Proverbs 8

Lao Bible (ฉบับอักษรลาว)

← Chapter 7 Jump to: Chapter 9 →

1ທສົງ-ເມ່ງ ເຫ່ວ ຈ໊ຽນ ໄມ້ ເຕສີ໌ຍ? ເມ່ງ ແປະ ເຍີຍ ເຈົ໊າ ເຫ່ວ ເຖຈຍ ໂຮລ ເຍີຍ ໄມ້ ເຕສີ໌ຍ?

2ນິ່ນ ຢຽມ ເຈົ໊າ-ເຮລນ ຮລັງ ເຍີຍ ຕ໋ອງ, ໂຊ້ວ ຈ໊ຽນ ຈ໊າບ-ມ໌າ ເຈົ໊າ.

3ນິ່ນ ຢຽມ ເປັຍ ຕສີ້ງ ເຍີຍ ຫລາດ ແກ້ງ ກະເຮລນ, ຢຽມ ເປັຍ ແກ້ງ ເຍີຍ ຕ໋ອງ ເຫ່ວ ບຸຍ ເຍີຍ ກ໊ອງ,

4“ຕສວັ໋ງ ມ່ຽນ ອ້າ! ເຢຍ ເຫ່ວ ເມີ່ຍ ບົວ. ເຢຍ ຫູງ ຈ໊ຽນ ຢຽດ ຕສູ໊ງ ປ້າມ ມ່ຽນ ເຫ່ວ.

5ໄມ້ ຮິ້ວ ຫາຍ ຫຍູ່ງ ເຍີຍ ມ່ຽນ ອ້າ! ເມີ່ຍ ບົວ ອ໋ອຍ ຕສຸ ໂຫະ ໄກວ. ມ່ຽນ ຫຮງົງ ມ່ຽນ ອ້າ! ເມີ່ຍ ບົວ ເຍີຍ ໂຮຍ້ວ ອ໋ອຍ ຕສຸ ເມ່ງ ແປະ.

6ໝວັງ ມ່າະ! ເຢຍ ອ໋ອຍ ກ໊ອງ ຫລົງ ໄຫ່ ເຍີຍ ຫວ່າ. ຫາຍ ຫຍູ່ງ ຫອບ ເຍີຍ ອ໋ອຍ ຢຽມ ເຢຍ ເຍີຍ ດສຸ້ຍ ທສວດ,

7ເຫວີ່ຍ ຕສຸ ເຢຍ ເຍີຍ ດສຸ້ຍ ອ໋ອຍ ກ໊ອງ ຕສຽນ ເລີ໌ຍ, ເຢຍ ເຍີຍ ດສຸ້ຍ ເໝີຍ ກ້ຳ ເດສ໊ຍ ໄຫ່ ເອ໊າະ ເຍີຍ ເຈົ໊າ.

8ເຢຍ ເຍີຍ ດສຸ້ຍ ກ໊ອງ ເຍີຍ ຢຽດ ຕສູ໊ງ ຫວ່າ ຫອບ ເຍີຍ, ໄມ້ ມ່າຍ ຢຽດ ເຕີ໋ຍ ເງົາ ໄຟ ອຈ໊ວດ.

9ເຫວີ່ຍ ໄຮ່ ເປັຍ ໂຮຍ້ວ ເຍີຍ ມ່ຽນ, ນ້າຍ ເຕີ໋ຍ ຢຽດ ຕສູ໊ງ ຫວ່າ ເຊ ຕສະ ເຍີຍ. ເຫວີ່ຍ ຕຸ໊ ວ່ວນ ຕສາງ ເຍີຍ ມ່ຽນ, ນ້າຍ ເຕີ໋ຍ ຫວ່າ ເຊ ຫອບ ເຍີຍ.

10ກິ໊ນ ຫລົ່ງ ເຢຍ ອຈ໋າວ ເຍີຍ ຫວ່າ ໄມ້ ເຕສີ໌ຍ ຍ່ານ, ກິ໊ນ ວ່ວນ ຕສາງ ໄມ້ ເຕສີ໌ຍ ຕສຽນ ຈຽມ,

11ເຫວີ່ຍ ຕສຸ ທສົງ-ເມ່ງ ເຊ ເກົ້າ ຫລົງ ເຈ໋ຍ ຫລະເປຢີ໊ຍ-ຈ໋າຍ, ຕົ້ງ ເມີ່ຍ ອ໋ອຍ ເຍີຍ ຢຽດ ຕສູ໊ງ ກະນ້າຍ ໄມ້ ໄຮ່ ເປີ໊ຍ ຕຸ໊ ທສົງ-ເມ່ງ.

12“ເຢຍ ເຊ ທສົງ-ເມ່ງ. ເຢຍ ປຸນ ມ່ຽນ ໄຮ່ ຮນ້ຳ ຕຸ໊ ທົງ, ມ່າຍ ວ່ວນ ຕສາງ ຢ່າ ໄກວ.

13ທ່າຍ ຕສ໊ຽວ ເຍີຍ ເຈົ໊າ ເຊ ດສອງ ເອ໊າະ ເຍີຍ ສີ່. ເຢຍ ດສອງ ເທສງ-ໂຮລ, ໂຕສ໋ວ ເໝົາ ເຍີຍ ສີ່, ໂຕສ໋ວ ເອ໊າະ ເຍີຍ ເຈົ໊າ ເຖສົາ ກ໊ອງ-ແປະ ດົ໊ວ ມ່ຽນ ເຍີຍ ຫວ່າ.

14ເຢຍ ໄຮ່ ເຖງ ຕ໊າ ຕສະເອີ໋ຍ, ມ່າຍ ທສົງ-ເມ່ງ ຫລົງ. ເຢຍ ໄຮ່ ເມ່ງ ແປະ ຢ່າ ມ່າຍ ທຈະ.

15ຮູ່ງ ເຕ໋ຍ ປັ່ງ ເຢຍ ກຸ໊ນ. ໂຕສ໋ວ ໂຮລ ເຍີຍ ມ່ຽນ ປັ່ງ ເຢຍ ຫລຽບ ແປ້ງ ຟິມ ເຍີຍ ເລີ໌ຍ.

16ໂມ໌ວ ເຕົ້າ ເປຢີ໊ຍ ເຕສີ໊ຍ ເຖສົາ ໂຕສ໋ວ ໂຮລ ເຍີຍ ມ່ຽນ ປັ່ງ ເຢຍ ກຸ໊ນ ລູ່ງ ເດ໊ຍ.

17ຮນ້ຳ ເຢຍ ວົ້ວ ເຕີ໋ຍ, ເຢຍ ຢ່າ ຮນ້ຳ ນິ່ນ ບົວ, ຈ້ຽນ ລໍ໌ ເຢຍ ວົ້ວ ເຕີ໋ຍ ຢ່າ ລໍ໌ ຕຸ໊ ປວັດ.

18ຕສິ້ນ ຕສ້ອຍ ເຖສົາ ອຈັງ-ຫລ່າງ ຢຽມ ເຢຍ, ຢ່າ ມ່າຍ ຢຽມ ຕຸ໊ ວ້ວນ ເຍີຍ ຟຸ-ໂຫລະ ເຖສົາ ກົງ-ຟິມ.

19ເມີ່ຍ ຢຽມ ເຢຍ ຕຸ໊ ຕ້າຍ ເຍີຍ ເຊ ເກົ້າ ຫລົງ ເຈ໋ຍ ຈຽມ, ຕສູ໊ງ ເກົ້າ ຫລົງ ເຈ໋ຍ ຕສຽນ ໄຫ່ ເຍີຍ ຈຽມ, ເຢຍ ທສວດ ເຍີຍ ຢ່າ ເກົ້າ ຫລົງ ເຈ໋ຍ ຕສຽນ ຍ່ານ.

20ເຢຍ ຢັ້ງ ໂຕສ໋ວ ຫອບ ເຍີຍ ເຈົ໊າ, ກັນ ແປ້ງ ຟິມ ເຍີຍ ເຈົ໊າ-ໂຫລ່ວ.

21ເຢຍ ປຸນ ຮນ້ຳ ເຢຍ ວົ້ວ ເຕີ໋ຍ ດສິບ ຕສິ້ນ ຕສ້ອຍ ປຸນ ນິ່ນ ຊຽວ ຈ໋າຍ ເຍີຍ ກະນ້າຍ ເຍີຍ ຕ໋ອງ ປວັ໊ງ ເດສ່ງ.

22“ ຕສ໊ຽວ ເຈ໌ຍ ກອນ ໂຕສ໋ວ ນິ່ນ ເຍີຍ ກົງ ວົ້ວ ຕສັ່ນ, ນິ່ນ ເຕສີ໋ຍ ເຢຍ ດ່າງ ເຈ໋ຍ, ເຊ ນິ່ນ ໂລ໌-ຮນອຍ ໂຕສ໋ວ ຕ້າຍ ເຍີຍ ຕ້າວ ຫຍູ່ງ ກົງ.

23ຢຽມ ໂລ໌-ຮນອຍ ຕົ້ງ ທສໍ ວົ້ວ, ໄມ້ ແກ້ງ ມ່າຍ ປ້າມ ເກນ ວົ້ວ ຕສັ່ນ ນິ່ນ ຫລຽບ ເຢຍ ເຈ໌ຍ ຕ້າຍ.

24ໄມ້ ແກ້ງ ມ່າຍ ຄ້ອຍ, ໄມ້ ແກ້ງ ມ່າຍ ວວມ ທສ້ຳ ເຍີຍ ວວມ-ຕສີ໊ງ ເຢຍ ທສວດ ເສີຍ ຕ້າຍ ອ໊ະ.

