1 Samuel 12

Lao Bible (ฉบับอักษรลาว)

← Chapter 11 Jump to: Chapter 13 →

1ຊາມູເອນ ກ໊ອງ ບົ໋ວ ອິສະລາເອນ ເຍີຍ ຕສວັ໋ງ ມ່ຽນ, “ເຢຍ ໝວັງ ເມີ່ຍ ບົວ ກ໊ອງ ເຍີຍ ຢຽດ ຕສູ໊ງ ຫວ່າ ຢ່າ ຫລຽບ ເຕົ້າ ຮູ່ງ ເຕ໋ຍ ກຸ໊ນ ເມີ່ຍ ບົວ.

2ອີ້ ຕສັ່ນ ເມີ່ຍ ບົວ ມ່າຍ ຮູ່ງ ຕໍ້ ເມີ່ຍ ບົວ. ເຢຍ ກັ້ນ ຫຮຍັງ-ເຈີ໊ຍ ໂກ໋, ບະເປຢີຍ ແປະ ອ໊ະ. ເຢຍ ເຍີຍ ຕອນ ບົວ ຢ່າ ເຖສົາ ເມີ່ຍ ບົວ ຢຽມ ນ້າຍ. ຢຽມ ເຢຍ ຫລຸນ ເຍີຍ ຕສຢັ້ງ ໂຫ່ ເຖົາ ອີ້ ຮນອຍ ເຢຍ ຕໍ້ ເມີ່ຍ ບົວ.

3ເຢຍ ຢຽມ ນ້າຍ. ໂທ້ ເມີ່ຍ ບົວ ຢຽມ ຕສ໊ຽວ ເຍີຍ ດສະຮມຽນ ເຖສົາ ນິ່ນ ຫລົ່ງ ໂຢ້ວ ອອນ ຕ້າຍ ໂຕສ໋ວ ຮູ່ງ ວົ້ວ ເຕົ້າ ເຍີຍ ດສະຮມຽນ ເຖງ ເຢຍ ໂຕສ໋ວ ຕສອງ-ເຕສ໋ງ. ເຢຍ ເຕສ໊າະ ເຈ໋ຍ ຫາຍ ເຕົ້າ ເຍີຍ ງົ່ງ ໄຟ? ເຢຍ ທສ້າງ ເຈ໋ຍ ຫາຍ ເຕົ້າ ເຍີຍ ລໍ່ ໄຟ? ເຢຍ ເຄວີຍ ເຈ໋ຍ ຫາຍ ເຕົ້າ ໄຟ? ເຢຍ ເຕສີ໋ຍ ເຈ໋ຍ ຫາຍ ເຕົ້າ ໄຟ? ເຢຍ ຢຽມ ຫາຍ ເຕົ້າ ເຍີຍ ປົ໌ວ ຕສິ໊ບ ເຈ໋ຍ ຍ່ານ ຫຮມວັງ ຕສ່ຽວ ໂຕສ໋ວ ປຸນ ເຢຍ ເຍີຍ ມຕສີງ ແມ່ງ ເຍີຍ ໄຟ? ກຸ໊ນ ກ໊ອງ ອ໊ະ. ເຢຍ ຕສ່ຽວ ຖຸຍ ດສ໋ວນ ປຸນ ເມີ່ຍ ບົວ.”

4ຕສວັ໋ງ ມ່ຽນ ກ໊ອງ, “ເມີ່ຍ ໄມ້ ເຄວີຍ ເຈ໋ຍ ເຢຍ ບົວ, ຢ່າ ໄມ້ ເຕສີ໋ຍ ເຈ໋ຍ ເຢຍ ບົວ, ຢ່າ ໄມ້ ຢຽມ ຫາຍ ເຕົ້າ ເຍີຍ ປົ໌ວ ຕສິ໊ບ ເຈ໋ຍ ຫາຍ ຫຍູ່ງ.”

