1 Chronicles 29

Madurese Bible 1994 (ALKETAB E DHALEM BASA MADURA)

← Chapter 28 Jump to:

1Rato Daud laju adhabu ka sakabbinna oreng se akompol e jadhiya, “Dhari antarana tang ana', Sulaiman se epele bi' Allah. Tape Sulaiman reya gi' ce' ngodhana ban gi' korang pangalaman, mangkana lalakon reya lalakon se ce' rajana. Ban pole se epaddegga jareya banne karaton se eangguya manossa, tape padalemman kaangguy GUSTE Allah.

2Sabarang se ekaparlo epamaddegga padalemman jareya ban parabudda bi' sengko' la esadhiya'agi noro' sakellarra sengko'. Sengko' la nyadhiya'agi emmas, salaka, paronggu, besse, kaju, bato mamatan ban enten, to-bato se acem-macem barnana kaangguy rarenggan ban to-bato marmar ce' bannya'na.

3La'-mala' dhari tang kataresna'an ka Padalemman Socce jareya sengko' massra'agi keya salaka ban emmas tang andhi' dibi':

4Sengko' ngatorragi emmas se paleng bagus lebbi dhari saratos ton ban salaka morne lebbi korang dhu ratos pa' polo ton se egabaya ngole'e geddhungnga Padalemman Socce, ban sakabbinna rang-barang se kodu ekagabay bi' reng-oreng se ahli. Sateya, sapa pole se ngatorragiya tor-ator se ehlas ka PANGERAN?”

6La-kapala kaom, la-kapala suku, para parwira ban reng-oreng se ngoros artana rato padha mator terro nyombanga.

7Se eatorragi reng-oreng jareya kaangguy kaparlowanna se maddegga Padalemman Socce jareya iya areya: emmas saratos pettong polo ton lebbi, salaka tello ratos pa' polo ton lebbi, paronggu para' nem atos dhu polo ton, ban besse tello ebu pa' ratos ton lebbi.

8Reng-oreng se andhi' to-bato mamatan massra'agi mamatanna jareya ka Yehiyel, esoro pamaso' ka dhalem ekkassa Padalemman Socce. (Yehiyel reya oreng Lewi dhari kaom Gerson.)

9Ra'yat ngatorragi ka PANGERAN kalaban ate ehlas, atena padha perak lantaran bannya' se eatorragi. Rato Daud ce' peragga keya.

10E adha'anna oreng se bannya' jareya Rato Daud moji PANGERAN. Dhabuna, “Guste Allah se esemba Yakub bangatowa abdidalem sadaja, moga Junandalem emolja'agiya salanjangnga!

11Junandalem agung sareng kobasa. Junandalem molja, jaja sareng agung. Sadaja se badha e langnge' sareng e bume kaagungannepon Junandalem. Junandalem rato se agung, se ngobasane sadajana.

12Sadajana kasogiyan sareng kama'moran dhari Junandalem asalla; Junandalem ngobasane sadajana sareng kakowadan ban kakobasa'annepon; Junandalem kobasa ngoba pasera'a saos epadaddi oreng raja sareng kobasa.

13Samangken, ya Allah, abdidalem sadaja padha ngatorragi sokkor ka Junandalem, sareng moji asmaepon Junandalem se agung.

14Abdidalem sareng ra'yat ka'dhinto sanyatana ta' gadhuwan pa-ponapa se eatorragiya ka Junandalem, sabab sadajana sanyataepon paparengnga Junandalem ban se eatorragi abdidalem sadaja ka'dhinto kaagungannepon Junandalem jugan.

15Junandalem ngagali, ja' akadi para bangatowa abdidalem sadaja, abdidalem sadaja ajalane odhi' ka'dhinto menangka oreng se dhateng dhari kennengngan laen sareng oreng manca. Odhi' abdidalem sadaja akadi jang-bajangan se lebat, ta' lopot dhari pate.

