2 Timothy 1

mewari

Jump to: Chapter 2 →

1मूँ पोलुस, ज्यो परमेसर की मरजीऊँ ईसू मसी को थरप्या तको खास चेलो हूँ, जिंने परमेसर वणी जीवन को परच्यार करबा का वाते खन्दायो, जणी जीवन ने परमेसर ईसू मसी में देबा को वादो किदो हे।

2मूँ परबू में, मारा लाड़ला बेटा तिमुतियुस थने, ओ कागद लिकरियो हूँ। बापू परमेसर अन आपणाँ परबू ईसू मसी में थने करपा, दया अन सान्ती मले।

3तिमुतियुस मूँ रात-दन मारी परातना में थने आद करूँ हूँ अन थाँरा वाते परमेसर ने धन्नेवाद दूँ हूँ, जिंकी सेवा मूँ मारा बड़ाबा का जस्यान हुदा मनऊँ करूँ हूँ।

4थाँरा आँसूवा ने आद करन हमेस्यान मारा हरदा में आ मरजी वेवे के, मूँ थाँराऊँ वेगोई मलूँ अन राजी वे जऊँ।

5मूँ थाँरा हाँचा विस्वास ने भी आद करूँ हूँ, अस्यान कोईस विस्वास थाँरी नानी लोइस अन थाँरी बई युनीके में हो, अन मूँ ईं बात वाते पाको हूँ के, वोईस विस्वास थाँरा में भी हे।

6ईं वाते मूँ थने आद देवाड़ूँ के, वीं वरदान ने जीवतो राक, जिंने परमेसर थने वीं टेम दिदो हो, जद्याँ में थाँरा पे हात मेल्यो हो।

7काँके परमेसर आपाँने दरपणी के बजाय तागत, परेम अन खुद ने बंस में राकबा की आत्मा दिदी हे।

8ईं वाते थूँ आपणाँ परबू अन मारी गवई देबा का वाते, ज्यो मसी का वाते बन्दी हूँ, हरमाज्ये मती, पण अस्यान करबा के, बजाय परमेसर, ज्या तागत थने दिदी हे, वींने मारा हाते हव हमच्यार का वाते दुक उटाबा में लगाज्ये।

9वणा आपाँने परमेसर का मनक वेबा वाते बंचाया अन बलाया हे, ओ सोभाग्य आपणाँ पे आपणाँ कामाँ का जस्यान ने मल्यो हे, पण ओ तो वाँकी दया अन वाँका मकसद वाते आपाँ पे ने मल्यो हे, ज्यो ईसू मसी में सरुवातऊँ आपणाँ वाते हो।

10पण अबे आपणाँ ने बंचाबावाळा ईसू मसी का आबा का आड़ीऊँ आपणाँ पे परगट व्यो हे। जणी हव हमच्यार का आड़ीऊँ मोत को नास करन जुग-जुग का जीवन ने परगट किदो हे।

11परमेसर मने हव हमच्यार ने हुणाबावाळो, एक हिकाबावाळो अन ईसू को थरप्या तका की जस्यान काम दिदो हे।

12अन ईं वजेऊँ मूँ ईं हारई दुक जेलूँ हूँ, पण मूँ ईं वाते हरमा ने मरूँ हूँ, काँके मूँ जाणूँ हूँ के, मारो विस्वास किंपे हे? अन मूँ ईं बात वाते पाको हूँ के, ज्यो कई वणा मने हूँप्यो हे, वींने मसी के पाच्छा आबा का दन तईं बंचाबा में तागतवर हे।

13जीं खरा बचन में थने हिकाया हे वाँने मजबुतीऊँ पकड़ राक अन वाँने भी विस्वास अन परेम का हाते, ज्यो ईसू मसी में हे, खुद का वाते नमुनो बणान राक।

14अन पुवितर आत्मा का आड़ीऊँ ज्यो आपणाँ में वास करे हे, हव चिजाँ की रुकाळी कर, जीं थने हूँपी गी हे।

15थूँ जाणे हे के, आसिया परदेस का रेबावाळा हाराई मने छोड़ दिदो हे, जणामें फुगिलुस अन हिरमुगीनेस भी हे।

16परमेसर उनेसिफुरस का घराणा पे दया करे, काँके वणा घणी दाण मारी मदत किदी हे अन मारा बन्दी वेवा की वजेऊँ भी हरमा ने मरिया हे।

17अन जद्याँ वो रोम नगर आयो तो वो मने जद्याँ तईं होदतो रिया, तद्याँ तईं मूँ वींने ने लादो।

18परमेसर वींपे भी, मसी के पाच्छा आबा का दन दया करे। थूँ भी हव तरिया जाणे हे के, वणी इपिसुस में मारा वाते कई-कई किदो हो?

Jump to: Chapter 2 →