2 Kings 19

kimiiru

← Chapter 18 Jump to: Chapter 20 →

1Mûnene Hezekia rîrîa aaigîrue mantû jau nî aatambûrangîre nguû ciaawe, areekîra mathango na areeta kîûrûûne kîa MWATHANI.

2Ningî aratûma Eliakimu ûrîa waarî mûrûngamîîri wa gîkaro kîa mûnene, na Shebuna ûrîa waarî karani, na athînjîri-Mûrungu barîa baatongeeragia bangî beekîrîte mathango bonthe, kîrî kîroria Isaya mûtaana wa Amozi.

3Bareeta baramwîra atîrî, “Hezekia ariuga ûjû: Naarua nî ntukû îrîa twarumwa, na twameneerua na nî tûkûthangîka. Tûkari ta mûka ûkinyîtie îgiita rîa kûewa mwana îndî akaaga inya ya kûthithia u.

4Kwombîka MWATHANI Mûrungu waaku akeethîrwa aigîîtue nteto cionthe irîa mûtongeeria wa mbûûtû ya asikarî ba Asîria, wa ndaracha ya Rabushake aarîîtie. Mantû jau nîjo mûnene wa Asîria aramûtûmîte eeja kûmeneeria Mûrungu ûrîa ûrî mwoyo. MWATHANI Mûrungu waaku aroigua irumi biu na agakanûkia barîa barumeene. Tontû bûû, rombera antû beetû barîa batigeere.”

5Rîrîa nthûûmba cia mûnene Hezekia ciakinyîîrie Isaya ntûmwa îîu,

6Isaya nî aabacokerie arabeera atîrî, “Îîreeni mwathi weenu mûnene, MWATHANI ariuga ûjû: ‘Bûgákîreeni nîûntû bwa nteto irîa bwaigua, ûrîa nthûûmba cia mûnene wa Asîria imeneeretie.

7Atîrî, nkaamwîkîra Roho nîkenda aigua mantû mana jakîarua, acoke nthîgûrûûne yaao. Naani ngatûma ooragîrwe nthîgûrûûne yaawe yongwa.’”

8Mûtongeeria wa mbûûtû ya asikarî wa ndaracha ya Rabushake nî aaigîrue atî mûnene wa Asîria akuuma ntûûreene ya Lakishi, eeta kwithûkîra ntûûra ya Libuna. Tontû bûû, aracoka areethîra mûnene wa Asîria akîrûjaga na antû ba ntûûra ya Libuna.

9Senakeribu nî aaigîrue mantû jaakîarua jegiî mûnene Tirihaka wa Ethiopia atî atongeeretie njûûrî îîta kûmwithûkîra. Mûnene Senakeribu nî aatûmanîre kaîrî kîrî Hezekia mûnene wa Juda aramwîra atîrî,

10“Ûkáreka mûrungu jwaaku jûrîa wîtîkîtie jûkwaîria atî ntîtaa ntûûra ya Jerusalemu.

11Atîrî, gwe nî wigîîtue ûrîa anene ba Asîria baithûkagîra nthîgûrû cionthe, bakaithiria buru. No gwe ûkoonoka?

12Biûjûjû bieetû nî biaithûkîîre birathiria ntûûra ya Gozeni na ya Harani na ya Resefu na antû ba Bethedeni, barîa barî ntûûreene ya Telasari. Kûrî mîrungu ya mîgongo îîu yaaboonokia?

13Arîkû mûnene wa ntûûra ya Hamathi, kana mûnene wa ntûûra ya Aripadi, kana mûnene wa ntûûra ya Sefarivaimu, kana mûnene wa ntûûra ya Hena, kana wa ntûûra ya Iva?”

14Mûnene Hezekia nî aajûkîrie barûga iu kuuma kîrî barîa baatûmi, aramîthoma. Aracoka areeta kîûrûûne aramîîka au mbere ya MWATHANI îkûnjûri.

15Hezekia nî aarombere MWATHANI arauga atîrî, “Itû MWATHANI, Mûrungu wa Israeli, gwe ûkaraga gîtîîne gîaaku kîa ûnene kîrîa kîrî îgûrû rîa kerubimu. Gwe gwenka nîgwe Mûrungu nîgwe waathaga moonene jonthe ja nthîgûrû. Nîgwe wombîre îgûrû na nthî.

16Kiinda gûtû wigue itû MWATHANI. Raithîîria woone ûrîa mantû jakari. Igua nteto irîa mûnene Senakeribu aarîîtie cia gûgûcikûûra gwe Mûrungu ûrîa ûrî mwoyo.

17Itû MWATHANI nî mma atî anene ba Asîria nî baithûkîrîte mîgongo îmiingî bakathûûkangia nthîgûrû ciaao.

18Ningî anene ba Asîria baagera mîrungu ya mîgongo îîu mwankiine baramîîthia, nîûntû îtaarî mîrungu, îndî yaarî into bithithîtue na njara, bia mîtî na maiga.