5ຊາມູເອນ ຕສ່ຽວ ກ໊ອງ ບົ໋ວ ນິ່ນ ບົວ, “ອີ້ ຮນອຍ ຕສ໊ຽວ ເຖສົາ ນິ່ນ ຫລົ່ງ ໂຢ້ວ ອອນ ຕ້າຍ ວົ້ວ ເຕົ້າ, ຕອງ ຈ໊ຽນ ເມີ່ຍ ບົວ ໂຕສ໋ວ ຕສອງ-ເຕສ໋ງ ກ໊ອງ, ‘ເມີ່ຍ ບົວ ໄມ້ ປວັດ ເຢຍ ມ່າຍ ຫາຍ ຫຍູ່ງ ຕ່ອງ ເຍີຍ ຕ໋ອງ.’” ຢຽດ ຕສູ໊ງ ແປະ ຝີງ ກ໊ອງ, “ ຕສ໊ຽວ ໂຕສ໋ວ ຕສອງ-ເຕສ໋ງ ໝີ່ ອ໊ະ.”

6ຊາມູເອນ ກ໊ອງ ບົ໋ວ ແປະ ຝີງ, “ຕສິ້ນ ດ່າງ ຕສ໊ຽວ ຫລຽບ ໂມເຊ ເຖສົາ ອາລົນ ຢ່າ ຕໍ້ ເມີ່ຍ ບົວ ເຍີຍ ອົງ-ຖາຍ ຢຽມ ອີຢິ໊ບ ເຕີ່ຍ-ປູງ ທສວດ ຕ້າຍ.

7ຮນັ້ງ ໜ່າຍ, ອີ້ ຕສັ່ນ ເມີ່ຍ ບົວ ອ໋ອຍ ຕສຸ ໂຊ້ວ ຈ໊ຽນ ຕີ່ງ ເຍີຍ. ເຢຍ ອ໋ອຍ ຕອງ ຈ໊ຽນ ຕສ໊ຽວ ໂກ໋ ເມີ່ຍ ບົວ, ປຸນ ເມີ່ຍ ບົວ ຈັ໋ງ ຕສ໊ຽວ ເຫວີ່ຍ ເມີ່ຍ ບົວ ເຖສົາ ເມີ່ຍ ບົວ ເຍີຍ ອົງ-ຖາຍ ໂຕສ໋ວ ເຍີຍ ຢຽດ ຕສູ໊ງ ຄູ້ ສີ່.

8“ຢາໂຄບ ເປັຍ ອີຢິ໊ບ ເຕີ່ຍ-ປູງ ວົ້ວ ຕສັ່ນ, ເມີ່ຍ ບົວ ເຍີຍ ອົງ-ຖາຍ ເຫ່ວ ຈ໊ຽນ ໂທ້ ຕສ໊ຽວ. ຕສ໊ຽວ ຕສ່ຽວ ພ້າຍ ໂມເຊ ເຖສົາ ອາລົນ. ນິ່ນ ບົວ ຕໍ້ ເມີ່ຍ ບົວ ເຍີຍ ອົງ-ຖາຍ ຢຽມ ອີຢິ໊ບ ເຕີ່ຍ-ປູງ ທສວດ ຕ້າຍ ຢຽມ ນ້າຍ ນອມ ເຕີ່ຍ-ປູງ.

9“ມປ່າ ນິ່ນ ບົວ ຫລະຄຸ ຕສ໊ຽວ, ນິ່ນ ບົວ ເຍີຍ ທິນ-ຮູ່ງ ໝີ່ ອ໊ະ. ນິ່ນ ຕສ່ຽວ ເຕສ໊າະ ນິ່ນ ບົວ ຈິວ ປຸນ ຢຽມ ຮາໂຊ ຕສີ້ງ ເຍີຍ ຮູ່ງ, ຢາບິນ, ເຍີຍ ຕົ້ມ ແປງ-ເປຢີ໊ຍ, ສິເສລາ ເຍີຍ ປົ໌ວ-ເດ໊ຍ, ຢ່າ ຈິວ ປຸນ ຢຽມ ຟິລິສະເຕຍ ມ່ຽນ ເຍີຍ ປົ໌ວ-ເດ໊ຍ, ຢ່າ ຈິວ ປຸນ ຢຽມ ໂມອັບ ເຍີຍ ຮູ່ງ ເຕ໋ຍ ເຍີຍ ປົ໌ວ-ເດ໊ຍ. ນິ່ນ ບົວ ຕສ່ຽວ ເຖສົາ ເມີ່ຍ ບົວ ເຍີຍ ອົງ-ຖາຍ ເບ໊າະ ຈ໋າ.

