Acts 3

mewari

← Chapter 2 Jump to: Chapter 4 →

1दपराँ केड़े तीनेक बज्या परातना की टेम पे पतरस अन यहुन्नो मन्दर में जारिया हा।

2वाँ दनाँ में वटे एक जनमऊँ लंगड़ो मनक हो, जिंने लोग हरेक दन तोकन ले जाता हा अन मन्दर का सुन्दर नाम का बाणा पे बेटा देता हा, ताँके वो मन्दर में जाबावाळा लोगाऊँ भीक माँग सके।

3वणी लंगड़े मनक जद्याँ ओ देक्यो के, यहुन्नो अन पतरस मन्दर में जाबाई वाळा हे, तो वणी वाँकाऊँ भीक माँगी।

4यहुन्ना की लारे-लारे पतरस भी वाँका दयने देकतो तको बोल्यो, “माकाँ दयने देक।”

5तो वणी भिकारी वाँका नकूँ कई मलबा की आसऊँ वाँका आड़ी देक्यो।

6पण, पतरस क्यो, “मारा नके थने देबा वाते कई ने हे, पण जो भी मारा नके हे, वो मूँ थने देरियो हूँ। ईसू मसी नासरी का नामऊँ उठ अन चाल।”

7पछे पतरस वींको जीमणो हात पकड़न ऊबो किदो। तो पगई वींका पगाँ अन गोडा में जीव आग्यो।

8अन वो फदकन ऊबो वेग्या अन चालबा लागो। ओ उछळ्तो, चालतो अन परमेसर की बड़ई करतो तको वाँकी लारे मन्दर में ग्यो।

9हारई लोगाँ वींने चालतो तको अन परमेसर की बड़ई करतो तको देक्यो।

10लोग-बागाँ वींने ओळक लिदो के, ओ तो वोईस मनक हे, जो मन्दर का सुन्दर नाम का बाना पे बेटन भीक मांगतो हो। वींका पे जा करपा व्यी, वीं बात पे वे अचम्बा अन हक्का-बक्का रेग्या।

11वो मनक आलतरे पतरस अन यहुन्ना की लारे हो। ईं वाते हारई लोग-बाग अचम्बा में आन सुलेमान का बरामदा तईं वींका लारे दोड़ता तका नके आया।

12जद्याँ पतरस ओ देक्यो, तो वो लोग-बागाँ ने केबा लागो, “ओ इजराएल का लोग-बागाँ, थाँ ईं बात पे अचम्बा में काँ आरिया हो? अन अस्यान घूर-घूरन माकाँ दयने काँ ताकरिया हो, जस्यान के माँ ईं मनक ने आपणी तागत अन भगतीऊँ चालतो-फरतो किदो हे?

13अबराम, इसाक अन याकूब का परमेसर, आपणाँ बड़ाबा का परमेसर आपणाँ सेवक ईसू की मेमा किदी। थाँकाणी वींने मराबा के वाते पकड़वा दिदो अन पछे पिलातुस वींने छोड़बा की बात ठाणी, तो थाँ लोगाँ पिलातुस के हामे भी वींने नकार दिदो।

14थाँ लोगाँ वीं धरमी अन नेकवान मनक ने नकार दिदो अन थाँका वाते एक हत्यारा की माँग किदी।

15थाँ जीवनदाता ने मरवा नाक्यो, पण परमेसर वींने मरिया तका मूँ पाछो जीवतो कर दिदो, माँ ईं बात का गुवा हा।

16काँके ईसू का नाम पे विस्वास करबा का मसऊँ यो मनक ताकड़े वेग्यो, जिंने थाँ देकरिया हो अन जाणो हो। हाँ, ईं मनक का विस्वासऊँ यो मनक थाँका हामे पुरी तरियाँ हव व्यो हे।”

17हो भई-लोगाँ, मने नंगे हे के, थाँ अन थाँका नेता ईसू के विरोद में जो कई भी किदो हे वो अणजाण में किदो,

18परमेसर आपणाँ आड़ीऊँ बोलबावाळा का मुण्डाऊँ ओ पेल्याँई क्यो के, मसी ने दुक जेळणो पेड़ी अन परमेसर ईं काम ने अस्यानीस पूरो किदो।

19ईं वाते थाँ आपणो मन बदलो अन परमेसर का दयने आ जावो, ताँके परमेसर थाँका पापाँ ने माप करे

20तद्याँ थाँका जीवन में परमेसर की मोजुदगीऊँ संतोक को टेम आई अन परबू थाँका वाते ईसू मसी ने खन्दाई, जो पेल्याई थाँका वाते थरप्यो ग्यो हे।

21मसी ने वीं दाण तईं हरग में रेणो पेड़ी, जतरे वीं हारी बाताँ परमेसर पेल्याँ के जस्यान कोयने कर दे, जिंका बारा में नरई पेल्याँ परमेसर आपणाँ आड़ीऊँ बोलबावाळा पुवितर मनकाँ का मुण्डाऊँ बतायो हो।

22काँके मूसे आपणाँ बड़ाबाऊँ क्यो हो, परमेसर थाँका वाते थाँ लोगाँमूईस एक मारे जस्यो परमेसर का आड़ीऊँ बोलबावाळा ने ऊबो केरी। वो थाँने जो भी केवे, थाँ वा बात मानन चालज्यो।

23अन जो भी परमेसर का आड़ीऊँ बोलबावाळा की बाताँ ने, ने हूणी, तो वींने परमेसर का लोगाँ मूँ बारणे काड़ देई।

24हाँ, समुएल अन वींका केड़े आया हारई परमेसर का आड़ीऊँ बोलबावाळा, जद्याँ भी कई क्यो तो वणा ईं दनाँ का बारा मेंईस क्यो हो।

25अन थाँ तो वाँ परमेसर का वादो जो परमेसर का आड़ीऊँ बोलबावाळा किदो अन वीं करार का वारिस हो, जो परमेसर थाँका बड़ाबा का लारे किदो हो। वणी अबरामऊँ क्यो हो, “थारी ओलादाँऊँ धरती का लोग आसीस पाई।”

26परमेसर जद्याँ आपणाँ दास ईसू ने चुण्यो अन सबाऊँ पेल्याँ वींने थाँका नके खन्दायो, ताँके थाँने खराब गेलाऊँ थाँको मन बदलन आसीस देवे।

← Chapter 2 Jump to: Chapter 4 →