2 Timothy 2

mewari

← Chapter 1 Jump to: Chapter 3 →

1परबू में मारा बेटा तिमुतियुस, ईसू मसी में परमेसर जस्यी दया थाँरा पे दिकई हे, वींके जस्यान पाको बण्यो तको रे।

2परमेसर को परच्यार करती दाण नरई गवा की मोजुदगी में, जीं बाताँ थें माराऊँ हिकी हे, वाँने विस्वास जोगा मनकाँ ने हूँप दे, जीं दूजाँ ने हिकाबा को मन राकता वेवे।

3ईसू मसी का वफादार सपई के, जस्यान ईं दुक में मारी लारे रे।

4एक सपई जद्याँ आपणाँ काम में लाग्यो तको रेवे हे, तो वो आपणाँऊँ ऊपरे का अदिकारी ने आपणाँ कामऊँ राजी राकणो छावे हे अन ईं वजेऊँ वो खुद ने दनियादारी का कामाँ में ने नाके हे।

5अन अस्यानीस कुस्ति को पेलवान बना नेमा का जस्यान दाव-पेंचऊँ लड़े, तो वो ईनाम ने जीत सके हे।

6मेनत करबावाळा करसाण नेईस हाराऊँ पेल्याँ हाक को फळ मलणो छावे।

7ज्यो कई मूँ बोलूँ हूँ वींपे चेतो लगा, अन परबू थने हारी बाताँ ने हमजबा की अकल देई।

8जस्यान हव हमच्यार में हिकाया ग्यो हे, मूँ वस्यानीस परच्यार करूँ हूँ के, दाऊद का घराणा का ईसू मसी, जीं मरिया तका मेंऊँ जी उट्या, वींपे थाँरो मन लागे।

9अन ईं हव हमच्यार ने परच्यार करबा की वजेऊँ मूँ दुक जेलरियो हूँ अन एक गुनेगार के, जस्यान हाँकळा में बन्दयो तको हूँ, पण परमेसर का बचना पे कुई बन्धन कोयने हे।

10अणीऊँ मूँ चुण्या तका मनकाँ का वाते हारोई जेलूँ हूँ जणीऊँ वीं भी उदार ने ज्यो ईसू मसी में हे, अन वींका हाते कदी ने खतम वेबावाळा मेमा ने पा सके।

11आ हाँची बात हे, “यद्याँ आपाँ वींके हाते मरिया हाँ, तो वींके हाते पाच्छा जीवा भी।

12जद्याँ आपाँ धीरज का हाते दुक जेलरिया, तो आपाँ वींके हाते राज भी कराँ। यद्याँ आपाँ वींका आड़ीऊँ मुण्डो फेर लेवा, तो वीं भी आपाऊँ मुण्डो फेर लेई।

13यद्याँ आपाँ विस्वासी ने वेवा, तो भी वीं विस्वास का जोगो बण्या तका रेवे हे, काँके वीं खुदई ने फर सके हे।”

14थाँरा मनकाँ ने, ईं बाताँ आद अवाड़ अन परमेसर का हामे चेतान केज्ये के, फोगट की बाताँ पे ने लड़े। अस्यान करणो हव ने हे, काँके वीं बाताँ हूणबावाळा का वाते नास की जड़ हे।

15परमेसर की देकणी में खुद ने मेनत करबावाळो अस्यान को मनक बणा, जणीऊँ थने आपणाँ कामऊँ हरमा ने मरणो पड़े, पण परमेसर का हाँच का हमच्यार ने सई तरियाऊँ हिका।

16मनकाँ ने परमेसरऊँ छेटी लेजाबा वाळी दनियादारी अन फोगटपणा की बाताँऊँ छेटी रे।

17अस्यी बाताँ खुला घाव का जस्यान फेले हे, हुमिनयुस अन फिलेतुस अस्याईस हाँ।

18वणा अस्यान केन हाँच को गेलो छोड़ दिदो के, आपणाँ ने पाछो जीवन पेल्याँई मलग्यो हे, नरई विस्वास्याँ का विस्वास को नास कर देवे हे।

19पण परमेसर की पाकी नीम हाले कोयने, जिंपे आ छाप लागरी हे के, “परबू आपणाँ मनकाँ ने जाणे हे,” अन, “ज्यो कुई परबू को नाम लेवे हे, वींने बुरा कामऊँ बच्यो तको रेणो छावे।”

20एक मोटा घर में हरेक तरियाँ का ठामड़ा वेवे हे, कुई टिंढका अन चिकणा गारा का बण्या तका, कुई होना अन चाँदी का, कुई खास मोको का वाते अन कुई घर में रोज काम में लेबा का वाते वेवे हे।

21ज्यो खुद ने आ हारी बुरी बाताँऊँ छेटी राकी, तो वो खास काम में काम आई, काँके वणी आपणाँ खुदाखुद ने आपणाँ मालिक परमेसर का वाते दे दिदो हे, जणीऊँ वो हरेक भला काम का वाते त्यार किदो तको वेई।

22जवानी की बुरी मरजीऊँ छेटी रे अन ज्यो खरा मनऊँ परबू को नाम लेवे हे वाँका हाते खुद ने धरम, विस्वास, परेम अन सान्तीऊँ रे।

23फोगट अन बना मतलब की बाताँऊँ खुद ने छेटी राक, काँके थूँ खुद जाणे हे के, अणाऊँ लड़ई-जगड़ा वेवे हे।

24परमेसर को दास लड़बावाळो ने, पण हाराई पे दया दिकाबावाळो, धीरज राकबावाळो अन हिक देबा जोगो वेणो छावे।

25अन ज्यो विरोद करे वाँने नरमाईऊँ हमजबा वाळो वेणो छावे, कई पतो, परमेसर वाँने भी आपणी गलती मानन मापी माँगबा को मन दे देवे अन वीं भी हाँच जाण जावे।

26अन वीं चेतो लगान, सेतान का जाळऊँ बंच जावे, ज्यो वाँने आपणी मरजी मानबा का वाते पकड़न राके हे।

← Chapter 1 Jump to: Chapter 3 →