19Nandî itû MWATHANI Mûrungu weetû, ndaakwerenca ûtwonokie, kuuma njareene cia Senakeribu, nîkenda mîgongo yonthe ya nthîgûrû îmenya atî gwe MWATHANI gwenka nîgwe Mûrungu.”

20Isaya mûtaana wa Amozi nî aatûmanîre kîrî Hezekia akiugaga atîrî, “MWATHANI Mûrungu wa Israeli auga ûjû: ‘Ndîkwigua îromba rîaaku rîrîa wandomba nîûntû bwa Senakeribu mûnene wa Asîria.’

21MWATHANI ariuga ujû, mantûûne jegiî Senakeribu: ‘Ntûûra ya Jerusalemu îgûkûthekera na îgûkûmeneeria.

22Nûû ûcikûûrîte na wameneeria? Nûû waarîrîtie bûbûûî na waakûnûrîra meetho? Nî ûûni Ûrîa Mûtheru wa Israeli!

23Ûtûmîte atûmwa baaku nîkenda beeja gûncikûûra ni MWATHANI. Ningî ûûgîîte ûraitia irîmeene bia Lebanoni birîa biraaja mono ûrî na ngaarî ciaaku cia ndwaa cionthe. Watema mîtarakwa ya Lebanoni na mîthithinda yaayo îrîa mîega. Ugîîte atî ûratonya miitû îrîa miimbanu mono.

24Uugîîte nî wenjîre ithima nthîgûrûûne ngeni, ûranyua ndûûjî ciaabio, na wakinyanga ndûûjî cia Misri cioma.

25Gwe Senakeribu ka ûtaigua atî nî ni ndaabangîre mantû jaja o karaaja na nandî ndîkûjoojûria. Ningî atî nî ni ndaakweete inya ya kûthiria buru ntûûra irîa ciaaki na nthingo.

26Antû barîa batûûraga ntûûreene iu nî baathirîrue inya, baamakua baatigwa barigari. Bo baakari ta nyaki yumîte kîeniine, kana ntima îrîa yuumaga îgûrûgûrû rîa nyomba. Nayo îîthagua nî riûa îtîrakûra.

27Îndî nî mbijî mantû jaaku jonthe; nî mbijî ûkiumagara na ûgîcoka. Nî mbijî ûrîa ûng’eenti nîûntû bwaakwa.

28Naani nî mbigîîtue mantû ja rûng'eento rwaaku na rwikumio rwaaku. Nî nthirîtie gûkûgwatia na rwano ta gîkûyû, na ngaagûcokia mwanka naarîa waaumîre.”

29Kîroria Isaya nî eerîre mûnene Hezekia atîrî, “Rûrû nîru rwano rwa mantû jarîa jagaakarîka: Mwaka jûjû na jûu jûngî ûkaarîjaga birîa biumîte bitîaandi nî muntû. Îndî mwakeene jwa îthatû gwe ûkaanda na ûkethe. Ûkaanda mîzabibû na ûrîe nzabibû ciaayo.

30Nabo antû ba Juda barîa bagaatigara bakaariiba ta mîtî îrîa îîthagîrwa îrî na mîri îmîraaja na îciaaraga maciara.

31Matigari jagatigara ntûûreene na kîrîmeene kîa Zaiûni nîûntû ûu nîu MWATHANI abangîte gûkara.

32“Nandî MWATHANI ariuga ûjû mantû jegiî mûnene wa Asîria: ‘Atîkûrûka ntûûreene îîjî kana aikia mûgwî ku. Atîmîkuîrîîria na rong'o kana oomba mîtaro ya gwitiira nayo amîcîgîîrîîtie.

33Njîra îrîa areejîîrîte, no yo agaacokeera, na atîkûrûka ntûûreene îîjî.’ Ûu nîu ûûni MWATHANI ndauga.

34‘Nîkwîthîrwa ngaakaria ntûûra îîjî, mîonokie, nîûntû bwaakwa ningwa na nîûntû bwa wîrane bûrîa ndeekîîre nthûûmba yaakwa Daudi.’”

35O ûtukû bûu, mûraîka wa MWATHANI nî eetîre kambîîne ya Asîria arooraga antû ngiri îgana rîmwe rîa mîrongo înaana na ithaano (185,000). Nabo antû bagîûkîîra rûkîîrî bareethîra antû bau bonthe barî biimba akî.

36Senakeribu, mûnene wa Asîria nî aambûrîre kambî aratigana na ntûûra ya Jerusalemu aracoka ntûûreene ya Nineve aratûûra ku.

37Ntukû îmwe akîrombaga arî kîromberoone kîa mûrungu jwaawe Nisiroki, ataana baawe Adrameleki na Sharezeri nî baamûûragîre na rûchiû, rîu baramatûka bareeta nthîgûrû ya Ararati. Esari-hadoni mûtaana waawe araa mûnene.

← Chapter 18 Jump to: Chapter 20 →