1 Samuel 30

Madurese Bible 1994 (ALKETAB E DHALEM BASA MADURA)

← Chapter 29 Jump to: Chapter 31 →

1Saellana olle dhu are dhari jareya, Daud ban reng-orengnga abali ka kottha Ziklag. Sanapa'na ka jadhiya, oreng Amalek etemmo la nyerrang bagiyan lao'na nagara Yehuda ban Ziklag. Tadha' oreng se epate'e, tape kottha jareya eobbar epatadha' karena. Samarena pas nerrossagi parjalananna sambi ngeba babine'an, na'-kana' ban pandhudhu' laenna. La-balana Daud ban la-balana pangerengnga, tamaso' rajina Daud se kadhuwa, iya areya Ahino'am ban Abigail, etawan kabbi. Daud ban reng-orengnga padha ce' sossana, pas padha nanges sampe' lesso.

6Reng-orengnga Daud padha ce' sossana lantaran kaelangan ana' binena, daddi laju padha agarujuga Daud ban bato. Daddi Daud ngadhebbi kasossa'an raja, tape panggaliyanna epakowat pole bi' PANGERAN.

7Daud laju adhabu ka Imam Abyatar pottrana Ahimelekh, “Efodda sampeyan bakta ka ka'dhinto.” Abyatar abakta efod jareya ka Daud.

8Daud laju mator ka PANGERAN, “Ponapa abdidalem kodu nyerser reng-oreng se nyerrang kottha ka'dhinto? Ba' ecapo'a sareng abdidalem?” Saodda PANGERAN, “Kassa' serser; ba'na tanto nyapo' ban mabebasa tawanan.”

9Daud laju meyos ban reng-orengnga se bannya'na nem atos oreng. Sanapa'na ka Songay Besor, Daud nerrossagi parjalananna asareng ban oreng pa' ratos; dineng se laenna se bannya'na dhu ratos oreng nyeccer e jadhiya, sabab la ce' lessona, ta' kellar se entasa Songay Besor.

11E dhalem parjalanan jareya reng-orengnga Daud tatemmo ban na'-kana' lalake' Messer e ra-ara; kana' jareya egiba ka Daud laju eberri'i ngakan ban ngenom,

12bariya keya jajan buwana ara sarta buwana anggur se kerreng dhu gundhung. Samarena ngakan kana' jareya laju kowat pole; baddiyanna kana' jareya ta' ngakan ban ta' ngenom la tello are abidda!

13Daud laju adhabu ka kana' jareya, “Sapa lorana ba'na, ban dhari dhimma asalla ba'na reya?” Saodda kana' jareya, “Abdina oreng Messer, dunorra oreng Amalek. Abdina edinggallagi sareng lora tello are se kapongkor polana abdina nganglo.

14Oreng Amalek nyerrang dhaeraepon oreng Kreti e bagiyan lao'na Yehuda sareng dhaeraepon kaomma Kaleb, sareng ngobbar kottha Ziklag epakantos tadha' karena.”

15Dhabuna Daud ka kana' jareya, “Apa ba'na endha' ngaterragi sengko' ka kennengnganna garombolan jareya?” Saodda, “Enggi, poron, sokor panjennengngan ajanji ka abdina kalaban asmana Allah, ja' panjennengngan ta' mateyana abdina otaba massra'agiya abdina ka lora abdina.”

16Kana' jareya laju ngaterragi Daud ban reng-orengnga ka kennengnganna garombolan gella'. E bakto jareya garombolan jareya teppa'na acar-pencar e kennengngan jareya, sambi ngakan ban ngenom, aneng-sennengngan polana ce' bannya'na barang rampasan ollena ngeba dhari nagara Filistin ban Yehuda.

17E bakto pajjar la ngombar kalagguwanna, reng-oreng jareya eserrang bi' Daud; perrangnga jareya sampe' malem. Tadha' settonga moso se salamet kajabana pa' ratos oreng se buru nompa' onta.

18Daud ahasel arebbu' sabarang se erampas bangsa Amalek, tamaso' rajina se kadhuwa;

19tadha' settonga se elang. Na'-kana' lalake' ban babine' sarta rang-barang rampasan se la egiba oreng Amalek, bi' Daud erebbu' pole.

20Laen dhari jareya Daud arampas sakabbinna dumba ban ebin. Ban-keban jareya eeret bi' reng-orengnga Daud; ban-keban jareya egiring e bagiyan adha', epesa dhari rang-barang rampasan laenna; reng-oreng jareya padha ngoca', “Areya bagiyanna Daud!”

21Saellana jareya Daud abali ka reng-orengnga se dhu ratos oreng se ta' noro' polana ce' lessona, ban edina'agi e penggirra Songay Besor. Reng-oreng jareya nyander ngamba' Daud ban reng-orengnga; Daud nyander sambi apareng salam ka reng-oreng jareya.

22Tape e antarana reng-oreng se noro' Daud badha se jahat ban tama'. Ca'na reng-oreng jareya, “Reng-oreng reya ta' noro', daddi ta' andhi' ha' narema bagiyan dhari barang rampasan reya. Se olle ekala' pera' ana' binena bang-sebang, mon mare pas nyengla.”

23Tape Daud adhabu, “Tan-taretan, ba'na ta' olle kantha jareya e dhalem narema paparengnga PANGERAN! Pangeran la alindhunge ba'na, ban apareng kamennangan e dhalem aperrang ban garombolan rowa.

24Daddi ta' olle badha oreng settonga se narema usulla ba'na buru! Kabbi kodu padha narema bagiyan se padha bannya'na: reng-oreng se nyeccer ajaga rang-barang kodu narema padha bannya'na ban reng-oreng se maju aperrang.”

25Parkara jareya bi' Daud egabay atoran, ban atoran jareya etoro' bi' sakabbinna oreng Isra'il sampe' sateya.

26E bakto Daud abali ka Ziklag, sabagiyan dhari rang-barang rampasanna jareya ekeremmagi ka para pamimpinna tha-kottha Yehuda se abanto salerana, dhabuna, “Paneka pondhut sampeyan, bagiyan dhari barang rampasan ollena dhari mosona PANGERAN.”

27Tha-kottha jareya: Betel ban Rama e bagiyan lao'na Yehuda, Yatir, Aroër, Sifmot, Estemoa, Rakhal, bariya keya tha-kotthana oreng Yerahme'el, tha-kotthana oreng Keni, Horma, Bor-Asan, Atakh ban Hebron. Tha-kottha se tao eentare Daud ban reng-orengnga padha ekereme rang-barang jareya.

← Chapter 29 Jump to: Chapter 31 →

Recommended Reading

Commentary 1 Samuel Commentaries → Devotional 1 Samuel Devotional Guide → Get This Bible Madurese Bible (ALKETAB E DHALEM BASA MADURA) Study Bible →