Proverbs 23

Lao Bible (ฉบับอักษรลาว)

← Chapter 22 Jump to: Chapter 24 →

1ເມີ່ຍ ເຖສົາ ໂຕສ໋ວ ໂຮລ ເຍີຍ ມ່ຽນ ຈວັ່ງ ເຕ້ຍ ຫຍັ່ນ ຫຮນາງ, ອ໋ອຍ ຕສຸ ສຳ ຫລົງ ຫາຍ ຫຍູ່ງ ຢຽມ ເມີ່ຍ ເຍີຍ ດສະຮມຽນ.

2ເຊ ກ໊ອງ ເມີ່ຍ ໂຕສ໋ວ ເມົ້າ ຫຍັ່ນ ເຍີຍ ມ່ຽນ, ອ໋ອຍ ຕສຸ ເຕສ໊າະ ດສຸ ແຕສງ ຈ໊ຽນ ກັ້ນ ເຍີຍ ຈາງ-ເດ໊ຍ.

3ໄມ້ ຕູ໋ງ ເມົ້າ ຫຍັ່ນ ນິ່ນ ຄູ້ ໄຫ່ ເຍີຍ ກະນ້າຍ, ເຫວີ່ຍ ຕສຸ ເຊ ດົ໊ວ ມ່ຽນ ເຍີຍ ໄລ-ຫຮນາງ.

4ໄມ້ ຕູ໋ງ ລ່າວ ຫລຸ່ຍ ເຫວີ່ຍ ລໍ໌ ຕສິ້ນ ຕສ້ອຍ, ອ໋ອຍ ຕສຸ ມ່າຍ ທສົງ-ເມ່ງ ເກົ໋າ ໄຮ່ ຕີ້ງ ເອຈ່ຍ.

5ເມີ່ຍ ຂູງ ປູ໋ງ ມຕສີງ ໝັ່ງ ໄມ້ ລ່ຳ ຫລົ່ງ ເຍີຍ ຕສິ້ນ ຕສ້ອຍ ໄຟ? ເຫວີ່ຍ ຕສຸ ຕສິ້ນ ຕສ້ອຍ ລ່ຽມ ເຕສີ້ຍ ຮນັ້ງ ທສວດ ດ໊າດ, ຢ່າ ຮນັ້ງ ຕົ້ມ ຈ໊າງ ນໍ, ໄດ໋ ຝາວ ລູ່ງ.

6ໄມ້ ຕູ໋ງ ຫຍັ່ນ ມ່ຽນ ອຈັ໊ບ ມ່ຽນ ເຍີຍ ໄລ-ຫຮນາງ, ຢ່າ ໄມ້ ຕູ໋ງ ເມົ້າ ນິ່ນ ຄູ້ ເຍີຍ ກະນ້າຍ.

7ເຫວີ່ຍ ຕສຸ ນິ່ນ ເຊ ຮນັ້ງ ເຕົ້າ ຢຽມ ໂຮຍ້ວ ກະຍົ໌ວ ຊ້າວ ຈ໊ຽນ ເຍີຍ ມ່ຽນ. ນິ່ນ ເຫ່ວ ເມີ່ຍ, “ກຸ໊ນ ຫຍັ່ນ ກຸ໊ນ ຮົບ,” ມປ່າ ນິ່ນ ເຍີຍ ໂຮຍ້ວ ໄມ້ ຮນັ້ງ ໜ່າຍ.

8ເມີ່ຍ ຫຍັ່ນ ລິ໌ວ ວົ້ວ ເຕີ໋ຍ ຕິ໊ ຕຽນ ໄລ-ຫຮນາງ ຕສູ໊ງ ຕສຸ ໂລ້ ທສວດ, ເມີ່ຍ ກ໊ອງ ເຍີຍ ຫວ່າ-ຫລົງ ຢ່າ ດ໊ອດ ໝີ່ ອ໊ະ.

9ໄມ້ ຕູ໋ງ ກ໊ອງ ຫວ່າ ປຸນ ມ່ຽນ ຫຮງົງ ມ່ຽນ ໝວັງ, ເຫວີ່ຍ ຕສຸ ນິ່ນ ອ໋ອຍ ໝັ່ງ ເຜຍ ເມີ່ຍ ເຍີຍ ທສົງ-ເມ່ງ ຫວ່າ.

10ໄມ້ ຕູ໋ງ ຊຸ້ຍ ໂລ໌-ຮນອຍ ເຕີ່ຍ-ຈ໋າຍ ເຍີຍ ຕົ່ງ, ໄຟ ເຕສ໊າະ ກູ້ ຮັ່ນ ຝຸຈ໊ວຍ ເຍີຍ ລີ່ງ ເຕີ່ຍ,

11ເຫວີ່ຍ ຕສຸ ຕສົວະ ນິ່ນ ບົວ ວົ້ວ ເຕົ້າ ຕສ໊ຽວ ເຊ ເຮ້ນ ໄຫ່. ນິ່ນ ບົວ ໂກ໋ ເມີ່ຍ, ຕສ໊ຽວ ອ໋ອຍ ເຖງ ນິ່ນ ບົວ ແຖສງ ສີ່.

