Deuteronomy 13

Madurese Bible 1994 (ALKETAB E DHALEM BASA MADURA)

← Chapter 12 Jump to: Chapter 14 →

1Mon badha nabbi otaba tokang ngarte'e mempe ajanji mabadha'a mo'jizat otaba kaajiban

2se maksodda terro sopaja ba'na nyemba'a ka la'-alla'anna, se sabellunna ta' tao esemba bi' ba'na, maske kaajiban jareya kadaddiyan onggu,

3ja' parduli. GUSTE Allahna ba'na ngangguy oreng jareya parlo ngojiya ba'na, sopaja etemmowa apa ba'na taresna onggu ka PANGERAN apa enja'.

4Oreng se kantha jareya kodu eokom mate, sabab manyempanga ba'na dhari jalan se eparenta'agi ka ba'na bi' GUSTE Allahna. Oreng jareya jahat polana nyoro ba'na ta' atoro' ka dhabuna GUSTE Allahna se mabebas ba'na dhari Messer, kennengnganna ba'na odhi' ekadunor oreng. Daddi oreng jareya kodu epate'e sopaja kajahadanna ta' terros alatlat. Tape ba'na kodu ta'at ka GUSTE Allahna ban hormat ka Salerana; pata'at ka Salerana ban lakone apa dhabuna. Paesto terros ban ngabdi ka Salerana salanjangnga.

6Mon taretanna ba'na, ana'na ba'na se lalake' otaba se babine', otaba binena ba'na se kataresnan, otaba kanca rapedda ba'na, nyacae ba'na kalaban samar sopaja ba'na nyemba'a ka la'-alla'an se sabellunna ta' tao esemba bi' ba'na otaba bi' bangatowana ba'na, la'-alla'anna sa-bangsa se semma' ka ba'na otabana se badha e jauna,

8ba'na ja' endha' ecacae oreng jareya, la'-mala' ja' edhingngagi cacana. Oreng jareya ja' kaneserre, ban ja' lindhunge.

9Garujuk ban bato pasampe' mate. Ba'na se kodu ngotep dha'-adha', pas eterrossagi bi' ra'yat laenna kabbi. Oreng se sala jareya kodu epate'e, sabab majauwa ba'na dhari GUSTE Allahna se mabebas ba'na dhari odhi'na se ekadunor oreng e Messer.

11Ommat Isra'il tanto pas ngedhing parkara oreng se epate'e jareya, ban tanto pas tako', daddi pas tadha' pole se alako jahat kantha jareya.

12Mon ba'na la enneng e tha-kottha se eparengngagi GUSTE Allah ka ba'na, olle daddi ba'na pas ngedhing kabar

13ja' badha reng-oreng bangsana ba'na se jahat ngeba pandhudhu'na kotthana ka jalan se sala, eajak nyemba ka la'-alla'an se sabellunna ta' tao esemba ba'na.

14Mon badha san-rasan se kantha jareya, talektegi pagu-onggu. Mon kajahadan jareya bendher badha onggu,

15pate'e sakabbinna oreng kottha jareya ban bin-ebinna. Kottha jareya kodu epamosna.

16Dhi'-andhi'na reng-oreng kottha jareya kodu pakompol kabbi, tompo' e lon-alon. Kottha jareya pas obbar ban sabarang se badha e jadhiya menangka kurban ka GUSTE Allahna. Saellana jareya kabbi pas dina padaddi kottha rosak, ban ta' olle epaddek pole.

17Rang-barang se ekenneng babaston jareya ta' olle badha se esempen otaba ekala' ba'na dibi', kabbi kodu pamosna. Mon jareya ejalannagi, dukana PANGERAN tanto pas elang, ban Salerana tanto pas noduwagi bellas asena ka ba'na. Salerana bakal bellasa ka ba'na ban ba'na bakal epadaddiya bangsa se raja akantha se la edhabuwagi ka bangatowana ba'na,

18sokor ba'na ngestowagi sakabbinna papakonna se bi' sengko' eajarragi ka ba'na are teya reya, ban ngalakone sabarang se daddi kasokanna.

← Chapter 12 Jump to: Chapter 14 →