2 Kings 5

kimiiru

← Chapter 4 Jump to: Chapter 6 →

1Naamani, mûtongeeria wa njûûrî ya nthîgûrû ya Sîria nî eendi na gwîkîîrwa mono nî mûnene wa Sîria. Nîkwîthîrwa Naamani nî aatumagîrwa nî MWATHANI nîkenda njûûrî ya Sîria yûûmbana. Naamani aarî nchamba ya ndwaa îndî nî aajîtue nî mûrimo jwa gîkonde jûmûthûûku.

2Nabo antû ba Sîria baithûkîrîte Israeli îgiita rîmwe, nî baataîre kaarî kamwe ga kuuma Israeli. Nako karaa mûriti wa ngûgî wa mûka wa Naamani.

3Kaarî kau nî keerîre mûka wa Naamani atîrî, “Ndeenda mono mwathi waakwa eeta kwona kîroria kîrîa gîtwîre Samaria! Kîroria kîu nîkîo kîûmba kûmworia mûrimo jûu jwa mûtigiri.”

4Naamani nî eerîre mûnene nteto irîa kaarî kau ga kuuma Israeli kaugîîte.

5Mûnene wa Sîria areera Naamani atîrî, “Îta o nandî. Naani ngaatûmîra mûnene wa Israeli barûga.” Naamani areeta arî na fetha ngiri mîrongo îthatû (30,000) na ngiri ithanthatû cia thaabu, na mabaa îkûmi ja nguû inthongi.

6Ningî Naamani nî aaikîîrie mûnene wa Israeli barûga îrîa yaaugaga, “Barûga îîjî yagûkinyîra, ûmenye nî ni mûnene wa Sîria ndaatûma nthûûmba yaakwa Naamani kîrî gwe nîkenda ûmworia mûrimo jwa gîkonde jûmûthûûku.”

7Rîrîa mûnene wa Israeli aathomere barûga îîu, nî aatambûrangîre nguû ciaawe akîûragia atîrî, “Ka ndî Mûrungu, we ûrî inya ya kûûraga na kûriûkia tontû mûnene wa Sîria agûntûmîra muntû mworia mûrimo jwa gîkonde jûmûthûûku? No mwanka eethîrwe nî mateta agûcwaa.”

8Îndî rîrîa Elisha, muntû wa Mûrungu aaigua atî mûnene wa Israeli nî atambûrangîte nguû ciaawe, nî aatûmanîre kîrî we akiugaga atîrî, “Nîmbi yatûma ûtambûranga nguû ciaaku? Reka muntû ûu eeje kîrî ni nîkenda amenya kûrî na kîroria ndeene ya Israeli.”

9Tontû bûû, Naamani nî eetîre arî na mbarathi ciaawe, na ngaari ciaawe cia ndwaa ararûngama mwariine jwa nyomba ya Elisha.

10Elisha aratûma nthûûmba kîrî Naamani îîta kûmwîra atîrî, “Îta ûthambe mathamba mûgwanja mûuroone jwa Jorodani. Naagwe ûkaabua mwîrî na ûthere.”

11Îndî Naamani arathûûra mono areeta akiugaga atîrî, “Nkûthûgaanagia noo kîroria gîkaumagara kîîje kîrî ni, kîrombe MWATHANI Mûrungu waakîo, gîcoke gîûkîîrie njara îgûrû rîa kûrîa kwajîtue, amborie mûrimo jwa gîkonde jûmûthûûku.

12Anga ndûûjî cia ntûûra ya Damaski, ta cio Abana na Faripari tî cio njega nkûrûki ya ndûûjî cionthe cia Israeli? Ntîngî kûthaamba ku nthera?” Aragarûka araciîtîra ang'eenti.

13Îndî nthûûmba ciaawe ireeta kîrî we iramwîra atîrî, “Aba këethîra nîka kîroria gîakwîra ûthithie ûntû bûbûnene rî, ûtîngî bûthithia? Tî kaaba kinya ûu gîakwîra, ‘Thaamba ûthere?’”

14Nîrîo Naamani eenamîre mûuroone jwa Jorodani araitombeka ku maitombeka mûgwanja ta ûrîa muntû wa Mûrungu augîîte. Nawe arabua mwîrî jûrakara ta jwa kaana kanyi. Nawe arathera.

15Naamani amwe na antû barîa bonthe aarî nabo bareeta bararûngama mbere ya kîroria Elisha. Naamani aramwîra, “Atîrî, nkûmenya gûtî Mûrungu ûngî nthîgûrûûne yonthe, tiga Mûrungu wa Israeli. Tontû bûû, îtîkîîria kîewa kuuma kîrî ni nthûûmba yaaku.”

16Îndî Elisha aramwîra atîrî, “Ka ngûciîtia na MWATHANI ûrîa ntumîkagîra atî, gûtî gîntû nkaajûkia.” Naamani aramwereenca ajûkia noo mbi îndî Elisha ararega.

17Naamani aramwîra atîrî, “Këethîra ûtîkwenda rî, îtîkîîria njûkie mûthetu jûrîa jûûmba gûkamatwa nî nyûmbû ijîîrî. Nîkwîthîrwa kuuma nandî ni nthûûmba yaaku ntîkororitîra mûrungu jûngî kîgongwana kinya kîa mûthemba jûrîkû. Nî MWATHANI wa Israeli wenka nkaaritagîra igongwana.

18Nî ûntû bûmwe akî ni nthûûmba yaaku nkûromba ûrekeri kuuma kîrî MWATHANI. Nabu nî atîrî, Rîrîa mwathi waakwa eetaga kîromberoone kîa mûrungu jûrîa jwîtagwa Rimoni, nîkenda aromba, nî mbîtanagia nawe. Tontû nî nkûromba MWATHANI wa Israeli andekere ndeetania na mwathi waakwa kîromberoone kîu.”

19Elisha aramwîra, “Îta bwega.” Mbere ya Naamani atîreeta antû arî thau,

20Gehazi, nthûûmba ya Elisha, araciûria wengwa atîrî, “Nîatîa mwathi waakwa akûrekeeria Naamani wa kuuma Sîria agacoka na into biaawe o ûu ûtheri? Ga ngûciîtia na MWATHANI atî nkeengana nawe mwanka mbone gantû kuuma kîrî we.”

21Gehazi areengana na Naamani. Rîrîa Naamani oonere muntû wîngeene nawe, arauma ngaarîîne yaawe areeta gûtirimana na Gehazi aramûûria atîrî, “Nîatîa kûrî?”

22Gehazi nawe aramwîra atîrî, “Nî gûkwega. Îndî nî mwathi waakwa Elisha wantûma ambîîra nkwîre atîrî, ‘Nthaka ijîîrî cia gîkundi kîa iroria ikwîja kîrî ni, ciumîte nthîgûrûûne ya irîma ya Efuraimu. Itû banenkere ngiri ithatû cia fetha na mabaa jaîrî ja nguû inthongi.’”

23Îndî Naamani aramwîra atîrî, “Itû îtîkîîria kûjûkia fetha ngiri ithanthatû (6,000).” Aramwereenca nîkenda ajûkia, aramwîkîîra fetha îîu nkunieene ijîîrî aracioga. Ningî aramûnenkera mabaa jaîrî ja nguû inthongi. Naamani aranenkera nthûûmba ciaawe îjîrî into iteethia Gehazi gûkamata.

24Rîrîa baakinyîre kîrîmeene, Gehazi arajûkia into biu arabiîka nyomba yaawe. Rîu arabeera beete, nabo bareeta.

25Nawe arakûrûka nyomba ararûngama mbere ya mwathi waawe Elisha. Elisha aramûûria atîrî, “Nîkû ûgûkarî Gehazi?” Nawe aramwîra, “Gûtî ku ni nthûûmba yaaku ndîreeta.”

26Elisha nawe aramûûria ûjû, “Anga ntîkwonere na roho yaakwa rîrîa muntû ûrîa aumîre ngaarîîne yaawe ya ndwaa akûthagaana! Rîrî nîrîo îgiita rîa kûjûkia mbeecha, na nguû, na miuunda ya mîzabibû, na ya mîzeituni na ng'ondu na ndegwa na nthûûmba cia arûme na cia aka?

27Tontû bûû, mûrimo jwa gîkonde jûmûthûûku jwa Naamani jûrokûgwata na jûkagwata nchiarwa ciaaku kenya na kenya.” Gehazi arauma au arî ûmwerû cwaa nîûntû bwa mûrimo jwa gîkonde jûmûthûûku.

← Chapter 4 Jump to: Chapter 6 →