Hosea 14

Madurese Bible 1994 (ALKETAB E DHALEM BASA MADURA)

← Chapter 13 Jump to:

1Samaria kodu eokom polana aberonta' alaban ka Sengko'. Ra'yadda bakal tebasa e dhalem paperrangan; na'-kana' babaji'na bakal enyek-enyegga, ban babine'anna se ngandhung bakal edhudhida tabu'na.”

2Mara ba'na abali ka GUSTE Allahna, he, bangsa Isra'il! Dusana ba'na daddi sababba ba'na tabalaccar sampe' labu.

3Mara abali ka Pangeran ban adu'a kantha reya menangka tor-atorra ba'na ka Pangeran, “GUSTE, nyo'ona sapora sadajana dusana abdidalem sadaja, ban kasokana Junandalem narema du'a abdidalem ka'dhinto, sopaja abdidalem sadaja kengenga amolja'agi Junandalem akadi se ampon ejanjiyagi sareng abdidalem sadaja.

4Asyur ta' kera kengeng masalamet abdidalem sadaja, ban jaran perrang ta' kera kengeng nolong abdidalem sadaja. Abdidalem sadaja ta' ngoca'a pole ka ca-arca badhiyan abdidalem sadaja ja' ca-arca gapaneka Allah abdidalem sadaja. Adhu GUSTE, Junandalem neser ka reng-oreng se ta' gadhuwan pasera'a saos se ekennenga andellagi.”

5PANGERAN adhabu, “Tang ommat se nyalethong, bi' Sengko' ekala' pole ban ekaneserre kalaban gu-onggu ate; bi' Sengko' ta' egigirana pole.

6Monggu ka oreng Isra'il Sengko' reya akantha ojan se mabacca tana kajal. Reng-oreng jareya bakal mekkara akantha kembang ban tombuwa akantha bungkana comara se dhalem ramo'na.

7Oreng Isra'il bakal odhi'a ban atamba'a bannya'na akantha men-tamennan se nyelbi' e man-dhimman, akantha bungkana jaitun bagussa, akantha bungkana comara ro'omma!

8Reng-oreng Isra'il bakal abaliya ka Sengko' ban ennengnga e dhalem Tang pangaoban. Bangsa jareya bakal ceppedda atamba ma'mor, akantha gandum se tombu e tana se landhu ban akantha kebbun anggur. Nyamana bakal kasohora akantha aeng anggur Libanon.

9Oreng Isra'il bakal mowanga ca-arca brahalana; bi' Sengko' epeyara'a ban ekabbulana du'ana. Akantha kajuwan se ros-terrosan gumbus dhaunna, Sengko' ngaobana reng-oreng jareya. Sengko' somberra berkadda sakabbinna berkat monggu ka reng-oreng jareya. Sengko', PANGERAN, la ngoca'!”

10Moga sakabbinna oreng se bicaksana eparengngana ngarte ka sabarang se etoles e dhinna' reya, ban agateyagi essena. Du-petodu dhari PANGERAN reya teppa', ban oreng alem odhi' menorot du-petodu jareya. Tape oreng se dusa ngenthengngagi du-petodu jareya, daddi pas tabalaccar sampe' labu.

← Chapter 13 Jump to: