ paˍ teˇ hpaˍ venˇbaˆ te leh, yawˇ ve paw hkuˇ teˇ hpaˍ htawˇ te‸ chiˉ venˇbaˆ maˇ cawˬ ve chaw hui hta‸ suh tuˬ te piˇ chehˇ ve pa taw yoˬ.

14Yawˇ ve awˬ hoˉ awˬ naˬ teˇ hpaˍ lehˬ, mehˆ cuˉ paˍ hkʼa shuˍ venˇ hkʼaw lo te toˇ chehˇ ve yoˬ. Yawˇ hui hta‸ awˬ suhˍ ngawˉ taˍ ve pa taw, chaw teˇ gʼaˇ ka‸ maˇ ca htawˇ.

15Tawˆ kʼai loˬ. Nawˬ lehˬ cha‸ chiˆ kʼai peuˬ. Ngaˬ hui hta‸ taˇ ca htawˇ la, teh‸ chaw yaˇ teˇ hpaˍ kuˬ chehˇ ve yoˬ. Hkʼe te leh, yawˇ hui mvuhˇmiˬ teˇ peˆ peuˬ teˇ peˆ lo ca te toˇ chehˇ ve yoˬ. Chaw teˇ gʼaˇ ka‸ yawˇ hui hta‸ maˇ ha‸ yuˬ.

16Gʼuiˬsha yawˇ hui hta‸ maˇ kʼaw‸ nyi piˇ. Yawˇ hui hta‸ hpaˆ da‸ kʼai piˇ lawˬ ve yoˬ. Ngaˬ hui ve paw hkuˇ leh awˬ hoˉ awˬ naˬ teˇ hpaˍ hta‸ ka‸ yawˇ maˇ kʼaw‸ nyi piˇ ve yoˬ.

17Ngaˬ hui lehˬ, ga laˇ shehˍ hpaˇ hta‸ hkʼaˬ mawˬ law nyi chehˇ ve htawˇ maˇ gaˬ la. Ngaˬ hui hta‸ te‸ chiˉ ga laˇ maˇ gʼa ve chaw ceuˬ hta‸ ngaˬ hui law nyi chehˇ ve yoˬ.

18Canˇ paˍ teˇ hpaˍ ngaˬ hui hta‸ law chehˇ ve yoˬ. Ngaˬ hui ca te toˇ maˇ haˆ. Ngaˬ hui ve awˬ yanˇ ponˬ peuˬ leh, awˬ leh meuˇ gaˬ la peuˬ.

19Yawˇ hui lehˬ, aˉ ceˬ a‸ kehˉ gehˬ jaˇ leh, ngaˬ hui hta‸ gʼa‸ yuˬ laˇ chehˇ ve yoˬ. Yawˇ hui lehˬ hkʼaw hkʼoˆ lo ngaˬ hui ve hkui ha hta‸ gʼa‸ chaw laˬ leh, heh puiˉ hkʼaw lo jaˆ taˍ leh ngaˬ hui hta‸ hpeh yuˬ laˇ ve yoˬ.

20Ngaˬ hui ve gʼaˇ va kuiˬ hpeh‸ leh ngaˬ hui hta‸ ha‸ shaˉ laˇ tuˬ, ngaˬ hui nyi hkʼaˇ suh leh Gʼuiˬsha leuˆ yuˬ taˍ ve jawˇmawˇ hta‸ yawˇ hui hpeh yuˬ ve yoˬ.

21Eˇdonˍ leh Uˉzaˆ venˇ yaˇ teˇ hpaˍ-oˬ, nawˬ hui ha lehˬ chehˇ hpeh‸ sheˍ htaˇ, gʼaˇ hte‸ gʼuiˬ chehˇ-oˆ. Nawˬ hui gʼa luˬ gʼa sheˆ tuˬ ve awˬ yanˇ gaˬ la chehˇ ve yoˬ. Nawˬ hui htawˇ awˬ kʼu nyi hpeh‸ leh gʼa ya‸ taw tuˬ yoˬ.

22Ziˉonˍ venˇ lehˬ, yawˇ te ya‸ taˍ ve venˇbaˆ awˬ pon gʼa hkanˍ peuˬ. Gʼuiˬsha ngaˬ hui hta‸ shu ve awˬ ceˬ kʼaw‸ te tcuh laˇ tuˬ ve maˇ heˆ. Ya‸ hkʼaˇ Eˇdonˍ venˇ-oˬ, Gʼuiˬsha nawˬ ve venˇbaˆ hta‸ hpeu‸ tawˆ leh, nawˬ hta‸ ciˍ yanˍ laˇ tuˬ yoˬ.

← Chapter 3 Jump to: Chapter 5 →