1 Peter 5

Marwari Bible

← Chapter 4 Jump to:

1थौरे में जिकौ पुरनिये है, म्हैं उणरी तरैह पुरनिये अर मसीह रै दुखौ रौ गवाई अर परगट होणवाळी महिमा में सहभागी होयनै उणनै ओ समझा रियौ हूं,

2की परमेसर रै लोगां नै, जिकौ थौरे बीच में है रूखाळी करौ। अर ओ दबाव ऊं कोनीं, पण परमेसर री इछा रै अनुसार आंणंद ऊं, अर नीच-कमाई रै लियै नीं, पण मन लगायनै ओ कांम करौ।

3अर जिकौ लोग थनै सूंपया है, उण माथै हक नीं जताणौ, बल्कि लोगां रै लियै सिकसा देवणवाळा बणौ।

4अर जद परधान रूखाळौ परगट होवैला, तो थांनै महिमा रौ मुगट दियौ जावैला, जिकौ उणरी सौभा कम नीं होवैला।

5हे जवानो, इण तरैह थै भी पुरनियो रै अधीन रैवौ, बल्कि थै सगळा रा सगळा एक दूजै री सेवा रै लियै दीनता ऊं कमर बांधनै रैवौ, क्यूंकै “परमेसर घमंडियो रौ विरोध करै है, पण दीनो माथै अनुग्रह करै है।”

6इण वास्तै परमेसर रै ताकतवर हाथो रै नीचे दीनता ऊं रैवौ, जिण ऊं वो थांनै सही वगत माथै बढ़ावैला।

7अर अपणी सगळी चिंता उण ऊपर घाल दो, क्यूंकै उणनै थौरो ध्यांन है।

8सावचेत हो, अर जागता रैवौ, क्यूंकै थौरो विरोधी सैतान दहाड़ने वाळै सिंघ री ज्यूं इण ताक में रैवै है, की कीण नै फाड़नै खाऊं।

9थां विसवास मांय मजबुत होयनै, उणरौ सामनो करौ। क्यूंकै थै तो जांणौ ही हो की थौरे भाई-बेन जिकौ संसार मांय है, ऐड़ौ ही दुख भुगत रिया है।

10अबै परमेसर जिकौ सगळै अनुग्रह रौ दाता है, जिणै थांनै मसीह में अपणी अनत महिमा रै लियै बोलाया, थौरे थोड़ी जेज तांई दुख उठाणै रै पछै आप इज थांनै सिद्ध अर मजबुत अर ताकतवर करैला।

11परमेसर रौ राज युगानयुग रैवै। आमीन।

12म्हैं सिलवानुस रै हाथ, जिणनै म्हैं विसवास लायक भाई समझ रियौ हूं, छोटे रूप में लिखनै थांनै समझाया है अर आ गवाई दी है की परमेसर रौ साचौ अनुग्रह ओहीज है। इण मांय मजबुत रैवौ।

13बेबिलोन री कलीसिया जिकौ थौरे ज्यूं परमेसर रै चुणयोड़ा लोग है, वो अर मसीह में म्हारै बेटे ज्यूं मरकुस थांनै नमस्कार कैवै है।

14परैम ऊं हाथ जौड़ने एक दूजै नै नमस्कार करौ। थांनै सगळौ नै जिकौ मसीह मे हो सानति मिळती रैवै।

← Chapter 4 Jump to: