Proverbs 7

Lao Bible (ฉบับอักษรลาว)

← Chapter 6 Jump to: Chapter 8 →

1ເຢຍ ເຍີຍ ຕອນ ອ່າ, ເມີ່ຍ ອ໋ອຍ ຕສຸ ເອີຍ ຈ໊ຽນ ເຢຍ ເຍີຍ ຫວ່າ, ອ໋ອຍ ຕສຸ ເຕສ໊າະ ເຢຍ ຫັດ ເຍີຍ ຫວ່າ ຊຽວ ຈ໊ຽນ ເມີ່ຍ ເຍີຍ ໂຮຍ້ວ.

2ອ໋ອຍ ຕສຸ ເອີຍ ຈ໊ຽນ ເຢຍ ຫັດ ເຍີຍ ຫວ່າ ຕສ່ຽວ ຕຸ໊ ແໝ່ງ ຕສຢັ້ງ, ໂກ໋ວ ຫລົງ ເຢຍ ອຈ໋າວ ເຍີຍ ຫວ່າ ຮນັ້ງ ໂກ໋ວ ຫລົງ ກັ້ນ ເຍີຍ ມຕສີງ ນໍ,

3ເຕສ໊າະ ຕ້າຍ ໂດ້ ຈ໊ຽນ ເມີ່ຍ ເຍີຍ ປົ໌ວ-ໂດ໊ະ, ແອ໋ງ ເຟ້ຍ ຈ໊ຽນ ເມີ່ຍ ເຍີຍ ໂຮຍ້ວ ກະຍົ໌ວ.

4ອ໋ອຍ ຕສຸ ກ໊ອງ ບົ໋ວ ທສົງ-ເມ່ງ, “ເມີ່ຍ ໂຕສ໋ວ ເຢຍ ເຍີຍ ຕໍ່,” ຢ່າ ເຫ່ວ ເມ່ງ ແປະ ເຍີຍ ເຈົ໊າ ໂຕສ໋ວ ເມີ່ຍ ເຍີຍ ໂລ໌-ແກງ ຕ່ອຍ.

5ນ້າຍ ເຕີ໋ຍ ອີ ຫຍູ່ງ ຕສ່ຽວ ເຖງ ເມີ່ຍ ຊິ້ມ ດຸ໊ດ ຫຮຢຽນ ໂອກ໋ ເຍີຍ ເອົ໊າ, ຢ່າ ເປຢົ໋າ ດຸ໊ດ ດສຸ້ຍ ບຢ່າງ, ປວັ້ງ ລ່ຽວ ເຍີຍ ມເຊັຍ ຕອນ.

6ເຢຍ ຢຽມ ເຢຍ ເຍີຍ ເປຢົ໊າ ເຍີຍ ຟົງ ມ່ວນ, ໝັ່ງ ທສວດ ລານ ຈ໊ຽນ ເຍີຍ ແພຢງ ເຍີຍ ຄວດ.

7ເຢຍ ປວັດ ຢຽມ ໄມ້ ຮິ້ວ ຫາຍ ຫຍູ່ງ ເຍີຍ ຕສວັ໋ງ ມ່ຽນ ກະຍົ໌ວ, ຢຽມ ມ່ຽນ ຫລຸນ ມ່ຽນ ບຸດົ໋ງ, ມ່າຍ ເຕົ້າ ມ່ຽນ ຫລຸນ ມ່ຽນ ຮນ້ຳ ຕຸ໊ ຫຮງົງ ໄຫ່.

8ນິ່ນ ກັນ ເຈົ໊າ ມີ່ງ ເຖົາ ເປັຍ ວົ້ວ ເຕົ້າ ມເຊັຍ ຕອນ ເຍີຍ ເປຢົ໊າ ເຍີຍ ເຈົ໊າ-ຖສາ, ແອ໋ງ ຢັ້ງ ວົ້ວ ຕິ້ວ ເຈົ໊າ ມີ່ງ ວົ້ວ ເຕົ້າ ເຍີຍ ເປຢົ໊າ

9ຕ໋ອຍ ລູ່ງ ມ໌ານ-ຫຮມວັງ, ດສ໋ຽມ-ຢ້າງ, ເຖົາ ລູ່ງ ມ໌ວນ ຕສັ່ນ ຫຮມວັງ ເຍີຍ ຕສຢັ້ງ ໂຫ່.

10ໝັ່ງ ມ່າະ! ມ່າຍ ເຕົ້າ ມເຊັຍ ຕອນ ຕ້າຍ ປວັ້ງ ນິ່ນ, ນິ່ນ ຕສອງ ຊິນ ຮນັ້ງ ໝ່າຍ ຊິນ ເຍີຍ ມເຊັຍ ຕອນ ຢ່າ ມ່າຍ ກູ໊ ໄກວ໋ ເຍີຍ ໂຮຍ້ວ.

11ນິ່ນ ລຢາ ໄຫ່, ໄມ້ ຮິ້ວ ຕຸ໊ ໄຍ້, ນິ່ນ ເຍີຍ ເຕສົ໋າ ຂູງ ອ໋ອຍ ມີ່ງ, ໄມ້ ຢຽມ ຕີ່ງ ເປຢົ໊າ.

12ອ໊າ ຕັ້ງ ຢຽມ ຈາຍ-ຫ່ອງ, ອ໊າ ຕັ້ງ ຢຽມ ຕົ້ມ ຕສວັ໋ງ ຕສ່າມ, ຢຽມ ນອມໆ ເຈົ໊າ-ຖສາ ນິ່ນ ປີ໋ງ ຈ໊ຽນ ຕສົ໊ວ.

13ນິ່ນ ເຕສ໊າະ ຈ໊ຽນ ວົ້ວ ເຕົ້າ ມ່ຽນ ຫລຸນ ມ່ຽນ ຕສົມ ນິ່ນ, ເຖສົາ ນິ່ນ ກ໊ອງ ຢ່າ ໄມ້ ຮິ້ວ ຕຸ໊ ໄຍ້. ນິ່ນ ກ໊ອງ,

14“ເຢຍ ຝົ່ງ ຫໍ່ ເຕສ່ຍ ເຫວີ່ຍ ຈິວ ທົງ ເຍີຍ ກະນ້າຍ, ອີ້ ຮນອຍ ເຢຍ ຢ່າ ຈ໊າວ ຊູງ ເຢຍ ແລ໌ງ ເຈ໋ຍ ເຍີຍ ແຫງ່ງ ຫວ່າ,

15ເຢຍ ຕສ່ຽວ ທສວດ ຕ້າຍ ລໍ໌ ເມີ່ຍ, ທຈະ ລໍ໌ ເມີ່ຍ, ຕສ່ຽວ ລໍ໌ ປວັດ ອ໊ະ.

16ເຢຍ ຫລົ່ງ ຢຽມ ອີຢິ໊ບ ຕ້າຍ ເຍີຍ ເຕສ໋ຍ ເຊດ ຫລະມ່າ ເດຍ-ໝ່ວນ, ຕິ່ມ ຕສຢັ໋ງ ເຢຍ ເຍີຍ ໂຖສວ.

17ເຢຍ ຫລົ່ງ ມູຢໍ່, ອາໂລ ເດຍ-ດາງ, ເຖສົາ ເຈ້ຍ ໂລ່ວ ດົ໊ບ ປຸນ ເຢຍ ເຍີຍ ໂຖສວ ດາງ.

18ຕ້າຍ ມ່າະ! ເຢຍ ບົວ ຕສຢັ້ງ ມ໌ວນ ຮນ້ຳ ເຖົາ ເປ໊ວ, ຢ່າ ຮນ້ຳ ເຖົາ ລູ່ງ ດອມ. ເຢຍ ບົວ ໄຮ່ ອຈຽນ-ໂຢ້ວ ເຍີຍ ລ່ານ ຮນ້ຳ ລ່ານ,

19ເຫວີ່ຍ ຕສຸ ເຢຍ ເຍີຍ ໂອກ໋ ໄມ້ ຢຽມ ເປຢົ໊າ. ນິ່ນ ທສວດ ເຈົ໊າ ມີ່ງ ໂກ.

20ນິ່ນ ຕໍ້ ຢຽດ ບົວະ ຍ່ານ ມີ່ງ. ເຖົາ ຫຮລາ-ຈຸ້ນ ນິ່ນ ຖສີງ ດສ໋ວນ.”

21ນ້າຍ ເຕົ້າ ຫຮຢຽນ ໂອກ໋ ເຍີຍ ເອົ໊າ ຫລົ່ງ ຫວ່າ-ກາມ ຢົວະ ນິ່ນ, ຫລົ່ງ ດສຸ້ຍ ບຢ່າງ ແປງ ນິ່ນ ມີ່ງ.

22ວົ້ວ ເຕົ້າ ມ່ຽນ ຫລຸນ ມ່ຽນ ລ່ຽມ ເຕສີ້ຍ ກັນ ຈ໊ຽນ ນິ່ນ ມີ່ງ ອ໊ະ, ຮນັ້ງ ງົ່ງ ໂກ໊ວ ມີ່ງ ຕສຸ ໄຕ໋ ໄຕ່, ຮນັ້ງ ໄອຈ້ ຕສຸ ຮລາງ ຮລົບ ຈ໊ຽນ ຕສຽດ ເຍີຍ,

23ຕສົ໊ວ ເຖົາ ຟອງ-ທສັງ ປ໊ວນ ເປັຍ ນິ່ນ ເຍີຍ ຮລັນ, ໄຟ ຮນັ້ງ ນອມ ເໜາະ ຊຽບໆ ເຍີຍ ໄດ໋ ເປັຍ ມູ໌ງ ກະຍົ໌ວ. ນິ່ນ ລ່ຽມ ໄມ້ ຮິ້ວ ຕຸ໊ ກັ້ນ ອ໋ອຍ ຕສຸ ຫ່ອຍ ແໝ່ງ.

24ຕອນ ອ້າ! ອີ້ ຕສັ່ນ ອ໋ອຍ ຕສຸ ໝວັງ ເຢຍ ມ່າະ! ອ໋ອຍ ຕສຸ ຫລົ່ງ ໂຮຍ້ວ ໝວັງ ເຢຍ ເຍີຍ ດສຸ້ຍ ກ໊ອງ ເຍີຍ ຫວ່າ.

25ໄມ້ ຕູ໋ງ ປຸນ ເມີ່ຍ ເຍີຍ ໂຮຍ້ວ ຮວິນ ມີ່ງ ວົ້ວ ເຕົ້າ ມເຊັຍ ຕອນ ເຍີຍ ເຈົ໊າ, ໄມ້ ຕູ໋ງ ເປັຍ ນິ່ນ ດົ໊ວ ເຍີຍ ເຈົ໊າ-ໂຫລ່ວ.

26ຕສຸ ວົ້ວ ເຕົ້າ ມເຊັຍ ຕອນ ຫ່ອຍ ເຍີຍ ມ່ຽນ ໄມ້ ເຕສີ໌ຍ ໂຕສະ, ຕສຸ ນິ່ນ ໄຕ໋ ໄຕ່ ເຍີຍ ມ່ຽນ ຕສະເກ້ງ ທສ້ຳ! ໄຫ່.

27ນິ່ນ ເຍີຍ ເປຢົ໊າ ຢຽມ ມີ່ງ ຢ້ຽມ ເກນ ເຍີຍ ເຈົ໊າ, ເຊ ຕໍ້ ມ່ຽນ ເອຈ່ຍ ຕສຸ ໄຕ່ ເຍີຍ ມ່ຽນ ຢຽມ ເຍີຍ ຕ໋ອງ.

← Chapter 6 Jump to: Chapter 8 →