10ເມີ່ຍ ບົວ ເຍີຍ ອົງ-ຖາຍ ເຫ່ວ ຈ໊ຽນ ໂທ້ ຕສ໊ຽວ ຢ່າ ກ໊ອງ, ‘ເຢຍ ບົວ ປ໌າມ ຕສຸ໌ຍ ໝີ່ ອ໊ະ, ເຫວີ່ຍ ຕສຸ ເຢຍ ບົວ ກວັ່ງ ຕສ໊ຽວ ມີ່ງ ຟູ-ສູ ບາອັນ ຕສ້ຽນ ເຖສົາ ອັດທາລົດ ຕສ້ຽນ. ມປ່າ ອີ້ ຕສັ່ນ ໂທ້ ໂອຈ໋ວ ເຢຍ ບົວ ເປຢົ໋າ ດຸ໊ດ ເຢຍ ບົວ ເຍີຍ ວິນ-ວັ້ງ ເຍີຍ ປົ໌ວ-ເດ໊ຍ. ເຢຍ ບົວ ຕສ່ຽວ ຟູ-ສູ ຕສ໊ຽວ. ’

11ຕສ໊ຽວ ພ້າຍ ເຢລຸບບາອັນ, ບາລາກ, ເຢ໊ບທາ ເຖສົາ ຊາມູເອນ, ຢ່າ ໂອຈ໋ວ ເມີ່ຍ ບົວ ເປຢົ໋າ ດຸ໊ດ ຟາມ-ປູງ ເຝີຍ ໂຫລ່ວ ວົ້ວ ເຕີ໋ຍ ວິນ-ວັ້ງ ເຍີຍ ປົ໌ວ-ເດ໊ຍ. ເມີ່ຍ ບົວ ຕສ່ຽວ ຕຸ໊ ຖາຍ-ແປ້ງ ເຍີຍ ຢຽມ.

12“ເມີ່ຍ ບົວ ປວັດ ອຳມົນ ມ່ຽນ ເຍີຍ ຮູ່ງ, ນາຫາດ, ຕ້າຍ ເບ໊າະ ເມີ່ຍ ບົວ ວົ້ວ ຕສັ່ນ, ໄມ້ ກຸ໊ນ ມ່າຍ ຕສ໊ຽວ, ເມີ່ຍ ບົວ ເຍີຍ ທິນ-ຮູ່ງ, ໂຕສ໋ວ ເມີ່ຍ ບົວ ເຍີຍ ຮູ່ງ ເຕ໋ຍ, ເມີ່ຍ ບົວ ກ໊ອງ ບົ໋ວ ເຢຍ, ‘ໄມ້ ເຕສີ໌ຍ! ເຢຍ ບົວ ອ໋ອຍ ຫລົ່ງ ເຕົ້າ ມ່ຽນ ໂຕສ໋ວ ຮູ່ງ ເຕ໋ຍ ກຸ໊ນ ເຢຍ ບົວ.’

13ໝັ່ງ ມ່າະ! ອີ້ ຕສັ່ນ ນ້າຍ ເຊ ເມີ່ຍ ບົວ ກິ໊ນ ຕ້າຍ ເຍີຍ ຮູ່ງ ເຕ໋ຍ, ຕົ້ງ ເມີ່ຍ ບົວ ໂທ້ ຕ້າຍ ວົ້ວ ເຕົ້າ. ຕສ໊ຽວ ຫລຽບ ເຕົ້າ ຮູ່ງ ຕ້າຍ ກຸ໊ນ ເມີ່ຍ ບົວ.

14ເຊ ກ໊ອງ ເມີ່ຍ ບົວ ທ່າຍ ຕສ໊ຽວ ຢ່າ ຟູ-ສູ ນິ່ນ, ໝວັງ ນິ່ນ ເຍີຍ ຫວ່າ, ໄມ້ ແຫງ່ງ ນິ່ນ ເຍີຍ ຫລີ່ງ, ເມີ່ຍ ບົວ ເຖສົາ ກຸ໊ນ ເມີ່ຍ ບົວ ເຍີຍ ຮູ່ງ ເຕ໋ຍ ຢ່າ ກັນ ຫລົງ ຕສ໊ຽວ, ເມີ່ຍ ບົວ ເຍີຍ ທິນ-ຮູ່ງ, ຕສ່ຽວ ຫລົງ ອ໊ະ.

15ມປ່າ ເຊ ກ໊ອງ ເມີ່ຍ ບົວ ໄມ້ ໝວັງ ຕສ໊ຽວ ເຍີຍ ຫວ່າ ຢ່າ ແຫງ່ງ ຕສ໊ຽວ ເຍີຍ ຫລີ່ງ, ຕສ໊ຽວ ເຍີຍ ປົ໌ວ ຕສ່ຽວ ເຖສົາ ເມີ່ຍ ບົວ ເຖສົາ ເມີ່ຍ ບົວ ເຍີຍ ຮູ່ງ ເຕ໋ຍ ຕ໋ອຍ-ເຕກ.

16“ຮນັ້ງ ໜ່າຍ, ອີ້ ຕສັ່ນ ເມີ່ຍ ບົວ ໂຊ້ວ ຕີ່ງ ໝັ່ງ ຈ໊ຽນ ຕສ໊ຽວ ອ໋ອຍ ຢຽມ ເມີ່ຍ ບົວ ເຍີຍ ດສະຮມຽນ ໂຕສ໋ວ ໂຮລ ໄຫ່ ເຍີຍ ສີ່.

17ອີ້ ຮນອຍ ໄມ້ ເຕສີ໌ຍ ຊຽວ ເບຢົ້າ ວີດ ເຍີຍ ຕສຢັ້ງ ໂຫ່ ໄຟ? ເຢຍ ອ໋ອຍ ໂທ້ ຕສ໊ຽວ ປຸນ ລູ່ງ ປ໌ອງ ບະອົງ, ຕຸ້ຍ ບຢູ່ງ, ປຸນ ເມີ່ຍ ບົວ ຮິ້ວ ຕຸ໊ ຢ່າ ສຳ ຕຸ໊ ທສວດ ຕສິ໋ວ ຕສ໊ຽວ ໝັ່ງ, ເມີ່ຍ ບົວ ໂທ້ ຫລຽບ ຮູ່ງ, ເມີ່ຍ ບົວ ໂຕສ໋ວ ເອ໊າະ ສີ່ ດົ່ງ ຫາຍ ໂຮລ.”

18ຊາມູເອນ ຕສ່ຽວ ໂທ້ ຕສ໊ຽວ. ວົ້ວ ຮນອຍ ຕສ໊ຽວ ປຸນ ລູ່ງ ປ໌ອງ ບະອົງ, ຕຸ້ຍ ບຢູ່ງ. ຕສວັ໋ງ ແປະ ຝີງ ຕສະເກ້ງ ກ້ຳ ເດສ໋ຍ ໄຫ່ ຕສ໊ຽວ ເຖສົາ ຊາມູເອນ.

19ຕສວັ໋ງ ແປະ ຝີງ ກ໊ອງ ບົ໋ວ ຊາມູເອນ, “ໂທ້ ເຫວີ່ຍ ເຢຍ ບົວ, ເມີ່ຍ ເຍີຍ ໂປວ, ເຕົ໋າ ເກົ໋າ ໂທ້ ຕສ໊ຽວ, ເມີ່ຍ ເຍີຍ ທິນ-ຮູ່ງ, ປຸນ ເຢຍ ບົວ ໄມ້ ຕສຸ ໄຕ່, ເຫວີ່ຍ ຕສຸ ເຢຍ ບົວ ໂທ້ ຫລຽບ ເຕົ້າ ຮູ່ງ ເຕ໋ຍ ຕສະເກ້ງ ເປ໋ນ ເອ໊າະ ສີ່ ຈາ ຈ໊ຽນ ເຢຍ ບົວ ເຍີຍ ຢຽດ ຕສູ໊ງ ຕສຸ໌ຍ.”

20ຊາມູເອນ ກ໊ອງ ບົ໋ວ ແປະ ຝີງ, “ໄມ້ ຕູ໋ງ ກ້ຳ ເດສ໋ຍ. ໄມ້ ກຸ໊ນ ເມີ່ຍ ບົວ ໂຕສ໋ວ ນ້າຍ ເຕີ໋ຍ ຢຽດ ຕສູ໊ງ ເອ໊າະ ສີ່ ມປ່າ ເມີ່ຍ ບົວ ໄມ້ ຕູ໋ງ ເລີ່ຍ ອກອຍ ຕສ໊ຽວ. ອ໋ອຍ ຕສຸ ຫລົ່ງ ເດສ່ງ ເມີ່ຍ ບົວ ເຍີຍ ໂຮຍ້ວ ຟູ-ສູ ຕສ໊ຽວ.

21ໄມ້ ຕູ໋ງ ຮວິນ ມີ່ງ ກັນ ໄມ້ ລ່ຳ ຫລົ່ງ ເຍີຍ ຕສ້ຽນ. ນິ່ນ ບົວ ໄມ້ ໄຮ່ ເຖງ ເມີ່ຍ ບົວ ຕຸ໊ ຫລົງ, ຢ່າ ໄມ້ ໄຮ່ ໂອຈ໋ວ ເມີ່ຍ ບົວ, ເຫວີ່ຍ ຕສຸ ນິ່ນ ບົວ ໄມ້ ລ່ຳ ຫລົ່ງ.

22ຕສ໊ຽວ ເຫວີ່ຍ ນິ່ນ ກັ້ນ ໂຮລ ໄຫ່ ເຍີຍ ເມ່ງ ໄມ້ ກວັ່ງ ນິ່ນ ເຍີຍ ມ່ຽນ, ເຫວີ່ຍ ຕສຸ ຕສ໊ຽວ ອະເຮນີ້ຍ ປຸນ ເມີ່ຍ ບົວ ເປ໋ນ ນິ່ນ ກັ້ນ ເຍີຍ ແປະ ຝີງ.

23ເຢຍ ກັ້ນ ອ໋ອຍ ຕສຸ ເຫວີ່ຍ ເມີ່ຍ ບົວ ໄມ້ ຕີ້ງ ລ່ຽວ ເຍີຍ ເຕົ໋າ ເກົ໋າ. ໄມ້ ເຕສີຍ ແອ໊ະ, ເຢຍ ປ໌າມ ຕສຸ໌ຍ ຕ່ອງ ຕສ໊ຽວ. ເຢຍ ຢ່າ ອ໋ອຍ ອຈ໋າວ ເມີ່ຍ ບົວ ຮິ້ວ ຕຸ໊ ຫາຍ ຫຍູ່ງ ຫລົງ ເຍີຍ, ຫອບ ຕສຸ ໂຕສ໋ວ ເຍີຍ ເຈົ໊າ.

24ເມີ່ຍ ບົວ ອ໋ອຍ ຕສຸ ທ່າຍ ຕສ໊ຽວ, ຫລົ່ງ ເດສ່ງ ໂຮຍ້ວ ຕສຽບ ຕສົ໊ວະ ເຍີຍ ຟູ-ສູ ນິ່ນ. ອ໋ອຍ ຕສຸ ຈັ໋ງ ຈ໊ຽນ ນິ່ນ ເຫວີ່ຍ ເມີ່ຍ ບົວ ໂຕສ໋ວ ໂຮລ ໄຫ່ ເຍີຍ ສີ່.

25ມປ່າ ເຊ ກ໊ອງ ເມີ່ຍ ບົວ ແອ໋ງ ໂຕສ໋ວ ຈ໊ຽນ ເອ໊າະ ສີ່ ຢຽມ ນໍ, ເມີ່ຍ ບົວ ເຖສົາ ເມີ່ຍ ບົວ ເຍີຍ ຮູ່ງ ເຕ໋ຍ ຕສູ໊ງ ອ໋ອຍ ຕສຸ ໝຽດ ອ໊ະ.”

← Chapter 11 Jump to: Chapter 13 →