Hosea 1

Madurese Bible 1994 (ALKETAB E DHALEM BASA MADURA)

Jump to: Chapter 2 →

1Reya' pessen se edhabuwagi PANGERAN ka Hoseya pottrana Be'eri e jaman baktona karaja'an Yehuda alir-gilir eparenta Rato Uziya, Yotam, Ahas ban Hizkiya, ban karaja'an Isra'il eparenta Yerobeyam pottrana Yowas.

2E bakto PANGERAN dha'-adha'na abu-dhabu ka bangsa Isra'il kalaban parantara'anna sengko', Pangeran adhabu kantha reya, “Hoseya, kassa' ba'na abine oreng se dujan nyondel, ban na'-ana'na ba'na bakal daddiya akantha babine' jareya keya. Tang ommat padha ban binena ba'na jareya; ta' esto ka Sengko', ban nyenglae Sengko'.”

3Daddi sengko' pas abine Gomer ana'na Diblaim. Saellana tang bine jareya rembi' ana' sareyang lalake',

4PANGERAN adhabu ka sengko', “Ana'na ba'na jareya nyamae Yizre'el, sabab ta' abit dhari sateya reya Sengko' ngokoma rato Isra'il polana Yehu, bangatowana se mate'e reng-oreng e Yizre'el Sengko' ngaherana pamarenta'anna toronanna Yehu.

5E bakto jareya e Cora Yizre'el Sengko' ngancora kakowadanna tantara Isra'il.”

6Saellana jareya tang bine rembi' se nomer dhuwa', ana'na babine'. PANGERAN adhabu ka sengko', “Hoseya, ana'na ba'na jareya nyamae Lo-Ruhama se artena ‘Se Ta' Ekaneserre’, sabab Sengko' la ta' neser pole ka bangsa Isra'il, ban sa-dusana bangsa jareya bi' Sengko' ta' esapora'a sakale.

7Tape bangsa Yehuda bi' Sengko' ekaneserrana. Sengko' PANGERAN, Allahna bangsa jareya, masalamedda bangsa jareya, tape banne ban paperrangan, bariya keya banne ban peddhang otaba pana otaba jaran ban orengnga se nompa'.”

8Saellana tang ana' se nomer dhuwa' epesa, tang bine ngandhung pole, pas rembi' lalake'.

9PANGERAN adhabu ka sengko', “Ana'na ba'na jareya nyamae Lo-Ami se artena ‘Banne Tang Ommat’, sabab oreng Isra'il banne Tang ommat ban Sengko' banne Allahna.”

10Bangsa Isra'il bakal bannya'a akantha beddhi e sagara, sampe' ta' ekenneng taker ban ta' ekenneng bitong. Sateya Allah adhabu ka bangsa jareya, “Ba'na banne Tang ommat,” tape bakal napa'a baktona salerana adhabuwa ka bangsa jareya kantha reya, “Sengko' reya Allah se odhi' ban ba'na Tang na'-ana'!”

11Bangsa Yehuda ban bangsa Isra'il epasettonga pole. Sa-bangsa jareya bakal ngangkada pamimpin, ban bakal atamba'a maju sarta ma'mor pole e nagarana. Onggu, arena Yizre'el bakal daddiya are se raja!

Jump to: Chapter 2 →