2 Timothy 3

mewari

← Chapter 2 Jump to: Chapter 4 →

1ओ ध्यान राको, आकरी का दनाँ में आपणाँ पे घणो अबको टेम आई।

2काँके मनक मतलबी, लोबी, मेपणा करबावाळा, फाकलेट अन बेजत करबावाळा, आपणाँ बई-बापू को क्यो ने करबावाळा, दया ने करबावाळा, अधरमी वेई।

3वाँका हरदा में ने तो परेम-भाव, ने दया-धरम वेई, वीं दूजाँ की बुरई करबावाळा, लड़ई करबावाळा, कल्डा मन का अन भलईऊँ दसमणी राकबावाळा वेई।

4वीं धोको देबावाळा, बेपरवा, मरोड़ में रेबावाळा, परमेसर की परेमी वेबा का बजाय मोज-मस्तीऊँ परेम करबावाळा वेई।

5वीं धरमीपणा को दिकावो तो करी, पण परमेसर की तागत ने ने मानी। अस्यान हिकबावाळा मनकाँऊँ खुद ने छेटी राक।

6वाँका मूँ थोड़ाक हिकबावाळा मनक लोगाँ का घरे में जान कमजोर लुगायाँ ने आपणाँ बंस में करी, ज्यो आपणाँ बुरा कामाँ में अन पाप की मरजी में फंसी तकी रेई,

7ईं लुगायाँ हमेस्यान वणा हिकबावाळाऊँ हिकणो तो छाई, पण हाँच कई हे, ईंने ने जाण पाई।

8ईं हिकबावाळा यन्नेस अन यमब्रेस का जस्यान हे, जणा मूसा को विरोद किदो हो, वस्यानीस ईं मनक हाँच को विरोद करी, ईं अस्यान का मनक हे जणाकी अकल मरगी हे अन ईं विस्वास में ने बण्या रे सकी।

9पण अबे वीं ओरी हेला ने पनप सकी, काँके जस्यान यन्नेस अन यमब्रेस की वेडी अकल हाराई का हामे अई वस्यानीस अणाकी भी आई।

10पण थूँ मारी हिक, वेवार, अन जीवन का वाते मारा मकसद ने माने हे, थूँ मारो विस्वास, मारो धीरज, मारो परेम, मारी सेण करबा की तागत, मारा पे व्या जुलम, अन मारा दुक में मारे हाते रियो हे। अन्ताक्या, इकुनियम अन लुस्त्रा में ज्यो कई व्यो हो अन कई-कई दक-भरिया जुलम ने सेण किदा हाँ, वाँमें भी थूँ मारे हाते हो। पण परबू मने वणा हाराईऊँ बंचायो हो।

12ज्यो भी मनक ईसू मसी का गट-जोड़ में खरो जीवन जीवणो छावे हे, तो वींने दुक देकणो पड़े हे।

13अन बुरा अन धोको देबावाळा मनक धोको देता अन खुद धोको खाता तका हेलाऊँ हेला बुरा वेता तका परा जाई।

14पण थूँ वणा बाताँ पे ज्यो थें हिकी हे अन ज्याँका बारा में थने पको विस्वास हे। ओ जाणन के, थने वीं बाताँ हिकाबावाळा कूण हाँ, वणामें बण्यो तको रे।

15अन बाळकपणाऊँ थूँ तो पुवितर सास्तर ने जाणे हे ज्यो ईसू मसी में विस्वास का आड़ीऊँ थने मुगती पाबा का वाते अकल दे सके हे।

16हारोई पुवितर सास्तर परमेसर की आत्मा की तागतऊँ लिक्यो ग्यो हे, ज्यो हाँच की, गलती पे फटकार की, हूदारबा की, अन सई तरियाऊँ जीवन जीववा की हिक देवे हे।

17अणीऊँ परमेसर को भगत हाराई भला काम करबा वाते ताकड़े अन त्यार रेवे।

← Chapter 2 Jump to: Chapter 4 →