Colossians 2

Malayalam (BSI) 2016 (സത്യവേദപുസ്തകം C.L. (BSI))

← Chapter 1 Jump to: Chapter 3 →

1നിങ്ങള്‍ക്കും ലവുദിക്യയിലുള്ളവര്‍ക്കും എന്നെ നേരിട്ടറിയാത്ത മറ്റുള്ള എല്ലാവര്‍ക്കും വേണ്ടി എത്ര വലിയ പോരാട്ടമാണ് ഞാന്‍ നടത്തുന്നത്!

2ഇത് അവര്‍ക്ക് ആശ്വാസം ലഭിക്കുന്നതിനും, സ്നേഹത്തില്‍ അവര്‍ ഒരുമിച്ചു ചേര്‍ക്കപ്പെടുന്നതിനും, അങ്ങനെ യഥാര്‍ഥജ്ഞാനത്തില്‍ നിന്നുണ്ടാകുന്ന വിശ്വാസത്തിന്‍റെ പൂര്‍ണസമ്പത്തു പ്രാപിക്കുന്നതിനും വേണ്ടിയാണ്. ഇങ്ങനെ അവര്‍ ദൈവത്തിന്‍റെ മര്‍മ്മം അറിയും.

3ക്രിസ്തുതന്നെയാണ് ആ മര്‍മ്മം. ഈശ്വരന്‍റെ ജ്ഞാനവിജ്ഞാനങ്ങള്‍ ക്രിസ്തുവില്‍ അന്തര്‍ലീനമായിരിക്കുന്നു.

4സമര്‍ഥമെന്നു തോന്നിക്കുന്ന യുക്ത്യാഭ്യാസംകൊണ്ട് ആരും നിങ്ങളെ വഞ്ചിക്കരുത്.

5ശരീരത്തില്‍ ഞാന്‍ നിങ്ങളില്‍നിന്ന് അകന്നിരുന്നാലും ആത്മാവില്‍ നിങ്ങളോടുകൂടിയുണ്ട്. ക്രിസ്തുവിലുള്ള വിശ്വാസത്തില്‍ നിങ്ങളെ ഉറപ്പിച്ചു നിറുത്തുന്ന നിശ്ചയദാര്‍ഢ്യത്തെപ്പറ്റി അറിയുകയും അതില്‍ ഞാന്‍ സന്തോഷിക്കുകയും ചെയ്യുന്നു.

6ക്രിസ്തുയേശുവിനെ നിങ്ങള്‍ കര്‍ത്താവായി കൈക്കൊണ്ടിരിക്കുന്നതിനാല്‍ അവിടുത്തോട് ഏകീഭവിച്ചു ജീവിക്കുക.

7ക്രിസ്തുവേശുവില്‍ നിങ്ങള്‍ വേരൂന്നുകയും നിങ്ങളുടെ ജീവിതം ആ അടിസ്ഥാനത്തില്‍ പടുത്തുയര്‍ത്തുകയും, നിങ്ങളെ പഠിപ്പിച്ചിട്ടുള്ളതുപോലെ വിശ്വാസത്തില്‍ കൂടുതല്‍ ബലം പ്രാപിക്കുകയും ചെയ്യണം. കൃതജ്ഞത നിങ്ങളില്‍ നിറഞ്ഞു കവിയട്ടെ.

8തത്ത്വജ്ഞാനവും ചതിയുംകൊണ്ട് ആരും നിങ്ങളെ വഴിതെറ്റിക്കാതെ സൂക്ഷിക്കുക. അവ മനുഷ്യന്‍റെ പരമ്പരാഗതമായ ഉപദേശങ്ങളില്‍നിന്നും, പ്രാപഞ്ചികമായ ഭൗതികശക്തികളില്‍നിന്നും വരുന്നതാണ്, ക്രിസ്തുവില്‍നിന്നുള്ളതല്ല.

9സമ്പൂര്‍ണദൈവികത്വം മനുഷ്യരൂപം പൂണ്ട് ക്രിസ്തുവില്‍ നിവസിക്കുന്നു.

10ക്രിസ്തുവിനോടുള്ള ഏകീഭാവം മൂലം നിങ്ങള്‍ പൂര്‍ണതയില്‍ എത്തിയിരിക്കുന്നു. അവിടുന്ന് എല്ലാ വാഴ്ചകളുടെയും അധികാരത്തിന്‍റെയും അധീശനാണ്.

11ക്രിസ്തുവിനോടുള്ള ഐക്യത്താല്‍ നിങ്ങള്‍ യഥാര്‍ഥ പരിച്ഛേദനത്തിനു വിധേയരായിരിക്കുന്നു. എന്നാല്‍ മനുഷ്യര്‍ ചെയ്യുന്ന പരിച്ഛേദനം അല്ല അത്; പിന്നെയോ ക്രിസ്തുവിന്‍റെ പരിച്ഛേദനമാകുന്നു. അത് പാപകരമായ ശരീരത്തിന്‍റെ ദുര്‍വാസനകളെ നിര്‍മാര്‍ജനം ചെയ്യുന്നു.

12സ്നാപനം മുഖേന നിങ്ങള്‍ ക്രിസ്തുവിനോടുകൂടി സംസ്കരിക്കപ്പെടുക മാത്രമല്ല, ക്രിസ്തുവിനെ മരിച്ചവരില്‍നിന്നുയിര്‍പ്പിച്ച ദൈവത്തിന്‍റെ ശക്തിയിലുള്ള വിശ്വാസത്താല്‍ ക്രിസ്തുവിനോടുകൂടി ഉയിര്‍പ്പിക്കപ്പെടുകയും ചെയ്തു.

13പാപങ്ങള്‍കൊണ്ടും ദൈവകല്പന അനുസരിക്കാത്തതുകൊണ്ടും നിങ്ങള്‍ ഒരിക്കല്‍ ആത്മീയമായി മരിച്ചവരായിരുന്നു. എന്നാല്‍ ഇപ്പോള്‍ ദൈവം നിങ്ങളെ ക്രിസ്തുവിനോടുകൂടി ജീവിപ്പിച്ചിരിക്കുന്നു. നമ്മുടെ സകല പാപങ്ങളും ദൈവം ക്ഷമിക്കുകയും ചെയ്തു.

14നമ്മുടെ കടങ്ങള്‍ സംബന്ധിച്ച് നമുക്കു പ്രതികൂലമായുണ്ടായിരുന്ന രേഖകളും ചട്ടങ്ങളും ദൈവം മാറ്റുകയും അവയെ കുരിശില്‍ തറച്ചു പൂര്‍ണമായി തുടച്ചു നീക്കുകയും ചെയ്തു.

15കുരിശിലൂടെ ക്രിസ്തു അധമശക്തികളെയും ദുഷ്ട അധികാരികളെയും നിരായുധരാക്കി അവരുടെമേല്‍ ജയോത്സവം കൊണ്ടാടുകയും അവരെ ജനമധ്യത്തില്‍ പരിഹാസപാത്രമായി പ്രദര്‍ശിപ്പിക്കുകയും ചെയ്തു.

16അതുകൊണ്ട് ആഹാരപാനീയങ്ങള്‍ സംബന്ധിച്ചോ പെരുന്നാള്‍, അമാവാസി, ശബത്ത് മുതലായവ സംബന്ധിച്ചോ ആരും ഇനി നിങ്ങളെ വിധിക്കാതിരിക്കട്ടെ.

17ഇവയെല്ലാം ഭാവിയില്‍ സംഭവിക്കുവാനിരിക്കുന്നതിന്‍റെ നിഴല്‍മാത്രമാകുന്നു; യാഥാര്‍ഥ്യം ക്രിസ്തുവത്രേ.

18പ്രത്യേക ദര്‍ശനങ്ങളുള്ളവരെന്നു പറഞ്ഞ് മറ്റുള്ളവരെക്കാള്‍ ശ്രേഷ്ഠരാണെന്ന് അവകാശപ്പെടുകയും, കപടവിനയം ഭാവിക്കുവാനും മാലാഖമാരെ ആരാധിക്കുവാനും പ്രേരിപ്പിക്കുകയും ചെയ്യുന്ന ആരും നിങ്ങള്‍ക്ക് അയോഗ്യത കല്പിക്കുവാന്‍ ഇടകൊടുക്കരുത്. അങ്ങനെയുള്ളവര്‍ തങ്ങളുടെ മാനുഷികരീതിയിലുള്ള ചിന്തമൂലം അഹങ്കരിക്കുന്നതേയുള്ളൂ.

19അവര്‍ ശിരസ്സാകുന്ന ക്രിസ്തുവിനോട് ഗാഢബന്ധം പുലര്‍ത്താത്തവരാണ്. ക്രിസ്തുവിന്‍റെ നിയന്ത്രണത്തില്‍ ശരീരം മുഴുവനും പരിപുഷ്ടമാക്കപ്പെടുകയും, സന്ധിബന്ധങ്ങളും സിരകളുംകൊണ്ട് കൂട്ടിയിണക്കപ്പെടുകയും ദൈവം ആഗ്രഹിക്കുന്ന പ്രകാരം വളരുകയും ചെയ്യുന്നു.

20നിങ്ങള്‍ ക്രിസ്തുവിനോടുകൂടി മരിക്കുകയും പ്രപഞ്ചത്തെ ഭരിക്കുന്ന ഭൗതികശക്തികളില്‍നിന്നു സ്വതന്ത്രരാക്കപ്പെടുകയും ചെയ്തിരിക്കുന്നു. പിന്നെയും, എന്തിനു ലോകത്തിനുള്ളവര്‍ എന്നവണ്ണം നിങ്ങള്‍ ജീവിക്കുന്നു?

21‘ഇത് എടുക്കരുത്, അതു രുചിക്കരുത്, മറ്റതു തൊടുകപോലും അരുത്’ എന്നിങ്ങനെയുള്ള ചട്ടങ്ങള്‍ എന്തിന് അനുസരിക്കണം?

22ഉപയോഗംകൊണ്ടു നശിച്ചുപോകുന്നവയെക്കുറിച്ചത്രേ ഇവിടെ പറയുന്നത്; ഇവയെല്ലാം മനുഷ്യനിര്‍മിതമായ ചട്ടങ്ങളും ഉപദേശങ്ങളുമാകുന്നു.

23സ്വേച്ഛാരാധനയും കപടവിനയവും കര്‍ക്കശമായ ശാരീരിക വ്രതാനുഷ്ഠാനവും സംബന്ധിച്ച വിജ്ഞാനത്തെ അടിസ്ഥാനമാക്കിയുള്ള അനുശാസനങ്ങളാണിവയൊക്കെ എന്നു തോന്നിയേക്കാം. എന്നാല്‍ ഇന്ദ്രിയനിഗ്രഹത്തിനു പര്യാപ്തമായ മൂല്യം ഇവയ്‍ക്കില്ല.

← Chapter 1 Jump to: Chapter 3 →