1 Chronicles 24

Madurese Bible 1994 (ALKETAB E DHALEM BASA MADURA)

← Chapter 23 Jump to: Chapter 25 →

1Harun kaagungan pottra lalake' kaempa, iya areya: Nadab, Abihu, Eleyazar ban Itamar. Nadab ban Abihu seda ajangadha'an dhari ramana ta' kalaban andhi' ana'. Daddi Eleyazar ban Itamar, tan-taretanna, se epadaddi imam. Bi' Daud toronanna Harun egi-bagi epagalumpo' menorot lalakonna. E dhalem carana magi jareya Daud etolonge Zadok toronanna Eleyazar ban bi' Ahimelekh toronanna Itamar.

4Toronanna Itamar ebagi epadaddi ballung galumpo'; dineng toronanna Eleyazar epadaddi nem bellas, sabab e dhalem toronanna Eleyazar abannya'an lalake'an kapala kalowarga.

5Sarrena e dhalem toronanna Eleyazar ban bariya keya e dhalem toronanna Itamar badha bat-pejabadda Padalemman Socce ban pin-pamimpinna agama, daddi carana magi lalakon etantowagi ngangguy ellot.

6Toronanna Eleyazar ban toronanna Itamar te-gante ajumbu' ellot, saellana jareya ma-nyamana laju ecathet bi' sekettaris se anyama Semaya ana'na Netane'el oreng Lewi. Jareya kabbi ejalannagi e ajunanna rato ban ba-ponggabana, Imam Zadok, Ahimelekh pottrana Abyatar sarta la-kapalana kalowarga golonganna imam ban la-kapalana kalowarga golonganna Lewi.

7Areya' nomer toro' gilirra lalakon se ekaolle dhari ellot se ebadha'agi kaangguy reng-oreng se pa' lekor galumpo' jareya:

81. Yoyarib 13. Hupa 2. Yedaya 14. Yesebeyab 3. Harim 15. Bilga 4. Se'orim 16. Imer 5. Malkiya 17. Hezir 6. Miyamin 18. Hapizes 7. Hakos 19. Petahiya 8. Abiya 20. Yehezkiel 9. Yesuwa 21. Yakhin 10. Sekhanya 22. Gamul 11. Elyasib 23. Delaya 12. Yakim 24. Ma'aziya

9Nyamana reng-oreng jareya ecathet menorot giliranna se maso'a ka Padalemman Socce kaangguy ajalannagiya tugas kabakteyan se la eteptebbagi bi' Harun, bangatowana, menorot papakonna PANGERAN, Allahna Isra'il.

10Laen dhari jareya, la-kapala kalowarga e baba reya tamaso' toronanna Lewi keya: Yehdeya, toronanna Amram dhari garis toronanna Suba'el;

11Yisiya, toronanna Rehabya;

12Yahat, toronanna Yizhar dhari garis toronanna Selomot;

13Yeriya, Amarya, Yehaziyel ban Yekameyam, ana' lalake'anna Hebron menorot toro' gilirra omorra;

14Samir, toronanna Uziyel dhari garis toronanna Mikha;

15Zakhariya, toronanna Uziyel dhari garis toronanna Yisiya taretanna Mikha;

16Mahli, Mosi ban Ya'aziya, toronanna Merari.

17Ya'aziya andhi' ana' lalake' katello, nyamana Syoham, Zakur ban Hibri.

18Mahli andhi' ana' lalake' kadhuwa, nyamana Eleyazar ban Kis. Eleyazar ta' andhi' ana' lalake', tape Kis andhi' ana' lalake' kasorang iya areya Yerahme'el.

20Ana' lalake'anna Mosi katello, iya areya: Mahli, Eder ban Yerimot. Jareya ga-kalowarga e dhalem suku Lewi.

21Kaangguy giliranna tugassa, saneyap kapala kalowarga ban ale' lalake'na ajumbu' ellot akantha se la ejalannagi bi' la-balana, iya areya para imam toronanna Harun. Jumbu'anna ellot jareya esakse'e Rato Daud ban Zadok, Ahimelekh sarta la-kapala kalowarga dhari golonganna mam-imam ban dhari golonganna oreng Lewi.

← Chapter 23 Jump to: Chapter 25 →