Lamentations 2

Lahu Bible Edited © Thailand Bible Society and Bible Society of Myanmar, 2010, 2020.

← Chapter 1 Jump to: Chapter 3 →

1Gʼuiˬsha lehˬ, nyi ma zuhˆ jaˇ ve hkʼaw Ziˉonˍ venˇ hta‸ naˆ ho‸ kʼai piˇ lawˬ ve yoˬ. Awˬ me‸ awˬ hponˇ cawˬ ve venˇ oˇ ve hta‸ yawˇ luˬ kʼai piˇ ve yoˬ. Yawˇ nyi ma zuhˆ ve awˬ nyi htaˇ, yawˇ ve bon yehˬ hta‸ ka‸ baˬ taˉ ve yoˬ.

2Gʼuiˬsha lehˬ, Yuˇda‸ mvuhˇmiˬ hkʼaw cawˬ ve hkʼaˆ hkʼa peu-eˬ hta‸ maˇ ha kʼaˉ piˇ leh te luˬ piˇ ve yoˬ. Mvuhˇmiˬ hta‸ shaw chehˇ ve ta‸ teˇ hpaˍ hta‸ ka‸ yawˇ te luˬ piˇ leh, mvuhˇmiˬ oˇ ve hta‸ maˇ kʼoˆ, awˬ hoˉ awˬ naˬ teˇ hpaˍ hta‸ maˇ kʼoˆ, yawˇ awˬ me‸ awˬ hponˇ luˬ kʼai piˇ lawˬ ve yoˬ.

3Nyi ma zuhˆ jaˇ ve hkʼaw, yawˇ lehˬ Iˉsaˍreˍlaˆ ve awˬ gʼaˇ awˬ shaˉ hta‸ nuˇ kʼai piˇ ve yoˬ. Canˇ paˍ gaˬ la ve teˇ yanˇ, yawˇ ngaˬ hui hta‸ maˇ ga laˇ. Yawˇ lehˬ, aˬ miˍ hkʼa shuˍ ngaˬ hui hta‸ te luˬ laˇ ve yoˬ.

4Yawˇ lehˬ, canˇ paˍ hkʼa shuˍ ngaˬ hui hta‸ hkaˆ htaw mawˍ taˍ laˇ ve yoˬ. Ngaˬ hui ve ha lehˬ kuiˬ hpeh‸ ve chaw teˇ hpaˍ hta‸ ka‸ tiˇ pehˍ laˇ ve yoˬ. Yeˍruˆsaˍlehnˍ venˇ chi hkʼaw ngaˬ hui lehˬ, yawˇ nyi ma zuhˆ ve hta‸ gʼa leh‸ nyi chehˇ taˍ peuˬ.

5Canˇ paˍ hkʼa shuˍ, Gʼuiˬsha lehˬ Iˉsaˍreˍlaˆ chaw hui hta‸ te luˬ te sheˆ piˇ peuˬ ve yoˬ. Yawˇ lehˬ, ta‸ yehˬ leh hawˉ yehˬ teˇ hpaˍ hta‸ te luˬ peuˬ ve yoˬ. Yawˇ lehˬ, Yuˇda‸chaw hui awˬ hkʼoˆ lo maˇ peuˬ maˇ leh puiˉ ve dawˇ haˍ tuˬ awˬ ceuˬ gaˬ la piˇ taˍ ve yoˬ.

6Ngaˬ hui oˉ kʼoˍ pui chehˇ ve bon yehˬ hta‸, yawˇ dawˆ paˆ laˇ peuˬ. Da‸ kehˬ ve awˬ nyi teˇ hpaˍ leh shinˉ nyi teˇ hpaˍ hta‸ yawˇ yuˬ baˬ peuˬ. Jawˇmawˇ leh paw hkuˇ teˇ hpaˍ htawˇ, yawˇ nyi ma zuhˆ ve hta‸ gʼa leh‸ nyi taˍ peuˬ.

7Gʼuiˬsha lehˬ, yawˇ ve tuˉ tanˇ kuiˬ leh yawˇ ve da‸ kehˬ ve bon yehˬ hta‸ baˬ taˉ peuˬ. Bon yehˬ hta‸ te luˬ tuˬ, yawˇ lehˬ canˇ paˍ teˇ hpaˍ hta‸ a hkaw-anˬ piˇ taˍ peuˬ. Teˇ pawˆ htaˇ ngaˬ hui ha lehˬ ha kʼa oˉ kʼoˍ pui jaw ve bon yehˬ hkʼaw lo, yawˇ hui ha lehˬ ha kʼa kuˬ chehˇ ve yoˬ.

8Ziˉonˍ ve lanˇ venˇ teˇ hpaˍ hta‸ te luˬ piˇ tuˬ, Gʼuiˬsha dawˇ cheˆ taˍ peuˬ. Oˇ ve teˇ hpaˍ hta‸ te luˬ piˇ tuˬ, yawˇ hkʼa deh‸ shawˍ nyi tehˆ nyi taˍ peuˬ. Ta‸ yehˬ leh lanˇ venˇ teˇ hpaˍ chi beu‸ luˬ kʼai peuˬ.

9Venˇ taˍ meu‸ hpe‸ teˇ hpaˍ htawˇ luˬ kʼai peuˬ. Jawˇmawˇ leh awˬ me‸ awˬ hponˇ cawˬ ve chaw teˇ hpaˍ, chi beu‸ shu ve mvuhˇmiˬ hkʼaw chehˇ taˍ peuˬ. Awˬliˇtawˇhkawˇ maˍ piˇ ve teˇ ceuˬ maˇ kʼaw‸ cawˬ leh, tcuh kaˍ paˍ teˇ hpaˍ htawˇ Gʼuiˬsha geh te‸ chiˉ hkawˇ maˇ kʼaw‸ gʼa kaˇ ve yoˬ.

10Yeˍruˆsaˍlehnˍ venˇ hkʼaw chehˇ ve chaw mawˇ teˇ hpaˍ miˬ chaˇ hkʼoˆ lo ta‸ iˉ gawˬ lehˍ jo mui chehˇ ve yoˬ. Yawˇ hui meh htuˉ pui hpa veu‸ deh leh, oˉ kʼoˍ hkʼoˆ lo je‸ meu-e hkaˆ pfuhˍ taˍ ve yoˬ. Yaˇ miˇ haˉ teˇ hpaˍ htawˇ, miˬ chaˇ hkʼoˆ lo boˆ chehˇ taˍ ve yoˬ.

11Ngaˬ hawˬ jaˇ peuˬ ve pa taw, ngaˬ ve mehˆ shiˍ gʼaˇ nuˇ kʼai peuˬ. Ngaˬ ve nyi ma htawˇ, dawˇ tui‸ jaˇ ve yoˬ. Ngaˬ ve chaw teˇ hpaˍ luˬ kʼai sheˆ kʼai peuˬ ve pa taw ngaˬ dawˇ haˍ jaˇ leh gʼaˇ nuˇ kʼai peuˬ. Yaˇ ehˉ teˇ hpaˍ lehˬ, ya‸ kʼaw hkʼoˆ lo paˍ suh-e chehˇ taˍ ve yoˬ.

12Awˍ meu‸ leh iˉ kaˆ shiˉ jaˇ ve hkʼaw, yawˇ hui a shu yawˇ ve awˬ e hta‸ kuˬ chehˇ ve yoˬ. Hkʼaw kuiˬ naˬ kuiˬ cawˬ ve chaw hkʼa shuˍ, yawˇ hui ya‸ kʼaw hkʼoˆ paiˍ taˍ ve yoˬ. Awˬ leh meuˇ yawˇ hui lehˬ a shu yawˇ awˬ e ve la‸ sheh hkʼaw suh-e ve yoˬ.

13Ngaˬ ha‸ jaˇ ve Yeˍruˆsaˍlehnˍ-oˬ, ngaˬ hkʼaˬ hkʼe gʼa kʼoˆ tuˬ le. Ngaˬ nawˬ hta‸ hkʼaˬ hkʼe te dawˇ sha laˇ gʼa tuˬ le. Chaw teˇ gʼaˇ ka‸ chi taw taw maˇ gʼa tu‸ hkanˍ jaw sheˍ. Nawˬ gʼa tu‸ hkanˍ chehˇ ve lehˬ, laˇ tsuhˇ gʼuiˬ hkʼe peuˬ kuiˬ leh kuiˬ maˇ cawˬ. Nawˬ awˬ pon dawˇ law kuiˬ ka‸ maˇ cawˬ.

14Nawˬ ve tcuh kaˍ paˍ teˇ hpaˍ nawˬ hta‸ heˍ laˇ chehˇ ve yoˬ. Yawˇ hui nawˬ hta‸ heˍ leh, nawˬ ve venˇbaˆ teˇ hpaˍ hta‸ maˇ hpeu‸ maˍ laˇ. Nawˬ venˇbaˆ dawˇ hpfuhˆ tuˬ maˇ loˍ, teh‸ yawˇ hui nawˬ hta‸ kʼoˆ laˇ chehˇ ve yoˬ.

15Choˬ kaˬ lo hpanˍ kʼai chehˇ ve chaw teˇ hpaˍ nawˬ hta‸ nyi taˍ leh, hkʼa mvuhˇ hkʼa na kʼoˆ chehˇ ve yoˬ. Yeˍruˆsaˍlehnˍ venˇ luˬ kʼai peuˬ ve pa taw, yawˇ hui oˉ kʼoˍ hiˆ leh gʼuiˬ chehˇ ve yoˬ. Chi lehˬ, nyi sha jaˇ ve venˇ maˇ heˆ laˇ. Venˇ chi lehˬ, miˬguiˬ hkʼa peu-eˬ ve nyi ma uiˍ kuiˬ hpeh‸ ve maˇ heˆ laˇ, teh‸ yawˇ hui kʼoˆ chehˇ ve yoˬ.

