John 8

mewari

2अन आगले दन भाग-फाट्याँ पाच्छा मन्दर की चोकी में आया अन हारई लोग-बाग वाँका नके आया जद्याँ वीं बेटन वाँने हिकबा लागा।

3तद्याँ नेमा ने हिकाबावाळा अन फरीसी लोग कुकरम में पकड़ाणी तकी एक लुगई ने वटे लाया अन वींने हाराई का बचमें ऊबी कर दिदी।

4अन वणा ईसुऊँ क्यो, “हो गरुजी, या लुगई कुकरम करती तकी पकड़ागी हे।

5मूसा का नेम माने आग्या देवे हे के, अस्यी लुगई ने भाटा ठोकन मार देणी छावे। तो ईं वाते थूँ अणी बारा में कई केवे हे?”

6वाँकाणी ईसू की जाँच-परक का वाते या बात किदी, काँके वाँने वींपे दोस लगाबा का वाते कई बात मल जावे। पण ईसू पगा पे बेटन धुळा में आँगळीऊँ कई लिकबा लागो।

7जद्याँ वीं वाँकाऊँ पूँछता रिया, तो वो हुदो ऊबो वेन वाँकाऊँ क्यो, “थाँका मेंऊँ कणी पाप ने किदो वे, वो पेल्याँ ईंके भाटा की ठोको।”

8अन ईसू पाच्छा पगा पे बेटन धुळा में आँगळीऊँ लिकबा लागा।

9तद्याँ या बात हुणन हाराई मनक एक-एक करन पराग्या अन हाराऊँ पेल्याँ भूण्डा मनक ग्या अन आकरी में वटे लुगई अन ईसूइस बच्या।

10पसे ईसू हुदा ऊबा वेन वणीऊँ पूँछ्यो, “वीं हारई कटे ग्या? कई कुई भी थने सजा देबा का वाते ने रक्यो?”

11वणी लुगई वाँकाऊँ क्यो, “हो मालिक कुई ने बच्यो।” तो ईसू वींने क्यो, “मूँ भी थने सजा ने देवूँ हूँ। जा अन अबे पाप मती करज्ये।”

12तद्याँ ईसू फरीसियाऊँ पाछो क्यो, “दनियाँ को उजितो मूँ हूँ, ज्यो मारा नके आई, वीं अंदारा में ने चाली, पण जीवन को उजितो पाई।”

13फरीसी वाँकाऊँ क्यो, “थूँ आपणी गवई खुद देवे हे। ईं वाते थाँरी गवई मानबा जोगी हे।”

14ईसू वाँने क्यो, “मूँ मारी गवई पलई देवूँ, पछे भी मारी गवई मानबा जोगी हे, काँके मूँ जाणूँ हूँ के, मूँ कटाऊँ आयो हूँ अन कटे जाऊँ। पण थाँ ने जाणो हो के, मूँ कटाऊँ आयो हूँ अन कटे जाऊँ।

15थाँ मनकाँ का नेमा ने देकन न्याव करो हो, पण मूँ किंकोई न्याव ने करूँ हूँ।

16अन यद्याँ मूँ न्याव करूँ, तो मारो न्याव हाँचो हे। काँके ईंमें मूँ एकलो ने हूँ, पण मारा हाते मने खन्दाबावाळा परमेसर भी हे।

17अन जस्यान थाँका नेमा में भी लिक्यो हे के, ‘यद्याँ दो जणा एक जस्यी गवई देवे, तो वाँ हाँची हे।’

18एक तो मूँ खुद, खुद की गवई देवूँ हूँ, अन दूँजा मारा बापू मारी गवई देवे हे जणी मने खन्दायो हे।”

19ईंपे वणा वींकाऊँ पूँछ्यो, “थाँरा बापू कटे हे?” ईसू जवाब दिदो, “ने थाँ मने ओळको हो, नेई मारा बापू ने। यद्याँ मने जाणता तो मारा बापू ने भी ओळकता।”

20ईं बाताँ वणी मन्दर के दान-पेटी का भड़े हिक देती दाण क्यो अन कणी भी वींने ने पकड़्यो, काँके वींको टेम आलतरे ने आयो हो।

21ईसू पाछो एक दाण ओरी वाँने क्यो, “मूँ परो जाऊँ अन थाँ मने होदो, पण थाँ खुद का पाप मेंईस मरोगा। जटे मूँ जारियो हूँ, वटे थाँ ने आ सको।”

22ईं वाते यहूदी अदिकारी केबा लागा, “कई वो आपणाँ खुद ने मारबावाळो हे, काँके वो केवे हे के, ‘जटे मूँ जाऊँ, वटे थाँ ने आ सको’?”

23ईंपे ईसू वाँने क्यो, “थाँ ईं धरती का हो पण मूँ ने हूँ, मूँ ऊपरे हरगऊँ आयो हूँ। थाँ अणी दनियाँ का हो, पण मूँ अणी दनियाँ को ने हूँ।

24ईं वाते में थाँकाऊँ क्यो के, थाँ खुद आपणाँ पाप मेंईस मरो, काँके यद्याँ थाँ विस्वास ने केरो के, ‘मूँ वोईस हूँ’ तो थाँ थाँके खुद का पाप मेंईस मरो।”

25वाँकाणी ईसुऊँ पूँछ्यो, “थूँ कूण हे?” ईसू वाँने जवाब दिदो, “मूँ वोईस हूँ ज्यो सरूऊँ थाँने केतो आरियो हूँ।

26थाँका बारा में मने घणी बाताँ करणी हे अन थाँने सजा देबा का वाते भी घणी बाताँ हे पण मने खन्दाबावाळो हाँचो हे अन ज्यो में वणीऊँ हुण्यो हे वोईस मूँ दनियाँ ने केवूँ हूँ।”

27वाँकाणी यो ने हमज पाया के, यो बापू परमेसर का बारा में बतारियो हे।

28ईं वाते ईसू क्यो, “जद्याँ मनक का पूत ऊसो उटायो जाई, तद्याँ थाँ हमज जावो के ‘मूँ कूण हूँ’ अन यो भी जाण जावो के, मूँ मारी ओरुँ कई ने करूँ। पण मूँ ज्यो कई केवूँ हूँ, वस्यानीस केवूँ हूँ, जस्यान मारा बापू मने हिकायो हे।

29जणी मने खन्दायो हे, वो मारे नके हे। वणी मने कदी एकलो ने छोड़्यो, काँके मूँ हमेस्यान वोईस करूँ हूँ, ज्यो वींने भावे हे।”

30ईसू जद्याँ ईं बाताँ केरियो हो, तद्याँ नरई वींपे विस्वास किदो।

31जणा यहूदी मनकाँ वींपे विस्वास किदो, वाँने ईसू क्यो, “यद्याँ थाँ मारा हिक का जस्यान चाल पे अटल रेवो, तो हाचेई मने मानबावाळा बणो।

32थाँ हाँच ने ओळको अन हाँच थाँने आजाद करी।”

33ईं वाते वणा ईसुऊँ पूँछ्यो, “माँ अबराम की बंस हा, माँ कदी भी किंका गुलाम ने रिया। तो थूँ ओ कस्यान के सके हे के, ‘थाँ आजाद वे जावो’?”

34ईसू वाँने क्यो, “मूँ थाँकाऊँ हाँची केवूँ हूँ, ज्यो कुई पाप करे हे, वो पाप को गुलाम हे।

35मालिक का घर में कुई गुलाम हक ने जमा सके हे, पण मालिक का पूत को हमेस्यान हक रेवे हे।

36ईं वाते यद्याँ पूत थाँने आजाद करी, तो थाँ हाचेई आजाद वेवो।

37मूँ जाणूँ हूँ के, थाँ अबराम की बंसज हो। पछे भी थाँ मने मारबा की ताक में रेवो हो, काँके थाँ मारी हिकने ने मानो हो।

38मूँ वोईस बताऊँ हूँ जस्यान मने मारा बापू परमेसर बतायो हे अन थाँ वोईस करो जस्यान थाँ थाँका बापूऊँ हुण्यो हे।”

39वाँकाणी ईसुऊँ क्यो, “माँ अबराम की ओलाद हा।” ईंपे ईसू वाँने क्यो, “यद्याँ थाँ अबराम की ओलाद वेता, तो अबराम के जस्यान काम करता।

40में परमेसरऊँ हूणी तकी हाँची बाताँ थाँने बता दिदी हे, ईं वजेऊँ थाँ मने मारबा का वाते त्यार बेट्या तका हो। पण अबराम तो थाँके जस्यान ने किदो हो।

41थाँ तो थाँका बाप को काम कररिया हो।” वणा ईसुऊँ क्यो, “माँ कूकरमऊँ पेदा ने व्या हा। माँको एकीस बाप हे अन वो परमेसर हे।”

42ईसू वाँने क्यो, “यद्याँ परमेसर थाँको बाप वेतो, तो थाँ माराऊँ भी परेम करता, काँके मूँ परमेसर का आड़ीऊँ आयो हूँ अन अटे हूँ। मूँ मारी मरजीऊँ ने आयो, पण मने वणा खन्दायो हे।

43थाँ मारी हिकने काँ ने हमजो हो? ईंको कारण योईस हे के, थाँ मारी बाताँने ने हुणो हो।

44थाँको बाप तो सेतान हो अन थाँ वींकी मरजी ने पुरी करणा छावो हो। वो तो ठेटऊँ हत्यारो हो। वो कदी भी हाँच का आड़ी ने रियो, काँके वींमें हाँच कोयने हे, जद्याँ वो जूट बोले हे, तो आपणाँ हाव-भाव के तरिया बोले हे। काँके वो जूटो हे अन हरेक जूट को बाप हे।

45पण मूँ हाँच बोलूँ हूँ, ईं वाते थाँ मारा ऊपरे विस्वास ने करो हो।

46थाकामूँ कुई भी मारा पे पाप को दोस ने लगा सके हे? यद्याँ मूँ हाँच बोलूँ हूँ, तो थाँ मारा पे विस्वास काँ ने करो हो?

47ज्यो परमेसर को हे, वो परमेसर की बाताँ हुणे हे। थाँ ईं वाते ने हुणो हो, काँके थाँ परमेसर का ने हो।”

48यहूदी मनकाँ ईसू ने पूँछ्यो, “कई माँको यो केणो सई ने के, थूँ सामरी हे अन थाँरा में हुगली आत्मा धस्यी तकी हे?”

49ईसू वाँने क्यो, “मारा में हुगली आत्मा कोयने हे। मूँ मारा बाप ने मान देवूँ हूँ। अन थाँ मारी बेजती करो हो।

50मूँ मारा खुद को मान ने छावूँ हूँ। पण एक हे ज्यो मारो मान छावे हे, अन वोईस न्याव भी करे हे।

51मूँ थाँने हाचेई केवूँ हूँ, यद्याँ कुई मारी हिक को पालण करी, तो वो कदी ने मरी।”

52ईंपे यहूदी नेता वाँने क्यो, “अबे माँने पको विस्वास वेग्यो हे के, थाँरा में हुगली आत्मा धस्यी तकी हे। अबराम अन परमेसर का आड़ीऊँ बोलबावाळा तो मरग्या, पण थूँ केवे हे के, ‘यद्याँ कुई मारी हिक ने मानी, तो वो कदी ने मरी।’

53कई थूँ माकाँ बड़ाबा अबरामऊँ भी मोटो हे? वो तो मरग्यो अन परमेसर का आड़ीऊँ बोलबावाळा भी मरग्या। तो पछे थूँ आपणाँ खुद ने कई हमजे हे?”

54ईसू वाँने क्यो, “यद्याँ मूँ खुद को मान करतो, तो वो मान कई ने हे। पण मने मान देबावाळो मारो बाप हे, जिंने थाँ थाँको परमेसर केवो हो।

55थाँ वींने ने जाणो हो, पण मूँ वींने जाणूँ हूँ। यद्याँ मूँ केतो के, मूँ वींने ने जाणतो, तो मूँ थाँका जस्यान जूट बोलवावाळो जूटो ठेरतो। पण मूँ वींने जाणूँ हूँ अन वींका बचना को पालण करूँ हूँ।

56थाँका बापू अबराम यो जाणन खुस व्या के, वो मारे आबा को दन देकी अन वणी वो देक्यो अन राजी व्यो।”

57पछे यहूदी नेता वाँकाऊ क्यो, “अबार तईं थाँ पचा वर का भी ने व्या अन थें अबराम ने कस्यान देक लिदो?”

58ईसू वाँकाऊँ क्यो, “मूँ थाँकाऊँ हाचेई केऊँ हूँ के, अबराम का जनम लेबा के, पेल्याँऊँ मूँ मोजुद हूँ।”

59ईं बात पे वणा ईसू ने मारबा के वाते भाटा हाताँ में ले लिदा, पण वो छानेकूँ मन्दरऊँ बारणे निकलग्यो।

← Chapter 7 Jump to: Chapter 9 →