Job 6

Lao Bible (ฉบับอักษรลาว)

← Chapter 5 Jump to: Chapter 7 →

1ໂຢ໊ບ ຕສ່ຽວ ເຕົາ,

2“ເຝີຍ ຕຸ໊ ໄຮ່ ເຕສ໊າະ ເຢຍ ເດສົ້າ ຟ່ານ ເຍີຍ ເຈົ໊າ ຕ້າຍ ດສຢັງ, ເຢຍ ເຍີຍ ຢຽດ ຕສູ໊ງ ໂຄ້ວ ໜ່ານ ອັນ ຈ໊ຽນ ທິນ-ແປ້ງ ດສຢັ໋ງ,

3ຕສູ໊ງ ເກົ້າ ເຮນ້ຍ ຄ້ອຍ ເຍີຍ ຊາ-ຕສຽວ. ເຫວີ່ຍ ນ້າຍ ເຢຍ ເຍີຍ ຫວ່າ ເປ໊ະ ເຍີຍ,

4ເຫວີ່ຍ ຕສຸ ເນິ່ນ ເຈ໋ຍ ວົ້ວ ເຕົ້າ ເຍີຍ ຟອງ-ທສັງ ຢຽມ ເຢຍ ເຍີຍ ຊິນ, ຟອງ-ທສັງ ເຍີຍ ເດຍ-ໂຕະ ເປຢົ໋າ ກ໋ອມ ຊິນ, ເຢຍ ຕສຸ ທິນ-ຮູ່ງ ຫລົ່ງ ຫຍູ່ງໆ ແຮະ ເຢຍ.

5ເຮ່ຍ ລໍ່ ມ່າຍ ເມ້ຍ ຫຍັ່ນ, ນິ່ນ ເຫ່ວ ເຍີຍ ໄຟ? ງົ່ງ ມ່າຍ ເບຢົ້າ ອກ໊າວ ຫຍັ່ນ, ນິ່ນ ເຫ່ວ ເຍີຍ ໄຟ?

6ໄມ້ ມ່າຍ ເໝວີຍ ເຍີຍ ກະນ້າຍ ໄມ້ ອັນ ເດສົ໊າ ໄຮ່ ຫຍັ່ນ ຕຸ໊ ເຍີຍ ໄຟ? ເຈົ໋າ-ອໍ໊ ມ່າຍ ຫາຍ ຫຍູ່ງ ເໝວີຍ ໂຕ່ ໄຟ?

7ເຫວີ່ຍ ເຢຍ ນ້າຍ ເຊ ກ້ຳ ເດສ໊ຍ ເຍີຍ ກະນ້າຍ, ເຢຍ ເຍີຍ ໂຮຍ້ວ ສ່ຽວ ໄມ້ ຕຸ໊.

8“ເຝີຍ ຕຸ໊ ຕສິ໋ວ ເຢຍ ໂທ້ ເຍີຍ ເຢຍ ເກ້ງ ໄຮ່ ຕຸ໊, ທິນ-ຮູ່ງ ຢ່າ ອ໋ອຍ ເຖສີຍ ປຸນ ຕົ້ງ ເຢຍ ອ໋ອຍ ຕຸ໊ ເຍີຍ.

9ເຝີຍ ຕຸ໊ ທິນ-ຮູ່ງ ຫຮລຽນ ເຢຍ ຮູ້ ໝ່ວນ, ຊູງ ນິ່ນ ເຍີຍ ປົ໌ວ ໄພ ເຢຍ ກວັ່ງ.

10ຮນັ້ງ ໜ່າຍ ໂຕສ໋ວ ໄຮ່ ອອນ ເຢຍ ເຍີຍ ໂຮຍ້ວ, ໄມ້ ກຸ໊ນ ເຢຍ ເຍີຍ ແປ່ງ ຊຽມ ເຢຍ ຕສູ໊ງ ອຈຽນ-ໂຢ້ວ ເຍີຍ ຖິວ, ເຫວີ່ຍ ຕສຸ ເຢຍ ໄມ້ ແຫງ່ງ ທສີງ-ເດສ່ງ ວົ້ວ ເຕົ້າ ເຍີຍ ຫວ່າ.

11“ເຢຍ ມ່າຍ ຫາຍ ຫຍູ່ງ ທຈະ ປຸນ ເຢຍ ຖສໍ່ ໄຮ່ ຕສົ໊ວ ຈ໊ຽນ? ເຢຍ ເຍີຍ ເຊດ ເມວີ໌ຍ ຮນັ້ງ ຫາຍ ນໍ, ເຢຍ ຖສີງ ຕ້າຍ ອ໋ອຍ ຕສຸ ມ່າຍ ໜ່ອຍ ເຕ໊ຍ?

12ເຢຍ ເຍີຍ ທຈະ ເຊ ຫລະເປຢີ໊ຍ ເຍີຍ ທຈະ ໄຟ? ເຢຍ ເຍີຍ ອໍ໊ ຊິນ ເປ໋ນ ຕົ້ງ ຊິ ໄຟ?

13ເຢຍ ກັ້ນ ຕສູ໊ງ ໄມ້ ມ່າຍ ທຈະ ເຖງ ເຢຍ ກັ້ນ ອ໊ະ. ເຢຍ ຢ່າ ຈົ່ມ ຕສະເອີ໋ຍ ໝີ່ ອ໊ະ.

14“ຫາຍ ເຕົ້າ ຕຸ໊-ເອີ໋ຍ ໄມ້ ໂຕສ໋ວ ຫລົງ ປຸນ ນິ່ນ ເຍີຍ ໂລ໌-ແກງ ຕ່ອຍ, ວົ້ວ ເຕົ້າ ກວັ່ງ, ໄມ້ ທ່າຍ ເນິ່ນ ເຈ໋ຍ ເຍີຍ ທິນ-ຮູ່ງ.

15ເຢຍ ເຍີຍ ກໍ໋-ໂຢ໌ວ ດົ໊ວ ເຢຍ ຮນັ້ງ ວວມ-ເສີຍ, ແອ໋ງ ຮນັ້ງ ໂດ໊ະ-ຕສ໋ວນ ໄຮ່ ອກາຍ ເດສ່ງ.

16ໂດ໊ະ ກິ໊ດ ຊອງ ຕສ່ຽວ ຫຮມວັງ, ຊອງ ຢ່າ ດຸຍ ກູ້ ຫງວ່າຍ ທ້ອງ ຈ໊ຽນ.

17ຢົ໊ວະ ເຍີຍ ຕສຢັ້ງ ໂຫ່ ຊອງ ຢຸ ໝີ່ ອ໊ະ. ຫຍຸດ ຈອມ ຕສ່ຽວ ໝິດ ເດສ່ງ, ໄມ້ ຢຽມ ນິ່ນ ເຍີຍ ຕ໋ອງ.

18ກັ໊ບ ຕ່ອຍ ທສວດ ເຈົ໊າ ເຍີຍ ມ່ຽນ ເລີ່ຍ ນິ່ນ ບົວ ເຍີຍ ເຈົ໊າ, ນິ່ນ ບົວ ເປັຍ ເຕີ່ຍ-ປູງ-ຮວາງ ຕສ່ຽວ ຕສຸ ໝຽດ.

19ຢຽມ ເທມາ ເຕີ່ຍ ກັ໊ບ ຕ່ອຍ ທສວດ ເຈົ໊າ ເຍີຍ ມ່ຽນ ລໍ໌ ວວມ, ເທຈບາ ເຍີຍ ເຈ໋ຍ ເຈົ໊າ ແຊງ-ເອີ໋ຍ ມ່ຽນ ມ່າຍ ລ່ຳ ຮນ້ຳ.

20ນິ່ນ ບົວ ມ່າຍ ລ່ຳ ຮນ້ຳ ໄຮ່ ຕຸ໊ ມປ່າ ໄມ້ ຕຸ໊ ອ໊ະ. ມີ່ງ ເຖົາ ວົ້ວ ນິ່ນ ບົວ ຕສ່ຽວ ໂຮຍ້ວ ຫລຸ່ນ ເດສ່ງ.

21ອີ້ ຕສັ່ນ ເມີ່ຍ ບົວ ເຫວີ່ຍ ເຢຍ ເຊ ຮນັ້ງ ໜ່າຍ ອ໊ະ. ເມີ່ຍ ບົວ ປວັດ ເຢຍ ຕສຸ ໂຄ້ວ ເຍີຍ ສີ່ ຕສ່ຽວ ແຮະ ເມີ່ຍ ບົວ ກ້ຳ ເດສ໋ຍ.

22ເຢຍ ກ໊ອງ ເຈ໋ຍ ‘ໂທ້ ເມີ່ຍ ບົວ ປຸນ ຕສີ້ງ ເຫຍີ່ຍ ເຢຍ’? ໄຟ ‘ຫລົ່ງ ເມີ່ຍ ບົວ ເຍີຍ ຕສິ້ນ ຕສ້ອຍ ດສຸ໌ຍ ຍ່ານ ຫຮມວັງ ປຸນ ເຢຍ’?

23ໄຟ ເຢຍ ກ໊ອງ ເຈ໋ຍ ‘ໂອຈ໋ວ ເຢຍ ເປຢົ໋າ ດຸ໊ດ ເຢຍ ເຍີຍ ວິນ-ວັ້ງ ເຍີຍ ປົ໌ວ-ເດ໊ຍ’? ໄຟ ‘ຕສົວະ ເຢຍ ຢຽມ ເຕສີ໋ຍ ມ່ຽນ ເຍີຍ ມ່ຽນ ເຍີຍ ປົ໌ວ-ເດ໊ຍ ທສວດ ຕ້າຍ’?

24“ອຈ໋າວ ເຢຍ ມ່າະ! ເຢຍ ຕສ່ຽວ ໄມ້ ໂຄ ໂລ. ໂທ້ ປຸນ ເຢຍ ເປັຍ ໂຮຍ້ວ ເຢຍ ຮນັ້ງ ຫາຍ ນໍ ໂຕສ໋ວ ຕ່ອງ.

25ຕສີ໋ງ ເຍີຍ ຫວ່າ ມ່າຍ ຫັດ ມ໌າ ໂຮລ, ເມີ່ຍ ບົວ ກ໊ອງ-ເຫມ ມປ່າ ກ໊ອງ-ເຫມ ຫາຍ ຫຍູ່ງ?

26ໄມ້ ລ່ຳ ຮນ້ຳ ເຍີຍ ມ່ຽນ ກ໊ອງ ເຍີຍ ຫວ່າ ເຊ ຮນັ້ງ ດສຢ໋າວ ນໍ, ວົ້ວ ຫຍູ່ງ ເມີ່ຍ ບົວ ເຫວີ່ຍ ຫາຍ ຕິ່ວ ອ໋ອຍ ເຕົາ ວົ້ວ ເຕີ໋ຍ ຫວ່າ?

27ເມີ່ຍ ບົວ ຕສູ໊ງ ຕີ່ງ ແໝ່ງ ໝັ່ງ ເຫວີ່ຍ ຕຸ໊ ກູ້ ຮັ່ນ ຝຸຈ໊ວຍ, ຢ່າ ໝ່າຍ ກັ້ນ ເຍີຍ ໂລ໌-ແກງ ຕ່ອຍ ເຫວີ່ຍ ຕຸ໊ ຍ່ານ.

28“ອີ້ ຕສັ່ນ ໂທ້ ເມີ່ຍ ບົວ ໝັ່ງ ເຢຍ, ເຢຍ ໄມ້ ຕອງ ຈ໊ຽນ ເມີ່ຍ ບົວ ກ໊ອງ-ແປະ.

29ໂທ້ ເມີ່ຍ ບົວ ແອ໋ງ ຮນ້ຳ ດສຸ່ນ. ໄມ້ ຕູ໋ງ ໂຕສ໋ວ ໄມ້ ແປ້ງ ຟິມ. ອີ້ ຕສັ່ນ ໂທ້ ແອ໋ງ ຮນ້ຳ ດສຸ່ນ. ອ໋ອຍ ຕສຸ ປຸນ ທສີງ ເຢຍ ໂຕສ໋ວ ຕຸ໊ ຕສີ໋ງ ເຍີຍ.

30ເຢຍ ກ໊ອງ ເຍີຍ ຫວ່າ ມ່າຍ ຫາຍ ຫຍູ່ງ ຕ່ອງ ໄຟ? ເມີ່ຍ ບົວ ຮນ້ຳ ຕ້າຍ ເຢຍ ໄມ້ ໄຮ່ ເສີຍ ໄມ້ ທສວດ ເຕສະ ໜ່ານ?

← Chapter 5 Jump to: Chapter 7 →