1 Chronicles 25

Madurese Bible 1994 (ALKETAB E DHALEM BASA MADURA)

← Chapter 24 Jump to: Chapter 26 →

1Rato Daud ban para pamimpinna oreng Lewi mele om-kaom Lewi se kasebbut e baba reya, epamimpin ra-opacarana kabakteyan: Asaf, Heman ban Yedutun. Reng-oreng jareya eberri'i kawajiban manapa' dhabu dhari Allah sambi etoro'e mosik calempong, gambus ban simbal. Kaangguy mimpin kabakteyan ban opacarana bang-sebang, epele gu-reggu e baba reya:

2Ana' lalake'anna Asaf se kaempa iya areya: Zakur, Yusup, Netanya ban Asarela. Pamimpinna iya areya: Asaf, se manapa' dhabu dhari Allah, mon etugassagi bi' rato.

3Ana' lalake'anna Yedutun se kaennem iya areya: Gedalya, Zeri, Yesaya, Simei, Hasabya ban Matica. Reng-oreng jareya epimpin ramana, manapa' dhabu dhari Allah etoro'e mosik calempong ban anyanye gu-lagu pojiyan sarta anyata'agi sokkor ka PANGERAN.

4Ana' lalake'anna Heman se pa' bellas oreng iya areya: Bukiya, Matanya, Uziyel, Sebuwel, Yerimot, Hananya, Hanani, Eliyata, Gidalti, Romamti-Ezer, Yosbekasa, Maloti, Hotir ban Mahaziyot.

5Heman reya nabbi pribadina rato. Bi' Allah, Heman jareya eparenge ana' lalake' pa' bellas ban ana' babine' katello sabab Allah la ajanji aparenga kakobasa'an ka Heman.

6Na'-ana'na Heman jareya kabbi nabbu mosik simbal, calempong ban gambus se epimpin ramana kaangguy noro'e opacarana kabakteyan e Padalemman Socce, Asaf, Yedutun ban Heman narema tugas menorot petoduna rato.

7Ana' lalake'anna oreng se katello jareya, se bannya'na kabbi pa' lekor oreng ban la-balana, kaetong li-ahli mosik se la elate. Kabbi bannya'na badha dhu ratos ballung polo ballu' oreng.

8Kaangguy nantowagi giliranna tugas, reng-oreng jareya kodu padha ajumbu' ellot kabbi – towa ngodha, se la apangalaman otabana se gi' buru ajar, padha bai.

← Chapter 24 Jump to: Chapter 26 →