1 Samuel 17 — Madurese Bible 1994 (ALKETAB E DHALEM BASA MADURA)

1E settong bakto oreng Filistin makalowar tantarana entara aperrang; tantara jareya eator e kottha Sokho, e dhaera Yehuda, pas masang parkemahan e antarana Sokho ban Azeka, e ma'-semma'na kennengngan se anyama Efes-Damim.

2Saul ban oreng Isra'il akompol keya, akemah e Cora Ela, padha aya-sadhiya ngadhebbana serranganna oreng Filistin.

3Daddi oreng Filistin abaris e settong gumo' ban oreng Isra'il abaris e gumo' laenna, e antarana gumo' se dhadhuwa' jareya badha corana.

4Badha oreng jago keket se nyamana Goliyat, asalla dhari kottha Gat, kalowar dhari parkemahan Filistin nangtanga oreng Isra'il. Tenggina badanna ra-kera tello meter,

5ngangguy topi dimbaga ban kalambi perrang dimbaga keya se berra'na ra-kera saeket petto' kilo.

6Bettessa ngangguy totop dhari dimbaga, ban mekol tombak dhari dimbaga keya.

7Gagangnga tombagga rajana padha ban kajuna pakakas tennon, ban matana tombagga berra'na ra-kera pettong kilo. Tamengnga egiba'agi parjurit se ajalan e adha'na.

8Goliyat ambu se ajalan pas aera' ka tantara Isra'il, “Arapa'a ba'na neng e jadhiya kabbi? Entara aperrang, ya? Sengko' reya oreng Filistin, he nor-dunorra Saul! Mara pele sala settong e antarana ba'na se bangal amoso sengko', soro nyander dha' enna'.

9Mon e dhalem perrang tandhing reya sengko' mate, oreng Filistin endha' epadaddi dunorra ba'na, tape mon sengko' mennang sarta mate'e oreng peleyanna ba'na, ba'na kabbi se kodu daddi dunorra oreng Filistin.

10Sateya keya, sengko' nangtang tantara Isra'il; mara pele sala settong e antarana ba'na, soro atandhing ban sengko'!”

11E bakto Saul ban tantarana ngedhing tangtanganna oreng jareya, kabbi padha takerjat ban katako'an.

12Daud reya ana'na Isay oreng Efrata, dhari Betlehem e Yehuda. Isay andhi' ana' lalake' baballu', ban e jaman pamarenta'anna Saul, Isay la ce' towana.

13Ana' lake'na se nomer settong, dhuwa' ban tello' noro' Saul aperrang. Se sareyang nyamana Eliyab, se nomer dhuwa' Abinadab, se nomer tello' Syama.

14Daud reya ana' lake'na se dha'-ngodha'an. E bakto kaka'na se katello aperrang abareng Saul,

15Daud seggut adina'agi tan-taretanna jareya, mole ka Betlehem ngowanna dumbana eppa'na.

16Goliyat nangtang bangsa Isra'il sabban gi' laggu ban sabban sar-asar, sampe' pa' polo are abidda.

17E settong are Isay ngoca' ka Daud, “Kassa' ngala' jagung sangngar sapolo kilo ban roti sapolo meggi', giba duliyan ka ka'-kaka'na e parkemahanna tantara.

18Areya' keju sapolo meggi' giba keya bagi ka komandhanna pasukan. Tanya'agi baramma kabadha'anna tan-taretanna ba'na jareya, ba'na masthe noduwagi bukte ka sengko' ja' ba'na ongguwan la atemmo ban ka'-kaka'na jareya sarta ja' ka'-kaka'na ba'na jareya bendher padha baras onggu.

19Kaka'na ba'na kabbi badha e Cora Ela abareng bi' Rato Saul, sarta reng-oreng Isra'il laenna aperrang ban bangsa Filistin.”

20Kalagguwanna gi' gu-laggu, Daud jaga pas akes-rengkes. Dumbana epatoro' ka oreng, saellana jareya pas ngala' ban-gibanna laju terros mangkat noro' parentana Isay, eppa'na. Daud napa' ka parkemahan teppa' e baktona reng-oreng Isra'il mangkat ka medan perrang sambi rak-oragan, ngoca'agi ca'-oca' se biyasana eorakkagi e dhalem paperrangan.