25ຕົ້ມ ບົງ ໄມ້ ແກ້ງ ຕຸ໊ ຢຽມ ຕີ່ງ, ຟິ້ວ-ບົງ ຢ່າ ໄມ້ ແກ້ງ ມ່າຍ, ເຢຍ ຕສູ໊ງ ທສວດ ເສີຍ.

26ເຢຍ ທສວດ ເສີຍ ດ່າງ ທິນ-ຮູ່ງ ເຕສີ໋ຍ ເດົາ ເຖສົາ ລີ່ງ ເຕີ່ຍ. ລູ່ງ ເດ໊ຍ ຕິ໊ ຕຽນ ເຍີຍ ເນຍ-ບູງ ຢ່າ ໄມ້ ແກ້ງ ມ່າຍ.

27ນິ່ນ ຫລຽບ ລູ່ງ ຢ່າ ເກວ໊ດ ຮວີງ ກ໋ອມ ຄ້ອຍ-ໝິ່ນ ເຍີຍ ລູ່ງ ກອນ ວົ້ວ ຕສັ່ນ, ເຢຍ ຢຽມ ໜ່າຍ.

28ນິ່ນ ປຸນ ລູ່ງ ກູ້ ຫງວ່າຍ ຢຽມ ຕຸ໊ ວ້ວນ, ຢ່າ ຫລຽບ ເດົາ-ເດ໊ຍ ເຍີຍ ວວມ-ຕສີ໊ງ ວົ້ວ ຕສັ່ນ,

29ນິ່ນ ຕີ່ງ ຄ້ອຍ ເຍີຍ ກັ໊ບ-ຈ໋າຍ ເຫວີ່ຍ ປຸນ ວວມ ໄມ້ ເຈ໋ຍ ດ່າງ ນິ່ນ ຫັດ ເຍີຍ ຫວ່າ, ນິ່ນ ຢ່າ ຫລຽບ ຕີ່ງ ເດົາ ເຍີຍ ກອນ-ໂດ໊ະ,

30ວົ້ວ ຕສັ່ນ ເຢຍ ຢຽມ ນິ່ນ ເຍີຍ ກະເຮລນ ຮນັ້ງ ເຕົ້າ ຕສັ່ງ ມ່ຽນ. ນິ່ນ ຮນອຍໆ ເຫວີ່ຍ ເຢຍ ອະເຮນີ້ຍ, ເຢຍ ຢ່າ ຕສັ່ນໆ ຢຽມ ນິ່ນ ເຍີຍ ດສະຮມຽນ ອຈຽນ-ໂຢ້ວ ໄຫ່.

31ເຢຍ ອະເຮນີ້ຍ ນິ່ນ ເຍີຍ ປ້າມ ເກນ, ຢ່າ ອະເຮນີ້ຍ ໄຫ່ ປ້າມ ມ່ຽນ.

32“ເຢຍ ເຍີຍ ຕອນ ອ່າ, ອີ້ ຕສັ່ນ ໝວັງ ເຢຍ ມ່າະ! ເອີຍ ຈ໊ຽນ ເຢຍ ເຍີຍ ເຈົ໊າ ໂຕສ໋ວ ວົ້ວ ເຕີ໋ຍ ມ່າຍ ອອນ-ເຫລາະ.

33ອ໋ອຍ ຕສຸ ໝວັງ ເຢຍ ອຈ໋າວ ເຍີຍ ຫວ່າ ຕສ່ຽວ ຕຸ໊ ທສົງ-ເມ່ງ, ໄມ້ ຕູ໋ງ ປູ໋ງ ຫລໍ.

34ໝວັງ ເຢຍ ເຍີຍ ຫວ່າ ວົ້ວ ເຕົ້າ ມ່າຍ ອອນ-ເຫລາະ, ນິ່ນ ຮນອຍໆ ຢຽມ ເຢຍ ເຍີຍ ແກ້ງ ດ່າງ ໝັ່ງ, ຢຽມ ເຢຍ ເຍີຍ ແກ້ງ ກະເຮລນ ຕສົ໊ວ.

35ຫາຍ ເຕົ້າ ລໍ໌ ປວັດ ເຢຍ ຕສ່ຽວ ຕຸ໊ ແໝ່ງ ຕສຢັ້ງ. ຕສ໊ຽວ ຢ່າ ຫອບ ໂຮຍ້ວ ນິ່ນ.

36ມປ່າ ຫາຍ ເຕົ້າ ລໍ໌ ໄມ້ ປວັດ ເຢຍ, ຕສ່ຽວ ຫ່ອຍ ຕສຸ ກັ້ນ. ດສອງ ເຢຍ ວົ້ວ ເຕີ໋ຍ ຢຽດ ຕສູ໊ງ ອະເຮນີ້ຍ ຕສຸ ໄຕ່ ເຍີຍ ເຈົ໊າ.”

← Chapter 7 Jump to: Chapter 9 →