12ອ໋ອຍ ຕສຸ ຫລົ່ງ ໂຮຍ້ວ ໝວັງ ມ່ຽນ ອຈ໋າວ, ແປງ ມນ່ອມ ໝວັງ ວ່ວນ ຕສາງ ເຍີຍ ຫວ່າ.

13ເມີ່ຍ ອ໋ອຍ ຕສຸ ເບ໊າະ ອຈ໋າວ ຝຸຈ໊ວຍ, ໄມ້ ຕູ໋ງ ກວັ່ງ. ເມີ່ຍ ຫລົ່ງ ປຢ໊າ ຟິດ ນິ່ນ, ນິ່ນ ໄມ້ ໄຕ່.

14ເຊ ກ໊ອງ ເມີ່ຍ ຫລົ່ງ ປຢ໊າ ຟິດ, ເມີ່ຍ ຕສ່ຽວ ເຖງ ໂອຈ໋ວ ນິ່ນ ເຍີຍ ແໝ່ງ ໄມ້ ຕສຸ ມີ່ງ ຢຽມ ຢ້ຽມ ເກນ.

15ເຢຍ ເຍີຍ ຕອນ ອ້າ! ເຊ ກ໊ອງ ເມີ່ຍ ເຍີຍ ໂຮຍ້ວ ມ່າຍ ທສົງ-ເມ່ງ, ເຢຍ ເຍີຍ ໂຮຍ້ວ ຢ່າ ອະເຮນີ້ຍ.

16ເຊ ກ໊ອງ ເມີ່ຍ ເຍີຍ ດສຸ້ຍ ກ໊ອງ ຕສຽນ ເຍີຍ ຫວ່າ, ເຢຍ ເຍີຍ ໂຮຍ້ວ ຕສ່ຽວ ອອນ-ເຫລາະ ໄຫ່.

17ໄມ້ ຕູ໋ງ ມ່າຍ ໂຮຍ້ວ ເໝວີ່ຍ ເຈັ໊ຍ ຕສຸ໌ຍ-ມ່ຽນ, ອ໋ອຍ ຕສຸ ຮນອຍໆ ທ່າຍ ຕສ໊ຽວ.

18ຮນັ້ງ ໜ່າຍ ເມີ່ຍ ອກະຮ້າ ຮີ້ງ ເຍີຍ ເຈົ໊າ ດົ່ງ ຫາຍ ຕສູ໊ງ ມ່າຍ ລ່ຳ ຮນ້ຳ ເຍີຍ, ຢ່າ ໄມ້ ຕສຸ ຈ໊ຳ ກວັ່ງ.

19ເຢຍ ເຍີຍ ຕອນ ອ້າ! ເມີ່ຍ ອ໋ອຍ ຕສຸ ໝວັງ ຢ່າ ອ໋ອຍ ຕສຸ ມ່າຍ ທສົງ-ເມ່ງ, ແອ໋ງ ປຸນ ເມີ່ຍ ເຍີຍ ໂຮຍ້ວ ມີ່ງ ວົ້ວ ຕິ້ວ ເຈົ໊າ.

20ໄມ້ ຕູ໋ງ ເຖສົາ ເຫງ ຮົບ ອະຫງຸ່ນ ຕິ໊ວ ໄຟ ເມົ້າ ຫຍັ່ນ ອໍ໊ ເຍີຍ ມ່ຽນ ຢຽມ,

21ເຫວີ່ຍ ຕສຸ ເມົ້າ ຫຍັ່ນ ຮົບ ອກວິນ ເຍີຍ ມ່ຽນ ອ໋ອຍ ຈົ່ມ. ເມົ້າ ມອຈ້ອມ ເຍີຍ ມ່ຽນ ຕສ່ຽວ ຕສຸ໊ ລຸຍ-ໂຫວ-ຮູ້.

22ເມີ່ຍ ເຍີຍ ເຕຍ ປຸນ ເມີ່ຍ ມ່າຍ ແໝ່ງ, ເມີ່ຍ ອ໋ອຍ ຕສຸ ໝວັງ ນິ່ນ. ເມີ່ຍ ເຍີຍ ມາ ໂກ໋ ຕ້າຍ, ໄມ້ ຕູ໋ງ ໝັ່ງ ເຜຍ.

23ອ໋ອຍ ຕສຸ ມ໌າຍ ຕສຽນ ເລີ໌ຍ ຢ່າ ໄມ້ ຕູ໋ງ ໝ່າຍ. ອ໋ອຍ ຕສຸ ມ໌າຍ ທສົງ-ເມ່ງ, ອຈ໋າວ ເຍີຍ ຫວ່າ ເຖສົາ ວ່ວນ ຕສາງ.

24ຄູ້ ມ່ຽນ ເຍີຍ ເຕຍ ຕສະເກ້ງ! ອອນ-ເຫລາະ ໄຫ່. ຫາຍ ເຕົ້າ ຕຸ໊ ທສົງ-ເມ່ງ ເຍີຍ ຕອນ ອ໋ອຍ ເຫວີ່ຍ ນິ່ນ ອະເຮນີ້ຍ.

25ອ໋ອຍ ຕສຸ ປຸນ ເມີ່ຍ ເຍີຍ ເຕ໋ຍ ໝ່າ ອະເຮນີ້ຍ, ປຸນ ເມີ່ຍ ເຍີຍ ມາ ຫຍໍ ອອນ-ເຫລາະ.

26ເຢຍ ເຍີຍ ຕອນ ອ່າ, ຫລົ່ງ ໂຮຍ້ວ ໝວັງ ເຢຍ, ປຸນ ເມີ່ຍ ເຍີຍ ມຕສີງ ໝັ່ງ ເຢຍ ເຍີຍ ເຈົ໊າ,

27ເຫວີ່ຍ ຕສຸ ໝ່າຍ ຊິນ ເຍີຍ ມເຊັຍ ຕອນ ເຊ ຮນັ້ງ ໂດ ໄຫ່ ເຍີຍ ຄວດ, ປວັ້ງ ລ່ຽວ ເຍີຍ ມເຊັຍ ຕອນ ຮນັ້ງ ເຫບ ເຍີຍ ວວມ-ຄວດ.

28ນິ່ນ ເມີຍ ຈ໊ຽນ ຕສົ໊ວ ຮນັ້ງ ຈັ໋ນ-ຕສະ, ຢ່າ ຢຽມ ປ້າມ ມ່ຽນ ບຸດົ໋ງ ປຸນ ໄມ້ ຕສຽບ ຕສົ໊ວະ ເຍີຍ ມ່ຽນ ທສ້ຳ ຈ໊ຽນ ຝາວ.

29ຫາຍ ເຕົ້າ ມ່າຍ ຂວນ ນ່ານ? ຫາຍ ເຕົ້າ ມ່າຍ ໂຢວ-ເດສົ້າ? ຫາຍ ເຕົ້າ ມ່າຍ ແດສງ ຈ໋າ ເຍີຍ ສີ່? ຫາຍ ເຕົ້າ ມ່າຍ ຫລະງົບ ເຍີຍ ເຈົ໊າ? ຫາຍ ເຕົ້າ ຕສຸ ມຸນ ຢ່າ ໄມ້ ມ່າຍ ກອນ-ແປ໋ງ? ຫາຍ ເຕົ້າ ມຕສີງ ຊິ?

30ເຊ ຕົ້ງ ລ່ຽວ ລິ່ນ ຮົບ ອະຫງຸ່ນ ຕິ໊ວ ເຖສົາ ມີ່ງ ເສີຍ ຮົບ ເຜວ ຕ້າຍ ເຍີຍ ຕິ໊ວ ວົ້ວ ເຕີ໋ຍ ມ່ຽນ.

31ໄມ້ ຕູ໋ງ ໝັ່ງ ອະຫງຸ່ນ ຕິ໊ວ-ຊິ ຢຽມ ກະຍົ໌ວ ຕສ໊ານ ແອ໊ງ ອຈັງ, ຮົບ ເອຈ່ຍ ເຊ ບຢ່າງ ເຍີຍ.

32ເຊດ ເມວີ໌ຍ ນ້າຍ ຫຍູ່ງ ຕິ໊ວ ໂຕະ ໄຫ່ ຮນັ້ງ ນາງ-ໂຕະ ເຍາະ ນໍ, ຢ່າ ຫ່ອຍ ຮນັ້ງ ນາງ-ເຈັ໊ຍ ເຍາະ.

33ເມີ່ຍ ເຍີຍ ມຕສີງ ຕສ່ຽວ ປວັດ ກູ໊ ໄກວ໋ ເຍີຍ ສີ່. ເມີ່ຍ ເຍີຍ ໂຮຍ້ວ ຢ່າ ຫລຸ່ນ, ກ໊ອງ ປູ໊ ລົ່ງ ປູ໊ ຕັ໊ງ ເຍີຍ ຫວ່າ.

34ເມີ່ຍ ຕສ່ຽວ ຮນັ້ງ ເປວີ໋ຍ ຈ໊ຽນ ຄ້ອຍ ກະຍົ໌ວ ເຍີຍ ມ່ຽນ, ຢ່າ ຮນັ້ງ ເປວີ໋ຍ ຈ໊ຽນ ທສອງ ເດຍ-ບວັ້ງ ເຍີຍ ດ້ຽວ ກູ້ ຫງວ່າຍ.

35ເມີ່ຍ ຕສ່ຽວ ກ໊ອງ, “ມ່ຽນ ເບ໊າະ ເຢຍ ມປ່າ ເຢຍ ໄມ້ ມຸນ. ນິ່ນ ບົວ ທຈະ ເບ໊າະ ເຢຍ, ເຢຍ ຢ່າ ໄມ້ ໄຮ໌ ຝູ່ງ. ເຢຍ ຫາຍ ຕສັ່ນ ຖສີງ ເຍຍ? ເຢຍ ແອ໋ງ ມີ່ງ ລໍ໌ ຕິ໊ວ ຮົບ.”

← Chapter 22 Jump to: Chapter 24 →