21Tantara Filistin ban tantara Isra'il dhep-adhebban aya-sadhiya se aperranga.

22Daud matoro' ban-gibanna ka oreng se atugas ajaga parlengkabanna tantara, pas berka' ka medan perrang entara ka ka'-kaka'na.

23Parappa'na Daud acaca ban tan-taretanna jareya, Goliyat maju ka adha' nangtang reng-oreng Isra'il akantha biyasana. Daud ngedhing keya ka ca'-oca'na Goliyat jareya.

24Reng-oreng Isra'il gi' buru nangale'e Goliyat pas terros padha buru katako'an.

25“Abassagi oreng jareya!” ca'na reng-oreng jareya se settong ka settongnga. “Edhingngagi tangtanganna! Rato Saul ajanji pa'-sapa'a se bisa mate'e Goliyat, eparengngana opa se raja. Sarta ekamantowa. Ban pole la-balana eppa'na oreng jareya ebebassagiya dhari pajek.”

26Ca'na Daud, “Ce' bangalla oreng kaper Filistin reya nangtang tantarana Allah se odhi'!” Daud pas atanya ka sala settong tantara, “Ponapa se eopa'agiya ka oreng se bisa mate'e oreng Filistin ka'issa' sarta mabali kahormadanna bangsa Isra'il se eya-seya oreng ka'issa'?”

27Reng-oreng se badha e jadhiya abala ka Daud apa se la ejanjiyagi bi' rato.

28Eliyab taretanna Daud se sareyang ngedhing Daud acaca ban tantara jareya. Daud egigiri oca'na, “Arapa'a ba'na dha' enna'? Sapa se ngoros ba-dumbana ba'na e talon? Me' la ngal-mabangal! Ba'na entar dha' enna' pera' terro nengguwa paperrangan, ya?”

29Ca'na Daud, “Apa tang sala? Sengko' gun atanya!”

30Daud pas ondur, laju atanya pole ka ra-tantara laenna parkara se etanya'agi sabellunna; jawabanna paggun padha.

31Badha reng-oreng se ngedhing cacana Daud jareya, pas epadhapa' ka Saul, Daud pas edikane bi' Saul.

32Atorra Daud ka Saul, “Guste, ta' mabi tako' ka oreng Filistin ka'dhissa'! Abdidalem se alabana oreng gapaneka.”

33“Enja',” dhabuna Saul. “Baramma ba'na se bisa'a alaban oreng jareya? Ba'na gi' kana', Goliyat la biyasa aperrang molae gi' ngodhana!”

34“Guste,” ca'na Daud, “Abdidalem biyasa ngowan dumbaepon eppa'. Manabi badha macan otaba baruwang se nyeppa' budhu'epon dumba,

35sareng abdidalem eserser pas eantem, budhu'epon dumbana epabebas. Manabi macan otaba baruwangnga alaban, sareng abdidalem eteggu' le'erra, pas epokol sampe' mate.

36Abdidalem ampon mate'e macan sareng baruwang, kadi ka'dhinto jugan oreng Filistin se kaper ka'dhissa' sareng abdidalem epateyana, sabab bangal ya-nyeya tantaraepon Allah se odhi'.

37PANGERAN masalamet abdidalem dhari macan sareng baruwang; tantoepon abdidalem epasalamet jugan dhari oreng Filistin ka'dhissa'.” “Iya la mara,” dhabuna Saul. “Kassa' mangkat, moga-moga ba'na etolonga bi' PANGERAN.”

38Saul marengngagi pangangguyya perrangnga dibi' ka Daud, iya areya kalambi besse, bi' Daud eangguy. Saellana jareya topi dimbagana bi' Saul epasang ka cethagga Daud.

39Dhi-budhina Daud masang peddhangnga Saul ka kalambi bessena, pas ngoddi ajalan, tape sarrena aba'na ta' biyasa ngangguy pangangguyya perrang daddi ta' bisa ajalan. “Abdidalem ta' bisa ajalan manabi ngangguy ka'dhinto,” atorra ka Saul. “Abdidalem ta' biyasa ngangguy kadi ka'dhinto.” Daddi bi' Daud pangangguyya perrang jareya ebukka' kabbi.

40Saellana jareya Daud pas ngala' tongkedda se eangguy ngowan dumba, sarta ngala' bato se ngennyer lema meggi' dhari songay, esaba' e dhalem kanthongnga. Sambi ngeba dhiballa, Daud nyander ka Goliyat.

41Ta' abit saellana jareya Goliyat molae ajalan nyander ka Daud, ejangadha'i bi' oreng se ngeba'agi tamengnga.

42Tape e bakto nangale'e Daud se eabassagi epapalasda, Goliyat pas agella'an bi-nyebbi sabab Daud jareya gi' kana' ban bagus robana.

43Ca'na Goliyat ka Daud, “Egabaya apa tongket jareya? Apa sengko' reya bi' ba'na eanggep pate'?” Goliyat pas abasto Daud kalaban nyamana para dibana.

44Daud etangtang, oca'na, “Mara, nyander! Badanna ba'na bi' sengko' ebagiya ka no'-mano' sarta ban-keban me' olle ekakan epatadha'.”

45Daud nyaot, “Ba'na ngadhebbi sengko' ngeba peddhang, tombak ban lembing, tape sengko' ngadhebbana ba'na kalaban asmana PANGERAN Se Mahakobasa, Allahna tantara Isra'il se bi' ba'na eya-seya.

46E are teya ba'na bi' PANGERAN la epassra'agi ka sengko'; bi' sengko' ba'na epakala'a, eketthoga le'erra. Badanna ba'na ban badanna sakabbinna tantara Filistin bi' sengko' ebagiya ka no'-mano' sarta ban-keban me' olle ekakan epatadha'. Daddi oreng sadunnya bakal taowa ja' bangsa Isra'il andhi' Allah se esemba,

47ban sakabbinna oreng se badha e dhinna' reya bakal taowa ja' PANGERAN ta' marlowagi peddhang otaba tombak mon masalamedda ommadda. PANGERAN se nantowagi jalanna perrang reya, ban se bakal massra'agiya ba'na ka tantarana tang bangsa.”

48Goliyat molae ajalan nyemma'e Daud pole, ban Daud duli berka' ka barisanna oreng Filistin ngadhebbana Goliyat jareya.

49Tanangnga araga ka dhalem kanthongnga, makalowar batona settong, bato jareya pas edhiballagi ka Goliyat. Batona teppa' ka dhaina sampe' cethagga bella, Goliyat robbu tajarungngep ka tana.

50Daud berka' pas manjeng e seddi'na Goliyat; peddhangnga Goliyat esendhal, pas eonos dhari barangkana, terros epangetthok le'erra oreng Filistin jareya. Daddi Daud makala ban mate'e Goliyat, pera' ngangguy dhibal ban bato. E bakto nangale'e ja' jagona la mate, oreng Filistin padha buru kabbi.

52Oreng Isra'il ban Yehuda rak-soragan sambi nyerser oreng Filistin jareya sampe' gan Gat ban labang sakethengnga Ekron. Reng-oreng Filistin se loka padha robbu car-kalacer e salanjangnga lorong se ka Sa'ara'im.

53Saellana jareya oreng Isra'il ambu se nyerser oreng Filistin, pas abali, arampas essena parkemahanna mosona jareya.

54Daud ngala' cethagga Goliyat, egiba ka Yerusalim, tape sanjatana Goliyat esempen e kemahna dibi' kabbi.

55E bakto ngoladi Daud se atandhing ban Goliyat, Saul mareksane ka Abner, panglimana tantarana, “Abner, ana'na sapa rowa?” “Abdidalem ta' oneng, guste,” saodda Abner.

56Saul pas makon kantha reya, “Kassa' tanya'agi.”

57Daddi e bakto Daud abali ka parkemahan saellana mate'e Goliyat, bi' Abner egiba ngadhep ka Saul. E bakto jareya Daud gi' nengteng cethagga Goliyat.

58Dhabuna Saul, “Ba'na ana'na sapa, Cong?” Saodda Daud, “Abdidalem pottrana Isay dhari Betlehem.”