John 5

mewari

1अणा हारी बाताँ का पछे यहूदी लोग-बागाँ का एक धारमिक तेवार में ईसू यरूसलेम ग्या।

2यरूसलेम में भेड़ फाटक के नके एक कुण्ड हो, जिंने इबरानी भासा में “बेतसेदा” केता हो अन वींके च्यारूँमेर पाँच टापरियाँ बणी तकी ही।

3जणामें नरई माँदा मनक ज्यामें आन्दा, लंगड़ा अन लकवा मारिया तका मनक पड़्या रेता हा।

5वटे एक मनक हो, ज्यो अड़तीस वराऊँ मांदो हो, वो वटेईस पड़्यो तको हो।

6ईसू वींने वटे पड़्या तको देकन अन ओ जाणन के, वो घणा दनाऊँ अणी दसा में हे। तो ईसू वींने क्यो, “कई थूँ हव वेणो छावे हे?”

7वीं मांदे मनक वाँने जवाब दिदो के, “हो हुकम, मारा नके कुई मनक ने हे के, जद्याँ पाणी हलायो जावे, तो मने कुण्ड में उतारे, पण मारे उतरता-उतरता दूजाँ माराऊँ पेल्या उतर जावे हे।”

8ईसू वींने क्यो, “उठ, आपणो माचो उठा अन चाल-फर।”

9अन वो मनक तरत हव वेग्यो, अन आपणो कुतल्यो उठान चालबा-फरबा लागो। यो दन सबत को दन हो।

10ईं वाते यहूदी अदिकारी मनकाँ ज्यो मांदकीऊँ हव किदो ग्यो हो। वींने केबा लागा के, “थाँरो कुतल्यो उठाणो ठीक ने हे, यो आपणाँ नेमा का खिलाप हे, काँके आज सबत को दन हे।”

11ईंपे वणी वाँने जवाब दिदो के, “जणी मने हव किदो, वणी मने क्यो, ‘आपणो वसाणो उठा अन चाल-फर।’”

12तो मनकाँ वींने पूँछ्यो, “वो कूण मनक हे जणी थने क्यो, ‘वसाणो उठान चाल-फर’?”

13पण वो ज्यो हव वेग्यो हो, वो ने जाणतो हो के, “वो कूण हे।” काँके वणी जगाँ नरई भीड़ वेबाऊँ ईसू पराग्या हा।

14अणा हारी बाताँ के पछे वो मनक ईसू ने मन्दर में मल्यो, जद्याँ ईसू वींने क्यो, “देक, अबे थूँ हव वेग्यो हे, अबे पाछो थूँ पाप मती करज्ये, अस्यान ने वे कुई मोटी आपत थारे गळा में पड़ जावे।”

15पछे वो मनक परोग्यो अन जान यहूदी अदिकारी मनकाऊँ के दिदो के, “जणी मने हव किदो हे, वो ईसू हे।”

16ईं वाते यहूदी मनक वाँने हताबा लागा, काँके ईसू यो काम आराम का दन में किदो हो।

17ईं वाते ईसू वाँकाऊँ क्यो के, “मारो बाप कदी भी काम करतो तको ने रके हे, ईं वाते मूँ भी काम करतो रूँ हूँ।”

18या बात यहूदी अदिकारियाँ ने घणी अकरगी अन वीं ईसू ने मारबा का ओरी हेला मोका होदबा लागा। काँके ईसू बेस सबद का नेम नेईस ने तोड़्यो, पण परमेसर ने आपणो बाप बतान खुद ने परमेसर का बराबर कर दिदो।

19ईं बात पे ईसू वाँने क्यो, “मूँ थाँने सई–सई केवूँ हूँ, मूँ, बेटो, खुद कई ने कर सके हे, मूँ बेस वोईस करूँ हे, ज्यो बापू परमेसर ने करता तका देकूँ हे। काँके परमेसर ज्यो कई करे हे। मूँ भी वस्यानीस करूँ हूँ।

20काँके परमेसर माराऊँ लाड़ राके हे अन ज्यो ज्यो काम वो खुद करे हे, वीं हाराई मने बतावे हे अन वो अणीऊँ भी मोटा-मोटा ने मने करबा का वाते देई। तद्याँ थाँ देकन अचम्बो करो।

21जस्यान परमेसर मरिया तका ने उठान जिवावे हे, वस्यानीस मूँ बेटो भी ज्याँने छाऊँ हे, वाँने जीवावूँ हूँ।

22अन परमेसर किंको भी न्याव ने करे हे, पण न्याव करबा को हारोई काम मने हूँप दिदो हे।

23ईं वाते हाराई लोग-बाग जस्यान परमेसर को आदर-मान करे हे वस्यानीस मारो भी आदर-मान केरी। ज्यो मारो आदर-मान ने करे हे, वीं वणा परमेसर को भी आदर-मान ने करी, जणा मने खन्दायो हे।

24“मूँ थाँने सई-सई केवूँ हूँ, ज्यो मारा बचनाँ ने हुणन मारा खन्दाबावाळा को विस्वास करे हे, वो अनंत जीवन पावे हे। अन वाँने दण्ड ने दिदो जाई, पण वीं मोतऊँ छेटी वेन जीवन में परवेस करग्या हे।

