Job 30

Lao Bible (ฉบับอักษรลาว)

← Chapter 29 Jump to: Chapter 31 →

1“ມປ່າ ເກົ້າ ຫລຸນ ເຢຍ ວົ້ວ ເຕີ໋ຍ ມ່ຽນ ຈັ໊ດ ເຢຍ. ນ້າຍ ເຕີ໋ຍ ມ່ຽນ ເຍີຍ ເຕຍ ເຢຍ ປວັດ ໄມ້ ຕສີ່ ຕຸ໊ ເຖສົາ ຕສົ໊ວ ເຢຍ ເຍີຍ ປະກີ ຢູ້ງ ກວັ້ນ ເຍີຍ ຈູ໊ ຢຽມ.

2ນິ່ນ ບົວ ເຍີຍ ປົ໌ວ ເຍີຍ ທຈະ ໄຮ່ ເຖງ ຫາຍ ຫຍູ່ງ ເຢຍ? ນິ່ນ ບົວ ເຍີຍ ທຈະ-ເຫລະ ເດສ່ງ ໝີ່ ອ໊ະ.

3ຫລາຍ ຈົ່ມ ໂຄ້ວ ຢ່າ ຫງໍ່, ລູ່ງ ມ໌ວນ ຕສັ່ນ ຢຽມ ເດົາ-ຮວາງ ນິ່ນ ບົວ ຫຍັ່ນ ເມ້ຍ-ດສູ້ງ ອກາຍ.

4ນິ່ນ ບົວ ແກ໊ະ ຢຽມ ເຕີ່ຍ-ປູງ-ຮວາງ ເຍີຍ ດຢັ໋ງ-ນ່ອມ, ເຖສົາ ໄມ້ ມ່າຍ ເໝວີຍ ເຍີຍ ດຢັ໋ງ-ດສູ້ງ ໂຕສ໋ວ ຫຍັ່ນ ຮົບ.

5ນິ່ນ ບົວ ຢຽມ ມ່ຽນ ບຸດົ໋ງ ຕສຸ ຕສຸ່ນ ທສວດ, ມ່ຽນ ເຫ່ວ ຈ໊ຽນ ຕສຸ່ນ ຮນັ້ງ ຕສຸ່ນ ຈັ໋ນ-ຕສະ ນໍ.

6ນິ່ນ ບົວ ຕສຸ ຢຽມ ໂດ໊ະ-ຕສ໋ວນ ອກາຍ ຢ່າ ຢຽມ ເດົາ-ຄວດ ເຖສົາ ແບ໋ງ-ງ່າມ.

7ນິ່ນ ບົວ ຢຽມ ເດົາ-ຮວາງ ຮນັ້ງ ເຮ່ຍ ຕສ້ອຍ ນໍ ເຫ່ວ, ຢ່າ ເບ໋ງ ຈ໊ຽນ ຢຽມ ດຢັ໋ງ-ຕອນ-ຟົ້ມ ກະເດ໊ຍ.

8ນິ່ນ ບົວ ເປ໋ນ ຢຽດ ກວັ້ນ ໄມ້ ລ່ຳ ຫລົ່ງ ເຍີຍ ຫ່າ ຮ່ອງ ມ່ຽນ, ຕສຸ ປຢ໊າ-ປິນ ເບ໊າະ ຕສຸ່ນ ທສວດ ເຕີ່ຍ-ປູງ.

9“ອີ້ ຕສັ່ນ ນ້າຍ ເຕີ໋ຍ ມ່ຽນ ຕໍ້ ເຢຍ ເປ໋ນ ດສູງ ປ໋າວ, ຢ່າ ຕໍ້ ເຢຍ ເປ໋ນ ໂກ໊ວ ກ໊ອງ.

10ນິ່ນ ບົວ ໂຢ໋ວ ເຢຍ, ຊິ້ມ ເຢຍ ໂກ, ຢ໊ຽດ ປວັດ ເຢຍ ຕສ່ຽວ ທຸ້ຍ ວວມ-ດສຸ້ຍ ແນດ ເຢຍ.

11ເຫວີ່ຍ ຕສຸ ທິນ-ຮູ່ງ ປຸນ ເຢຍ ເມົາ, ເຖງ ໄມ້ ຕຸ໊ ກັ້ນ, ນິ່ນ ບົວ ຕສ່ຽວ ຕອງ ຈ໊ຽນ ເຢຍ ເຊວີ່ຍ ເອີ໋ຍ ໂຕສ໋ວ.

12ນ້າຍ ເຕີ໋ຍ ເຖສວ ຫລຸ່ນ ເຍີຍ ມ່ຽນ ຢຽມ ເຢຍ ເຍີຍ ບຢ່າວ ແໝງ ເຈ໌ຍ ຕ້າຍ, ນິ່ນ ບົວ ຟົ້ງ ເຢຍ ທສວດ ມີ່ງ. ນິ່ນ ບົວ ຫລິ່ວ ເລີ໌ຍ ເຈົ໊າ ໝຽດ ເຢຍ.

13ນິ່ນ ບົວ ປຸນ ເຢຍ ເປຢົ໋າ ເຍີຍ ເຈົ໊າ ຕັ໋ງ, ແອ໋ງ ຈາ ເຕສະ ໜ່ານ ປຸນ ເຢຍ, ຢ່າ ໄມ້ ມ່າຍ ຫາຍ ເຕົ້າ ຕັ໊ງ ນິ່ນ ບົວ.

14ນິ່ນ ບົວ ດຸດໆ ເຍີຍ ຕ້າຍ ຮນັ້ງ ເປັຍ ຕສີ້ງ ຫລາດ ທົງ ເຍີຍ ຕ໋ອງ. ຢຽມ ປ່າຍ ຫວ່າຍ ເຍີຍ ຕ໋ອງ ນິ່ນ ບົວ ວູ໌ໆ ເຍີຍ ຕ້າຍ.

15ກ້ຳ ເດສ໋ຍ ໄຫ່ ເຍີຍ ສີ່ ຫ່ອຍ ເຢຍ ໂຄ້ວ ໄຫ່, ເຢຍ ເຍີຍ ອຈັງ-ຫລ່າງ ເຈ໋ຍ ຮນັ້ງ ດສຢ໋າວ ປ່ວນ ມີ່ງ ນໍ, ເຢຍ ເຍີຍ ຟຸ-ໂຫລະ ຢ່າ ຮນັ້ງ ບ໋ວນ ເຈ໋ຍ ໝີ່ ອ໊ະ.

16“ອີ້ ຕສັ່ນ ເຢຍ ເຍີຍ ໂຮຍ້ວ ຕສະເກ້ງ ໂຄ້ວ ໄຫ່, ຕສຸ ໂຄ້ວ ເຍີຍ ຮນອຍ-ເຫຍັຍ ເຕສ໊າະ ຈ໊ຽນ ເຢຍ.

17ລູ່ງ ມ໌ວນ ຕສັ່ນ ເຢຍ ເຍີຍ ບູ໊ງ ຮລຳ, ດສິ໊ວໆ ເຍີຍ ມຸນ ຢ່າ ໄມ້ ມ່າຍ ຕສຢັ້ງ ໂຫ່ ຕີ້ງ.

18ທິນ-ຮູ່ງ ເຍີຍ ຕົ້ມ ທຈະ ຕ໋ອງ ຮນັ້ງ ເຢຍ ເຍີຍ ລຸຍ, ແອ໋ງ ຮນັ້ງ ລຸຍ-ຈາງ ນໍ ແໜະ ຈ໊ຽນ ເຢຍ.

19ທິນ-ຮູ່ງ ເຕສ໊າະ ເຢຍ ຕສອຍ ເອຈ່ຍ ວວມ-ປ່ຳ ດ້ອງ, ເຢຍ ຕສ່ຽວ ເປ໋ນ ເນຍ-ບູງ ເຖສົາ ຊ້າຍ ໝີ່ ອ໊ະ.

20“ທິນ-ຮູ່ງ ອ່າ, ເຢຍ ເຫ່ວ ຈ໊ຽນ ເມີ່ຍ, ເມີ່ຍ ຢ່າ ໄມ້ ເຕົາ ເຢຍ, ເຢຍ ໂຊ້ວ ເຈ໌ຍ ຕ້າຍ, ເມີ່ຍ ຂູງ ປູ໋ງ ມຕສີງ ໝັ່ງ ຮນັ້ງ.

21ເມີ່ຍ ທິ້ວ ໂຮຍ້ວ ໂຕສ໋ວ ໂຕະ ເຢຍ, ຫລົ່ງ ເມີ່ຍ ເຮ້ນ ໄຫ່ ເຍີຍ ປົ໌ວ ເຕສີ໋ຍ ເຢຍ.

22ເມີ່ຍ ໂປ້ວ ເຢຍ ຝາວ ຢຽມ ດສຢ໋າວ ກູ້ ຫງວ່າຍ, ປຸນ ເຢຍ ເກ້ ຈ໊ຽນ ດສຢ໋າວ ມີ່ງ, ເມີ່ຍ ປຸນ ເຢຍ ຢຽມ ຕົ້ມ ດສຢ໋າວ ຕສຸ ເບວ ມີ່ງ ເບວ ຕ້າຍ.

23ເຢຍ ຮິ້ວ ຕຸ໊ ເມີ່ຍ ຕໍ້ ເຢຍ ມີ່ງ ຕສຸ ໄຕ່, ເຊ ເຖົາ ຕີ່ງ ຕສຢັ໋ງ ເຕົ້າໆ ຕສຢັ້ງ ຈ໊ຽນ ເຍີຍ ມ່ຽນ ອ໋ອຍ ຕສຸ ມີ່ງ ເຍີຍ ຕ໋ອງ.

24“ມປ່າ ມ່ຽນ ຢຽມ ປ່າຍ ຫວ່າຍ ເຍີຍ ກະນ້າຍ-ດຸຍ ຊູງ ປົ໌ວ, ຢ່າ ຢຽມ ນິ່ນ ຕສຸ ເຍີຍ ເຕສະ ໜ່ານ ເຫ່ວ ຈ໊ຽນ ໂທ້ ເຖງ ໄມ້ ເຕສີ໌ຍ?

25ມ່ຽນ ດ໊ອດ ໜ່ານ ເຍີຍ ຕສຢັ້ງ ໂຫ່ ເຢຍ ໄມ້ ເຕສີ໌ຍ ເຫວີ່ຍ ນິ່ນ ບົວ ຍ້ຽມ ໄຟ? ເຢຍ ເຍີຍ ໂຮຍ້ວ ໄມ້ ເຕສີ໌ຍ ເຫວີ່ຍ ມ່ຽນ ຈົ່ມ ມ່ຽນ ເດສົ້າ ໄຟ?

26ເຢຍ ຮນ້ຳ ຈ໊ຽນ ອ໋ອຍ ຕຸ໊ ຫລົງ ມປ່າ ຕຸ໊ ທສ້ຽວ. ເຢຍ ຕສົ໊ວ ຈ໊ຽນ ອຈັງ ມປ່າ ຫຮມວັງ ຕ້າຍ ເຖົາ.

27ເຢຍ ເຍີຍ ໂຮຍ້ວ ຟານ-ເຟີຍ ຫລຸ່ນ, ໄມ້ ຕີ້ງ ຢຽດ ຕັ້ງ, ໂຄ້ວ ໜ່ານ ເຍີຍ ຮນອຍ-ເຫຍັຍ ມໍ່ ຈ໊ຽນ ເຢຍ ຢຽມ.

28ເຢຍ ເດສົ້າ, ຮມຽນ ຫຮມວັງ ຢ່າ ໄມ້ ມ່າຍ ຫຍຸດ ຕສິ໋ວ, ເຢຍ ໂຊ້ວ ຈ໊ຽນ ກັ໊ບ ຕສຸ໊ນ ເຍີຍ ຫວຸ່ຍ, ເຫ່ວ ຈ໊ຽນ ໂທ້ ເຖງ.

29ເຢຍ ເຖສົາ ເຮ່ຍ ຈູ໊ ເປ໋ນ ມົ໌ວ-ຕ່ອຍ, ຢ່າ ເຖສົາ ເໜາະ ລໍ່ ທໍ່ ໂຕສ໋ວ ຕ່ອຍ.

30ເຢຍ ເຍີຍ ດົ໊ບ ເຈັ໊ຍ ຢ່າ ເອກ໊າະ ໝີ່ ອ໊ະ, ເຢຍ ເຍີຍ ບູ໊ງ ຈອມ ຮນັ້ງ ໂຕ໌ວ ປົ໊ວ ນໍ.

31ເຫວີ່ຍ ນ້າຍ ເຢຍ ເຍີຍ ຕ້ານ ປ້າ ເຍີຍ ເຖຈຍ ທິ້ວ ເປ໋ນ ເດສົ້າ ເຍີຍ ເຖຈຍ. ເຢຍ ເຍີຍ ເຮລົ້າ-ດົ້ງ ໜູ ເຍີຍ ເຖຈຍ ທິ້ວ ເປ໋ນ ມ່ຽນ ຍ້ຽມ ເຍີຍ ເຖຈຍ.

← Chapter 29 Jump to: Chapter 31 →