Deuteronomy 16

Madurese Bible 1994 (ALKETAB E DHALEM BASA MADURA)

← Chapter 15 Jump to: Chapter 17 →

1“Raya'agi Paska e bulan Abib kaangguy ngormadi GUSTE Allahna ba'na, sabab e bulan jareya, e bakto malem, GUSTE Allah mabebas ba'na dhari Messer.

2Ba'na kodu entar ka kennengngan se la epele bi' PANGERAN, e jadhiya ba'na kodu nyambelli sala settong dhari dumbana otaba sapena menangka tor-ator Paska kaangguy ngormadi GUSTE Allahna.

3Tor-ator Paska jareya kodu ekakan bi' roti se ta' eragi'i. Pettong are abidda ba'na kodu ngakan roti se ta' eragi'i, akantha e bakto ba'na ondura dhari tana Messer ru-kaburu rowa. Kakan roti jareya, se enyamae roti kasangsara'an, sopaja saomorra ba'na terros enga' ka are e bakto ba'na ondur dhari Messer, kennengnganna ba'na nanggung sangsara.

4Pettong are abidda e sanagarana ba'na ta' olle badha se nyempen ragi e bengkona. Dagingnga ebin se esambelli e malem se dha'-adha'na kodu ekakan epatadha' e malem jareya keya.

5Ebin kaangguy paraya'an Paska jareya kodu esambelli e kennengngan se la etantowagi bi' GUSTE Allah, ta' olle e kennengngan laen e saanterona nagara se eparengngagi Salerana ka ba'na. Jareya kodu elakone bi' ba'na e bakto compet are, akantha e bakto ba'na ondura dhari tana Messer.

7Daging jareya kolop, pas kakan e kennengngan se la epele bi' GUSTE Allahna ba'na; saellana jareya ba'na pas mole ka bengkona kalagguwanna gu-laggu.

8Saellana jareya nem are aggi' ba'na kodu ngakan roti se ta' eragi'i. E are se kapeng petto' ba'na kodu akompol kaangguy abakte ka Pangeran, GUSTE Allahna. E are jareya ba'na ja' alalakon.”

9“Etong pettong menggu molae dhari are dha'-adha'na ba'na anye gandum,

10laju raya'agi Pesta Anye menangka panghormadan ka GUSTE Allahna. E are jareya ba'na kodu ngeba tor-ator sokalella ka Salerana menorot bannya'na rajekke se eparengngagi ka ba'na.

11E ajunanna GUSTE Allahna, e kennengngan se la epele Salerana, ba'na kodu agumbiraan abareng ban na'-ana'na, nor-dunorra, ban oreng Lewi, oreng manca, na'-kana' jatim ban para randha se badha e tha-kotthana ba'na.

12Estowagi sakabbinna papakonna, ban ja' kaloppae ja' lamba' ba'na daddi dunor keya neng e Messer.”

13“Mon gandumma ba'na la mare egebba kabbi, ban buwana anggurra la mare eperres kabbi, ba'na kodu araya'agi paraya'an Ranggun Dhaun pettong are abidda.

14Agumbiraan ban na'-ana'na, nor-dunorra, oreng Lewi, oreng manca, na'-kana' jatim ban para randha se badha neng e tha-kotthana ba'na.

15Pettong are abidda ba'na kodu araya'agi paraya'an jareya menangka panghormadan ka GUSTE Allah e kennengngan se epele Salerana. Agumbiraan, sabab GUSTE Allah la aberkadi hasella tanana ban lalakonna ba'na.

16Reng-oreng lalake'an kodu padha dhateng kabbi abakte ka GUSTE Allahna e kennengngan se la epele Salerana tello kale sataon, iya areya e Are Raja Paska, e bakto paraya'anna Pesta Anye, ban Ari Raja Ranggun Dhaun. Saneyap oreng kodu ngeba tor-ator

17menorot kakowadanna bang-sebang, menorot bannya'na rajekke se eparengngagi PANGERAN ka aba'na.”

18“E saneyap kottha se eparengngagi GUSTE Allah ka ba'na, ba'na kodu ngangkat kim-hakim ban gas-petugas laen se kodu ngadili ra'yat saadilla.

19E dhalem motose parkara, reng-oreng jareya ta' olle ngala' sakarebba dibi' otabana berra' salaja, ta' olle narema go'-sogo', sabab go'-sogo' jareya mabuta oreng, la'-mala' oreng se bicaksana ban jujur, sampe' ta' adil motose parkara.

20Ba'na kodu adil terros, sopaja bisa'a ngennengnge tana se eparengngagi GUSTE Allahna ka ba'na ban odhi' nyaman e jadhiya.

21Mon ba'na agabay mezba kaangguy panghormadan ka GUSTE Allahna, e seddi'anna ja' saba'i arca kaju lambangnga Asyera

22ban ja' agabay cangga kaangguy nyemba brahala, sabab lalakon se kantha jareya ekabaji'i bi' GUSTE Allahna ba'na.

← Chapter 15 Jump to: Chapter 17 →