John 18

mewari

1ईसू या परातना करिया केड़े आपणाँ चेला की लारे किद्रोन वाळा के पार ग्या। वटे एक बाग हो। जिंमें वीं अन वाँका चेला ग्या।

2वाँने धोकाऊँ पकड़बावाळो यहूदो भी वाँ जगाँ जाणतो हो। काँके ईसू नरी दाण आपणाँ चेला की लारे वटे जाया करता हा।

3तद्याँ यहूदो रोमी सेना का एक दल ने अन मुक्य याजकाँ अन फरीसियाँ की आड़ीऊँ मन्दर का चोकीदाराँ ने लेन वटे आयो। अन वाँका हाताँ में मसाळ, लालटेन अन हत्यार हा।

4तद्याँ ईसू वणा हारी बाताँ ने ज्यो वींपे आबावाळी ही जाणन आगे आयो अन वाँने क्यो, “थाँ किंने होदरिया हो?”

5वाँकाणी वाँने क्यो, “नासरत का ईसू ने।” ईसू वाँकाऊँ क्यो, “मूँ वोईस हूँ।” वाँने धोकाऊँ पकड़वाबावाळो यहूदो भी वाँकी लारे ऊबो हो।

6जद्याँ ईसू ओ क्यो के, “मूँ वोईस हूँ,” तो वीं तरत पाच्छे हरक्याँ अन रेटे पड़ग्या।

7तद्याँ ईसू वाँने पाछो पूँछ्यो, “थाँ किंने होदरिया हो?” वणा क्यो, “नासरत का ईसू ने।”

8ईसू वाँने जबाव दिदो, “मूँ तो थाँने के चुक्यो हूँ के, मूँ वोईस हूँ। यद्याँ मनेइस होदरिया हो तो अणाने जाबा दो।”

9ओ वणा ईं वाते क्यो, ताँके वो बचन पूरो वेवे ज्यो वणा क्यो हो, “ज्याँने थाँ मने दिदा हे वाँका मूँ एक ने भी ने खुवावे।”

10तद्याँ समोन पतरस तरवार ज्या वींका नके ही ताणी अन मायाजक का दास को जीमणो कान्दड़ो काट दिदो। वीं दास को नाम मलकुस हो।

11पण ईसू पतरस ने क्यो, “आपणी तरवार म्यान में राक। ज्यो दुक को प्यालो मारा बापू मने दिदो हे, कई मूँ वींमूँ ने पीवूँ?”

12तद्याँ रोमी सपायाँ अन वाँका सूबेदार अन यहूदियाँ का मन्दर का चोकीदार ईसू ने पकड़ लिदा अन बाँदन,

13पेल्याँ वींने हन्ना का नके लेग्या। काँके हन्ना वीं वर का मायाजक केफा को होरो हो।

14ओ वोईस केफा हो, जणी यहूदियाँ अदिकारियाँ ने सला दिदी ही के, हाराई मनकाँ के मरबा बजे एक मनक को मरणो हव हे।

15समोन पतरस अन एक दूजो चेलो भी ईसू का पाच्छे आया। ओ दूजो चेलो मोटा याजक के जान-पेचाणवाळो हो। ईं वाते वो ईसू की लारे मोटा याजकाँ का आगंणा में परोग्यो।

16पण पतरस बारणे बाणा पे ऊबो रियो। तद्याँ वो दूजो चेलो ज्यो मोटा याजक की पेचाणवाळो हो, बारणे आयो अन चोकीदारणीऊँ केन पतरस ने मयने लेग्यो।

17वटे एक दासी ज्या चोकीदारणी ही। वणी पतरसऊँ क्यो, “कई थूँ भी तो ईं मनक का चेला मयनूँ एक ने हे?” वणी क्यो, “ने, ने मूँ कोयने हूँ।”

18दास अन चोकीदार ठन्डऊँ बंचबा के वाते धूणी लगान तापरिया हा अन पतरस भी वाँका हाते ऊबो वेन तापरियो हो।

19तद्याँ मोटे याजक ईसुऊँ वाँका चेला का बारा में अन वाँकी हिक का बारा में पूँछ्यो।

20ईसू वाँने क्यो, “में हाराऊँ खुलन बाताँ किदी। में परातना घर अन मन्दर में, जटे हारई मनक भेळा व्या करता हा। वटे हरदाण हिक दिदी अन छाने कई भी ने क्यो।

21पछे थूँ माराऊँ कई पूछे हे? हुणबावाळाऊँ पुछ के, में वाँकाऊँ कई क्यो। वीं जाणे हे के, में कई-कई क्यो।”

22जद्याँ ईसू अस्यान क्यो तो मन्दर को एक चोकीदार ईसू का नकेईस ऊबो हो वणी ईसू के छापट मारन क्यो, “कई मोटा याजक ने जवाब ईं तरिया देवे हे?”

23ईसू वींने जबाव दिदो, “यद्याँ में गलत क्यो, तो हाराई का हामे साबत कर। अन यद्याँ में सई क्यो हे तो मारे काँ ठोकी?”

24तद्याँ हन्ना ईसू ने बन्दयो तकोईस मोटा याजक केफा का नके खन्दा दिदो।

25समोन पतरस ऊबो तको तापरियो हो। तद्याँ कणी वींने क्यो, “कई थूँ भी तो ईंका चेला मूँ एक हे?” पण पतरस नटग्यो अन क्यो, “ने मूँ ने हूँ।”

26मोटा याजक का दासाँ मूँ एक ज्यो वींका परवार को हो। जिंको पतरस कान्दड़ो काट नाक्यो हो वणी क्यो, “कई में थने ईंका हाते बाग में ने देक्यो हो?”

27पतरस पाछो एक दाण ओरी नटग्यो अन तरत कूकड़ो बोल ग्यो।

28तद्याँ वीं ईसू ने केफा का नकेऊँ रोमी राजपाल का दरबार में लेग्या अन भाग-फाट्याँ को टेम हो, पण यहूदी अदिकारी ज्यो वींने लेग्या हाँ वीं खुद दरबार मयने ने ग्या, ताँके असुद ने वेवे, पण फसे का तेवार को खाणो खा सके।

29तद्याँ पिलातुस वाँका नके बारणे आयो अन क्यो, “थाँ अणी मनक पे किंको दोस लगावो हो?”

30वाँकाणी वींने जवाब दिदो, “यद्याँ यो अपरादी ने वेतो तो माँ ईंने थाँरा हाताँ में ने हूँपता।”

31पिलातुस वाँने क्यो, “थाँ ईंने ले जावो अन आपणाँ नेमा के हस्याबूऊँ न्याव करो।” यहूदी लोगाँ वींने क्यो, “माँने यो हक ने हे के, किंने मोत को दण्ड देवा।”

32यो ईं वाते व्यो के, ईसू की वाँ बात पुरी वेवे ज्याँ वणा आपणी मोत का बारा क्यो हो के, वींकी मोत कस्यान वेई।

33तद्याँ पिलातुस पाछो दरबार में ग्यो अन ईसू ने बलान वणीऊँ पूँछ्यो, “कई थूँ यहूदियाँ को राजा हे?”

34ईसू वींने क्यो, “कई थाँ आ बात आपणाँ आड़ीऊँ केवो हो कन दूजाँ जणा मारा बारा में थाँने की हे?”

35पिलातुस क्यो, “कई मूँ यहूदी हूँ? थाराईस यहूदी मनकाँ अन मुक्य याजकाँ थने मारा हात में हूँप्यो हे। थें अस्यो कई किदो हे?”

36ईसू वींने क्यो, “मारो राज ईं दनियाँ को ने हे। यद्याँ मारो राज ईं दनियाँ को वेतो तो मने मानबावाळा लड़ता के, मूँ यहूदियाँ का हाताँ में हूँप्यो ने जाऊँ। पण मारो राज अटा को ने हे।”

37पिलातुस वींने क्यो, “तो कई थूँ राजा हे?” ईसू वींने क्यो, “थूँ केवे हे के, मूँ राजा हूँ। में ईं वाते जनम लिदो अन ईं वाते दनियाँ में आयो हूँ के, हाँच की गवई दूँ अन ज्यो कुई हाँचो हे, वो मारो बचन हुणे हे।”

38पिलातुस वींने क्यो, “हाँच कई हे?” ओ केन वो पाछो यहूदी मनकाँ का नके ग्यो अन वाँने क्यो, “मूँ तो वींका में कई दोस ने पावूँ हूँ।

39पण, थाँकी आ रीत हे के, मूँ फसे का तेवार पे थाँका वाते कणी एक केदी ने छोड़ दूँ। ईं वाते थाँ छावो, तो मूँ अणी ‘यहूदियाँ का राजा’ ने छोड़ दूँ?”

40तद्याँ वणा कल्ड़ो हाको करन क्यो, “ईंने मती छोड़ो, पण माकाँ वाते बरब्बा ने छोड़ दो।” बरब्बा एक दंगो करबावाळो हो।

← Chapter 17 Jump to: Chapter 19 →