25मूँ थाँकाऊँ सई-सई केवूँ हूँ, वो टेम आरियो हे, अन अबाणू भी हे, जीं मरिया तका हा, वीं परमेसर का बेटा का बचन हूणी अन ज्यो हूणी, वीं जीवता वे जाई।

26काँके जस्यान बापू परमेसर आपणाँ खुद में जीवन राक मेल्यो हे, वस्यानीस वणा मने ओ हक दिदो हे के, मूँ भी आपणाँ खुद में जीवन राकूँ।

27पण मने न्याव करबा को भी हक दिदो ग्यो हे काँके मूँ, मनक को पूत हूँ।

28“ईंपे थाँ अचम्बो मती करो, काँके वाँ टेम आरी हे के, ज्यो भी कबराँ में हे, वीं मारा बचन हूणी,

29अन कबराऊँ बारणे आ जाई। जणा भलई किदी हे वीं जीवन का वाते मरिया तकाऊँ पाच्छा जीवता वे जाई। जणा बुरई किदी हे, वीं दण्ड पाबा का वाते जीवता वे जाई।

30“मूँ आपणाँ खुद का हकऊँ कई भी ने कर सकूँ हूँ, ज्यो परमेसरऊँ हूणूँ हूँ, वींके जस्यानीस न्याव करूँ हूँ। अन मारो न्याव हाँचो हे, काँके मूँ मारी मरजी ने कोयने, पण मारा खन्दाबावाळा की मरजी ने पुरी करूँ हूँ।

31“यद्याँ मूँ खुद मारी गवई दूँ, तो वाँ मानबा जोगी ने वेई।

32मूँ ने पण कुई ओरी हे ज्यो मारी गवई देवे हे अन मूँ जाणूँ हूँ के, ज्याँ वो गवई देवे हे, वाँ हाँची हे।

33थाँ आपणाँ मनकाँ ने यहुन्ना का नके पूछबा का वाते खन्दाया हा, तद्याँ वणी हाँच की गवई दिदी।

34में या बात ईं वाते ने क्यो के, मनक बारा में गवई देवे, पण ईं वाते क्यो, ताँके थाँ बंचाया जावो।

35यहुन्नो तो वीं दिवा का जस्यान हो ज्यो बळतो अन उजितो देतो रेवे हे अन थाँ वींका उजिता को थोड़ाक टेम तईं मजो लेणा छावता हा।

36पण मारा नके एक ओरी गवा हे जिंकी गवई यहुन्ना की गवईऊँ मोटी हे काँके परमेसर ज्यो काम पूरो करबा के वाते मने हुप्यो हे, मूँ वाँका काम ने कररियो हूँ अन वीं कामइस मारी गवई हे के, परमेसर मने खन्दायो हे।

37परमेसर जणा मने खन्दायो हे, वीं भी मारी गवई देवे हे। थाँकाणी वाँकी वाणी कदी भी ने हूणी अन ने थाँ वींने देक्यो हे।

38अन नेई खुद का मन में वाँका बचन राको हो, काँके थाँ वींपे विस्वास ने करो हो, जिंने परमेसर खन्दायो हे।

39थाँ सास्तरा की किताब में होदो हो, काँके थाँ हमज्यो हो के, थाँने वींमें अनंत जीवन मले हे। पण ईं हाराई सास्तर भी मारी गवई देवे हे।

40पछे भी थाँ अनंत जीवन पाबा का वाते मारा नके ने आणा छावो हो।

41“मूँ मनकाँ का मुण्डाऊँ किदी तकी बड़ई ने छावूँ हूँ।

42काँके मूँ थाँने ओळकूँ हूँ के, थाँ कणी तरिया का मनक हो। थाँकामें परमेसर को परेम कोयने हे।

43मूँ मारा बापू परमेसर का हकऊँ आयो हूँ, तद्याँ भी थाँ मने ने मानो हो। पण यद्याँ कुई दूजो आपणाँ खुद का नामऊँ आवे, तो थाँ वींने मान लेवो हो।

44थाँ ज्यो एक-दूजाऊँ मान छावो हो अन वो मानज्यो खाली परमेसर का आड़ीऊँ मले हे, वींकी थाँने कई परवा ने हे। तो थाँ मारा पे कस्यान विस्वास कर सको हो?

45यो मती हमज्यो के, मूँ मारा बापू परमेसर का हामे थाँका ऊपरे दोस लगाऊँ। थाँका पे दोस लगाबावाळो तो मूसो हे, जिंपे थाँ आस लगा मेली ही।

46यद्याँ थाँ हाँची में मूसा को विस्वास करता, तो मारो भी विस्वास करता, काँके वणी मारा बारा मेंईस लिक्यो हे।

47पण यद्याँ थाँ वणी ज्यो लिक्यो हे वींपे भी विस्वास ने करो हो तो पछे मारी बाताँ पे कस्यान विस्वास करो?”

← Chapter 4 Jump to: Chapter 6 →