John 21

mewari

← Chapter 20 Jump to:

1अणा बाताँ का केड़े ईसू खुद तिबिरियस नाम का समन्द का कनारे आपणाँ चेला के हामे परगट व्या अन आ बात अस्यान वीं।

2समोन पतरस अन थोमो, ज्यो दिदुमस नामऊँ जाण्यो जातो हो अन गलील के काना नगर को नतनएल अन जब्दी का छोरा की लारे वाँका चेलाऊँ दो जणा ओरी हा।

3समोन पतरस वाँकाऊँ क्यो, “मूँ माछळ्याँ पकड़बा ने जारियो हूँ।” तो वणा वींने क्यो, “माँ भी थाँरा हाते आवा।” तो वीं नाव में चड़ग्या पण, वणी रात वीं एक भी माछळी ने पकड़ सक्या।

4भाग-फाट्याँईं ईसू कनारा पे आन ऊबा वेग्या हा, तुई चेला वाँने ने ओळक्या के, ईं ईसू हे।

5तद्याँ ईसू वाँकाऊँ क्यो, “ओ भायाँ, थाँका नके माछळ्याँ हे कई?” वाँकाणी क्यो, “कोयने।”

6तो ईसू वाँकाऊँ क्यो, “नाव की जीमणा पाल्डे जाळ नाको तो पावो।” ईं वाते वाँकाणी जाळ नाक्यो, अन हेली माछळ्याँ वेबाऊँ जाळ खेंच ने सक्या।

7तद्याँ वणी चेले ज्यो लाड़लो हो पतरसऊँ क्यो, “ईं तो परबू हे।” समोन पतरस यो हुणन के, वो परबू हे, कमर में हसताड़ो बांद दिदो, काँके वणी काम करबा का वाते उपरला गाबा खोल मेल्या हा। अन पाणी में कुद ग्यो, ताँके जट कनारे पे जा सके।

8तो दूजाँ चेला वींका पाच्छे नाव में माछळयाऊँ भरी तकी जाळ खेंचता तका आया, काँके वीं कनारे हेला छेटी ने हा, वीं हो गज छेटी हा।

9जदी वीं कनारा पे आया तो वणा खीरा पे माछळी अन रोट्याँ मेली तकी देकी।

10ईसू वाँने क्यो, “ज्यो माछळी थाँ अबाणू पकड़ी हे, वाँका मेंऊँ थोड़ीक लावो।”

11तो समोन पतरस नाव पे चढन एक हो तिरेपन मोटी माछळयाऊँ भरियो तको जाळ कनारा पे खेंच्यो, अन अतरी माछळ्याँ ही तद्याँ भी जाळ ने फाटी।

12ईसू वाँकाऊँ क्यो, “आवो, रोटी खावो,” चेला मेंऊँ किंनेई हिम्मत ने वी के, वाँकाऊँ पूछे, “थाँ कूण हो?” काँके वीं जाणता हा के, ईं परबुइस हे।

13तद्याँ ईसू आगे आया अन रोट्याँ लेन वाँने दिदी अन वस्यानीस माछळ्याँ भी दिदी।

14यो तीजी दाण हो के, ईसू मरिया तका मेंऊँ पाच्छा जीं उठबा के केड़े चेला ने दरसण दिदा।

15जीमणा के पछे ईसू समोन पतरसऊँ पूँछ्यो, “ए समोन, यहुन्ना का बेटा, कई थूँ अणाऊँ हेलो परेम माराऊँ राके हे?” वणी वाँने क्यो, “हाँ, परबू जी, थाँ तो जाणो हो के, मूँ थाँकाऊँ कतरोक परेम राकूँ हूँ?” ईसू वींने क्यो, “मारा उन्याँ ने चरा।”

16वाँकाणी पाछो दूजी दाण वींने क्यो, “ए समोन, यहुन्ना का बेटा। कई थूँ माराऊँ परेम करे हे?” पतरस वाँने क्यो, “हाँ परबू, थाँ जाणो हो के, मूँ थाँकाऊँ कतरोक परेम करूँ हूँ?” वणा वींने क्यो, “थूँ मारा गारा की रुकाळी कर।”

17ईसू तीजी दाण क्यो, “ए समोन, यहुन्ना का बेटा, कई थूँ माराऊँ परेम राके हे?” तो पतरस दकी वेग्यो के, वाँकाणी वींने तीजी दाण अस्यान काँ क्यो, “कई थूँ माराऊँ परेम राके हे?” अन वाँने क्यो, “ओ परबू, थाँ तो सब जाणो हो। थाँ ओ भी जाणो हो के, मूँ थाँकाऊँ परेम करूँ हूँ।” ईसू वींने क्यो, “मारा गारा ने चरा।

18मूँ थाँराऊँ सई-सई केवूँ हूँ, जद्याँ थूँ मोट्यार हो। तो जटे जाणो छातो हो, वटे जातो। पण, जदी थूँ डोकरो वेई। तो आपणाँ हात ऊँचा केरी अन दूज्यो थने बाँदन जटे थूँ ने जई वटे ले जई।”

19वणा अणा बाताँऊँ इसारो किदो के, पतरस कस्यी मोतऊँ परमेसर की बड़ई करी। तद्याँ ईसू वणीऊँ क्यो, “मारा पाच्छे वेजा।”

20पतरस पाछो फरन वीं चेला ने पाच्छे आतो तको देक्यो। ज्यो लाड़लो केवातो हो। यो वोईस जणी जीमबा की टेम वाँके कान्दड़ा नके मुण्डो करन पूँछ्यो, “हो परबू, थाँने धोकाऊँ पकड़बावाळो कूण हे?”

21वींने देकन पतरस ईसुऊँ क्यो, “ओ परबू, ईंको कई हाल वेई?”

22ईसू वींने क्यो, “यद्याँ मूँ छावूँ के, वो मारे पाछो आबा तईं जीवी, तो थाँरे अणीऊँ कई हे? थूँ तो मारा पाच्छे वेजा।”

23ईं वाते चेला में या बात फेलगी के, वो चेलो ने मरी। ईसू वींने ओ ने क्यो हो के, वो ने मरी। पण ओ क्यो के, “यद्याँ मूँ छावूँ के, वो मारे आबा तईं जीवी, तो थाँरे अणीऊँ कई हे?”

24यो वोईस चेलो हे। ज्यो अणा बाताँ की गवई देवे अन जणी अणा बाताँ ने लिकी हे अन आपाँ जाणा हाँ के, वाँकी गवई हाँची हे।

25ओरी भी नरई काम हे। ज्याँने ईसू किदा हे। यद्याँ वीं हाराई लिक्या जाता, तो मूँ हमजूँ हूँ के, ज्या किताबाँ लिकी जाती वाँ ईं दनियाँ में भी ने माती।

← Chapter 20 Jump to: