Daniel 7

Lao Bible 2012 (ພຣະຄຳພີສັກສິ)

← Chapter 6 Jump to: Chapter 8 →

1ໃນປີທຳອິດແຫ່ງຣາຊການຂອງເຈົ້າເບັນຊັດຊາເຣ ກະສັດແຫ່ງບາບີໂລນ ຂ້າພະເຈົ້າໄດ້ຝັນ ແລະເຫັນນິມິດໃນເວລາກາງຄືນ. ສະນັ້ນ ຂ້າພະເຈົ້າຈຶ່ງບັນທຶກຄວາມຝັນນັ້ນໄວ້ ແລະຕໍ່ໄປນີ້ແມ່ນບັນທຶກຂອງຄວາມຝັນ

2ທີ່ຂ້າພະເຈົ້າໄດ້ເຫັນໃນຄືນນັ້ນ: ໄດ້ມີລົມພັດມາຈາກທຸກທິດ ຕີໜ້ານໍ້າມະຫາສະໝຸດໃຫ້ເປັນຟອງ.

3ແລ້ວກໍມີສັດໃຫຍ່ສີ່ໂຕຂຶ້ນມາຈາກມະຫາສະໝຸດນັ້ນ ສັດແຕ່ລະໂຕມີຮູບຮ່າງແຕກຕ່າງກັນ.

4ໂຕທຳອິດເບິ່ງຄ້າຍຄືສິງ ແຕ່ມີປີກເໝືອນນົກອິນຊີ. ໃນຂະນະທີ່ຂ້າພະເຈົ້າຫລຽວເບິ່ງຢູ່ນັ້ນ ປີກຂອງມັນກໍຖືກຫລົກອອກ. ສັດໂຕນັ້ນຖືກຍົກຂຶ້ນ ແລະໃຫ້ຢືນຢູ່ເໝືອນຄົນ. ແລ້ວມັນກໍໄດ້ຮັບຈິດໃຈດັ່ງມະນຸດ.

5ສັດໂຕທີສອງເບິ່ງຄ້າຍຄືໝີ ທີ່ກຳລັງຢືນຢູ່ດ້ວຍຂາຫລັງຂອງມັນ. ປາກມັນຄາບກະດູກສາມຊີກໄວ້ ແລະມີສຽງໜຶ່ງບອກມັນວ່າ, “ຈົ່ງກິນຊີ້ນຕໍ່ໄປໃຫ້ຫລາຍໆ.”

6ໃນຂະນະທີ່ຂ້າພະເຈົ້າກຳລັງຫລຽວເບິ່ງຢູ່ນັ້ນ ກໍມີສັດອີກໂຕໜຶ່ງປາກົດຂຶ້ນມາ. ສັດໂຕນີ້ເບິ່ງຄ້າຍຄືເສືອດາວ ແຕ່ເທິງຫລັງມີສີ່ປີກເໝືອນປີກນົກ ແລະມີສີ່ຫົວ. ມັນໄດ້ຮັບສິດອຳນາດແຫ່ງການເປັນໃຫຍ່.

7ໃນຂະນະທີ່ ຂ້າພະເຈົ້າກຳລັງເຝົ້າເບິ່ງຢູ່ນັ້ນ ກໍມີສັດໂຕທີສີ່ປາກົດຂຶ້ນມາ. ມັນມີອຳນາດຫລາຍທັງເປັນຕາຢ້ານ ແລະຮ້າຍກາດ. ດ້ວຍແຂ້ວເຫຼັກຂະໜາດໃຫຍ່ນັ້ນ ມັນໄດ້ຫຍໍ້າກິນສິ່ງທີ່ເປັນເຫຍື່ອຂອງມັນ ແລະທັງຢຽບຢໍ່າຖິ້ມ. ມັນມີສິບເຂົາແລະບໍ່ເໝືອນກັບສັດອື່ນໆ.

8ໃນຂະນະທີ່ຂ້າພະເຈົ້າກຳລັງຈ້ອງເບິ່ງເຂົາເຫຼົ່ານັ້ນ ຂ້າພະເຈົ້າກໍເຫັນເຂົານ້ອຍໆອັນໜຶ່ງປົ່ງອອກມາຈາກເຂົາທັງໝົດ ແລະເຮັດໃຫ້ເຂົາສາມອັນໃນນັ້ນຫລ່ອນອອກ. ເຂົານ້ອຍນີ້ມີຕາເໝືອນມະນຸດ ແລະມີປາກເວົ້າຄູຍໂມ້ໂອ້ອວດຢ່າງຈອງຫອງ.

9ໃນຂະນະທີ່ຂ້າພະເຈົ້າກຳລັງເບິ່ງຢູ່ນັ້ນ ກໍມີບັນລັງຫລາຍອັນໄດ້ຖືກນຳມາຕັ້ງໄວ້. ເພິ່ນຜູ້ມີຊີວິດຢູ່ຕະຫລອດໄປ ໄດ້ນັ່ງຢູ່ເທິງບັນລັງອັນໜຶ່ງໃນຈຳນວນບັນລັງເຫຼົ່ານີ້. ເຄື່ອງນຸ່ງຂອງເພິ່ນຂາວເໝືອນຫິມະ ຜົມຂອງເພິ່ນເໝືອນຂົນແກະບໍຣິສຸດຜຸດຜ່ອງ. ບັນລັງຂອງເພິ່ນທີ່ຢູ່ເທິງລໍ້ກໍເປັນໄຟລຸກໄໝ້ຢູ່

10ແລະມີແປວໄຟຟົ້ງອອກຈາກທີ່ນັ້ນ. ມີຫລາຍພັນຄົນບົວລະບັດຮັບໃຊ້ເພິ່ນຢູ່ທີ່ນັ້ນ ແລະມີຫລາຍລ້ານຄົນຢືນຢູ່ຊ້ອງໜ້າເພິ່ນ. ສານເລີ່ມການພິພາກສາ ແລະໜັງສືຕ່າງໆກໍຖືກເປີດອອກ.

11ໃນຂະນະທີ່ຂ້າພະເຈົ້າກຳລັງເບິ່ງຢູ່ນັ້ນ ກໍໄດ້ຍິນສຽງຂອງເຂົານ້ອຍເວົ້າຄຸຍໂມ້ ແລະໂອ້ອວດຂຶ້ນ. ເມື່ອຂ້າພະເຈົ້າເຝົ້າເບິ່ງຢູ່ ສັດໂຕທີສີ່ໄດ້ຖືກຂ້າ ແລະຊາກສົບຂອງມັນກໍຖືກໂຍນໃສ່ໄຟ ເພື່ອທຳລາຍຖິ້ມ.

12ສ່ວນສັດໂຕອື່ນໆກໍຖືກປົດອອກຈາກອຳນາດ; ແຕ່ພວກມັນໄດ້ຮັບອະນຸຍາດໃຫ້ມີຊີວິດຢູ່ຕໍ່ໄປ.

13ໃນເວລາກາງຄືນລະຫວ່າງເກີດນິມິດນີ້ ຂ້າພະເຈົ້າໄດ້ເຫັນຜູ້ໜຶ່ງມີຮູບຮ່າງເໝືອນມະນຸດ. ເພິ່ນຫຍັບເຂົ້າມາໃກ້ຂ້າພະເຈົ້າ ເພິ່ນມາເທິງເມກໃນສະຫວັນ ແລະເພິ່ນໄດ້ໄປຫາຜູ້ມີຊີວິດຢູ່ຕະຫລອດໄປ ແລະເຂົ້າເຝົ້າເພິ່ນ.

14ເພິ່ນໄດ້ຮັບສິດອຳນາດ, ກຽດຕິຍົດ ແລະອຳນາດແຫ່ງການເປັນໃຫຍ່ ຈົນວ່າທຸກຊົນຊາດ, ທຸກເຊື້ອຊາດ ແລະທຸກພາສາໄດ້ຮັບໃຊ້ເພິ່ນ. ສິດອຳນາດຂອງເພິ່ນຈະດຳລົງຢູ່ຕະຫລອດໄປ ແລະອານາຈັກຂອງເພິ່ນກໍຈະບໍ່ສິ້ນສຸດເປັນຈັກເທື່ອ.

15ນິມິດທີ່ຂ້າພະເຈົ້າໄດ້ເຫັນນັ້ນເຮັດໃຫ້ຂ້າພະເຈົ້າຕື່ນຕົກໃຈ ແລະຂ້າພະເຈົ້າກໍເປັນທຸກໃຈທີ່ສຸດ.

16ຂ້າພະເຈົ້າຈຶ່ງຂຶ້ນໄປຫາທ່ານຜູ້ໜຶ່ງທີ່ຢືນຢູ່ທີ່ນັ້ນ ແລະຂໍຮ້ອງເພິ່ນໃຫ້ອະທິບາຍເລື່ອງທັງໝົດນີ້. ສະນັ້ນ ເພິ່ນຈຶ່ງບອກຄວາມໝາຍແກ່ຂ້າພະເຈົ້າ.

17ເພິ່ນບອກວ່າ, “ສັດໃຫຍ່ສີ່ໂຕເຫຼົ່ານີ້ ແມ່ນອານາຈັກທັງສີ່ ທີ່ຈະເກີດຂຶ້ນໃນແຜ່ນດິນໂລກ.

18ປະຊາຊົນຂອງພຣະເຈົ້າອົງສູງສຸດຈະໄດ້ຮັບອຳນາດແຫ່ງກະສັດ ແລະຈະຮັກສາອຳນາດນັ້ນໄວ້ໄດ້ຕະຫລອດໄປ.”

19ແລ້ວຂ້າພະເຈົ້າກໍສົນໃຈຢາກຮູ້ເລື່ອງຕື່ມກ່ຽວກັບສັດໂຕທີສີ່ ຊຶ່ງບໍ່ເໝືອນກັບສັດໂຕອື່ນໆ ມັນເປັນສັດທີ່ໜ້າຢ້ານທີ່ສຸດ ຊຶ່ງມີເລັບທອງສຳຣິດ ແລະມີແຂ້ວເຫຼັກ. ມັນຫຍໍ້າກິນແລະຢຽບຢໍ່າທຳລາຍເຫຍື່ອຂອງມັນ.

20ຂ້າພະເຈົ້າຢາກຮູ້ກ່ຽວກັບສິບເຂົາທີ່ຢູ່ເທິງຫົວຂອງມັນ ແລະເຂົາອັນໜຶ່ງທີ່ປົ່ງຊ້ອນອອກມາຕາມຫລັງ ຊຶ່ງເຮັດໃຫ້ສາມເຂົາຫລ່ອນອອກນັ້ນ. ເຂົາອັນນີ້ມີຕາ ແລະມີປາກເວົ້າຄູຍໂອ້ອວດຢ່າງຈອງຫອງ. ມັນເປັນໜ້າເກງກົວຫລາຍກວ່າເຂົາອື່ນໆ.

21ໃນຂະນະທີ່ຂ້າພະເຈົ້າກຳລັງຫລຽວເບິ່ງຢູ່ນັ້ນ ເຂົາອັນນັ້ນກໍໄດ້ຮົບເສິກກັບປະຊາຊົນຂອງພຣະເຈົ້າ ແລະໄດ້ຮັບໄຊຊະນະ.

22ແລ້ວອົງຊົງພຣະຊົນຢູ່ຕະຫລອດໄປ ກໍໄດ້ມາປະກາດຕັດສິນເຂົ້າຂ້າງ ປະຊາຊົນຂອງພຣະເຈົ້າອົງສູງສຸດ. ເວລາຂອງປະຊາຊົນຂອງພຣະເຈົ້າ ທີ່ຕ້ອງຮັບອຳນາດແຫ່ງກະສັດໄດ້ມາເຖິງແລ້ວ.

23ຕໍ່ໄປນີ້ ແມ່ນການແກ້ຄວາມຝັນທີ່ຂ້າພະເຈົ້າໄດ້ຮັບ ດັ່ງນີ້: ສັດໂຕທີສີ່ແມ່ນຈັກກະພົບທີສີ່ທີ່ຈະເກີດຂຶ້ນເທິງແຜ່ນດິນໂລກ ແລະຈະແຕກຕ່າງຈາກຈັກກະພົບອື່ນໆທັງປວງ. ມັນຈະຢຽບຢໍ່າທຳລາຍແຜ່ນດິນໂລກທັງໝົດໃຫ້ໝຸ່ນ.

24ສິບເຂົານັ້ນແມ່ນກະສັດສິບຄົນທີ່ຈະປົກຄອງຈັກກະພົບນັ້ນ. ແລ້ວຈະມີກະສັດອີກອົງໜຶ່ງປາກົດຕົວຂຶ້ນ; ກະສັດຄົນນີ້ຈະແຕກຕ່າງຈາກກະສັດຄົນກ່ອນຫລາຍ ແລະເພິ່ນຈະໂຄ່ນລົ້ມກະສັດສາມຄົນນັ້ນເສຍ.

25ເພິ່ນຈະເວົ້າຕໍ່ສູ້ພຣະເຈົ້າອົງສູງສຸດ ແລະຈະຂົ່ມເຫັງປະຊາຊົນຂອງພຣະເຈົ້າ. ເພິ່ນຈະພະຍາຍາມປ່ຽນແປງກົດໝາຍ ແລະວັນສະຫລອງຕ່າງໆທາງສາສະໜາ ແລະປະຊາຊົນຂອງພຣະເຈົ້າຈະຢູ່ໃຕ້ອຳນາດຂອງເພິ່ນເປັນເວລາສາມປີເຄິ່ງ.

26ແລ້ວສານແຫ່ງສະຫວັນກໍຈະພິພາກສາເພິ່ນ, ຈະຖອນອຳນາດຂອງເພິ່ນ ແລະຈະທຳລາຍເພິ່ນຈົນໝົດສິ້ນ.

27ອຳນາດແລະຄວາມຍິ່ງໃຫຍ່ຂອງອານາຈັກທັງໝົດໃນແຜ່ນດິນໂລກນັ້ນ ຈະຖືກມອບໃຫ້ແກ່ປະຊາຊົນຂອງພຣະເຈົ້າອົງສູງສຸດ. ອຳນາດແຫ່ງກະສັດຂອງພວກເຂົາຈະບໍ່ສິ້ນສຸດໄປ ແລະບັນດາຜູ້ປົກຄອງທັງໝົດທີ່ເທິງແຜ່ນດິນໂລກຈະຮັບໃຊ້ແລະເຊື່ອຟັງພວກເຂົາ.

28ນີ້ແມ່ນບົດສຸດທ້າຍຂອງເລື່ອງ. ຂ້າພະເຈົ້າຕົກໃຈຢ້ານກົວຈົນໜ້າຊີດໄປ ແຕ່ຂ້າພະເຈົ້າກໍຍັງຈື່ຈຳເລື່ອງລາວທັງໝົດນີ້ໄວ້ໄດ້.

← Chapter 6 Jump to: Chapter 8 →