16Nawˬ ve canˇ paˍ hkʼa peu-eˬ nawˬ hta‸ nyi taˍ leh maˇ shawˍ maˇ caˆ kʼoˆ chehˇ ve yoˬ. Ngaˬ hui venˇ oˇ ve hta‸ te luˬ piˇ peuˬ. Chi hkʼe te piˇ tuˬ ve awˬ nyi hta‸ ngaˬ hui law chehˇ ve yoˬ, teh‸ yawˇ hui kʼoˆ chehˇ ve yoˬ.

17Gʼuiˬsha lehˬ, yawˇ kʼoˆ taˍ peuˬ ve hkʼe awˬ tehˬ awˬ na te peuˬ. Ponˬ laˬ htaˇ yawˇ ngaˬ hui hta‸ shaˍ ti‸ piˇ laˇ taˍ peuˬ ve hkʼe, ngaˬ hui hta‸ maˇ ha kʼaˉ leh te luˬ laˇ peuˬ. Gʼuiˬsha lehˬ, canˇ paˍ teˇ hpaˍ hta‸ gʼaˇ shehˍ hpaˇ hpeh‸ piˇ lawˬ leh, yawˇ hui hta‸ ha lehˬ chehˇ piˇ lawˬ ve yoˬ.

18Yeˍruˆsaˍlehnˍ-oˬ, nawˬ ve lanˇ venˇ hkʼa peu-eˬ Gʼuiˬsha hta‸ lawˬ hkawˉ piˇ lawˬ-o‸. Nawˬ ve mehˆ gʼuiˬ iˉ kaˆ lawˬ hkʼa shuˍ, mvuhˇ law‸ kʼaw mvuhˇ hpeu‸ ya‸ la chehˇ piˇ-oˆ. Hkanˍ maˇ gʼa htaˇ hkʼa gaˬ, dawˇ haˍ leh hawˬ chehˇ-oˆ.

19Teˇ haˉ tanˇ hkuinˇ teˇ pawˆ peuˬ teˇ pawˆ tu leh, Gʼuiˬsha hta‸ kuˬ-o‸. Nawˬve yaˇ teˇ hpaˍ hta‸ ha kʼaˉ laˇ tuˬ, nyi ma awˬ tawˬ hkʼa gaˬ yawˇ hta‸ lawˬ hkawˉ-oˆ. Ya‸ kʼaw hpuiˇ lo yaˇ ehˉ teˇ hpaˍ awˍ meu‸ suh-e chehˇ ve yoˬ.

20Gʼuiˬsha-oˬ, nawˬ fawˉ mehˍ piˇ chehˇ ve chaw hui hta‸ a ciˉ nyi sheˍ. Yaˇ miˇ teˇ hpaˍ lehˬ, yawˇ hui ha‸ ve yaˇ teˇ hpaˍ ve awˬ shaˍ hta‸ caˇ chehˇ ve yoˬ. Paw hkuˇ leh tcuh kaˍ paˍ teˇ hpaˍ htawˇ, bon yehˬ hkʼaw shu tiˇ pehˍ ve hta‸ gʼa hkanˍ ve yoˬ.

21Chaw mawˇ yaˇ nehˬ teˇ hpaˍ ya‸ kʼaw hpuiˇ lo paˍ suh taˍ ve yoˬ. Chaw haˉ yaˇ miˇ haˉ teˇ hpaˍ htawˇ, canˇ paˍ teˇ hpaˍ chaw pehˍ ve hta‸ gʼa hkanˍ ve yoˬ. Nawˬ nyi ma zuhˆ ve awˬ nyi hkʼaw, yawˇ hui hta‸ nawˬ maˇ ha kʼaˉ piˇ.

22Nawˬ lehˬ, canˇ paˍ teˇ hpaˍ hta‸ kuˬ yuˬ leh, ngaˬ awˬ paˇ lo kawˆ tuˬ hkʼa caw zuhˇ cawˬ la piˇ ve yoˬ. Nawˬ nyi ma zuhˆ ve awˬ nyi hkʼaw, chaw teˇ gʼaˇ ka‸ ponˬ hpeh‸ tuˬ ve maˇ heˆ. Canˇ paˍ teˇ hpaˍ lehˬ, ngaˬ ha‸ ve yaˇ teˇ hpaˍ hta‸ tiˇ pehˍ laˇ peuˬ ve yoˬ.

← Chapter 1 Jump to: Chapter 3 →