16Adhu, GUSTE Allah, Pangeran kaula, sadajana barang se aji ka'dhinto sareng abdidalem sadaja epakompol e ka'dhinto epamaddegga padalemman se eatorragiya ka Junandalem sopaja abidalem sadaja kengenga ahormadi asmaepon Junandalem se socce. Namong sadajana ka'dhinto asallepon dhari Junandalem, sadajana kaagungannepon Junandalem jugan.

17Abdidalem oneng Junandalem ngoji atena saneyap oreng sareng kasokan ka oreng se morne atena. Kalaban ate ehlas sareng ate senneng abdidalem ngatorragi ka'dhinto sadaja ka Junandalem. Abdidalem ampon nengale kadi ponapa ommattepon Junandalem se akompol e ka'dhinto abakta tor-atorra ka Junandalem kalaban ate senneng.

18GUSTE Allah, Pangeran kaula, se esemba Ibrahim, Ishak sareng Yakub, para bangatowa abdidalem sadaja, moga kasokana Junandalem ajaga ommattepon Junandalem sadaja sopaja teptebba abakte ka Junandalem akadi samangken ka'dhinto, sareng sopaja sadajana ommattepon Junandalem teptebba esto ka Junandalem.

19Kasokana Junandalem marenge Sulaiman, ana' abdidalem, pangaterro se gu-onggu kaangguy norodi sadajana papakonna Junandalem sareng kaangguy maddek Padalemman Socce ka'dhinto se sadajana kaparlowanna sareng abdidalem ampon esadhiya'agi.”

20Samarena adu'a kantha jareya, Daud adhabu ka oreng se bannya' se akompol e jadhiya, “Mara poji GUSTE Allah!” Daddi reng-oreng jareya padha ji-moji PANGERAN, Allah se esemba bangatowana. Saellana jareya kabbi laju padha asojud ahormadi PANGERAN ban ratona.

21Kalagguwanna reng-oreng jareya nyambelli keban se eatorragiya menangka kurban ka PANGERAN, laju egi-bagi ka sakabbinna ra'yat. Laen dhari jareya gi' badha sape lake' saebu, dumba lake' saebu ban budhu'na dumba saebu se esambelli ban eobbar kol-bungkol e attassa mezba. Reng-oreng jareya ngatorragi keya anggur se ewajibbagi kaangguy ban-kurban jareya.

22E are jareya reng-oreng jareya kan-ngakan ban nom-enoman anga-bunga e ajunanna PANGERAN. Saellana jareya reng-oreng jareya ngomommagi kadhukaleyanna Sulaiman menangka rato. Bit asmana PANGERAN reng-oreng jareya aresmeyagi Sulaiman epadaddi ratona, ban Zadok epadaddi imam.

23Daddi Sulaiman agante Daud ramana, alenggi e tahta se la eteptebbagi bi' PANGERAN. Sulaiman jareya rato se ahasel ban ekasengkae bi' sakabbinna bangsa Isra'il.

24Sakabbinna kaom oreng agungnga pamarenta ban militer sampe' ka tra-pottrana Daud se laen ngakone kakobasa'anna Sulaiman menangka rato.

25Bi' PANGERAN ra'yat kabbi epangalem Rato Sulaiman; Sulaiman epadaddi rato se ngalebbi'i rato se kemma'a bai se tao marenta Isra'il.

26Daud pottrana Isay marenta saantero Isra'il

27pa' polo taon abidda. E Hebron marenta pettong taon, ban e Yerusalim tello polo tello' taon.

28Daud jareya sogi ban ehormadi oreng, se seda la seppo. Sulaiman pottrana agante daddi rato.

29Caretana Rato Daud dhari awwal sampe' aher ecathet e dhalem ketab Nabbi Samuwel, Nabbi Natan ban Nabbi Gad.

30E dhalem ketab jareya ecareta'agi parkara pamarenta'anna, kakobasa'anna ban sabarang se kadaddiyan ka salerana, ka Isra'il ban ka karaja'an-karaja'an e sabingkerra Isra'il.

← Chapter 28 Jump to: