1 Samuel 24

Madurese Bible 1994 (ALKETAB E DHALEM BASA MADURA)

← Chapter 23 Jump to: Chapter 25 →

1Dhari jadhiya Daud meyos ka dhaera En-Gedi, pas ngetek e wa-guwa.

2E bakto buru abali dhari paperrangan ban oreng Filistin, Saul meyarsa ja' Daud badha e ra-ara beddhi e seddi'na En-Gedi.

3Saul pas mele tantarana se paleng bagus sa Isra'il, bannya'na tello ebu oreng, samarena jareya laju mangkat nyare Daud ban reng-orengnga se e bagiyan temorra Gunong Bato Embi' Alas.

4Saul napa' ka seddi'na dhang-kandhangnga dumba se badha e penggir lorong. E jadhiya badha guwana, Saul maso' ka guwa jareya akopadhanga. Kabendherran Daud ban reng-orengnga ngetek e guwa jareya, e bagiyan se jang dhalemman.

5Atorra reng-orengnga Daud, “Samangken kasempadan ka panjennengngan! PANGERAN gu ta' ampon adhabu kadi ka'dhinto ka panjennengngan, ‘Mosona ba'na bi' Sengko' epassra'agiya ka ba'na, epabaramma'a bai ban ba'na, soka'na ba'na.’ ” Daud pas ta' asa'-kasa' nyander ka seddi'anna Saul; jubana Saul eketthok penggirra sakone'; se ngetthok re-lere sampe' tadha' monyena ban ta' etemmo oreng.

6Tape saellana jareya, Daud pas arassa sala,

7dhabuna ka reng-orengnga, “Moga-moga bi' PANGERAN sengko' ejaga'a sopaja ta' sampe'a alako jahat ka tang rato peleyanna PANGERAN. Sengko' ta' olle nyake'e tang rato reya sanajjan sakone'a, sabab rato reya peleyanna PANGERAN!”

8Kantha jareya carana Daud masabbar reng-orengnga, ta' eparengngagi nyerrang Saul. Saul pas ngadek, kalowar dhari guwa jareya, pas nerrossagiya parjalananna.

9Daud pas kalowar keya dhari guwa gella' sambi aera', “Guste!”

10Saul atole, Daud asojut ngormat ka Saul, pas adhabu, “Aponapa junandalem me' meyarsa'agi petennana oreng se ngoca' ja' abdidalem macalaka'a junandalem?

11Samangken junandalem ngagali dibi' ja' e guwa ka'dhinto gella', junandalem sareng PANGERAN ampon epassra'agi ka abdidalem. Abdidalem ecacae oreng sopaja mate'e junandalem, namong abdidalem ta' poron. Ca'epon abdidalem, abdidalem ta' nyake'ana rato abdidalem se ampon epele sareng PANGERAN dibi'.

12Oladi, Rama, oladi ka'dhinto thok-ketthoganna jubaepon junandalem se badha e tanang abdidalem! Sanyatana abdidalem bisa mate'e junandalem, namong abdidalem coma ngetthok penggirra jubaepon junandalem sakone'. Daddi, ampon terrang ja' abdidalem ka'dhinto ta' gadhuwan maksod juba' otaba daraka ka junandalem. Abdidalem eser-serser sareng junandalem epateyana, sanajjan abdidalem ta' gadhuwan sala sakone'a balakka' ka junandalem.

13Moga-moga PANGERAN se motosana pasera se sala e antaraepon abdidalem sareng junandalem! Moga-moga PANGERAN se malessa lalakonnepon junandalem ka abdidalem, abdidalem dibi' ta' nyake'ana junandalem maske sakone'a.

14Junandalem ampon ngagali ka parebasan kona, ‘Se ngalakone kajahadan pera' oreng se jahat.’ Daddi abdidalem ta' nyake'ana junandalem.

15Ngereng oladi abdidalem ka'dhinto, oreng se epateyana sareng rato Isra'il! Ngereng oladi abdidalem ka'dhinto se eru-buru sareng junandalem! Abdidalem namong babathangnga pate', namong koto!

16PANGERAN se badhi ahakime e antarana abdidalem sareng junandalem. Moga-moga PANGERAN kasokana mareksa parkara ka'dhinto, sarta nolong abdidalem sopaja salamedda dhari kakobasa'annepon junandalem.”

17Saellana Daud mare se abu-dhabu, Saul adhabu, “Ba'na jareya, ya, na', Daud?” Saul pas molar.

18Dhabuna ka Daud, “Ba'na se bendher, sengko' se sala.

19Tang kajahadan bi' ba'na ebales ban kabecce'an. E are teya ba'na noduwagi ja' ba'na pajat ce' becce'na ka sengko', sabab ba'na ta' endha' mate'e sengko', sanajjan sengko' la epassra'agi ka ba'na bi' PANGERAN.

20Ce' rangrangnga badha oreng se tatemmo ban mosona tape mosona jareya ta' epate'e! Moga-moga PANGERAN aberkadi ba'na polana kabecce'anna ba'na ka sengko' are teya!

21Sateya sengko' yakin ja' ba'na bakal daddiya rato Isra'il ban ja' karaja'an Isra'il reya bakal teptebba koko e dhalem pamarenta'anna ba'na.

22Sateya mara ba'na ajanji ka sengko' kalaban asmana PANGERAN, ja' ba'na ta' mateyana tang toronan, ban ta' mamosna'a nyamana tang kalowarga.”

23Daud asompa alampa'agiya parnyo'onna Saul jareya. Saellana jareya Saul gubar ka kalenggiyanna, Daud ban reng-orengnga abali ka pangetegganna.

← Chapter 23 Jump to: Chapter 25 →