1 Chronicles 20

Madurese Bible 1994 (ALKETAB E DHALEM BASA MADURA)

← Chapter 19 Jump to: Chapter 21 →

1E mosem selbi' saellana jareya, e bakto to-rato biyasana entar aperrang, Yowab makalowar tantarana entar arampas nagara Amon. E bakto jareya Rato Daud paggun badha e Yerusalim, ta' noro' meyos. Yowab ban tantarana ngeppong kottha Raba; kottha jareya laju eserrang ban epaancor.

2Saellana jareya Daud rabu, laju mondhut barang rampasan ce' bannya'na dhari kottha jareya. E antarana rang-barang jareya badha makothana rato Amon. Makotha jareya berra'na ra-kera tello polo empa' kilo, ataretes mamatan. Mamatan jareya bi' Daud epondhut, laju epasang ka makothana dibi'.

3Saellana jareya reng-oreng kottha jareya eangko', epaksa alako ngangguy gargaji, landhu' ban kapak. Tha-kottha Amon se laenna epakantha jareya keya. Saellana jareya Daud ban tantarana padha abali ka Yerusalim.

4Ta' abit dhari jareya badha perrang pole ban oreng Filistin e Gezer. E dhalem sala settongnga perrang jareya Sibkhai oreng Husa mate'e buta se anyama Sipai. Daddi oreng Filistin laju kala.

5E dhalem perrang laenna ban oreng Filistin, Elhanan ana'na Ya'ir mate'e Lahmi taretanna Goliyat oreng Gat. Gagangnga tombagga Lahmi jareya rajana padha ban kajuna patennonan.

6E dhalem perrang laenna pole neng e Gat badha buta se garigi'na soko ban tanangnga aesse nem-ennem ebang. Buta jareya toronanna buta jaman lamba'.

7Sarrena ya-nyeya oreng Isra'il, daddi epate'e bi' Yonatan, pottrana Simeya kaka'na Daud.

8Oreng katello se epate'e Daud ban pasukanna jareya toronanna buta e Gat.

← Chapter 19 Jump to: Chapter 21 →