1 Samuel 31

Madurese Bible 1994 (ALKETAB E DHALEM BASA MADURA)

← Chapter 30 Jump to:

1Sabatara jareya oreng Filistin aperrang ban oreng Isra'il e Pagunongan Gilboa. Bannya' oreng Isra'il se mate e jadhiya, ban se laenna, tamaso' Saul ban tra-pottrana padha buru.

2Tape reng-oreng jareya ekenneng serser bi' oreng Filistin; pottrana Saul se katello epate'e, iya areya Yonatan, Abinadab ban Malkisuwa.

3Perrang e sabingkerra Saul jareya ce' rammena, ban Saul dibi' ekenneng na-panana moso sampe' loka sara.

4Saul pas adhabu ka oreng ngodha se ngeba'agi sanjatana, “Mara onos peddhangnga ba'na, cocowagi ka sengko', me' olle sengko' reya ta' egabay en-maenan ban epate'e oreng se ta' tao ka Pangeran.” Tape oreng ngodha gella' ta' endha' nyoco lorana, sabab aba'na talebat hormat ka lorana jareya. Daddi Saul pas mondhut peddhangnga dibi' sarta pas marobbu ka konco'na peddhangnga jareya.

5E bakto oreng ngodha se ngeba sanjatana Saul jareya nangale'e ja' lorana la mate, aba'na dibi' pas marobbu ka konco'na peddhangnga, pas mate e seddi'anna Saul.

6Daddi Saul ban pottrana se katello, sakabbinna pasukanna ban oreng ngodha se ngeba'agi sanjatana, kabbi padha mate e dhalem saare jareya.

7E bakto reng-oreng Isra'il se badha e temorra Cora Yizre'el ban e temorra Songay Yordan ngedhing ja' tantara Isra'il la buru, ban Saul sarta tra-pottrana padha seda, reng-oreng jareya pas padha ondur dhari kottha kennengnganna bang-sebang. Tha-kottha jareya pas ekobasae reng-oreng Filistin.

8Kalagguwanna e bakto reng-oreng Filistin mareksa yit-mayyit parlo arampasa rang-barangnga, reng-oreng jareya nemmo jinazana Saul ban pottrana se katello la seda e pagunongan Gilboa.

9Jinazana Saul jareya eketthok serana, pangangguy perrangnga ekala'; reng-oreng Filistin jareya pas ngerem otosan esoro mabalattra kabar se magumbira ate jareya ka ra'yat e saantero nagara Filistin ban ka dibana.

10Pangangguy perrangnga Saul pas esaba' e dhalem kowella Dewi Asytoret, ban badanna epakowagi ka pagar geddhungnga kottha Bet-Seyan.

11Tape oreng Yabes e Gileyad ngedhing apa se elakone oreng Filistin ka Saul jareya,

12reng-oreng se paleng bangalan pas mangkat dhari jadhiya ajalan samalem benteng entar ka Bet-Seyan. Jinazana Saul ban tra-pottrana epatoron dhari pagar geddhungnga kottha jareya, pas egiba ka Yabes, terros eobbar.

13Lang-tolangnga epakompol, ekoburragi e babana bungkana tamariska e kottha jareya, reng-oreng jareya pas apowasa pettong are abidda.

← Chapter 30 Jump to: