2 Timothy 4

mewari

← Chapter 3 Jump to:

1ईसू मसी राजा का रूप में आई अन हाराई जीवता अन मरिया तका को न्याव करी, वाँने अन परमेसर ने गवा मानन मूँ थने आदेस दूँ हूँ के,

2परमेसर का हव हमच्यार को परच्यार कर, पलई ईंने हाराई मनक ने माने, पण ईंका केड़े भी थूँ ईंने पूरा मनऊँ करतो रे। थूँ लोगाँ ने सई कर अन वाँका पापाँ को वाँने ध्यान करान चेता। हातेई हाते वाँने उदास मती वेबा दे, वाँने सला देती दाण हमेस्यान धीरज राकज्ये।

3अस्यान को टेम आरियो हे जद्याँ मनक हव हिक ने, ने हूणी, पण ईंकी अलावा वीं आपणाँ वाते अस्यान का हिकाबावाळा होद लेई, जीं वाँने वीं बाताँइस हिकाई जस्यी हूणणी वाँने हव लागे हे।

4वीं हाँचऊँ छेटी वे जाई अन बना मतलब की बाताँ पे ध्यान लगाई।

5थूँ सान्तीऊँ टक्यो तको रेज्ये अन दुक भोगबा का वाते त्यार रे। हव हमच्यार को परच्यार करबा का वाते घणी मेनत कर अन थाँरी जिमेदारी ने हव तरियाऊँ पुरी करज्ये।

6मूँ मारो यो जीवन परमेसर की सेवा करबा का वाते दे चुक्यो हूँ। ओ वो टेम हे जद्याँ मने यो सरीर छोड़णो पड़ी।

7मूँ हव तरियाऊँ लड़्यो, में मारी दोड़ पुरी करी लिदी हे अन मूँ विस्वास जोगो रियो।

8अन अबे वटे परमेसर का हाते जीत को ईनाम मारी वाट नाळरियो हे, जिंने धरमी अन खरा न्याव करबावाळा परबू आकरी दन में मने देई। मने एकला नेईस ने, पण वाँ हाराई ने भी ज्यो परेम का हाते वींके परगट वेबा की वाट नाळे हे।

9थूँ जट मारा नके आबा की कोसीस कर,

10काँके देमास तो ईं दनियादारी का मो-माया में पड़न मने छोड़न थिस्सुलुनिक्यों नगर परोग्यो हे। क्रेसकेस गलातिया नगर में अन तीतूस दलमतिया नगर में परोग्यो हे।

11मारा हाते बेस लुकोइस रिया हे। काम में तो मरकुस जोरदार खिलाड़ी हे। वे सके तो, वींने थाँरा हाते लेतो आज्ये, ताँके मारे काम में मने जेलो देवे।

12तुखिकुस ने में इपिसुस नगर खन्दायो हे।

13जद्याँ थूँ आवे तो त्रोआस का रेबावाळा करपुस का घरेऊँ मारो कोट, पोत्याँ अन चामड़ा का पतर ने तो खास तरियाऊँ आद राकन लेतो आज्ये।

14धातु को काम करबावाळे सिकन्दर मने घणो दुक दिदो हे। परबू वींकी करणी के जस्यान वींने फळ देवे।

15थूँ भी वणीऊँ हमळन रेज्ये, काँके वो आपाँ ज्यो हमच्यार हूणावाँ हाँ, वींको घणो विरोद करे हे।

16पेलकी दाण कोरट में मारा बचाव में मारी मदत कणी ने किदी, पण हाराई का हाराई मने छोड़ दिदो, भलो वे के, परमेसर वणाऊँ ईंको हस्याब ने लेवे।

17पण परमेसर मारा हाते ऊबारियो अन मने तागत दिदी, जणीऊँ तो मूँ ज्यो यहूदी ने हा, वणा हाराई में हव हमच्यार हुणा सक्यो अन मूँ मोत का दण्डऊँ बंचायो ग्यो।

18अन परबू मने हारी बुरी बाताँऊँ बंचाई अन बंचान हरग में लेजाई। वाँकी मेमा जुग-जुग वेती रेवे! आमीन।

19प्रिसकिल्‍ला, अक्‍विला अन उनेसिफुरस का घराणा ने मारे राजी-खुसी को नमस्कार केज्ये।

20इरास्तुस कुरिन्तुस नगर में रेग्यो, अन त्रुफिमुस ने, में मांदकी की वजेऊँ मिलेतुस गाम मेंईस छोड़ दिदो।

21हियाळाऊँ पेल्याँ-पेल्याँ आबा की पुरी-पुरी कोसीस करज्ये। युबुलुस, पदेस, लिनुस, कलोदिया अन हाराई विस्वास्याँ थने राजी-खुसी को नमस्कार क्यो हे।

22परबू थाँरी आत्मा का हाते रेवे। थाँ हाराई पे परमेसर की करपा बणी तकी रेवे।

← Chapter 3 Jump to: