Acts 13

mewari

1अन्ताक्या का विस्वास्याँ की मण्डली में परमेसर का आड़ीऊँ बोलबावाळा अन हिकाबावाळा हा, बरनबास अन समोन जो नीगर केवावे हे, अन कुरेन को लुकियुस, देस का चोता हिस्सा को राजपाल हेरोदेस की लारे पळ्या-बड़्या मनाएन अन साउल जस्या नरई हिकाबावाळा हा।

2वे जद्याँ वरत करता तका परबू की मेमा कररिया हा, तद्याँई पुवितर आत्मा क्यो, “बरनबास अन साउल ने जीं काम के वाते में बलाया हा, वीं काम के वाते वाँने न्यारा कर दो।”

3जद्याँ वे वरत अन परातना करन बरनबास अन साउल पे आपणो हात मेल्यो अन वाँने हिक दे दिदी।

4पुवितर आत्माऊँ खन्दान बरनबास अन साउल सलुक्या ग्या, वटूँ नाव में बेटन वे साइपरस नाम का टापू पे पूगा।

5अन वे सलमीस नगर पूगा, तो वाँकाणी यहूदियाँ की परातना घर में परमेसर का बचनाँ को परच्यार किदो। मरकुस नाम को यहुन्नो वाँकी सायता करबा वाते वाँकी लारे हो।

6वीं आकई टापू की जातरा करता तका वीं पाल्ड़े का पापुस तईं जा पूगा। वटे वाँने बारईसू नाम को एक यहूदी जादूगर अन जूटो परमेसर का आड़ीऊँ बोलबावाळो मल्यो।

7वो घणा हूँस्यार राजपाल हरग्युस पोलुस को हण्डाळी हो। हरग्युस पोलुस परमेसर को बचन हुणबा के वाते बरनबास अन साउल ने पाच्छा बलाया हा।

8पण अलीमास जादूगर, जिंको युनानी नाम बारईसू हो, वणी वाँको विरोद किदो। वीं टापू के राजपाल को विस्वास तोड़बा के वाते जोर दिदो।

9पछे साउल जिंको दूजो नाम पोलुस हो। वो पुवितर आत्माऊँ भरन, अलीमास के हामे ताकते तके क्यो,

10“हे हंगळा छळ-कपटऊँ भरिया तका सेतान का पूत, थूँ हारी तरिया की भलई को दसमण, कई थूँ परबू का हव गेला ने बगाड़णो ने छोड़ी?

11अबे देक परबू को हात थाँरा दयने आरियो हे। थूँ आन्दो वे जाई अन थोड़ाक दनाँ तईं दन को उजितो भी ने देक सेकी।” तरत वींने धुधळो दिकबा लागो अन अन्दारो पड़ग्यो, वो अटने-वटने हात लाम्बो करबा लागो के, कुई वींको हात पकड़न वींने चलावे।

12जद्याँ टापू के राजपाल ओ सब देक्यो, तो वो परबू पे भरोसो करबा लागो अन परबू का वसना की हिकईऊँ घणो अचम्बो व्यो।

13पछे पोलुस अन वींका हण्डाळी पापुसऊँ नाव में बेटन पफुलिया का पिरगा में आ पूग्या। पण यहुन्नो जिंको नाम मरकुस हो, वाँने वटेई छोड़न यरूसलेम परोग्यो।

14वटने वे आपणी जातरा करता तका पिरगाऊँ पिसदिया का अन्ताक्या में आ पूगा। पछे सबत के दन यहूदी परातना घर में जान बेटग्या।

15मूसा की वेवस्ता का नेम अन परमेसर का आड़ीऊँ बोलबावाळा की पोत्याँ का पाट भणन यहूदी परातना घर का अदिकारी वाँका नके अस्यान पूँछबा खन्दाया के, “ओ भई-लोगाँ, थाँका नके धिजो बन्दाबा के वाते ओरी बचन वेवे, तो हुणावो।”

16ईं बात पे पोलुस ऊबो व्यो अन हातऊँ हानी करतो तको केबा लागो, ओ इजराएल का अन परमेसरऊँ दरपबावाळा लोगाँ हुणो।

17“इजराएल का लोगाँ के परमेसर आपणाँ पूरबजाँ ने थरप्या अन जद्याँ आपणाँ लोग मिसर देस में रूक्या तका हा, तो वाँकाणी वाँने मान बणाया अन वे आपणी सगतिऊँ वाँने मिसरऊँ बारणे लाया हा।

18अन पछे चाळी सालाँ तईं वो हुन्ना काँकड़ में वाँने सेण करतो रियो।

19अन कनान देस का हात राज ने खतम करन वणी वा जगाँ इजराएल का लोगाँ ने बापोती का रूप में दे दिदी।

20ईं हारई काम में लगे-भगे हाडा च्यारसे वर लागा। ईंका केड़े परमेसर का आड़ीऊँ बोलबावाळा समुएल की टेम तईं वाँने नरई न्याव करबावाळा दिदा हा।

21पछे वाँकाणी एक राजो माँग्यो, तो परमेसर वाँने बिन्यामीन की गोत का कीस का छोरा साउल ने चाळी सालाँ तईं राजो बणायो।

22पछे साउल ने हटान दाऊद ने वाँको राजो बणायो, जिंका बारा परमेसर अस्यान क्यो हो के, में ईसे का पूत दाऊद ने देक्यो हे के, वो एक अस्यो मनक जो मारा मन का जस्यान हे। मूँ जो कई भी छावूँ, हारोई वो केरी।

23अणीस मनक का बंसऊँ आपणो बचन पूरो करबा के वाते परमेसर इजराएल का लोगाँ ने बंचाबावाळा ईसू ने खन्दायो।

24ईसू का आबाऊँ पेल्याँ यहुन्नो इजराएल का मनकाँ ने मन बदलन बतिस्मो लेबा को परच्यार करतो हो।

25यहुन्नो जद्याँ आपणो काम पूरो करबा में हो, तो वणी क्यो, ‘जस्यान थें मारा बारा में होचरया हो वस्यान मूँ ने हूँ। पण, एक अस्यो मनक मारा केड़े आरियो हे, मूँ जिंकी पगरख्याँ का कसणा खोलबा के जोगो भी कोयने हूँ।’”

26ईं वाते भई-लोगाँ, अबराम की ओलादाँ अन थाँकामूँ परमेसरऊँ दरपबावाळा लोगाँ, बंचाबावाळो ओ सन्देसो आपणाँ वातेई खन्दायो ग्यो हे।

27यरूसलेम में रेबावाळा अन वाँका अदिकारियाँ भी ईसू ने कोयने ओळक्यो अन सबद का हरेक दन हुणाता तका परमेसर का आड़ीऊँ बोलबावाळा का बचन ने कोयने हमज्या, पण ईसू पे दोस लगान वाँ वसना ने पूरा किदा।

28अन जद्याँ वींने मारबा के वाते कई मोको ने मल्यो, तुई वाँकाणी पिलातुसऊँ वींने मारबा के वाते क्यो।

29ईसू वाते जो भी सास्तर में लिक्यो हो, वो हारोई वणा पूरो कर नाक्यो हो, तो वाँकाणी वींने हूळीऊँ उतारन कबर में मेल दिदो।

30पण, परमेसर वींने मरिया केड़े पाछो जीवतो कर दिदो हो।

31अन पछे जो भी मनक गलीलऊँ यरूसलेम तईं वींकी लारे आया हा, वाँका हामे वो नरई दनाँ तईं परगट व्यो। वीं अबे मनकाँ में वींकी गवई हे।

32माँ अटे वो हव हमच्यार लाया हा जिंका बारा में परमेसर आपणाँ बड़ाबाऊँ वादो किदो हो,

33जो आपीं आपणाँ पूरबजाँ का बंस का हा, आपणाँ वाते परमेसर पूरो किदो हे। जस्यान के, भजनाँ की किताब का दूजाँ पाट में लिक्यो हे, “थूँ मारो बेटो हे, आजइस मूँ थारो बापू बण्यो हूँ।”

34अन परमेसर वींने मरयाँ तकाऊँ जीवतो किदो, ताँके वींकी देह कदी हड़े कोयने। ईंका बारा में परमेसर अस्यान क्यो हो, “मूँ थने पुवितर वरदान देवूँ, जिंको में दाऊदऊँ वादो किदो हो।”

35अस्यानीस वणी एक ओरी भजन में क्यो हे, “थूँ आपणाँ वीं धरमी मनक ने हड़बा ने देई।”

36पछे दाऊद आपणाँ जुग में परमेसर के वाते आपणो काम पूरो करन मरग्यो अन वींने वटेईस गाड़्यो जटे वींका बड़ाबा ने गाड़्या हा, वींकी लास हड़गी,

37पण जणी ने परमेसर मरिया तकाऊँ पाछो जीवतो किदो, वींकी लास कदी ने हड़ी।

38ईं वाते ओ भायाँ, थाँकाणी जाणणो छावे के, बेस ईसुऊँइस थाँका वाते हाराई पापाँ की मापी घोसित वीं हे अन जो कुई भी विस्वास करी वो परमेसर का हामे सई मान्यो जाई, अस्यान मूसा का नेम कदी ने कर सके।

40ईं वाते अबे हेंचेत रेवो, कटेई परमेसर का आड़ीऊँ बोलबावाळा जो क्यो हो, वो थाँका हाते ने वे जावे,

41“‘रोळ करबावाळा देको, अचम्बा में आन मर जावो, काँके थाँका जुग में एक अस्यो काम करूँ, जिंने कुई थाँने हमजाई तुई थें विस्वास ने करो।’”

42पोलुस अन बरनबास जद्याँ वटूँ जारिया हा, तो लोगाँ वाँने आगला सबत के दन अस्यी बाताँ ओरी केबा के वाते क्यो।

43जद्याँ सबा खतम व्यी, तो नरई यहूदी अन यहूदी धरम ने मान लिदा तका लोग भी पोलुस अन बरनबास का पाच्छे वेग्या। पोलुस अन बरनबास वाँकाऊँ बाताँ करता तका लोगाँ ने मनारिया हा के, वे परमेसर की करपा में बण्या रेवे।

44आगले सबत के दन तो हारई नगर का मनक परमेसर का बचन हुणबा के वाते भेळा वेग्या।

45जद्याँ यहूदियाँ आ मनकाँ की भीड़ देकी, तो वे रिस्याँ बळता तका पोलुस जो भी क्यो हो, वींको विरोद करबा लागा अन खोट्याँ खाबा लागा।

46पण पोलुस अन बरनबास बनाई दरप्या क्यो, “ओ जरूरी हे के, परमेसर का बचन सबऊँ पेल्याँ थाँने हूणावाँ, पण थाँकाणी वाँने नकारता तका खुद ने अमर जीवन जीबा के जोगा ने हमज्या। ईं वाते माँ अबे यहूदियाँ ने छोड़न जो यहूदी ने हे वाँका नके जारिया हा।

47काँके परबू माँने ओ आदेस दिदो के, “‘में थाँने जो यहूदी ने हे, वाँके वाते उजितो बणायो, ताँके वीं बंचाया जाई, धरती का ईं खुणाऊँ वीं खुणा तईं।’”

48वाँ लोगाँ जो यहूदी ने हे जद्याँ ओ हुण्यो, तो वे घणा राजी व्या अन परमेसर का वसना को मान किदो अन जणा अमर जीवन जीबा ने चुण्यो वणा विस्वास किदो।

49अस्यान वटे हारी जगाँ परबू का बचन फेलग्या।

50तो वटने यहूदियाँ, जानी-मानी लुगायाँ जणी यहूदी धरम ने मान लिदो हो अन नगर का मुक्या ने उकसाया, तो वे पोलुस अन बरनबास पे अन्याव करन हताबा लागा अन दरपाता तका जोरावरीऊँ वाँने आपणाँ अटूँ बारणे निकाळ दिदा।

51पछे पोलुस अन बरनबास वाँका विरोद में आपणाँ पगाँ को धूळो जाटकन इकुनियम पराग्या।

52पण, विस्वासी लोग राजी वेता तका पुवितर आत्माऊँ भरग्या।

← Chapter 12 Jump to: Chapter 14 →